Yika Yakulingiwa Kuli Mutu Nyi Hafwa?

Shina hiunafwisa kama mutu yoze te wazanga chinji? Muze unanenganyana muhasa kulihula ngwe: ‘Yika yakulingiwa kuli mutu nyi hafwa? Shina mutukalimona cheka nawa ni waze hanafu?’ Ha longeso lino ni lize mulihataho, mumona makumbululo apema a mu Mbimbiliya hakutwala ku yihula yino.

1. Yika yakulingiwa kuli mutu nyi hafwa?

Yesu katesele kufwa ni tulo. Nyi mutu kali mu tulo keshi kunyingika yuma yize yinalingiwa haze. Kuchi kufwa chalifwa ni tulo? Mutu nyi hafwa, keshi kwivwa yikola, keshi kulivwa ukawenyi, chipwe ngwe te kakuzanga chinji masepa ni asoko jenyi. Mbimbiliya yinambe ngwo: “Afu kanyingikine nichimwe.”—Tanga Chilumbununyi 9:5.

2. Kuchi mutuhasa kuyuka ha kunyingika umwenemwene hakutwala ku kufwa?

Atu anji kakwivwa woma wa kufwa hanji kuvwila afu woma. Alioze muwahilila chinji ha kunyingika umwenemwene wa mu Mbimbiliya hakutwala ku kufwa. Yesu kambile ngwenyi: “Umwenemwene kumuukanutusula.” (Yoano 8:32) Mayingeleja amwe kakulongesa ngwo, mutu kakwete alma yize yakununga ni mwono muze akufwa. Mbimbiliya kuyishi kulongesa chocho. Yakwamba ngwo, mufu keshi kumona lamba. Chikwo nawa, amu afu kanyingikine nichimwe, o kechi kuhasa kutulinga upi niumwe. Kashika kutwatambile kwawayila hanji kwalingila yuma yimwe mumu lia woma wa kutulinga upi.

Atu amwe kakwamba ngwo, mahasa kuhanjika ni afu. Alioze, niumwe yoze mahasa kuhanjika ni afu wakuhi. Ngwe chize twamona, “afu kanyingikine nichimwe.” Atu waze akunyonga ngwe kakuhanjika ni afu, kakuchilinga mumu kanyingikine ngwo kakuhanjika ni andemoniu waze akusoloka ngwe afu. Alioze kunyingika umwenemwene hakutwala kuli afu, chakutufunga kuli andemoniu. Yehova kakututoweza hakutwala ku chikuma cha kuhanjika ni afu, mumu kananyingika ngwenyi kuhanjika ni andemoniu muchitusa mu ponde.—Tanga Shimbi Yamuchiali 18:10-12.

3. Nyingika umwenemwene hakutwala kuli afu

Hashi heswe, atu kakufuliela ha malongeso alisa hakutwala ku yize yakulingiwa muze mutu akufwa. Alioze malongeso jacho, amwe kali a mahuza.

• Ku chihela kuze watwama, yuma yika yize atu akufuliela chinji hakutwala kuli afu?

CHINEMA: Yika Yakulingiwa Kuli Mutu Nyi Mafwa?—Chinema chikehe (1:19)

Tanga Chilumbununyi 3:20, mba nushimutwine yihula yino:

• Kulita ni versu yino, yika yakulingiwa kuli mutu nyi mafwa?

• Shina kuli chuma chimwe chize chakununga ni mwono muze mutu akufwa?

Mbimbiliya yakuhanjika hakutwala ku kufwa cha Lazaru, sepa lia Yesu. Muze mutanga Yoano 11:11-14, tala yize Yesu ambile hakutwala kuli Lazaru, mba nushimutwine yihula yino:

• Ni yika Yesu atesele kufwa?

• Kuchi chino chinatukwase kunyingika yize yakulingiwa kuli mutu nyi hafwa?

• Kuchi wakwivwa ha yize Mbimbiliya yakwamba hakutwala ku kufwa?

4. Umwenemwene hakutwala ku kufwa wakutuyukisa

Kunyingika umwenemwene hakutwala ku kufwa, chakutukwasa tuhone kwivwa woma wa afu. Tanga Chilumbununyi 9:10, mba nushimutwine chihula chino:

• Shina afu mahasa kutulinga upi?

Umwenemwene wa mu Mbimbiliya wakutukwasa kunyingika mahuza hakutwala ku malongeso akwamba ngwo, atu katamba kuwayila afu. Tanga Izaia 8:19 ni Usolwelo 4:11, mba nushimutwine chihula chino:

• Ku nyonga lie, kuchi Yehova akwivwa hakumona atu mawayila afu hanji kweseka kufupa ukwaso wo?

5. Umwenemwene hakutwala ku kufwa wakututakamisa

Atu anji kakwalongesa ngwo, muze makafwa makaamwesa lamba ha yuma yipi yize alingile. Alioze chili kuyuka chinene kunyingika ngwetu atu keshi kumona lamba muze akufwa chipwe ngwe kalingile yuma yipi. Tanga A-Roma 6:7, mba nushimutwine chihula chino:

• Mbimbiliya yakulongesa ngwo, muze mutu akufwa kakutusuka ku shili yenyi. Ku nyonga lie, shina mutu yoze wafwa kakumona lamba mumu lia yuma yipi yize alingile?

Nyi mutunyingika kanawa Yehova, mutumona ngwetu iye kali Zambi yoze keshi kumwesa afu lamba. Tanga Shimbi Yamuchiali 32:4 ni 1 Yoano 4:8, mba nushimutwine yihula yino:

• Kulita ni yisoneko twatanga, shina Zambi yoze ukwete yitanga yipema kakumwesa afu lamba?

• Ku nyonga lie, shina umwenemwene hakutwala kuli afu muuhasa kututakamisa? Mumu liaka?

YIZE WALILONGESA

Muze mutu akufwa, mwono wenyi wakusula. Afu keshi kumona lamba, chipwe kutulinga upi niumwe.

Kuhitulula

• Yika yakulingiwa kuli mutu nyi hafwa?

• Kuchi umwenemwene hakutwala ku kufwa wakutuyukisa?

• Kuchi umwenemwene hakutwala ku kufwa wakututakamisa?

HENGWOLA NAWA

Tala yize liji “alma” linalumbunuka kulita ni Mbimbiliya.

“Alma Yika Yinalumbunuka?” (Lusango wa ha internet)

Nyingika nyi Zambi kakuzachisa chitende cha kahia hanga amwese atu api lamba.

Shina Chitende cha Kahia Kuchatwama ko Lume? (3:07)

Shina twatamba kuvwila afu woma?

Espíritos dos Mortos—Ajudam? Ou Prejudicam? Existem Realmente? (kamukanda)

Nyingika chize umwe lunga awanyine utakamiso ha kunyingika umwenemwene hakutwala kuli afu.

“Ngunakawahilila Chinji ha Ungunu wa Mbimbiliya ni Kumbululo Liamo” (Kaposhi wa Kutalila 1 wa Fevereiro, 2015)