LONGESO 09
Kundama Kuli Zambi Kupalikila mu Yilemba
Shina hiunapalika kama mu umwe ukalu mba yiumona ngwe unafupu chimwe chiyulo? Shina uli ni yihula yimwe yize unafupu kuwana makumbululo? Shina unafupiwa utakamiso ni ukwaso? Shina unazange kukundama kuli Yehova? Ha yikuma yeswayi, kulemba muchihasa kukukwasa. Mba kuchi twatamba kulemba? Shina Zambi kakwivwa yilemba yeswe? Yika watamba kulinga mba Zambi apanjike yilemba ye? Yino ye mutumona.
1. Kuli iya twatamba kulemba, nawa yuma yika twatamba kutongola mu yilemba?
Yesu kalongesele ngwenyi twatamba kulemba wika kuli Tata wetu wa mu malilu. Ni Yesu che alingile. Iye yamba ngwenyi: “Kashika lembenu ngwenu, Tata nuli mu malilu . . .” (Mateu 6:8, 9) Muze twakulemba kuli Yehova, usendo wetu ni iye wakukola chinji.
Mutuhasa kwita yeswayo yuma mu yilemba. Alioze Zambi kakukumbulula wika yilemba yize yinalite ni upale wenyi. “Nyi kachi mutwita chuma chimwe cha kulita ni upale wenyi [Zambi], aye matwivwa.” (1 Yoano 5:14) Yesu kahichikile chilweza cha chize twatamba kulemba. (Tanga Mateu 6:9-13.) Hi chipi ko kulemba ha yuma ya ku mwono. Alioze kutwatambile kuvulama kulembelako akwetu ni kusakwilila Zambi ha yize akutulingila.
2. Kuchi twatamba kulemba?
Yilemba yetu yatamba kupwa ya ku mbunge. Kashika Mbimbiliya yinatukolweza “kuzukwila mbunge jetu kumeso jenyi.” (Samu 62:8) Mutuhasa kulemba ni liji mwilu hanji mu mbunge, ha shimbu ni ha chihela cheswacho chize tuli. Mutuhasa kulemba umanyina, utwamina, chipwe kuzondama. Chuma chilemu chili wika kusolola vumbi.
3. Kuchi Yehova akukumbulula yilemba yetu?
Iye kakukumbulula yilemba mu majila alisa. Chakutalilaho, mu Mbimbiliya twakuwanamo makumbululo anji a yihula yetu. Kutanga Liji lia Zambi ‘chakukanyamisa yizuzuke.’ (Samu 19:7; tanga Tiangu 1:5.) Yehova mahasa kutuhwimisa mbunge muze tunasakalala. Mahasa kuzachisa tuvumbi twenyi hanga atukwase muze mutufupiwa ukwaso.
NYINGIKA NAWA
Nyingika chize watamba kulemba kuli Yehova mba akupanjike ni chize kulemba muchihasa kukukwasa.
4. Yize twatamba kulinga mba Zambi apanjike kulemba chetu
Yika twatamba kulinga mba Zambi apanjike kulemba chetu? Tala CHINEMA.
Yehova kanazange hanga tulembe kuli iye. Tanga Samu 65:2, mba nushimutwine yihula yino:
Shina wakunyonga ngwe ‘mukwa-kwivwa kulemba,’ kanazange hanga yena ulembe kuli iye? Mumu liaka wakunyonga chocho?
Nyi tunazange hanga Zambi apanjike yilemba yetu, twatamba kutwama kulita ni chize iye akuzanga. Tanga Mika 3:4 ni 1 Petulu 3:12, mba nushimutwine chihula chino:
Kuchi mutuhasa kupwa ni shindakenyo ngwetu Yehova mapanjika yilemba yetu?
Mu jita, maswalale kakulemba hanga Zambi aakwase kukumba. Ku nyonga lie, shina twatamba kushimbwila ngwetu Yehova mapanjika yilemba yacho?
5. Twatamba kulemba ni mbunge yeswe
Atu amwe kaalongesele kufunyena-funyena maliji amuwika mashimbu eswe malemba kuli Zambi. Shina ayi ye Zambi akuzanga? Tanga Mateu 6:7, mba nushimutwine chihula chino:
Yika watamba kulinga hanga uhone kufunyena-funyena maliji muze unalembe?
Matangwa eswe muhasa kunyonga ha chuma chimwe chipema chize chalingiwa ni kusakwilila Yehova ha chuma chacho. Nyi wasa tachi ukaule chiyulo achi ha poso jeswe, mumona ngwe ha poso yamuwundu wasakwilila ha yuma shimbiali yalisa chakuhona kufunyena-funyena maliji.
Chisemi mweswe kakuzanga hanga mwanenyi amulweze chize anevu. Yehova neye kakuzanga muze mutulemba kuli iye ni mbunge yeswe
6. Kulemba chili chawana cha Zambi
Kuchi kulemba muchihasa kutwaha tachi, chipi-chipi muze tunapinji ku mwono? Tala CHINEMA.
Mbimbiliya yinambe ngwo, kulemba muchihasa kutukwasa kupwa ni sambukila mu mbunge. Tanga A-Fwilipu 4:6, 7, mba nushimutwine yihula yino:
Tunanyingika ngwetu, ha mashimbu amwe kulemba kuchishi kuhwisa lamba lietu. Mba kuchi kulemba muchihasa kutukwasa?
Yuma yika yize unazange kwita mu yilemba?
Unachinyingika nyi?
Liji “amene” linalumbunuka “ewa,” hanji “chochene.” Chize ku mashimbu a kunyima ndo musono, liji lino kakulizachisa ku songo lia yilemba.—1 Sango ja Mianangana 16:36.
7. Kanda uvulama kulemba
Ha mashimbu amwe twakuvulama kulemba hamukunda wa kwoka cha milimo. Shina kulemba chapwile chilemu kuli Yesu? Tanga Mateu 14:23 ni Marku 1:35, mba nushimutwine yihula yino:
Yika Yesu apwile ni kulinga mba apwe ni mashimbu a kulemba?
Yika watamba kulinga mba upwe ni mashimbu a kulemba?
ATU AMWE KAKWAMBA NGWO: “Kulemba chili kukisa mashimbu, niumwe keshi kuchipanjika.”
Kuchi wakunyonga?
YIZE WALILONGESA
Kulemba ni mbunge yeswe muchihasa kutukundamisa kuli Yehova, kutwaha sambukila mu mbunge ni tachi hanga tuhase kuvwisa Yehova kuwaha.
Kuhitulula
Kuli iya twatamba kulemba?
Kuchi twatamba kulemba?
Kuchi kulemba muchihasa kutukwasa?
HENGWOLA NAWA
Wana makumbululo a yihula yimwe hakutwala ku yilemba.
Nyingika ulemu wa kulemba ni chize watamba kulemba kanawa.
“Shina Chili Lume Chilemu Kulemba?” (Lusango wa ha internet)
Kuli iya twatamba kulemba? Nyingika yize Mbimbiliya yakulongesa ha chikuma chacho.
“Shina Natamba Kulemba Kuli Asandu?” (Lusango wa ha internet)
Ha chinema achi cha mwaso, tala nyi twatamba kutesa mashimbu hanji chihela haze mutulembela.