Kolesa Ufulielo we ha Yiwape Yize Unashimbwila Kulutwe lia Matangwa

1, 2. (a) Kuchi yuma yize tunashimbwila yinalise ni yuma yize atu akwo anashimbwila? (b) Yika mutulilongesa mu mutwe uno?

YEHOVA kanatulakenya yuma yipema yize tunashimbwila kulutwe lia matangwa. Iye kanalakenya ngwenyi, makapwisa jina lienyi lisandu ni kumanununa upale wenyi mu malilu ni hano hashi. (Mateu 6:​9, 10) Yino yili yuma yilemu yize tunashimbwila. Yehova kanalakenya nawa kutwaha mwono wa mutolo, amwe mu malilu akwo hano hashi. Wano kumakapwa mashimbu apema! (Yoano 10:16; 2 Petulu 3:13) Nawa tuli ni kushimbwila kumona chize Yehova manunga ni kusongwela ni kukwasa atu jenyi ha matangwa wano akusula.

² Mbimbiliya yinambe ngwo, ufulielo uli “kulisela” cha yuma yize tunashimbwila kulutwe lia matangwa. Chino chinalumbununa ngwo waze ali ni ufulielo, kali ni shindakenyo ngwo yuma yize Yehova analakenya muyikamanunuka. (A-Hepreu 11:⁠1) Atu anji musono kakushimbwila yimwe yuma, alioze o keshi shindakenyo nyi yuma yacho muyikalingiwa lume. Chakutalilaho, mutu mahasa kunyonga ngwenyi, makumba yiheho ya mbongo, alioze keshi kuhasa kupwa ni ushindakenyo ngwenyi iye mwe mayikumba. Mu mutwe uno, mutulilongesa yize mutuhasa kulinga hanga tukolesa ufulielo wetu ha yiwape ya Zambi. Mutulilongesa nawa, chize mutuhasa kukolesa ufulielo wetu musono.

 3. Mumu liaka tunafuliela ngwetu, yilakenyo ya Zambi muyikamanunuka?

³ Ni umwe wakuli yetu wakusemuka ni ufulielo wakuhi. Nyi tunazange kupwa ni ufulielo, twatamba kwecha spiritu yisandu ya Zambi hanga yisongwele mbunge yetu. (A-Ngalashia 5:22) Spiritu yisandu muyihasa kutukwasa kunyingika kanawa Yehova. Muze hitwanyingika ngwetu kali mukwa-ndundo-jeswe ni mana, mba mutujikijila ha uhashi wenyi wakumanununa yilakenyo yenyi. Yehova mwene kakuhanjika hakutwala ku yilakenyo yenyi ngwe hi yinamanunuka kulu, ha kwamba ngwo: “Hichamanunuka!” (Tanga Usolwelo 21:​3-6.) Tunanyingika ngwetu, Yehova kakumanununa yilakenyo yenyi. Iye kali ‘Zambi mukwa-kushishika.’ Kashika, twakufuliela ha yuma yeswe yize iye akutulakenya hakutwala kulutwe lia matangwa.​​—⁠Shimbi Yamuchiali 7:⁠9.

 4. Ha yika tuvumbi twa Zambi akushakulu te akufuliela?

⁴ Mukanda wa A-Hepreu kapitulu 11, unasolola majina 16 a malunga ni a mapwo waze apwile ni ufulielo ukolo ha yilakenyo ya Yehova. Unavuluka nawa atu akwo anji waze azangile chinji Yehova ha mukunda wa “ufulielo wo.” (A-Hepreu 11:39) Ayo eswe kapwile ni kushimbwila kwiza cha “munyachi” uze Yehova alakenyene. Kanyingikine ngwo, “munyachi” wacho te muunongesa akwa-kole eswe a Zambi ni kupwisa nawa hashi paraisu. (Uputukilo 3:15) Tuvumbi wano a Zambi kapwile ni ufulielo ukolo ngwo, nyi mafwa Yehova kumakaahindwisa. Alioze, o kakapwile ni kutalatala cha kutwama mu malilu, mumu Yesu te kanda achilinga chilakenyo chacho. (A-Ngalashia 3:16) Ha chino, o kapwile wika ni kutalatala cha kutwama ni mwono wa mutolo mu paraisu hano hashi hapema.​​—⁠Samu 37:11; Izaia 26:19; Hozeia 13:⁠14.

5, 6. Yika Apalahama ni asoko jenyi apwile ni kushimbwila? Kuchi ayo anungine ni kukolesa ufulielo wo? (Tala chizulie ha uputukilo.)

⁵ Mukanda wa A-Hepreu 11:​13, unahanjika hali tuvumbi wano ashishika a Yehova ngwo: “Eswe afwile nikulita ni ufulielo, katambwile yilakenyo, alioze ayimwene kusuku; ayisambililile.” O kapwile ni kushimbwila hashi haha ni kulinyonga ene ngwe he ali. Umwe wakuli ayo te Apalahama. Yesu kambile ngwenyi, Apalahama “walikwijile ha kumona” tangwa liacho. (Yoano 8:56) Sara, Izake, Yakomba ni atu akwo nawa anji, te kakushimbwila tangwa liacho muze Wanangana uze ‘chilangaji ni tungi wawo Zambi’ muuyula hashi heswe.​​—⁠A-Hepreu 11:​8-11.

⁶ Kuchi Apalahama ni asoko jenyi anungine kukolesa ufulielo wo? O kachilingile ha kununga ni kulilongesa hakutwala kuli Yehova. Ha mashimbu jacho, Zambi te kakuhanjika no kupalikila muli angelo, usolwelo hanji yilota. Ayo kota kalilongesele nawa kupalikila muli tulamba two hanji yisoneko yikulu. Apalahama ni asoko jenyi kakavulamine yilakenyo ya Zambi, nawa te kakuzanga chinji kupukuna ha yiwape yacho. Ha chino, ayo kakapwile ni kuyambashana ha kumanunuka cha yiwape ya Yehova. Kashika o anungine ni kushishika kuli iye chipwe muze te akumona lamba ni yihungumiona.

 7. Yika yize Yehova hanatwehe hanga tukolese ufulielo wetu, nawa yika twatamba kulinga?

⁷ Yika muyitukwasa hanga tununge ni kukolesa ufulielo wetu? Yehova hanatwehe Mbimbiliya hanga yitulongese hakutwala ku yilakenyo yenyi ya kulutwe lia matangwa. Mu Mbimbiliya aye kanatusolwela yize twatamba kulinga hanga tuwahilile ku mwono. Kashika chili ni ulemu kutanga Mbimbiliya matangwa eswe ni kukaula usongwelo wamo. (Samu 1:​1-3; tanga Yilinga 17:11.) Yehova nawa kakutwaha ‘kulia ha mwaka wacho’ kupalikila muli “ndungo wamwenemwene.” (Mateu 24:45) Chizechene apwile tuvumbi twa Zambi kushakulu, ni yetu twatamba kutanga hakutwala ku yilakenyo ya Zambi ni kuyipukuna. Chino muchitukwasa kununga ni kushishika kuli Zambi hamwe ni kushimbwila tangwa lize Wanangana wa Zambi muukayula hashi heswe.

 8. Kuchi yilemba muyihasa kukolesa ufulielo wetu?

⁸ Yika nawa yakwashile tuvumbi twa Zambi kushakulu hanga anunge ni kukolesa ufulielo wo? O te kakulemba ni kwita ukwaso kuli Yehova. Nawa muze te akumona kumbululo lia yilemba yo, ufulielo wo te wakukola chinji. (Nehemia 1:​4, 11; Samu 34:​4, 15, 17; Daniele 9:​19-21) Chizechene nawa, muze mutumona ngwetu Yehova kakwivwa yilemba yetu nawa kakutwaha yuma yize tunafupu ha tangwa lize lialita, ufulielo wetu muli iye muukola. (Tanga 1 Yoano 5:​14, 15.) Twatamba nawa ‘kununga ni kwita’ kuli Yehova hanga atwehe spiritu yisandu yize muyitukwasa kupwa ni ufulielo unji.​​—⁠Luka 11:​9, 13.

 9. Yuma yika yize twatamba kwita muze tunalembe?

⁹ Muze mutulemba kuli Yehova, kutwatambile kumwita wika yuma yize tunafupu ku mwono wetu. Twatamba nawa kumusakwilila ni kumuhalisa matangwa eswe. Mumu aye kakutwaha yuma yinji yipema! (Samu 40:⁠5) Tuvumbi twa Zambi kakulembela nawa mandumbu jo a hashi heswe. Chakutalilaho, ‘twakwiwuluka funge.’ Twakulembela nawa mandumbu ‘waze apwa tusongo’ hakachi ketu. Muze mutumona chize Yehova anakumbulula yilemba yetu, ufulielo wetu muli iye wakukola nawa twakukundama kuli iye.​​—⁠A-Hepreu 13:​3, 7.

10. Yika yakwashile tuvumbi anji kupwa ni hamu ni kununga kushishika kuli Zambi?

¹⁰ Mu A-Hepreu kapitulu 11, postolo Paulu yamba ngwenyi: “Mapwo atambwile afu jo ku uhindukilo: akwo aapinjishile ndo ku kufwa, se katayijile akaapulule, hanga akazuke uhindukilo wahiana.” (A-Hepreu 11:35) Tuvumbi anji kakumbile yipikalo ni kununga ni kushishika kuli Zambi, mumu kapwile ni ufulielo ukolo ha uhindukilo wa afu uze Zambi hanalakenya. Kanyingikine ngwo, nyi mafwa, kulutwe lia matangwa Yehova te maahindwisa hanga atwame ni mwono wa mutolo hano hashi. Achinyonga hali Nabote ni Zekaria. O kaashihile ni mawe, mumu lia kwononokena Zambi. (1 Mianangana 21:​3, 15; 2 Sango ja Mianangana 24:​20, 21) Daniele kamusele mu wina wa ndumba, nawa masepa jenyi kaasele mu kahia. Shimbu ahone kushishika kuli Yehova, o yazanga kwo kufwa. Malunga wano, kapwile ni ufulielo ukolo hali Yehova ngwo maaha spiritu yisandu ni kwaakwasa hanga anyongonone ha lamba liacho.​​—⁠Daniele 3:​16-18, 20, 28; 6:​13, 16, 21-23; A-Hepreu 11:​33, 34.

11. Yipikalo yika amwe aprofeta anyongonwene mumu lia ufulielo wo?

¹¹ Aprofeta anji, ngwe Mikaia ni Jeremia kaachokele ni kwaasa mu mazuwo aususu. Akwo, ngwe Elia, “achamanganyine mu puya ni ha milundu, ni mu yivwenge, ni mu mena a hashi.” Wano eswe kanyongwenene mu yipikalo ni kununga kushishika kuli Zambi, mumu kapwile ni “chinyingi cha yuma yize anayitalatala.”​​—⁠A-Hepreu 11:​1, 36-38; 1 Mianangana 18:13; 22:​24-27; Jeremia 20:​1, 2; 28:​10, 11; 32:⁠2.

12. Chilweza chika chipema chize mutuhasa kukaula? Yika yamukwashile mba akumbe yipikalo?

¹² Yesu Kristu kanyongonwene ha cheseko chinene ni kununga kushishika kuli Yehova. Yika yamukwashile mba anyongonwone? Paulu yamba ngwenyi: ‘Ha uwahililo uze asele kumeso jenyi, wanyongonwene mu lamba muze amuhachile ha mutondo, nikulelesa je sonyi; hanatwama ku kwoko lia chindume lia ngunja ya Zambi.’ (A-Hepreu 12:⁠2) Paulu nawa kakolwezele akwa-Kristu hanga ‘azewule kanawa’ chilweza cha Yesu. (Tanga A-Hepreu 12:⁠3.) Ngwe Yesu, akwa-Kristu anji ku sekulu yitangu kaashihile ha mukunda wa ushishiko wo kuli Yehova. Umwe wakuli ayo te Andipa. (Usolwelo 2:13) Akwa-Kristu jacho hanatambula kulu yiwape yo. O kalisa ni tuvumbi twa Zambi waze apwile kulutwe lio, waze akushimbwila kutwama ni mwono wa miaka yeswe hano hashi. (A-Hepreu 11:35) Ha mashimbu amwe muze Yesu te hapwa Mwanangana ha mwaka 1914, akwa-Kristu akuwayisa waze te hanafu kulu yaahindwisa ni mwono wa mutolo ni kuya mu malilu. O makayula atu hano hashi hamwe ni Yesu.​​—⁠Usolwelo 20:⁠4.

13, 14. Yipikalo yika anyongonwene ndumbu Rudolf Graichen, nawa yika yamukwashile mba anunge ni kushishika kuli Zambi?

¹³ Tununu a tuvumbi twa Zambi kanakaula chilweza cha Yesu. O kakupukuna ha yilakenyo ya Zambi ni kununga kushishika kuli iye ha matangwa a yipikalo. Tutalenu chilweza cha ndumbu Rudolf Graichen, yoze wasemukine mu Alemanha ha mwaka 1925. Muze te uchili kanuke yisemi jenyi kasele yimwe yizulie ya yiheho ya Mbimbiliya mu zuwo lio. Aye yamba ngwenyi: “Chizulie chimwe te chakusolola kangunga ni mwana-panga, kanuke ni changwi, chimbembe cha ngombe, ni ndumba​​—⁠eswe kanatwama ni sambukila ni kwaasongwela kuli mwana-kemba.” (Izaia 11:​6-9) Yino yakwashile Rudolf kunyonga chinji hakutwala ku paraisu hano hashi nawa yichikolesa ufulielo wenyi. Yino yeswe yamukwashile hanga anunge kushishika kuli Yehova chipwe muze amumwesele lamba ha miaka yinji kuli A-Nazista ni kuli comunista Stasi ku Alemanha ya kuto.

¹⁴ Rudolf kanyongonwene ha lamba linji. Naye kafwile ni yikola ya tifu ku chihela cha Ravensbrück, kuze te akulinga milimo yikalu. Tato yasoneka umwe mukanda ni kulituna kupwa Chela cha Yehova. Alioze Rudolf yanunga ni kukolesa ufulielo wenyi. Ha kupalika cha mashimbu yamutusula, yapwa kalayi wa mbonge. Kulutwe lia matangwa, yamusanyika ku Shikola ya Ngiliate nawa yamutuma ku chifuchi cha Chile, koko yapwa nawa kalayi wa mbonge. Yalimbata ni Patsy umwe pangi mishionaliu. Alioze hakupalika cha mwaka, mwano wa pwo yafwa. Ha kupalika cha amwe mashimbu Patsy neye yafwa. Aye kapwile wika ni miaka 43. Chipwe ha yino yeswe yalingiwile, Rudolf nihindu yanunga ni kuwayila Yehova. Chipwe muze apwile kashinakaji nawa mujimba te kuushi kanawa, aye te kakukalakala ngwe pionelu wa shimbu lieswe nawa mukulwana mu chikungulwila. Mutuhasa kutanga sango jenyi ha Kaposhi wa Kutalila wa 1 Agosto 1997, ha mafwo 20-25.^[1] (Tala maliji akusongo.)

15. Hana yimwe yilweza ya mandumbu ni mapangi musono waze anawayila Yehova ni chiseke, chipwe ngwe kanaahungumiona.

¹⁵ Musono, mandumbu ni mapangi jetu anji kanawayila Yehova ni chiseke cheswe chipwe ngwe kanaahungumiona. Kulakaji a mandumbu jacho kali mu mazuwo aususu mu Eritreia, Cingapura ni Corea do Sul ha mukunda wa kulituna ‘kwanda katana.’ (Mateu 26:52) Chakutalilaho, Isaac, Negede, ni Paulos kali mu zuwo lia ususu mu Eritreia ha miaka 20! Kakwaamwesa lamba linji. Nawa ha miaka yeswe ayi o kahashile kumbata hanji kufunga yisemi jo. Chipwe chocho, o kananungu kushishika nawa ufulielo wo unakolo. Haliapwila tufunga twa zuwo lia ususu kakwaasa vumbi linji. Chizulie cha mandumbu jacho chili ha site jw.org. O kanasehejela chipwe ngwe kanaamwesa lamba.

16. Yika ufulielo ukolo muuhasa kukukwasa kulinga?

¹⁶ Tuvumbi twa Yehova anji kanda achaasa kama mu zuwo lia ususu hanji kwaamwesa lamba ngwe chize anamwesa mandumbu waze twavuluka. Alioze anji kanamono lamba ha mukunda wa uswale, kakundukundu hanji jita. Akwo, kanakaula chilweza cha Apalahama Izake, Yakomba ni Mose nawa kanalituna lufuma hanji upite hanga alihulikile mu mulimo wa Yehova. Yika yakukwasa mandumbu jetu hanga anunge ni chiseke mu mulimo wa Yehova? Zango lio hali Zambi ni ufulielo wo ukolo ha yilakenyo yenyi. Ayo kananyingika ngwo, Zambi makawahisa tuvumbi twenyi ashishika ni mwono wa mutolo hashi haha, haze kuhechi kapwa kalimbalimba.​—Tanga Samu 37:​5, 7, 9, 29.

17. Kuchi muhasa kununga kukolesa ufulielo we, nawa yika mutulilongesa ha mutwe uze muusalaho?

¹⁷ Mu mutwe uno, twamono chize ufulielo uli “kulisela chinyingi cha yuma yize anayitalatala.” Mba tupwe ni ufulielo wacho, twatamba kulemba kuli Yehova ni kununga kupukuna ha yiwape yenyi. Chocho, mutupwa ni uhashi wa kunyongonona yihungumiona yeswayo muyisoloka. Mutwe uze muusulaho mutulilongesa yize yinalumbunuka kupwa ni ufulielo.