Mumu Liaka Zambi Keshi Kukumbulula Yilemba Yimwe?

‘Hakulemba kanda nufunyina maliji waze ene.’—Mateu 6:7.

Yehova keshi kuzanga hanga tufunyine yuma yizeyene muze tunalembe hanji kutanga yilemba ha umwe mukanda. Alioze, iye kakuzanga hanga tuhanjike nenyi ni mbunge yeswe. Achinyonga chize muwivwa kupihia nyi umwe sepa lie makulweza yuma yizeyene matangwa eswe. Masepa apema kechi kukuswekela chuma nichimwe nawa makulweza yuma yize yinakatuka ku mbunge. Muze twakuzachisa maliji a yetwene ha kulemba, chino chakusolola ngwo, twakumona Tata yetu wa mu malilu ngwe sepa lietu.

“Nwakwita alioze kunushi kutambula, mumu nwakwita ni mbunge yipi.”—Tiangu 4:3.

Kutwatambile kushimbwila ngwetu Zambi akumbulule yilemba yetu nyi mutwita yuma yize tunamono ngwe, iye kazangile hanga tuyilinge hanji kupwa nayo. Chakutalilaho, nyi umwe mutu malemba kuli Zambi hanga amukwase kukumba chimwe chiheho azuke mbongo jinji, Zambi kechi kumukumbulula, mumu keshi kuzanga atu waze akwete kuzo. (Izaia 65:11; Luka 12:15) Kutwatambile kushimbwila hanga Zambi akumbulule yilemba yamutapwau! Twatamba kupwa ni shindakenyo ngwetu, yize tunalembe yinalite ni upale wa Zambi ngwe chize Mbimbiliya yakulongesa, mba iye akumbulule yilemba yetu.

“Yoze matewulula twitwi lienyi ku shimbi, chipwe kulemba chenyi kuchakuzelwokesa.”—Yishima 28:9.

Kushakulu, Zambi kakapwile ni kukumbulula yilemba ya atu waze te keshi kwononokena shimbi jenyi. (Izaia 1:15, 16) Zambi kalumukine. (Malakia 3:6) Nyi mutuzanga hanga Zambi akumbulule yilemba yetu, twatamba kusa tachi hanga twononokene shimbi jenyi. Mba yika twatamba kulinga nyi twalingile yuma yipi kunyima? Shina Yehova kechi keza kupanjika yilemba yetu? Kwamba pundu, ka! Zambi matukonekena ni mbunge yeswe nyi mutusa tachi hanga twalumune yitanga yetu ni kulinga yize muyimuvwisa kuwaha.—Yilinga 3:19.