Wahilila ha Tachi Jize Unase Hanga Ulingile Yehova!

 1. Mumu liaka Yehova keshi kututesa ni akwetu?

YEHOVA kakuzanga yuma yalisa. Chino chinasoloka zwalala ha yuma yize atangile, kuchingako atu. Hita umwe wa kuli yetu kalisa ni mukwo. Kashika, Yehova kechi keza kakutesa ni atu akwo. Iye kakuhengwola mbunge ye ni kumona yize yilimo. (1 Samue. 16:7) Iye nawa kananyingika yize muhasa kulinga, ulelu we ni chize akulelele. Chikwo nawa, keshi kukwita ulinge yize kuuchi kuhasa. Kashika, tunafupiwa kulimona ngwe chize Yehova akutumona. Hachino, mutupwa ni “mana,” chekwamba, kutuchi kulimona ngwe tuli alemu kuhiana akwetu hanji ngwe kutushi ni ulemu.—Roma 12:3.

 2. Mumu liaka hi chipema ko kulitesa ni akwetu?

² Hi chipi ko kulihulikila ha yilweza yipema ya akwetu. Chakutalilaho, hanji unanyingika umwe ndumbu yoze wa kwambujola kanawa. (Hepre. 13:7) Chino muchihasa kukukwasa kululieka majila akwambulwilamo. (Fwili. 3:17) Alioze, kuli kalisa munene ha kwimbulula umwe mutu ni kulitesa nenyi. Mutu yoze wa kulitesa ni akwo mahasa kupwa ni chipululu, kuhonga hanji kulivwa ngwe keshi ni ulemu. Ngwe chize twamonanga ha mutwe wapalika, kulitesa ni akwetu mu chikungulwila muchihasa kupihisa ufulielo wetu. Kashika Yehova akututoweza ni zango lieswe ngwenyi: “Mutu ni mutu akeseke chitanga chenyi mwene, chocho makapwa ni kulisamba chenyi ha kutwala kuli iye mwene wika, hi ha kutwala ku yuma ya mbala ko.”—Ngala. 6:4.

 3. Yuma yika walinga ku ufulielo yize yinakwehe uwahililo?

³ Yehova kanazange uwahilile ha tachi jize wakusa hanga umulingile. Chakutalilaho, nyi hanakupapachisa, tunakuchichimieka! Chiyulo chino wachikwachile ukawe mumu lia zango lie hali Yehova. Achinyonga nawa ha tachi jize wakusa hanga umulingile ndo musono. Chakutalilaho, shina wakwivwa ngwe zango lie lia kutanga Mbimbiliya ni longeso lie lia wika yinakolo? Kutala unamono ngwe haliapwila unahase kulemba ni mbunge yeswe? (Samu 141:2) Shina haliapwila hiwalulieka kwambujola che nawa unazachisa kanawa yikwata yetu ya kwambujola nayo? Nyi uli ni usoko, kutala unamono ngwe Yehova kanakukwase kupwa lunga, pwo hanji chisemi mupema? Nyi unalingi yimwe ya ku yuma yacho, muhasa kulivwa kanawa ni kuwahilila.

 4. Yika mutulilongesa ha mutwe uno?

⁴ Mutuhasa kukwasa akwetu kuwahilila ha tachi jize anase hanga alingile Yehova. Nawa mutuhasa kwakwasa hanga achine kulitesa ni akwo. Ha mutwe uno, mutumonaho chize yisemi mahasa kukwasa ana jo, chize waze alimbata mahasa kulikwasa umwe ni mukwo ni chize makulwana a mu chikungulwila mahasa kukwasa mandumbu eswe. Kusulaho, mutumonaho chize shimbi ja Mbimbiliya mujihasa kutukwasa kutesa yimwe ku ufulielo kulita ni uhashi ni utotombo wetu.

 5. Kulita ni A-Efwesu 6:4, yika yisemi katambile kulinga?

⁵ Yisemi katamba kukeya hanga achine kutesa mwana ni ana akwo, hanji kumwita hanga alinge yuma yize keshi kuhasa. Yuma ya mutapu au, muyihasa kuvwisa mwana chinyengo. (Tanga A-Efwesu 6:4.) Umwe ndumbu avuluka ngwo Sachikob yamba ngwenyi: “Alongeshi jami ku shikola, kapwile ni kushimbwila hanga ngulinge yuma yinji kuhiana akwetu waze te nakulilongesa no. Chikwo nawa, mama kazangile ngupwe ni mana anji ku shikola hanga nguhane uchela upema kuli longeshi ni kuli tata yoze te hi Chela cha Yehova ko. Kwamba umwenemwene, iye kazangile hanga ngwande nota jipema ha yeseko yeswe, chuma chize te chikalu kuli yami. Chipwe ngwe hikwapalika miaka yinji chize haze nahwishile shikola, ndo musono nakulihula nyi nakuhasa kulingila Yehova kanawa.”

 6. Yika yisemi mahasa kulilongesa ha mukanda wa Samu 131:1, 2?

⁶ Yisemi mahasa kulilongesa chikuma chilemu ha Samu 131:1, 2. (Tanga.) Mwanangana Ndawichi kambile ngwenyi, iye te keshi kufupa ‘yuma yinene-yinene,’ hanji ngwetu yuma yize te keshi kuhasa kulinga. Mumu lia kulikehesa, Ndawichi yahasa ‘kususuminya mbunge yenyi nikuyiholesa.’ Yika yisemi mahasa kulilongesa ha maliji jenyi? Yisemi, pwenu akwa-kulikehesa hi wika ko ha yize munushimbwila hali yenwene, alioze ni ha yize munushimbwila hali ana jenu. Nyingikenu yuma yize mwanenu mahasa kulinga ni yize keshi kuhasa kulinga, nawa mukwasenu hanga atese yimwe ni kuyilinga. Nyi nwachilinga, mwanenu malivwa ngwe kali ni ulemu. Marina, umwe ndumbu wa pwo yamba ngwenyi: “Mama te keshi kungutesa ni mandumbu jami, chipwe ni ana akwo. Iye te kakungulongesa ngwo mutu mweswe kali ni utotombo walisa, nawa ngwo hita mutu kali mulemu kuli Yehova. Mumu lia ukwaso wenyi, yami chishi kulitesa ni akwetu.”

7-8. Kuchi lunga mahasa kusolola ngwo kakulemesa mukwo-pwo?

⁷ Lunga mukwa-Kristu katamba kulemesa mukwo-pwo. (1 Petu. 3:7) Kulemesa mutu chinalumbunuka kumusa vumbi ni kulihulumba hali iye. Chakutalilaho, lunga kakulemesa mukwo-pwo ha kumumona ngwo kali mulemu chinji. Iye keshi kumwita hanga alinge yuma yize keshi kuhasa. Nawa keshi kumutesa ni mapwo akwo. Kuchi pwo malivwa, nyi mukwo-lunga mamutesa ni mapwo akwo? Tutalenu chilweza cha Rosa. Mukwo-lunga, yoze hi Chela cha Yehova ko kakumutesa mashimbu eswe ni mapwo akwo. Maliji jenyi api kapinjishile chinji Rosa, ni kumutwala alivwe ngwe kukushi niumwe yoze wakumuzanga. Iye yamba ngwenyi: “Nakufupiwa mashimbu eswe hanga akwetu angwiwulule ngwo, nguli mulemu kuli Yehova.” Kashika, lunga mukwa-Kristu katamba kulemesa mukwo-pwo. Mumu iye kananyingika ngwenyi, chino chinakwate ha usepa wenyi ni Yehova ni mukwo-pwo.c

⁸ Lunga yoze wakulemesa mukwo-pwo, kakulweza akwo yuma yipema hakutwala kuli iye, kakumuchichimieka ni kumulweza ngwenyi kakumuzanga. (Yishi. 31:28) Yino ye lunga lia Katerina yoze twatongola ha mutwe wapalika alingile, hanga akwase mukwo-pwo kukumba manyonga api. Muze apwile kanuke, Katerina te kakumwamba-mba yuma yipi kuli naye yoze te wakumutesa ni ana mapwo akwo, kuchingako ni masepa jenyi. Hachino, Katerina yaputuka kulitesa ni akwo chipwe muze te hapwa kulu Chela cha Yehova! Alioze mukwo-lunga Chela cha Yehova, yamukwasa hanga eche ndako yino yipi ni kupwa ni nyonga lialita hakutwala kuli iye mwene. Katerina yamba ngwenyi: “Mukwetu-lunga kakunguzanga, kakunguchichimieka ha yuma yipema yize nakulinga ni kungulembelako. Iye nawa kakungwiwulula yitanga yipema ya Yehova ni kungukwasa hanga ngwehuke manyonga api.”

9-10. Kuchi makulwana akwashile umwe pangi kwehuka ndako ya kulitesa ni akwo?

⁹ Kuchi makulwana a mu chikungulwila mahasa kukwasa mandumbu waze akwete ndako ya kulitesa ni akwo? Tutalenu chilweza cha pangi Hanuni. Muze apwile kanuke, te keshi kumuchichimieka chinji. Iye yamba ngwenyi: “Te nakwivwa-vwa sonyi ni kumona ngwe twanuke-ni-akwetu kali alemu chinji kuhiana yami. Naputukile kulitesa ni akwetu muze te nguchili kanuke.” Chipwe hanyima lia kupwa Chela cha Yehova, nihindu Hanuni yanunga ni kulitesa ni akwo. Mumu lia chino, yaputuka kulimona ngwe keshi ni ulemu mu chikungulwila. Alioze, musono kanawahilila ha kukalakala ngwe pionelu. Yika yamukwashile kwalumuna nyonga lienyi?

¹⁰ Hanuni yamba ngwenyi, chuma chize chamukwashile, chili ukwaso uze atambwile kuli makulwana a mu chikungulwila. Ayo kamulwezele ngwo, kali mulemu mu chikungulwila ni kumuchichimieka ha chilweza chenyi chipema. Hanuni yamba ngwenyi: “Makulwana a mu chikungulwila ha mashimbu amwe, te kakungwita hanga ngutakamise mandumbu a mapwo waze te anafupiwa ukwaso. Milimo yacho te yakungukwasa kulimona ngwami nguli mulemu. Ngunewuluka muze makulwana anguchichimiekene, ha utakamiso uze te ngunahane kuli amwe akweze. Hachino, ayo yangutangila 1 A-Tesalonika 1:2, 3. Maliji jacho kangukwachile ku mbunge! Mumu lia ukwaso wa tufunga wano apema, musono nakulemesa chinji chihela chami mu ululikiso wa Yehova.”

11. Kuchi mutuhasa kukwasa waze ali ni “spiritu ya kuhia ni kulikehesa,” anatongola ha Izaia 57:15?

¹¹ Tanga Izaia 57:15. Yehova kakulihulumba chinji hali waze ali ni “spiritu ya kuhia ni kulikehesa.” Yetweswe mutuhasa kukolweza mandumbu jetu hi wika ko makulwana a mu chikungulwila. Jila yimwe yakuchilingila yili kusolola ngwetu, twakulihulumba hali ayo. Yehova kanazange hanga tukwase mandumbu jetu amone ngwo iye kakwazanga. (Yishi. 19:17) Chikwo nawa, nyi mutupwa akwa-kulikehesa chino muchihasa kukwasa mandumbu jetu. Kutwatambile kulisolola ngwetu tunahiane akwetu, mumu chino muchihasa kuneha chipululu mukachi ka mandumbu jetu. Shimbu tuchilinge, twatamba kuzachisa utotombo ni yinyingi yetu hanga tulitakamise umwe ni mukwo.—1 Petu. 4:10, 11.

12. Mumu liaka akwa-kulikehesa te akuya kuli Yesu? (Tala chizulie ha chifukilo.)

¹² Chize Yesu atwamine ni tumbaji twenyi, muchihasa kutulongesa chize mututwama ni akwetu. Yesu kapwile lunga mulemu chinji hano hashi. Chipwe chocho, iye kapwile “mukwa kushimbika, mukwa kulikehesa mu mbunge.” (Mateu 11:28-30) Iye kapwile ni mana ni yinyingi yinji, nihindu te keshi kulisuta. Alioze, muze apwile ni kulongesa te kakuzachisa maliji ni yilweza yashi yize yapwile ni kukwata ku mbunge ya akwa-kulikehesa. (Luka 10:21) Mangana a mayingeleja ha matangwa ja Yesu, kapwile akwa-kulizata nawa te kakutwala atu alivwe ngwe keshi ni ulemu kumeso ja Zambi. Alioze Yesu te keshi kulinga chocho. (Yoa. 6:37) Iye kapwile ni kulemesa atu eswe.

13. Kuchi upeme ni zango lia Yesu, yasolokele ha chize te akutwama ni tumbaji twenyi?

¹³ Upeme ni zango lia Yesu, yasolokele ha chize te akutwama ni tumbaji twenyi. Iye te kananyingika ngwenyi, hita umwe wa kuli ayo kali ni utotombo ni uhashi walisa. Kashika, eswe te kechi kupwa ni yiteli yimuwika hanji kukalakala chinji mu mulimo wa kwambujola. Chipwe chocho, Yesu kalemesene yuma yize hita umwe wa kuli ayo te akulinga. Yesu kapwa mutu mwashi, yino yasolokele zwalala ha chishima cha mbongo. Ha chishima chino, mwata kahanyine mbongo kuli hita ndungo “kulita ni kuhasa chenyi.” Umwe wa kuli ndungo jacho, yakalakala kanawa yazukako mbongo jikwo kuhiana mukwo, alioze mwene wo yachichimieka eswe aali hakwamba ngwenyi: “Hiwalinga kanawa, uli ndungo mupema, wamwenemwene.”—Mateu 25:14-23.

14. Kuchi mutuhasa kwimbulula mutapu uze Yesu te akutwama ni akwo?

¹⁴ Yesu kali mutu mupema nawa kakuzanga atu. Iye kananyingika ngwenyi, utotombo ni uhashi wetu walisa nawa kakuwahilila chinji muze twakulinga yize mutuhasa. Twatamba kwimbulula Yesu. Muchihasa kupwa ngwe, mandumbu jetu amwe keshi kuhasa kulinga yize akwo akulinga, kashika kutwazangile kwamba chipwe kulinga yize muyevwisa sonyi hanji kulivwa ngwe keshi ulemu. Shimbu tuchilinge, twachichimiekenu ha tachi jize anase hanga alingile Yehova.

15-16. Kuchi umwe pangi ayukile ha kutesa kulinga yimwe yize te mahasa?

¹⁵ Kutesa yuma ya ku ufulielo, chakutukwasa kunyingika chize mutumbata mwono wetu. Alioze, twatamba kutesa kulinga yuma kulita ni utotombo ni uhashi wetu hi wa akwetu ko. Kutesa yuma yize kutuchi kuhasa kulinga, muchihasa kutuvwisa yinyengo ni kutuhongesa. (Luka 14:28) Tutalenu chilweza cha Midori umwe pionelu.

¹⁶ Midori muze apwile kanuke, kanji-kanji te kakumuvwisa sonyi kuli tato yoze hi Chela cha Yehova ko. Tato te kakumutesa ni mandumbu jenyi ni alongi ni akwo ku shikola. Midori yamba ngwenyi: “Yami te nakulivwa ngwe kuchishi ulemu.” Alioze muze te anayi ni kukola, iye yaputuka kupwa ni nyonga lialita hakutwala hali mwene. Yamba ngwenyi: “Kutanga Mbimbiliya matangwa eswe, changukwashile kupwa ni sambukila ya ku mbunge ni kulivwa ngwe Yehova kakunguzanga.” Chikwo nawa, Midori yatesa yimwe ku ufulielo yize te mahasa kulinga. Hachino, yalemba kuli Yehova hanga amukwase kulinga yuma yacho. Chino yichimukwasa kuwahilila ni yize te mahasa kulinga mu mulimo wa Yehova.

17. Kuchi mutuhasa ‘kununga ni kupwa atu aha mu spiritu ya kunyonga’ chetu, nawa yika mutuzukako?

¹⁷ Manyonga api keshi kuhwa mu mbunge yetu susumuku. Kashika Yehova anambe ngwenyi: ‘Nungenu ni kupwa atu aha mu spiritu ya kunyonga chenu.’ (Efwe. 4:23, 24) Mba tuchilinge, twatamba kulemba, kulilongesa Liji lia Zambi ni kulipukuna. Kashika, sako tachi hanga ulinge yuma yacho, nawa nunga ni kwita kuli Yehova hanga akwehe tachi. Spiritu yenyi yisandu, muyikukwasa kwehuka ndako ya kulitesa ni akwenu. Nyi mumona ngwe kulizata ni chipululu yinaputuka mu mbunge ye, eta ukwaso kuli Yehova hanga uyichize ni kawashi.

18. Kuchi 2 Sango ja Mianangana 6:29, 30 muuhasa kukutakamisa?

¹⁸ Tanga 2 Sango ja Mianangana 6:29, 30. Yehova kananyingika mbunge yetu. Iye kananyingika nawa tachi jize twakusa hanga tulimike ni spiritu ya hano hashi ni uhenge wetu. Muze Yehova akumona tachi jize tunase hanga tulimike ni yuma yino, zango lienyi hali yetu liakukola chinji.

19. Chilweza chika Yehova akuzachisa hanga asolole zango lize akwete hali yetu?

¹⁹ Mba asolole chize akwivwa hali yetu, Yehova kakuzachisa zango lize umwe mama akwete hali mwanenyi. (Iza. 49:15) Tutalenu yize yalingiwile kuli umwe chisemi avuluka ngwo, Rachel. Iye yamba ngwenyi: “Mwanami Stephanie kasemukine wisu. Muze namumwene ha chisuho chitangu, kapwile mukehe chinji. Alioze ha kakweji mutangu yoze apwile mu chihela muze akusa ana akusemuka wisu, ndotolo yangwecha hanga ngupwe ni kumusa mu kondo matangwa eswe. Ha mashimbu jacho, yami ni mwanami yitulinyingika kanawa. Musono, Stephanie kali ni miaka 6 nawa mukehe chinji kuhiana twanuke a miaka yenyi. Chipwe chocho, nakumuzanga chinji mumu kasele tachi mba amone mwono, nawa kanakangunehena uwahililo unji ku mwono wami!” Twakuwahilila chinji ha kunyingika ngwetu, Yehova kakutuzanga chinji, chipi-chipi muze akumona tachi jize twakusa hanga tumulingile ni mbunge yeswe!

20. Yika muyihasa kukutwala hanga uwahilile mumu lia kupwa kavumbi ka Yehova?

²⁰ Amu uli kavumbi ka Yehova, yena walisa ni tuvumbi twenyi akwo nawa uli mulemu chinji mu usoko wenyi. Yehova kakakukokele kuli iye mumu ngwo uli mulemu chinji kuhiana akwenu. Alioze, kakukokele kuli iye mumu katalile mu mbunge ye ni kumona ngwo, uli mukwa-kulikehesa yoze unazange kulilongesa hakutwala kuli iye. (Samu 25:9) Pwako ni shindakenyo ngwe, Yehova kakulemesa yeswe yize wa kulinga mu mulimo wenyi. Kunyongonona ni ushishiko we yinasolola zwalala ngwo, uli ni ‘mbunge yipema.’ (Luka 8:15) Kashika, nunga ni kulinga yize muhasa mu mulimo wa Yehova. Nyi wachilinga, muwahilila ‘ha kutwala kuli yena mwene wika, hi ha kutwala ku yuma ya mbala ko.’