LONGESO 34
Kuchi Mutuhasa Kusolola Zango Lietu Kuli Yehova?
Shina zango lie kuli Yehova hilioka chize haze waputukile kulilongesa Mbimbiliya? Shina unazange kununga ni kukolesa usepa we ni Yehova? Nyi chenacho nyingika ngwe, muze Yehova akumona zango lie hali iye linoko, neye kakukuzanga chinji ni kukufunga. Kuchi muhasa kusolola ngwe wakumuzanga chinji?
1. Kuchi mutuhasa kusolola ngwetu twakuzanga Yehova?
Mutuhasa kusolola ngwetu twakumuzanga ha kumwononokena. (Tanga 1 Yoano 5:3.) Iye keshi kutushinjila hanga tumwononokene. Alioze, kakuhana kuli mutu ni mutu uhashi wa kusakula kumwononokena hanji ka. Mumu liaka? Mumu Yehova kakuzanga hanga eswe ‘amwononokene ni mbunge yeswe.’ (A-Roma 6:17) Mu maliji akwo, iye kazangile hanga umwononokene mumu ngwo watamba kuchilinga, alioze mumu wakumuzanga. Chihanda 3 ni 4 mu mukanda uno, kanakayilulieka hanga yikukwase kusolola zango lie kuli Yehova ha kulinga yuma yize iye akuzanga ni kwehuka yize keshi kuzanga.
2. Mumu liaka muchihasa kupwa chikalu kusolola zango lietu kuli Yehova?
“Mukwa ululi lamba linji akumona.” (Samu 34:19) Tulieswe twakupinda mumu lia uhenge wetu. Twakupinda nawa mumu lia uswale, yuma yipi hanji kapinda mweka-ni-mweka. Muze twakupalika mu yuma yacho, muchihasa kupwa chikalu kulinga yize Yehova akuzanga hanga tulinge. Chino chakulingiwa, mumu muze tuli mu ukalu chakupwa chashi kulinga yuma yipi. Alioze nyi mushishika ni kulinga yize Yehova akukwita, musolola ngwe wamuzanga chinji kuhiana cheswacho chuma. Musolola nawa ngwe, kumana washishika kuli Yehova, ni Yehova neye mashishika kuli yena. Yehova kechi kakuhichika nilimwe tangwa.—Tanga Samu 4:3.
NYINGIKA NAWA
Nyingika mumu liaka kwononoka che chakuvwisa Yehova kuwaha ni yize yatamba kukukwasa kununga ni kushishika kuli iye.
3. Chikuma chize chinakwata hali yena
Kulita ni mukanda wa Yombi, Satana kakalamikijine wika Yombi, alioze kalamikijine atu eswe waze te mazanga kulingila Yehova. Tanga Yombi 1:1, 6–2:10, mba nushimutwine yihula yino:
Kulita ni maliji a Satana, ngwo mumu liaka Yombi apwile ni kwononokena Yehova?—Tala Yombi 1:9-11.
Kuchi Satana alamikijine atu eswe, hamwe ni yena?—Tala Yombi 2:4.
Tanga Yombi 27:5, mba nushimutwine chihula chino:
Kuchi Yombi asolwele ngwenyi kapwile ni kuzanga Yehova?
Yombi kasolwele zango lienyi kuli Yehova ha kununga ni kushishika kuli iye
Ni yetu mutuhasa kusolola zango lietu kuli Yehova ha kununga ni kushishika kuli iye
4. Vwisa Yehova kuwaha
Tanga Yishima 27:11, mba nushimutwine yihula yino:
Kuchi Yehova akwivwa muze wakusolola mana ni kumwononokena? Mumu liaka?
5. Muhasa kushishika kuli Yehova
Zango lietu hali Yehova liakutukwasa kwambujola kuli akwetu hakutwala kuli iye. Kushishika chetu kuli Yehova chakutukwasa kulinga yuma yalita chipwe muze muchikaliwa. Tala CHINEMA, mba nushimutwine yihula yinahateho.
Shina hiunevu kama woma wa kwambujola kuli akwenu hakutwala kuli Yehova?
Kulita ni chinema, yika yakwashile Grayson kukumba woma?
Nyi twazanga yuma yize Yehova akuzanga ni kuvwila lwaji yuma yipi, muchipwa chashi kushishika kuli iye. Tanga Samu 97:10, mba nushimutwine yihula yino:
Kulita ni yize hiwalilongesa, yuma yika yize Yehova akuzanga? Yuma yika yize iye keshi kuzanga?
Kuchi muhasa kulilongesa kuzanga yuma yipema ni kuvwila lwaji yuma yipi?
6. Kwononokena Yehova chakutuyukisa
Kwononokena Yehova chili chuma chize chatutela kulinga. Tanga Izaia 48:17, 18, mba nushimutwine yihula yino:
Ku nyonga lie, shina twatamba lume kufuliela ngwetu Yehova kananyingika yize yakutukwasa kufumbuka ku mwono? Mumu liaka?
Kuchi longeso lie lia Mbimbiliya ni umwenemwene hakutwala kuli Yehova Zambi yinakuyukisa?
ATU AMWE KAKWAMBA NGWO: “Munguhasa kulinga yuma yeswayo munguzanga, Zambi keshi kupala yuma yacho.”
Chisoneko chika muhasa kuzachisa hanga usolole kuli mutu ngwe, yuma yize twakulinga muyihasa kuvwisa Yehova kuwaha hanji yinyengo?
YIZE WALILONGESA
Muhasa kusolola zango lie kuli Yehova ha kumwononokena ni kununga ni kushishika kuli iye chipwe muze yuma ku mwono we muyikala.
Kuhitulula
Yika walilongesa ha chilweza cha Yombi?
Kuchi muhasa kusolola zango lie kuli Yehova?
Yika muyihasa kukukwasa kununga ni kushishika kuli Yehova?
HENGWOLA NAWA
Nyingika chize muhasa kushishika kuli Yehova ni mu chikungulwila.
Nyingika nawa chize Satana alamikijine atu eswe.
“Yombi Kanungine ni Kushishika” (Mbimbiliya-Sango Jika Jatwamamo? Chihanda 6)
Tala chize twanuke no mahasa kusolola zango lio kuli Yehova.
Kuchi kanuke mahasa kushishika kuli Yehova chipwe muze twanuke-ni-akwo mamushinjila kulinga yuma yipi?