Kanda Wecha Nichimwe Chikukinde Kuzuka Yiwape

1, 2. (a) Yiwape yika tuvumbi a Zambi akushimbwila? (b) Yika muyitukwasa hanga tununge ni kuhulikila meso jetu ha yiwape? (Tala chizulie ha uputukilo.)

AKWA-Kristu akuwayisa kali ni chiwape chipema cha kutalatala. Ayo kakushimbwila kuya ni kutwama mu malilu. Postolo Paulu kachivulukile ngwo ‘chawana cha kutambika cha kwilu cha Zambi.’ (A-Fwilipu 3:14) Mu malilu, ayo makayula hamwe ni Yesu Kristu mu Wanangana wenyi ni kukalakala hamuwika hanga akwase atu apwe angunu. (Usolwelo 20:6) Chino muchikapwa kutalatala chipema! Mapanga akwo kanashimbwila chiwape cheka. Ayo kanashimbwila kutwama ku miaka yeswe mu Paraisu hano hashi, nawa kutalatala chino chakwanehena uwahililo wamwenemwene!—2 Petulu 3:13.

² Paulu kazangile kukwasa akwa-Kristu-ni-akwo akuwayisa hanga anunge ni kushishika mba azuke yiwape. Yaamba ngwenyi: “Nyongenu yuma yize yili mwilu.” (A-Kolosu 3:2) Maliji wano kanasolola ngwo, ayo te katamba kulihulikila ha kutalatala cho cha mu malilu. (A-Kolosu 1:4, 5) Kunyonga ha yiwape ya Yehova chakukwasa tuvumbi twenyi eswe hanga anunge ni kulihulikila ku chawana cha kulutwe lia matangwa. Chino chinatale hali tuvumbi twenyi eswe chipwe waze ali ni kutalatala cha mu malilu hanji cha hashi.—1 A-Korindu 9:24

 3. Ha yika Paulu atowezele akwa-Kristu?

³ Paulu nawa katowezele akwa-Kristu hakutwala ku ponde yize te muyakinda kuzuka yiwape. Chakutalilaho, yasonekena A-Kolosu hakutwala kuli akwa-Kristu a mahuza waze te akweseka kuvwisa Zambi kuwaha ha kukaula Shimbi ya Mose, chakuhona kufuliela muli Kristu. (A-Kolosu 2:16-18) Paulu nawa kahanjikile ha ponde yinasoloka musono yize muyihasa kutukinda kuzuka yiwape. Iye yalumbununa chize twatamba kwehuka usolo wa utanji ni yize twatamba kulinga muze mukusoloka kapinda mukachi ka mandumbu amu chikungulwila hanji asoko jetu. Chiyulo chino cha Paulu muchihasa kutukwasa chinji. Kashika tuhengwolenu utowezo wa zango uze mutuwana ha mukanda wenyi kuli A-Kolosu.

 4. Mumu liaka usolo wa kulinga utanji muuhasa kutukinda kuzuka yiwape?

⁴ Muze Paulu te hewulula mandumbu jenyi hakutwala ku kutalatala cho chilemu, mba yasoneka ngwenyi: ‘Shihenu yihanda yenu yize yili hano hashi hakutwala ku; utanji, ni luchisa, ni kusasaminya, ni usolo upi, ni kuzo.’ (A-Kolosu 3:5) Usolo wa kulinga utanji muuhasa kwoka chinji nawa chino muchihasa kupihisa usepa wetu ni Yehova hamwe ni kutalatala chetu cha kulutwe. Umwe Ndumbu yoze walingile utanji, muze ahilukile mu chikungulwila yamba ngwenyi, usolo wa kulinga utanji wokele chinji chocho “yingulinga shili mumu kuchakahashile kwehuka usolo wacho.”

 5. Kuchi mutuhasa kulifunga ha yuma yize muyihasa kupihisa ufulielo wetu?

⁵ Twatamba kukanyama chipi-chipi nyi mutupwa mu cheseko chize muchitutwala kukwehuka kwononoka shimbi ja Yehova. Chakutalilaho, chili ukanyame waze anafupu kulimbata kutesa chize kuuputukilo wa usendo wo yuma ngwe, kulikwata-kwata, kulimbejala, ni kupwa ha wukawo. (Yishima 22:3) Yuma yikwo yipi muyihasa kulingiwa muze mutulinga wenyi wa mingoso hanji muze tunakalakala ni mutu yoze kutwalimbachile nenyi. (Yishima 2:10-12, 16) Yika muhasa kulinga mba wehuke yuma yacho? Lisolole kuli akwenu ngwo uli Chela cha Yehova. Pwako ni yitanga yipema nawa kanda uvulama ngwo kulitenya-tenya ni yoze kuwalimbachile nenyi muchihasa kukutwala ku luyinda. Nawa twatamba kukanyama muze tunanenganyana hanji tunalivu ngwe tuli ukawetu. Hachino mutuhasa kufupa mutu yoze matuvwisa kuwaha. Kunenganyana muchihasa kutulingisa hanga tufupe ukwaso kuli mutu mweswawo matupanjika. Chino chili ponde yinene. Nyi hiunevu chocho, kanda ulinga nichimwe chize muchikukinda kuzuka yiwape. Fupa ukwaso kuli Yehova ni kuli mandumbu je mu chikungulwila.—Tanga Samu 34:18; Yishima 13:20.

 6. Yika twatamba kwiwuluka muze mutusakula yiheho?

⁶ Mba tushihe usolo wa kulinga utanji, twatamba kwehuka yiheho ya upangala. Musono, yiheho yinji yakutwiwulula chize yuma yapwile mu Sondome ni Ngomora. (Yundase 7) Waze akulinga yiheho yacho kakusolola utanji ngwe hi chuma chipi ko. Kashika twatamba kukanyama mashimbu eswe. Kutuchi kuhasa kutayiza yiheho yeswayo ya hano hashi. Alioze, twatamba kukanyama hanga tuhone kusakula yiheho yize muyitukinda kuzuka chiwape cha mwono.—Yishima 4:23.

 7. Tupalia aka mahasa kusoloka mu chikungulwila cha akwa-Kristu?

⁷ Twakuwahilila chinji ha kupwa mu chikungulwila cha akwa-Kristu. Twakulilongesa Liji lia Zambi ha kukunguluka, nawa ni zango lieswe twakulikwasa umwe ni mukwo. Chino chakutukwasa hanga tulihulikile ku yiwape yetu. Alioze ha mashimbu amwe kuhona kupanjika kanawa chimwe chuma muchihasa kuneha mbwanja mukachi ka mandumbu. Nyi twahwishile tupalia twacho, muchihasa kupwa chashi kutulika toto ku mbunge.—Tanga 1 Petulu 3:8, 9.

8, 9. (a) Yitanga yika muyitukwasa kuzuka yiwape? (b) Yika muyitukwasa tufunge sambukila nyi umwe ndumbu matuvwisa uli?

⁸ Kanda twecha toto hanga litukwike kuzuka yiwape. Paulu kalumbunwine yize akwa-Kristu atamba kulinga, hakwamba ngwenyi: “Ngwe ana aze hanaatongola Zambi, asandu, waze kanaazange chikolo, zalenu mbunge ja keke, ni utu, ni mbunge ja kulikehesa, ni kushimbika, ni uhomboloji. Lihumikizenu umwe ni mukwo, nikulikonekena umwe ni mukwo, nyi kachi umwe munengo ali nawo kuli mukwo. Chizechene ngwe Kristu hananukonekena, chocho ni yenu nawa likonekenenu. Helu lia yino yuma yeswe zalenu zango, mumu zango liapwa muya wa ungunu.”— A-Kolosu 3:12-14.

⁹ Zango ni umbovu muyihasa kutukwasa hanga tukwonekene akwetu ni mbunge yeswe. Nyi umwe ndumbu matuvwisa yikola ku mbunge hakwamba hanji kutulinga chimwe, twatamba kunyonga muze twahanjikile hanji twalingile yuma yize yanehene yikola kuli akwetu, alioze ayo yatukwonekena. Hachino, twakuwahilila chinji ha zango ni umbovu wo! (Tanga Chilumbununyi 7:21, 22.) Twakusakwilila chinji ha chize Kristu akukwasa tuvumbi amwenemwene hanga alivwashane. (A-Kolosu 3:15) Tulieswe twakuzanga Zambi umuwika, twakwambujola sango jo-jene, nawa kanji-kanji twakupwa ni yipikalo yo-yene. Nyi twapwa yimbovu hamwe ni zango ni kukonekena akwetu, mutupwa ni kulivwashana mu chikungulwila nawa mutuhasa kulihulikila ku yiwape yetu.

10, 11. (a) Mumu liaka chipululu chili chipi? (b) Kuchi mutunyingika ngwetu chipululu kuchichi kuhasa kutukinda kuzuka yiwape?

¹⁰ Chipululu muchihasa kutukinda kuzuka yiwape. Yilweza ya Mbimbiliya yakusolola chize chipululu chapwa ponde yinene. Chakutalilaho, Kene kevwilile Abele chipululu chocho yamushiha. Kora, Ndatane ni Apirame, kevwilile Mose chipululu chocho yalimika nenyi. Mwanangana Saulu kapwile ni kwivwila Ndawichi chipululu chocho yafupa kumushiha. Yize Mbimbiliya yakwamba yili yamwenemwene ngwo: ‘Kuze kuli chipululu ni kulimanangana, kuzekwene nawa kuli vunda ni yilinga yeswe yipi.’—Tiangu 3:16.

¹¹ Nyi twalikolweza ha kupwa yimbovu ni kusolola zango liamwenemwene, kutuchi kupwa ni chipululu. Mbimbiliya yinambe ngwo: ‘Zango uhomboloji lili nawo, utu lili nawo. Zango kulishi chipululu.’ (1 A-Korindu 13:4) Mba tunyingike ngwetu kutushi akwa-chipululu twatamba kumona yuma ngwe chize Yehova akuyimona. Twatamba kumona mandumbu jetu ngwe kali yihanda ya mujimba wetu, ye yinalingi chikungulwila. Mbimbiliya yinambe ngwo: “Nyi malemesa chihanda chimwe, yihanda yeswe muyiwahilila hamuwika nacho.” (1 A-Korindu 12:16-18, 26) Nyi chuma chipema muchilingiwa kuli umwe ndumbwetu, mutuwahilila nenyi, chakuhona kumuvwila chipululu. Achinyonga ha chilweza chipema cha Jonata mwana wa Mwanangana Saulu. Jonata kakapwile ni chipululu muze asakwile Ndawichi ngwe mwanangana, chakuhona kumusakula iye. Shimbu evwe chipululu, iye yakolweza Ndawichi ni kumukwasa. (1 Samuele 23:16-18) Kutala mutuhasa kama kupwa yimbovu hamwe ni zango ngwe Jonata?

12. Chiyulo chika cha Mbimbiliya chize muchikwasa asoko jetu kuzuka yiwape?

¹² Nyi hita mutu mu usoko makaula shimbi ja Mbimbiliya, usoko wetu muupwa ni sambukila hamwe ni chiseke, chino muchitukwasa tukazuke yiwape. Paulu kahanyine chiyulo chino kuli asoko: “Yenu mapwo, zeyelenu kuli akwenu-malunga ngwe chinatambe muli Mwene. Yenu malunga, zangenu akwenu-mapwo. Kanda nupwa asasu kulimika no. Yenu ana, ononokenu kuli yisemi jenu ha yuma yeswe, mumu chino chinapemena chikolo kuli Mwene. Yenu atato, kanda nukehia ana jenu kuchina mahonga mu mbunge.” (A-Kolosu 3:18-21) Shina muhasa kumona chize chiyulo chino muchihasa kukwasa usoko we?

13. Kuchi ndumbu wa pwo mahasa kukwasa mukwo-lunga yoze hi chela ko kuwayila Yehova?

¹³ Hanji uli ndumbu yoze mukwenu-lunga keshi kuwayila Yehova. Yika muulinga nyi mwivwa ngwe keshi kukufunga kanawa? Muhasa kumuvwila uli ni kuzwela nenyi, nyi walinga chocho shina yino muyilulieka yuma? Chipwe ngwe musamba, shina chino muchimukwasa kuwayila Yehova? Hanji ka. Alioze nyi muvumbika chiteli chenyi ngwe mutwe wa usoko, muhasa kukwasa asoko jenu hanga apwe ni sambukila nawa chino muchihalisa Yehova. Chilweza che chipema muchihasa kukwasa mukwenu-lunga hanga awayile Yehova, hachino, yenweswe aali munuhasa kuzuka yiwape.—Tanga 1 Petulu 3:1, 2.

14. Yika lunga mukwa-Kristu atamba kulinga nyi mukwo-pwo yoze hi chela ko mamuhona vumbi?

¹⁴ Hanji uli ndumbu yoze mukwenu-pwo keshi kuwayila Yehova. Yika mulinga nyi mwivwa ngwe keshi kukuvumbika? Nyi mufupa kumusolwela ngwo yena mwe mwata, hakumukalumukina, kutala makusa lume vumbi? Kuchichi kuhasa kulingiwa! Zambi kanakushimbwila ni kupwa lunga wa zango ha kwimbulula Yesu. (A-Efwesu 5:23) Yesu, mwe mutwe wa chikungulwila iye kali chihumikiji nawa mukwa zango. (Luka 9:46-48) Nyi mwibulula Yesu, ha mashimbu amwe mukwenu-pwo neye mahasa kuwayila Yehova.

15. Kuchi lunga mukwa-Kristu masolola ngwenyi kakuzanga mukwo-pwo?

¹⁵ Yehova hanalweza malunga ngwenyi: “Zangenu akwenu-mapwo. Kanda nupwa asasu kulimika no.” (A-Kolosu 3:19) Lunga mukwa-zango kakulemesa mukwo-pwo. Kuchi akuchilinga? Iye kakupanjika kanawa manyonga jenyi ni kumwecha anyingike ngwo yize akwamba yili yilemu chinji. (1 Petulu 3:7) Chipwe ngwe kechi kulinga yuma yeswe yize mukwo-pwo akwamba, alioze kumupanjika muchimukwasa hanga akwate yiyulo yipema. (Yishima 15:22) Lunga yoze ukwete zango keshi kushinjila mukwo-pwo hanga amuvumbike. Alioze kakusa tachi hanga azuke vumbi lia mukwo-pwo. Nyi lunga mazanga mukwo-pwo ni ana jenyi, eswe mawahilila chinji ha kuwayila Yehova, chino muchaakwasa kuzuka mwono wa mutolo.

16, 17. Akweze, kuchi munuhasa kwehuka kwivwila yisemi jenu ufwatulo?

¹⁶ Kota uli mukweze yoze wakwivwa ngwe yisemi je keshi kukupanjika ha yize wakwaalweza hanji kapwa akalu chinji. Chino muchihasa kukupinjisa chinji nikulihula, nyi unazange lume kuwayila Yehova. Alioze nyi muhichika Yehova, munyingika ngwe kukushi niumwe hano hashi yoze makuzanga chinji kuhiana chize akukuzanga yisemi je Yela ja Yehova ni masepa je mu chikungulwila.

¹⁷ Achinyonga hachino: Nyi yisemi je keshi kukwaha chiyulo, kuchi munyingika ngwe kakukuzanga lume? (A-Hepreu 12:8) Chochene, yisemi je hi atu angunu ko, kashika mutapu uze makuhelamo fumbo muuhasa kukunehena chinyengo. Alioze kanda ulihulikila wika ha yize makwamba. Fupa kunyingika chitela cha mumu liaka akwamba ni kukulinga chocho. Hwima mbunge kanda uneha mbwanja. Liji lia Zambi linambe ngwo: “Yoze matepulula maliji jenyi kali ni yinyingi; mukwa kuhwima mbunge kali ni malinjekela.” (Yishima 17:27) Kashika, sako tachi hanga utatuke ku ufulielo, ha kutayiza chiyulo cheswacho makwaha ni kwandaho fumbo. (Yishima 1:8) Kanda uvulama ngwo kupwa ni yisemi waze akuzanga Yehova chili chiwape chinene. Ayo kanazange kukukwasa ukazuke mwono wa mutolo.

18. Mumu liaka watamba kununga ni kuhulikila meso je ha yiwape?

¹⁸ Chipwe ngwe tuli ni kutalatala cha kuya mu malilu hanji cha kutwama hano hashi, hita mutu katamba kuhulikila meso jenyi ku yiwape. Kutalatala chetu chili chamwenemwene. Mumu chinakatuka ha chilakenyo cha Sakatanga wa yuma yeswe, chakwamba ngwo: “Mumu hashi muhakazala ni chinyingi cha Yehova.” (Izaia 11:9) Kwasala hakehe atu eswe a hashi makaalongesa kuli Zambi. Chino muchipwa chiwape ha mulimo uze twakulinga. Kashika mashimbu eswe, iwuluka ngwe Yehova hanakulakenya yiwape, kanda wecha nichimwe chikukinde kuyizuka!