Umwenemwene Hakutwala Kuli Angelo

Yehova kanazange hanga tulilongese hali usoko wenyi wa mu malilu. Mu usoko wacho, mwatwama angelo waze avuluka ngwo “ana a Zambi.” (Yombi 38:7) Yika Mbimbiliya yakuhanjika hali angelo? Kuchi chino chakukwata hali atu? Shina angelo eswe kali mu usoko wa Zambi?

1. Angelo aya?

Yehova kaliangile kutanga angelo shimbu te kanda atanga hashi. Angelo keshi kumoneka mumu kali yitangiwa ya spiritu waze atwama mu malilu. (A-Hepreu 1:14) Kwatwama angelo anji, chikwo nawa hita mungelo kalisa. (Usolwelo 5:11) O ‘kakwononokena [Yehova] nikwivwa liji lia kuhanjika chenyi.’ (Samu 103:20) Ku mashimbu a kunyima, Yehova kapwile ni kutuma angelo hanga ambujole sango jenyi ni kulamwina atu jenyi. Musono, angelo kakusongwela akwa-Kristu mu mulimo wa kwambujola.

2. Satana ni andemoniu jenyi aya?

Angelo amwe kakanyongonwene ni kushishika kuli Yehova. Mungelo mutangu yoze wapiangukile “jina lienyi ngwo, Ndiapu kanda Satana, mwe mukwa kupiangula yifuchi yeswe ya hashi.” (Usolwelo 12:9) Satana kazangile kuyula, chocho yapiangula Alama ni Eva, kulutwe yapiangula nawa angelo akwo hanga apwe sali lienyi. Angelo jacho api kakwasanyika ngwo andemoniu. Yehova yaahanga mu malilu ni kwanyasa hashi. Chikwo nawa makaanongesa.—Tanga Usolwelo 12:9, 12.

3. Kuchi Satana ni andemoniu akuzanga kutupiangula?

Satana ni andemoniu kakuzanga kupiangula atu ni yuma ya yipanda-panda, chitanga chipi chakuzanga kuhanjika ni andemoniu. Chakutalilaho, atu amwe kakuya ni kufupa ukwaso kuli yimbanda, akwa-kutaha ngombo ni nganga. Eka nawa, muze anayiji kakuya ni kufupa uwukiso kuli akwa-kupanda-panda. Atu anji kakwonga hanga atayize ngwo mahasa kuhanjika ni afu. Alioze Yehova kakututoweza ngwenyi: “Kanda nukatewulukila kuli akwa mahamba ni akwa tufutafuta.” (Ulevi 19:31) Yehova kakutwaha utowezo wacho hanga atufunge kuli Satana ni andemoniu. O kali akwa-kole ja Zambi waze akuzanga kutupinjisa.

NYINGIKA NAWA

4. Angelo kakukwasa atu kunyingika Yehova

Angelo ja Zambi keshi kuya ni kwambujola ku zuwo ni zuwo. Alioze kakusongwela tuvumbi twa Zambi hanga awane atu waze anazange kulilongesa hakutwala kuli Yehova. Tanga Usolwelo 14:6, 7, mba nushimutwine yihula yino:

• Mumu liaka tunafupiwa ukwaso wa angelo mu mulimo wa kwambujola?

• Shina kunyingika ngwe angelo kakutusongwela mu mulimo wa kwambujola chakukwaha hamu? Mumu liaka?

5. Ehuka yipanda-panda

Satana ni andemoniu kali akwa-kole ja Yehova. O kali nawa akwa-kole je. Tanga Luka 9:38-42, mba nushimutwine chihula chino:

• Yuma yika andemoniu akulinga kuli atu?

Kutwatambile kwecha hanga andemoniu atupiangule. Tanga Shimbi Yamuchiali 18:10-12, mba nushimutwine yihula yino:

• Mu mulali uka andemoniu akuzanga kutupiangula ni kuhanjika ni yetu? Yako yika yakusoloka chinji ku chihela chize watwama?

• Ku nyonga lie, shina chili chipema Yehova kukanjisa yipanda-panda? Mumu liaka?

Tala CHINEMA, mba nushimutwine yihula yinahateho.

CHINEMA: “Limikenu ni Ndiapu” (5:02)

• Ku nyonga lie, shina muya uze Palesa akashile ku kwoko lia mwanenyi wapwile upi? Mumu liaka?

• Yika Palesa te atamba kulinga hanga alifunge kuli andemoniu?

Akwa-Kristu amwenemwene kakulimika ni andemoniu. Tanga Yilinga 19:19 ni 1 A-Korindu 10:21, mba nushimutwine chihula chino:

• Mumu liaka chili chilemu kwocha hanji kumbila cheswacho chuma chinatale ha yipanda-panda?

6. Kumba jita yize unase ni Satana ni andemoniu jenyi

Satana mwe wakuyula andemoniu. Alioze angelo waze ashishika kakwasongwela kuli Mikele, mungelo wa lutwe. Mikele, lili jina likwo lia Yesu. Ndundo jika Mikele akwete? Tanga Usolwelo 12:7-9, mba nushimutwine yihula yino:

• Iya ukwete ndundo jinji, shina Mikele ni angelo jenyi nyi Satana ni Andemoniu jenyi?

• Ku nyonga lie, shina tumbaji twa Yesu katamba kuvwila Satana ni andemoniu jenyi woma?

Muhasa kukumba jita yize unase ni Satana ni andemoniu jenyi. Tanga Tiangu 4:7, mba nushimutwine chihula chino:

• Kuchi muhasa kulifunga kuli Satana ni andemoniu jenyi?

YIZE WALILONGESA

Angelo ashishika kakutufunga. Satana ni andemoniu jenyi kali akwa-kole ja Yehova. Kakuzachisa yipanda-panda hanga apiangule atu.

Kuhitulula

• Kuchi angelo ja Yehova akukwasa atu waze anazange kumunyingika?

• Satana ni andemoniu aya?

• Mumu liaka watamba kwehuka yuma ya yipanda-panda?

HENGWOLA NAWA

Lilongese hanga upwe ni shindakenyo ngwe Yesu mwe Mikele mungelo wa lutwe.

“Mikele, Mungelo wa Lutwe Iya?” (Lusango wa ha internet)

Lilongese upwe ni shindakenyo ngwe Satana hi chimwe chuma ko hanji chitanga chimwe mu mbunge yetu.

“Shina Ndiapu Katwama ko Lume?” (Lusango wa ha internet)

Tala chize umwe pwo atusukile ku yitanga ya andemoniu.

“Iye Kawanyine Ulumbunwiso wa Mwono” (Kaposhi wa Kutalila 1 wa Julho, 1993)

Nyingika chize Satana akuzachisa yipanda-panda hanga apiangule atu.

“Umwenemwene Hakutwala ku Tufutafuta, Kujilika ni Wanga” (Jila ya Mwono wa Mutolo—Shina Hiwayiwana?, Chihanda 5)