LONGESO 37
Yika Mbimbiliya Yakwamba Hakutwala ku Milimo ni Mbongo?
Shina hiunasakalala kama hamukunda wa mulimo hanji mbongo? Muchihasa kupwa chikalu kupwa ni yuma yize tunazange ku mwono, aku tunawayila Yehova kulita ni chize iye akuzanga. Mbimbiliya yakuhana yiyulo yipema yize muyihasa kutukwasa.
1. Yika Mbimbiliya yakwamba hakutwala ku mulimo?
Zambi kakuzanga hanga tuwahilile mu milimo yetu. Mbimbiliya yakwamba ngwo, “mutu . . . mawahisa mbunge yenyi ni upeme wa milimo yenyi, nichimwe chikwo cha kuwaha chakuhi.” (Chilumbununyi 2:24) Yehova kakukalakala chinji. Nyi mutwimbulula chilweza chenyi ni kusa tachi mu milimo yetu, mutumuvwisa kuwaha ni kuwahilila ku mwono.
Mulimo uli ulemu. Alioze kutwatambile kwecha hanga upwe ulemu chinji kuhiana uwayilo wetu kuli Yehova. (Yoano 6:27) Iye kanalakenya ngwenyi, nyi twasa upale wenyi kulutwe lia yuma yeswe ku mwono wetu, matukwasa kupwa ni yize tunafupiwa ku mwono.
2. Yika chinalumbunuka kupwa ni nyonga lialita hakutwala ku mbongo?
Chipwe ngwe Mbimbiliya yakwamba ngwo “mbongo kujakutufunga,” nihindu yakututoweza nawa ngwo, mbongo ukawajo kujishi kuneha uwahililo. (Chilumbununyi 7:12) Kashika, Mbimbiliya yakutukolweza hanga tuchine kuzanga mbongo, alioze twatamba kuwahilila hanji ngwetu, ‘kuyuka ni yuma yize tuli nayo.’ (Tanga A-Hepreu 13:5.) Nyi twawahilila ni yuma yize tuli nayo, kutuchi kusakalala ha yuma yize kutushi nayo. Chikwo nawa, muchitukwasa twehuke kupwa ni makongo anji. (Yishima 22:7) Chakutukwasa nawa kwehuka yiheho yipi yize yakusoloka ngwe muyitupichisa nikawashi.
3. Kuchi mutuhasa kupwa yihanyi ha chize twakuzachisa mbongo jetu?
Yehova kali chihanyi, kashika twakumwimbulula muze twakupwa “akwa kunyengumuna, akwa kulianyina.” (1 Timoteu 6:18) Mutuhasa kuzachisa mbongo jetu hanga tukwase chikungulwila, atu waze anamono lamba chipi-chipi mandumbu jetu. Yehova keshi kutala wika ha unji wa yuma yize twakuhana, alioze kakutala ha mbunge yize twakuhana nayo. Muze twakuhana ni mbunge yeswe, twakuwahilila ni kuvwisa Yehova kuwaha.—Tanga Yilinga 20:35.
NYINGIKA NAWA
Tala chize muhasa kuyuka ha kupwa ni nyonga lialita hakutwala ku mulimo ni kuwahilila ni yuma yize uli nayo.
4. Halisa Yehova kupalikila mu mulimo we
Usepa wetu ni Yehova watamba kutukwasa tupwe ni nyonga lialita hakutwala ku milimo. Tala CHINEMA, mba nushimutwine yihula yinahateho.
Kulita ni chinema, yika Jason apwile ni kulinga yize yakomwesene akwo ku mulimo?
Yika iye alingile hanga ase mulimo ha chihela chalita?
Tanga A-Kolosu 3:23, 24, mba nushimutwine chihula chino:
Mumu liaka nyonga lietu hakutwala ku mulimo lili lilemu?
Mulimo uli ulemu. Alioze kutwatambile kwecha hanga upwe ulemu chinji kuhiana uwayilo wetu kuli Yehova
5. Kuwahilila ni yuma yize tuli nayo chakutuyukisa
Atu anji kakusa tachi hanga apwe ni mbongo jinji. Alioze Mbimbiliya yakusolola nyonga lialisa. Tanga 1 Timoteu 6:6-8, mba nushimutwine chihula chino:
Yika Mbimbiliya yakutukolweza hanga tulinge?
Chipwe ngwe kutushi ni mbongo jinji, nihindu mutuhasa kuwahilila. Tala CHINEMA, mba nushimutwine chihula chinahateho.
Yika yakukwasa asoko wano kuwahilila chipwe ngwe kali yiswale?
Mba yika mutulinga nyi tukwete mbongo jinji, chipwe chocho tunazange kuwezelaho nawa jikwo? Tanga Luka 12:15-21, mba nushimutwine chihula chino:
Yika walilongesa ha chishima cha Yesu?—Tala versu 15.
Tanga ni kutesa Yishima 10:22 ni 1 Timoteu 6:10, mba nushimutwine yihula yino:
Ku nyonga lie, chuma chika chahiana ulemu, kupwa sepa lia Yehova nyi kupwa ni mbongo jinji? Mumu liaka?
Kapinda muka mutu mahasa kupwa nenyi nyi mazanga kupwa ni mbongo jinji?
6. Yehova matukwasa ha yuma yize mutufupiwa
Kuhona mulimo hanji mbongo, muchihasa kweseka ufulielo wetu kuli Yehova. Tala CHINEMA hanga umone chize muhasa kukumba cheseko chacho mba nushimutwine yihula yinahateho.
Kulita ni chinema, kapinda muka ndumbwetu apalikile?
Yika alingile mba ahase kukumba kapinda wacho?
Tanga Mateu 6:25-34, mba nushimutwine chihula chino:
Yika Yehova analakenya kulinga hali waze akusa upale wenyi kulutwe lia yuma yo ene?
ATU AMWE KAKWAMBA NGWO: “Natamba kukalakala chinji hanga ngulise asoko jami. Kashika chichi kuhasa kukunguluka poso jeswe.”
Kuchi Mbimbiliya yakukukwasa kupwa ni shindakenyo ngwe, kusa upale wa Yehova kulutwe lia yuma yeswe ku mwono we chili chuma chilemu chize watamba kulinga?
YIZE WALILONGESA
Kukalakala milimo ya ku musunya ni kupwa ni mbongo, chili chuma chilemu, alioze yuma yino kuyatambile kulalwisa mulimo wetu kuli Yehova.
Kuhitulula
Yika muyihasa kukukwasa kupwa ni nyonga lialita hakutwala ku mulimo?
Kuchi kuwahilila ni yuma yize tuli nayo muchihasa kutuyukisa?
Kuchi muhasa kusolola ufulielo we ha chilakenyo cha Yehova cha kukwasa tuvumbi twenyi?
HENGWOLA NAWA
Hengwola hanga unyingike nyi Mbimbiliya yakwamba ngwo kupwa ni mbongo chili chipi.
“Shina Usolo wa Upite Chikota cha Yipi Yeswe?” (Lusango wa ha internet)
Nyingika chize mutuhasa kuzachisa mbongo jetu mu jila yize yakuvwisa Zambi kuwaha.
“Yika Mbimbiliya Yakwamba Hakutwala ku Kupwa Yihanyi?” (Lusango wa ha internet)
Shina yili yiheho wika, nyi yili yuma yipi?
Tala yize umwe lunga alingile mba ahase kwecha kuta batota ni kwiya.
“Te Nakuzanga Chinji Kuzomboka ni Tuvwalu” (Kaposhi wa Kutalila 1 wa Novembro, 2011)