LONGESO 46
Mumu Liaka Watamba Kulihana Kuli Yehova ni Kukupapachisa?
Lihane kuli Yehova ha kulemba kuli iye ni kumulakenya ngwe, muwayila wika iye ni kusa upale wenyi kulutwe lia yuma yeswe. (Samu 40:8) Hachino, maahasa kukupapachisa. Muze makupapachisa, musolola ku mbunga ngwe walihana kuli Yehova. Kulihana kuli Yehova chili chiyulo chilemu chinji chize muchalumuna mwono we. Mba yika muyihasa kukukwasa kukwata chiyulo chino chilemu?
1. Yuma yika yakukwasa mutu kulihana kuli Yehova?
Zango, lie liakutukwasa kulihana kuli Yehova. (1 Yoano 4:10, 19) Mbimbiliya yakutulweza ngwo: “Ukazange Mwene Zambi ye ni mbunge ye yeswe, ni mwono we weswe, ni kunyonga che cheswe, ni ngolo je jeswe.” (Marku 12:30) Twakusolola ngwetu twakuzanga Yehova mu yitanga hi mu maliji wika ko. Chizechene ngwe lunga ni pwo malizanga mba malimbata, zango lietu kuli Yehova nelio liakutukwasa kulihana kuli iye ni kutupapachisa.
2. WYiwape yika Yehova akuhana kuli Yela jenyi akupapachisa?
Muze makupapachisa, muopwa mu usoko wa Yehova uze ukwete uwahililo. Muhasa kumona zango lia Yehova hali yena ni kukundama chinji kuli iye. (Tanga Malakia 3:16-18.) Mumona Yehova ngwe Tatenu wa zango, chikwo nawa, muopwa mukachi ka usoko wa mandumbu a hashi heswe azanga Yehova ni yena. (Tanga Marku 10:29, 30.) Alioze, watamba kulinga yuma yimwe mba akupapachise. Watamba kulilongesa hakutwala kuli Yehova, kumuzanga ni kufuliela muli Mwanenyi. Kusulaho, watamba kulihana kuli Yehova. Nyi walinga yuma yino ni kukupapachisa, chino muchikukwasa kuwahilila ku mwono ndo ku miaka ya mutolo. Liji lia Zambi linambe ngwo: ‘Upapachiso wakulamwina.’—1 Petulu 3:21.
NYINGIKA NAWA
Nyingika mumu liaka chili chilemu kulihana kuli Yehova ni kukupapachisa.
3. Tulieswe twatamba kusakula yoze mutulingila
Ku Izalele ya ku shakulu, atu kapwile ni kunyonga ngwe mahasa kuwayila Yehova ni Mbale hamuwika. Alioze, Yehova yatuma profeta wenyi Eliya hanga olole nyonga liacho lipi. Tanga 1 Mianangana 18:21, mba nushimutwine chihula chino:
Yuma yika A-Izalele te atamba kusakula?
Ni yetu twatamba kusakula yoze mutulingila ngwe chize A-Izalele alingile. Tanga Luka 16:13, mba nushimutwine yihula yino:
Mumu liaka kutwatambile kuwayila Yehova aku tunawayila umwe mutu hanji chuma?
Kuchi mutuhasa kusolola kuli Yehova ngwetu, twasakula kuwayila wika iye?
4. Pukuna ha zango lia Yehova hali yena
Yehova hanatwehe yawana yinji yipema. Mba etu yika mutuhasa kumwaha? Tala CHINEMA.
Mu majila aka waze Yehova asolwele zango lienyi hali yena? Tanga Samu 104:14, 15 ni 1 Yoano 4:9, 10, mba nushimutwine yihula yino:
Chawana chika cha Yehova chize wakusakwilila chinji?
Yika wakunyonga hali Yehova ha kukwaha yawana yacho?
Muze twakutambula chawana chize twazanga chinji, twakuzanga kusakwilila mutu yoze watwahacho. Tanga Shimbi Yamuchiali 16:17, mba nushimutwine chihula chino:
Muze wakunyonga ha yuma yize Yehova hanakulingila, yuma yika wakuzanga kumwaha?
5. Kulihana kuli Yehova, chakuneha yiwape yinji
Atu anji kakunyonga ngwo, lufuma, mulimo upema hanji kupwa ni mbongo jinji, ye muyanehena uwahililo. Shina chino chili chamwenemwene? Tala CHINEMA, mba nushimutwine yihula yinahateho.
Kulita ni chinema, mumu liaka ndumbu Andrey echele kwasa konda se kapwile ni kuyizanga?
Iye kechele kwasa konda hanga alihane kuli Yehova. Ku nyonga lie, shina iye kakwachile chiyulo chipema? Mumu liaka?
Shimbu postolo Paulu te kanda achipwa mukwa-Kristu, kapwile ni uhashi wa kufumbuka ku mwono. Kalilongesele chinji shimbi ja A-Yunda ni malongeshi alemu. Alioze yecha yuma yacho, yapwa mukwa-Kristu. Shina Paulu kalisehele ha chiyulo chize akwachile? Tanga A-Fwilipu 3:8, mba nushimutwine yihula yino:
Mumu liaka Paulu apwile ni kumona yuma yize te akulinga shimbu te kanda achipwa mukwa-Kristu ngwe “yiswaswa”?
Mba yika iye ayukile?
Shina watamba kutesa kulingila Yehova ni mulimo weswawo uze muhasa kupwa nawo ku mwono?
Muze Paulu apwile mukwa-Kristu, kayukile yuma yinji kuhiana yize atokesele
ATU AMWE KAKWAMBA NGWO: “Kuwafupiwile kulihana kuli Zambi. Chuma chilemu kulivwisa wika kuwaha.”
Ku nyonga lie, mumu liaka chili chilemu kulihana kuli Yehova?
YIZE WALILONGESA
Zango liakutukwasa kulihana kuli Yehova ni kutupapachisa.
Kuhitulula
Mumu liaka Yehova atela zango ni uwayilo wetu?
Kuchi Yehova akuyukisa Yela jenyi waze akupapachisa?
Shina unazange kulihana kuli Yehova?
HENGWOLA NAWA
Tala mumu liaka umwe ngimba ni umwe mukwa-kwasa konda akwachile chiyulo cha kulihana kuli Yehova.
Yize Akweze Akuhula—Yika Mungulinga ku Mwono Wami?—Kutala Kunyima (6:54)
Nyingika yikuma yikwo yize muyihasa kukukwasa kulihana kuli Yehova.
“Mumu Liaka Natamba Kulihana Kuli Yehova?” (Kaposhi wa Kutalila 15 wa Janeiro, 2010)
Ha chinema chino cha mwaso, tala uwahililo akupwa nawo atu waze akulihana kuli Yehova.
Ha lusango wakwamba ngwo “Napwile ni Kulihula ha Miaka Yinji Ngwami: ‘Ulemu wa Mwono Uka?’” tala yize yakwashile umwe pwo kusakula yuma yahiana ulemu ku mwono wenyi.
“Mbimbiliya Yakwalumuna Mwono wa Atu” (Kaposhi wa Kutalila 1 wa Novembro, 2012)