Shina Kuli Kutalatala Cha Afu?

KUMBULULO LIA MBIMBILIYA: “Ola muyiza, muze waze eswe ali mu mafuka makevwa liji lienyi [Yesu], makatuhuka”​—Yoano 5:28, 29.

Yesu kambile ngwenyi kulutwe lia matangwa, mu Wanangana wenyi, Mafuka eswe makasala awashi. Fernando yoze avuluka mu mutwe uze wapalika yamba ngwenyi: “Nakomokene chinji ha tangwa litangu lize natangile, Yoano 5:28, 29. Chino changwehele kutalatala cha umwenemwene, nawa yinguputuka kupwa ni nyonga lingunu hakutwala ku kutalatala cha kulutwe lia matangwa.”

Kushakulu, Yombi umwe lunga washishika kapwile ni ushindakenyo ngwenyi nyi mafwa, Zambi makamuhindwisa. Aye yahula ngwenyi: “Nyi mutu mafwa matwama nawa ni mwono?” Yakumbulula chihula chino ni ufulielo weswe ngwenyi: Matangwa eswe a uvumbiko wami [mashimbu waze mapwa Mufuka] te mungutwaminyina, ndo mangwalumuna. Musanyika mba mungukumbulula; muwivwa usona ha chitanga cha moko je.”​—Yombi 14:14, 15.

Uhindukilo wakapwile chuma chaha kuli Marta pangi ya Lazaru. Muze Lazaru afwile, Yesu yamba kuli Marta ngwenyi: “Ndumbwe kumakahinduka.” Marta yakumbulula ngwenyi: “Ngunanyingika makahinduka ha uhindukilo wa tangwa lia kusula.” Mba Yesu yamba kuli iye ngwenyi: “We uhindukilo ni we mwono yami. Yoze mangufuliela chipwe mafwa, hindu kumakapwa ni mwono.” (Yoano 11:23-25) Hohene Yesu yahindwisa Lazaru ku ufwe! Sango jino jipema, jakusolola yuma yinene-yinene yize muyikalingiwa kulutwe lia matangwa. Achinyonga kama chiseke chize uhindukilo muukaneha hashi heswe!

Liji lia Zambi liakusolola ngwo uhindukilo wa Yesu walisa ni uhindukilo nake uze uli mu Mbimbiliya. Atu jacho nake waze ahindwishile nihindu kanungine ni kutwama hano hashi. Alioze uhindukilo wa Yesu tunatange ngwenyi: “Yesu Kristu . . . kwali ku kwoko lia chindume lia Zambi, se hanayi mwilu.” (1 Petulu 3:21, 22) Shina Yesu wika mwe unakahinduka ni kuya mu malilu? Yesu kaliangile kulweza apostolo jenyi ngwenyi: ‘Nyi kachi munguya mukunululikila chihela, kachi mungwiza cheka nawa, mungukanutambula kuli yami mwene: hanga kuze yami nguli, kuzekwene ni yenu nawa nukapwe.’​—Yoano 14:3.

Kristu kayile mu malilu ni kululiekela amwe tumbaji twenyi chihela. Waze ali ni kutalatala cha kuya mu malilu kali unji wa 144,000. (Usolwelo 14:1, 3) Mba tumbaji jacho mulimo uka makalinga muze mu malilu?

Ayo makalinga mulimo unji! Mbimbiliya yinatulweze ngwo: “Kawaha kanda musandu yoze uli ni chihanda mu uhindukilo utangu. Hali wano kufwa chamuchiali kuchishi chiyulo nichimwe; alioze makapwa asasendote a Zambi ni a Kristu, makayula hamwe nenyi kanunu ka miaka.” (Usolwelo 20:6) Waze makaya mu malilu makayula hashi heswe ngwe mianangana-asasendote hamwe ni Kristu.

KUMBULULO LIA MBIMBILIYA: Mbimbiliya yili ni maliji wano asonekene kuli postolo Paulu ngwenyi: “Ngunafuliela Zambi, yozemwene wano nawa anafuliela ngwami, Kumukukapwa uhindukilo wa akwa ululi ni wa yihenge.”​—Yilinga 24:15.

Aya ali mu chizavu cha atu waze Paulu ambile ngwenyi “akwa ululi”? Tala chilweza chino. Daniele umwe lunga washishika ku songo lia mwono wenyi yamba ngwenyi: “Yena, yako kwe ndo mukukapwa songo; mumu kumukahwima, mba kumukamana kuma kwe ha songo lia matangwa.” (Daniele 12:13) Kulihi Daniele makatwama muze makamuhindwisa? “Akwa ululi kumakazuka chifuchi, kumakatwamamo ku miaka ya mutolo” (Samu 37:29) Nawa Yesu kambile ngwenyi: “Kawaha akwa kushimbika, mumu kumakahinga he hashi.” (Mateu 5:5) Daniele ni malunga ni mapwo akwo ashishika makaahindwisa hanga akatwame nawa ni mwono hano hashi, ku miaka ya mutolo.

Aya ali mu chizavu cha atu waze Paulu avulukile ngwenyi “yihenge”? Ayo kali tununu twa atu waze hanafu, anji akuli ayo muze apwile ni mwono kakapwile ni uhashi wa kulilongesa ni kukaula umwenemwene wa mu Mbimbiliya. Muze makahindwisa, o makapwa ni uhashi wa kunyingika ni kuzanga Yehovaa ni Yesu. (Yoano 17:3) Waze eswe makasakula kuwayila Zambi makapwa ni kutalatala cha mwono wa miaka yinji ngwe uze apwa nawo Yehova​—mwono wa miaka yeswe.

KUMBULULO LIA MBIMBILIYA: Zambi “Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.”(Usolwelo 21:4) “Kumakatunga mazuwo ni kutwamamo; kumakatumba minda ya uva ni kulia ye mihuko yamo.”​—Izaia 65:21.

Achinyonga kutwama hamwe ni atu waze makahindwisa! Alioze chihula chili chino, Kuchi muhasa kunyingika ni ushindakenyo weswe ngwenyi uhindukilo muukalingiwa?