“Yehova Zambi Yetu Iye Yehova Umuwika”

1, 2. (a) Mumu liaka maliji hali ha Shimbi Yamuchiali 6:4 anaanyingika kanawa? (b) Mumu liaka Mose ahanjikile maliji jacho?

HA Miaka yinji, A-Yunda kakuzachisa maliji ali ha Shimbi Yamuchiali 6:4, ngwe kulemba cho chilemu. Kulemba chacho kakuchivuluka ngwo Shema, kali maliji atangu a versu yacho mu Hepreu. A-Yunda anji kakuvuluka kulemba chacho matangwa eswe chimene ni chingoloshi hanga asolole ni mbunge yo yeswe uwayilo wo kuli Zambi.

² Maliji wano kali chihanda cha kasula cha pande jize Mose ahanjikile kuli vungu lia Izalele. Ha mwaka 1473 muze Kristu te kanda achisemuka, vungu lia Izalele te lili mu chifuchi cha A-Moape, te kwasala hakehe hanga azauke Lwiji-Yordau ni kuzuka Chifuchi cha Chilakenyo. (Shimbi Yamuchiali 6:1) Mose te hasongwela atu ha miaka 40, alioze te kanazange hanga o apwe ni hamu hanga ahase kukumba yipikalo yize te muyiza kulutwe. O te katamba kufuliela muli Zambi yo, Yehova, ni kushishika kuli iye. Kashika maliji a Mose akasula, aakolwezele hanga achilinge. Muze te hatongwola Kumi lia Shimbi ni shimbi jikwo ja kuli Yehova, Mose yahana kuli A-Izalele umwe utowezo uze twakutanga ha Shimbi Yamuchiali 6:4, 5. (Tanga.)

 3. Yihula yika mutushimutwina mu mutwe uno?

³ A-Izalele te kananyingika ngwo Yehova Zambi yo kali “Yehova umuwika.” A-Izalele ashishika te kakuwayila Zambi umuwika, Zambi ya tulamba two. Mba mumu liaka Mose wa ewulwile ngwo Yehova Zambi yo, kali “Yehova umuwika”? Kulita chika chili ha maliji wano ni maliji akwamba ngwo tukazange Zambi yetu ni mbunge yetu eswe, mwono wetu weswe, ni ngolo jetu jeswe? Nawa kuchi maliji ali ha Shimbi Yamuchiali 6:4, 5 anatutale musono?

4, 5. (a) Ulumbunwiso uka umuwika uze uli ha maliji wano ngwo, “Yehova umuwika”? (b) Kuchi Yehova alisa ni tuzambi eka ni eka akwa-mavungu?

⁴ Iye wika. Liji “Yehova umuwika” linalumbunuka ngwo Yehova kali umuwika, kukushi niumwe walita ngwe iye. Mumu liaka Mose ambile maliji wano? Muze Mose ambile maliji wano aye te keshi kuhanjika hakutwala ku longeso lia tuzambi atatu. Mumu Yehova kali Sakatanga wa malilu ni hashi nawa iye mwe Mwata wa chifuchi cheswe. Aye kali Zambi umuwika wamwenemwene, nawa kukushi nyi umwe walita ni iye. (2 Samuele 7:22) Ha chino, maliji ja Mose kewulwile A-Izalele ngwo o te katamba kuwayila wika Yehova. Ayo te katambile kwimbulula atu waze te atunga no hamuwika waze te akuwayila tuzambi anji mahuza. Atu jacho te kakufuliela ngwo tuzambi two te mahasa kusongwela yimwe yitangiwa.

⁵ Chakutalilaho, A-Engitu te kakuwayila zambi mwalwa Ra, zambi wa mwilu Nute, zambi wa mavu Gebe, zambi Nilu Hapi, hamwe ni tushitu anji. Yehova kasolwele ngwenyi, aye te munene chinji kuhiana tuzambi wano a mahuza muze atuhwishile Kumi lia Yilungo. A-Kanana, zambi wo munene te Mbale, umwe zambi wa mahuza yoze A-Kanana te akufuliela ngwo mwe wanehene mwono hano hashi. Te kakumufuliela nawa ngwo kali zambi wa mwilu, wa vula ni kangunga. Ku yihela yinji, atu te kakufupa ukwaso muli Mbale. (Kwalula 25:3) A-Izalele keewulwile ngwo Zambi yo, mwe ‘Zambi wamwenemwene,’ umuwika. Iye mwe “Yehova.”—Shimbi Yamuchiali 4:35, 39.

6, 7. Ulumbunwiso uka ukwo wa “umuwika” nawa kuchi Yehova akusolola ngwo kali “umuwika”?

⁶ Keshi Kwalumuka nawa Kashishika. Liji “umuwika” linasoloka ha maliji “Yehova umuwika” kanalumbunuka nawa ngwo upale ni yitanga yenyi yili yamwenemwene mashimbu eswe. Yehova kali Zambi umuwika keshi kwalumuka. Iye mashimbu eswe kapwa mungunu, keshi kwalumuka, kashishika nawa kali wamwenemwene. Chakutalilaho, iye kalakenyene Apalahama ngwo munyachi wenyi te mutwama mu Chifuchi cha Chilakenyo. Ha chino Yehova kalingile yikomokeso yinji ya ndundo hanga anunge ni kufunga chilakenyo chacho. Miaka kulakaji yiwana ni kumi ni yitatu muze te hahana chilakenyo chacho, nihindu nyonga lia Yehova kuliakalumukine.—Uputukilo 12:1, 2, 7; Kutuhuka 12:40, 41.

⁷ Kulakaji ya miaka kunyima, Yehova kavulukile A-Izalele ngwo yela jenyi ni kwaalweza ngwenyi: ‘Yami wika nguli Zambi. Kukushi Zambi mukwo shina yami.’ Yehova yalumbununa kanawa upale wenyi ngwo, kuuchi keza kalumuka muze ambile nawa ngwenyi: ‘Yami nguli Zambi mungupwako matangwa eswe.’ (Izaia 43:10, 13; 44:6; 48:12) A-Izalele kayukile chinji ha kuwayila Zambi yoze keshi kwalumuka nawa washishika! Ni yetu tuli ni chiwape chochene musono.—Malakia 3:6; Tiangu 1:17.

8, 9. (a) Yika yize Yehova anechi kuli tuvumbi twenyi? (b) Kuchi Yesu asolwele ulemu wa maliji ja Mose?

⁸ Chochene, Mose kewulwile A-Izalele ngwo zango ni ufunge wa Yehova hali ayo te kuyichi kwaalumuka. Alioze Yehova te kakushimbwila hanga o amwehe uwayilo uze watela wika iye ni kumuzanga ni mbunge jo jeswe, mwono wo weswe, ni ngolo jo jeswe. Yisemi te kakulongesa ana jo mashimbu eswe hakutwala kuli Yehova hanga akweze no awayile wika Yehova.—Shimbi Yamuchiali 6:6-9.

⁹ Yehova kechi keza kalumuna upale wenyi, kashika iye kechi keza kalumuna shimbi jenyi jilemu hakutwala kuli tuvumbi twenyi amwenemwene. Nyi tunazange hanga Yehova awahilile ni uwayilo wetu, twatamba wika kumuwayila mu jila yize iye akuzanga ni kumuzanga ni mbunge yetu eswe kunyonga chetu cheswe, ni ngolo jetu jeswe. Yesu kambile ngwenyi, shimbi yino ye yilemu kuhiana. (Tanga Marku 12:28-31.) Tulilongesenu chize mutuhasa kusolola ku yitanga yetu nyi twakufuliela ngwetu “Yehova Zambi yetu iye Yehova umuwika.”

10, 11. (a) Yika chinalumbunuka kuwayila wika Yehova? (b) Kuchi akweze A-Hepreu mu Babilonia asolwele ngwo te kakuwayila wika Yehova?

¹⁰ Yehova kali wika ni wetu nawa kali Zambi umuwika. Twakumwaha uwayilo uze anafupu muze twakuwayila wika iye. Kutwatambile kuwayila tuzambi akwo hanji malongeso a mahuza chipwe kwaazachisa mu uwayilo wetu kuli Yehova. Aye keshi wika umwe zambi yoze uli helu lia tuzambi akwo hanji yoze wahiana tuzambi twacho. Aye kali Zambi wamwenemwene. Yetu twatamba kuwayila wika Yehova.—Tanga Usolwelo 4:11.

¹¹ Mu mukanda wa Daniele, twakutanga hakutwala kuli akweze wano A-Hepreu, Daniele, Hanania, Mishaele, ni Azaria. Ayo kawayile wika Yehova muze alitunyine kulia chize te chapwa cha luchisa kuli tuvumbi twa Yehova. Nawa masepa wano atatu a Daniele kalitunyine kufukama ku kaponya wa oru wa Nabukanezore, kuli ayo Yehova kapwile ha chihela chitangu. Ayo kashishikile kuli iye ni mbunge yo yeswe.—Daniele 2:1–3:30.

12. Nyi tunazange kuwayila wika Yehova ha yika twatamba kukanyama?

¹² Yehova katamba kupwa mutu mutangu ku mwono wetu. Nyi tunazange kuwayila wika iye, twatamba kukanyama hanga yimwe yuma yichine kupwa mu chihela cha Yehova ku mwono wetu. Yuma yacho muyihasa kupwa yika? Mu Kumi lia Shimbi Yehova kambile ngwenyi, atu jenyi katambile kuwayila tuzambi akwo. Nawa te katambile kukombelela mahamba. (Shimbi Yamuchiali 5:6-10) Musono, kuli uwayilo unji wa kukombelela mahamba, umwe muuhasa kupwa ukalu kuunyingika. Alioze shimbi ja Yehova kujalumukine. Iye nihindu uchili “Yehova umuwika.” Tutalenu chize mutuhasa kwehuka uwayilo wa mahamba musono.

13. Yika mutuhasa kuputuka kuzanga chinji kuhiana Yehova ni twapwa ni kuzo?

¹³ Mu mukanda wa A-Kolosu 3:5 (Tanga), tunatangemo yuma yize muyihasa kupihisa usepa wetu upema ni Yehova. Twamona ngwetu, kuzo yinalite ni kukombelela mahamba. Yika chino chinalumbunuka? Nyi twapwa ni usolo unji wa kupwa ni chimwe chuma ngwe kupwa ni mbongo jinji hanji yikumba ya ndando yinyi, yino muyihasa kusongwela mwono wetu, ni kupwa ni ndundo hali yetu ngwe zambi. Shili yeswe yize atongola ha A-Kolosu 3:5, yinatale ku kuzo, yino yili umwe mutapu wa uwayilo wa mahamba. Kashika nyi tuli ni usolo unji ha yuma yacho, mutuhasa kuputuka kuyizanga chinji kuhiana Zambi. Ha chino, Yehova kechi kupwa nawa “Yehova umuwika” kuli yetu. Kanda twecha hanga chino chilingiwe.

14. Utowezo uka postolo Yoano anahane hakutwala ku zango lia Zambi?

¹⁴ Postolo Yoano kanakashindakenya ha yuma yoyene. Iye yatoweza ngwo, nyi mutu mazanga chinji yuma ya hano hashi, ngwe, “usolo wa musunya, ni usolo wa meso, ni kulizata cha mwono” ha chino, “zango lia Tata kulishimo muli iye.” (1 Yoano 2:15, 16) Kashika twatamba kulihengula yetwene mashimbu eswe hanga tumone nyi twakuzanga chinji yuma ya hano hashi. Kota mutuhasa kumona ngwetu, hitwaputuka kuzanga kuheha, atu, mutapu wa mazalo ni kuzala cha hano hashi. Hanji kota mutuzanga kufupa “yuma yilemu” ha kuya ku shikola jinene-jinene ja hano hashi. (Jeremia 45:4, 5) Chifuchi chaha hichakundama. Kashika twatamba kwiwuluka maliji alemu a Mose! Nyi twanyingika ni kufuliela ngwetu “Yehova Zambi yetu iye Yehova umuwika,” mutumuwayila wika iye nawa mutumulingila mu jila yize iye akuzanga.—A-Hepreu 12:28, 29.

15. Mumu liaka Paulu ewulwile akwa-Kristu ngwenyi, Zambi, kali “Yehova umuwika”?

¹⁵ Maliji “Yehova umuwika” kanatukwase kunyingika ngwetu, Yehova kanazange hanga tuvumbi twenyi alinunge ni kupwa ni upale wowene ku mwono wo. Chikungulwila cha akwa-Kristu ku uputukilo chapwile ni A-Yunda, A-Ngregu, A-Roma ni atu aku mavungu akwo. O kapwile ni ndako, mianda, ni manyonga eka ni eka. Ha mukunda wa yino yuma, kashika chapwile chikalu kuli amwe akuli ayo kutayiza uwayilo waha hanji kwecha yitanga yo yikulu. Kashika Paulu wafupile kwewulula ngwenyi, akwa-Kristu kali ni Zambi umuwika, Yehova.—Tanga 1 A-Korindu 8:5, 6.

16, 17. (a) Uprofeto uka unamanunuka musono, nawa yika yinezako? (b) Yika muyihasa kupihisa unungiso wetu?

¹⁶ Yika mba mutwamba hakutwala ku chikungulwila cha akwa-Kristu musono? Profeta Izaia kambile ngwenyi, “ha matangwa a kusula” atu aku mavungu eswe meza hamuwika hanga awayile Yehova. Ayo te mamba ngwo: “Atulongese ndako jenyi tukende mu majila jenyi.” (Izaia 2:2, 3) Tunawahilila chinji ha kumona chize uprofeto uno unamanunuka musono! Mandumbu ni mapangi jetu kali atu aku yihela yeka ni yeka, kakuhanjika malimi eka ni eka nawa kakwete ndako jeka ni jeka. Chipwe chocho, twalinunga ha kuwayila Yehova. Alioze, amu tuli atu alisa, ha mashimbu amwe mukuhasa kusoloka umwe kapinda.

¹⁷ Chakutalilaho, kuchi wakwivwa hakutwala kuli mandumbu hanji mapangi a ku minyachi yeka? Limi, mazalo, ndako ni kulia cho muchisa kulisa ni cha yenu. Shina wakwaalengulula ni kufupa kutwama wika ni atu waze akwetu ndako ngwe ja yenu nyi? Kuchi wakumona makulwana amu chikungulwila che waze ali twanuke ku miaka hanji aku vungu lieka hanji waze akwete ndako jeka? Nyi kutwakeyele, mutuhasa kwecha ndako jino hanga jitupinjise ni kupihisa unungiso wetu.

18, 19. (a) Chiyulo chika chili mu Efwesu 4:1-3? (b) Yika mutuhasa kulinga hanga tukwase chikungulwila chilinunge?

¹⁸ Kuchi mutuhasa kwehuka kapinjiso wacho? Paulu kahanyine chiyulo kulu akwa-Kristu waze te atunga mu Efwesu, mbonge yize te yikwete upite unji ni atu aku minyachi yeka ni yeka. (Tanga A-Efwesu 4:1-3.) Paulu katongwele yitanga ngwe kulikehesa, umbovu, uhomboloji, uhumikizo ni zango. Yitanga yino yili ngwe manguji waze akukolesa zuwo. Alioze zuwo liacho mba linunge kanawa, liakufupiwa kukalakala chinji. Paulu kazangile hanga akwa-Kristu mu Efwesu ase tachi jinji hanga apwe ni “kununga cha spiritu.”

¹⁹ Yetweswe twatamba kusa tachi hanga tulinunge mu chikungulwila. Kuchi mutuhasa kuchilinga? Chitangu, twatamba kupwa ni yitanga yize Paulu atongwele ni kuyisolola: kulikehesa, umbovu, uhumikizo ni zango. Chamuchiali, twatamba kusa tachi hanga ‘tupwe ni sambukila.’ Kuhona kulivwashana mukachi ketu, kuchapwa ngwe yimwe miaji mu unungiso wetu; ha chino twatamba kusa tachi hanga tulivwashane ni kupwa ni sambukila ni unungiso mu kachi ketu.

20. Kuchi mutuhasa kusolola ngwetu tunanyingika ngwetu “Yehova Zambi yetu iye Yehova umuwika”?

²⁰ “Yehova Zambi yetu iye Yehova umuwika.” Maliji wano kali ni ulemu unji! Mumu katakamishine A-Izalele hanga anyongonone mu yipikalo muze anjilile mu Chifuchi cha Chilakenyo. Maliji jacho mahasa kututakamisa hanga tuhase kunyongonona ndo ku luyinda munene ni kutukwasa kunjila mu Paraisu yize yineza. Kashika, tunungenu ni kuwayila wika Yehova. Twatamba kumuzanga ni kumulingila ni mbunge yetu yeswe, ni manyonga jetu eswe ni ngolo jetu jeswe, nawa twatamba kusa tachi hanga tupwe ni sambukila ni unungiso hamwe ni mandumbu jetu. Nyi twanunga ni kulinga yuma yino, Yesu makatupatwila ngwe mapanga nawa mutukamona kumanunuka cha maliji jenyi akwamba ngwo: “Tweyenu, enu kunwawaha kuli Tata, nuhinge Wanangana anululikilile chize ku kusela cha fundamentu ya hashi.”—Mateu 25:34.