LONGESO 49
Kuchi Muhasa Kupwa ni Uwahililo mu Usoko?—Chihanda 1
Atu waze machilimbata, kakuzanga kupwa ni uwahililo uzewene evwile ha tangwa litangu lia umbachiso. Chino muchihasa kulingiwa, mumu akwa-Kristu waze hanalimbata ha miaka yinji kananyingika ngwo, nyi masa tachi hanga akaule chiyulo cha mu Mbimbiliya, chino muchihasa kulingiwa.
1. Chiyulo chika Mbimbiliya yakuhana kuli malunga?
Yehova hanatongola lunga hanga apwe mutwe wa usoko. (Tanga A-Efwesu 5:23.) Iye kanazange hanga lunga akwate yiyulo yize muyiyukisa usoko wenyi. Mbimbiliya yakutoweza malunga hanga anunge ni ‘kuzanga akwo-mapwo.’ (A-Efwesu 5:25) Yika maliji wano analumbunuka? Lunga yoze ukwete zango kakutwama kanawa ni pwo lienyi chipwe muze ali ku zuwo hanji ha mbunga. Kakumufunga ku manyonga ni kusa tachi hanga amulise ku musunya. (1 Timoteu 5:8) Chahiana ulemu, iye kakumufunga ku ufulielo. (Mateu 4:4) Chakutalilaho, lunga mahasa kulemba ni kutanga Mbimbiliya ni usoko wenyi. Lunga kakukolesa usepa wenyi ni Yehova muze akufunga kanawa mukwo-pwo.—Tanga 1 Petulu 3:7.
2. Chiyulo chika Mbimbiliya yakuhana kuli mapwo?
Liji lia Zambi liakwamba ngwo, pwo katamba ‘kuvwila woma [kuvumbika] mukwo lunga.’ (A-Efwesu 5:33) Kuchi iye mahasa kuchilinga? Ha kunyonga ha yitanga yipema ya mukwo-lunga ni tachi jize akusa hanga amufunge hamwe ni ana jenyi. Iye mahasa nawa kuchilinga, ha kutayiza yiyulo yize mukwo-lunga makwata, kuhanjika nenyi ni vumbi ni kuhanjika kanawa hali iye chipwe ngwe keshi kuwayila Yehova.
3. Kuchi waze alimbata mahasa kukolesa ulo wo?
Mbimbiliya yakwamba hali waze alimbata ngwo: “E aali kumakapwa musunya umuwika.” (Mateu 19:5) Chino chinalumbunuka ngwo, katamba kusa tachi hanga ahone kulihandununa. O kakuchilinga ha kupalikisa mashimbu anji hamuwika ni kulilweza yize mutu ni mutu akunyonga. O kakulemesa chinji Yehova kuhiana mutu mweswawo hanji chuma cheswacho. Kakusa nawa tachi hanga ahone kusolola zango lia ulo kuli mutu mweka.
NYINGIKA NAWA
Tala chize shimbi ja mu Mbimbiliya mujihasa kukolesa ulo we.
4. Malunga—zangenu mapwo jenu ni kwafunga kanawa
Mbimbiliya yakwamba ngwo, malunga katamba “kuzanga akwo-mapwo chizechene ngwe mijimba yoene.” (A-Efwesu 5:28, 29) Yika maliji wano analumbunuka? Tala CHINEMA, mba nushimutwine chihula chinahateho.
Kuchi lunga mahasa kusolola ngwenyi, kakuzanga mukwo pwo ni kulihulumba hali iye?
Tanga A-Kolosu 3:12, mba nushimutwine chihula chino:
Kuchi lunga mahasa kusolola yitanga yino mu ulo?
5. Mapwo—zangenu malunga jenu ni kwavumbika
Mbimbiliya yakukolweza pwo hanga avumbike mukwo-lunga chipwe ngwe kakuwayila Yehova hanji ka. Tanga 1 Petulu 3:1, 2, mba nushimutwine yihula yinahateho:
Nyi mukwenu-lunga keshi kuwayila Yehova, kwamba pundu, unazange hanga aputuke kuchilinga. Ku nyonga lie, yika muyihasa kumukwasa, shina kumwambulwila sango lipema matangwa eswe nyi kumuvumbika? Mumu liaka?
Pwo ni lunga mahasa kukwata yiyulo yipema hamuwika. Alioze, ha mashimbu amwe pwo mahasa kuhona kutayiza nyonga lia mukwo-lunga. Pwo mahasa kusolola manyonga jenyi ni vumbi, alioze katamba kwiwuluka ngwenyi, Yehova hanahana chiteli kuli lunga cha kukwata yiyulo yize muyiyukisa usoko wenyi. Chino muchimukwasa kuneha sambukila ku zuwo. Tanga 1 Petulu 3:3-5, mba nushimutwine chihula chino:
Kuchi Yehova akwivwa muze pwo akuvumbika mukwo-lunga?
6. Muhasa kukumba kapinda mu ulo we
Kukwatwamine ulo ungunu. Alioze, waze alimbata katamba kukalakala chimuwika hanga akumbe kapinda mweswawo masoloka mu ulo wo. Tala CHINEMA, mba nushimutwine yihula yinahateho.
Kulita ni chinema, yuma yika yasolola ngwo, pwo ni lunga te kasolo kulivwashana?
Yuma yika o alinga mba akolese ulo wo?
Tanga 1 A-Korindu 10:24 ni A-Kolosu 3:13, mba nushimutwine chihula chino:
Kuchi kukaula yiyulo yino muchihasa kukolesa ulo?
Mbimbiliya yakwamba ngwo, twatamba kulilemesa umwe ni mukwo. Kulilemesa chinalumbunuka kulivumbika umwe ni mukwo. Tanga A-Roma 12:10, mba nushimutwine chihula chino:
Shina lunga hanji pwo katamba kushimbwila hanga mukwo aliange kumulemesa? Mumu liaka wakumbulula chocho?
ATU AMWE KAKWAMBA NGWO: “Yuma yalumuka chinji mu ulo wetu, kuyishi nawa ngwe chize yapwile.”
Kuchi muhasa kulumbununa chize Mbimbiliya muyihasa kukwasa ha chikuma chacho?
YIZE WALILONGESA
Pwo ni lunga mahasa kuwahilila mu ulo nyi kakulizanga, kulivumbika ni kukaula shimbi ja mu Mbimbiliya.
Kuhitulula
Kuchi lunga mahasa kukwasa hanga apwe ni uwahililo mu ulo?
Kuchi pwo mahasa kukwasa hanga apwe ni uwahililo mu ulo?
Nyi hiunambata, shimbi yika ya mu Mbimbiliya yize muyihasa kukukwasa kukolesa ulo we?
HENGWOLA NAWA
Lilongese yikuma yize muyihasa kukukwasa kupwa ni wahililo mu ulo.
Tala chinema cha mwaso chize chinasolola yiwape yakwiza ha kukaula yiyulo ya Zambi mu ulo.
Tala yize yinalumbunuka kuzeyela kuli lunga ngwe mutwe wa mu usoko.
“Mumu Liaka Pwo Atamba Kuzeyela ku Wata?” (Kaposhi wa Kutalila 15 wa Maio, 2010)
Tala chize yiyulo ya mu Mbimbiliya muyihasa kukwasa waze alimbata.