Usolwelo wa Yitangiwa ya mu Malilu

“Ngunja ayisele mwilu, ni ha ngunja umwe unatwamaho. Yoze watwaminoho kalifwa ni liwe lia jasepe ni sartiu: kongolo ha kujingilika ngunja, kalifwa ni esmeralda.”—Usolwelo 4:2, 3.

“Kweswe kwa kumujingilika kwapwile kupanguka. Kulifwa cha pangu lize lia jingilikile chapwile ngwe kongolo yoze uli mu lelwa ha tangwa lia vula. chocho chapwile kusoloka cha kulifwa cha uhenya wa Yehova.”—Ezekiele 1:27, 28.

Usolwelo uno, ahanyine kuli postolo Yoano ni profeta Ezekiele, wasolola uhenya wa Chitunda mwe Zambi, Yehova, ha kuzachisa yuma yize mutuhasa kumona—ngwe liwe lia kulejima, kongolo, ni ngunja ya wata. Ayo kanatulweza ngwo muma atwama Yehova mwa kukola woma chinji, kupema, nawa mwatwama sambukila.

Yuma yeswayi yinahanjika hali Zambi, yinalite ni maliji a mukwa-kwimba masamu yoze wasonekene ngwenyi: “Yehova munene, chatamba kumuhalisa chikolo. Chatamba kumuvwila woma kuhiana tuzambi tukwo tweswe. Mumu tuzambi twa mavungu twapwa yuma yamokomoko alioze Yehova iye tangi ya malilu. Uhenya ni ulamba watwama ku meso jenyi; tachi ni upeme watwama muma mwenyi musandu.”—Samu 96:4-6.

Yehova kanatusanyika hanga tukundame kuli iye mu yilemba, mumu kali Chitunda, nawa katulakenya ngwenyi, mapwa ni kwivwa kulemba chetu. (Samu 65:2) Zambi kakutuzanga nawa kakutufunga, kashika postolo Yoano asonekene ni ushindakenyo weswe ngwenyi: “Zambi iye zango.”—1 Yoano 4:8.

“[Kambaji mukwa-Kristu Eshetevau], wa too ni Spiritu Musandu, yahulikila mwilu, yamona uhenya wa Zambi, ni Yesu kanamana ku chindume cha Zambi. Mba yamba ngwenyi, Talenu, ngunamono malilu akwazulula, ni mwe Mwana Mutu kanamana ku chindume cha Zambi.”—Yilinga 7:55, 56.

Muze te Eshetevau kanda achitambula usolwelo uno, Yesu kamushihile kuli atu wawene amuwika apwile ni kuhanjika no Eshetevau—mangana ja A-Yunda. Usolwelo wacho washindakenyene ngwo Yesu te kali ni mwono nawa ngwo kanakamuhindwisa ku afu, mba hatambula uhenya. Hakutwala ha chino postolo Paulu yasoneka ngwenyi: ‘[Yehova] kahindwishile [Yesu] hakachi ka afu, ni kumutwamisa ku kwoko lienyi lia chindume mu malilu, helu lia mawanangana eswe ni yiyulo yeswe, ni tachi jeswe, ni wene weswe, ni majina eswe waze anaavuluka hi ha mwaka uno wika ko, alioze ha uze muwizaho nawa.’—A-Efwesu 1:20, 21.

Kuchizako ulumbunwiso uno wa ulemu wenyi, Yisoneko yakusolola nawa ngwo Yesu ni Yehova kali ni mbunge yakuzanga chinji kufunga atu. Muze Yesu apwile hano hashi, kaukile mieji ni yilema ni kuhindwisa afu. Ha mukunda wa chitapo cha kufwa chenyi, iye kasolwele zango lienyi hali Zambi ni hali atu. (A-Efwesu 2:4, 5) Ha kumana ku kwoko lia chindume lia Zambi, kwasala hakehe hanga Yesu azachise ndundo jenyi ni kuneha yiwape yinji kuli atu eswe waze akwononoka.

“Ami [profeta Daniele], shimbu munguchitala, aseleko ngunja, ni umwe jina lienyi Mukulu-wa-Matangwa [Yehova] kanatwamaho. . . . Kanunu ka tununu amuvumbikile, ni kumi lia tununu twa yisuho ya kumi lia tununu amanyine kumeso jenyi.”—Daniele 7: 9, 10.

Ha usolwelo uno wa malilu, Daniele kakamwene wika mungelo umuwika, alioze kamwene mbunga ya angelo. Usolwelo uno wapwile wakukomwesa! Angelo kali yitangiwa ya spiritu, kakwete mana nawa kakwete ndundo jinji. Mu yizavu yo mwatwama a serafime ni akerupimi. Mbimbiliya yakuhanjika hali angelo yisuho 250.

Angelo hi atu waze ko atwamine hano hashi ku shakulu. Zambi katangile chitangu angelo mba neko atu amusunya. Ha kusa fundamento ya hashi, angelo kapwile ni kutala, ni kulikwiza ni chiseke.—Yombi 38:4-7.

Jila yimwe yize angelo akulingilamo Zambi, yili ya kukwasa mulimo ulemu unalingiwa hano hashi ha mashimbu wano—wa kwambujola sango lipema lia Wanangana wa Zambi. (Mateu 24:14) Ukwaso wo ha mulimo uno, kausolwele kuli postolo Yoano, hakusoneka ngwenyi: “Namwene mungelo mukwo kanahumuka mukachi ka lilu, kali ni sango lipema lia mutolo mukwambujola kuli akwa hashi, ku mavungu eswe, ni ku minyachi yeswe, ni ku malimi eswe, ni kuli atu eswe.” (Usolwelo 14:6) Chipwe ngwe musono angelo keshi kuhanjika ni atu ngwe chize apwile ni kulinga kumatangwa akunyima, nihindu kakusongwela akwa-kwambujola sango lipema kuli atu waze akwete mbunge yipema.

“Mwapwile jita mwilu. Mikele [Yesu Kristu ] ni angelo jenyi ashile jita ni ndragau; ni ndragau ni angelo jenyi ashile jita; alioze kakumbileko chipwe chihela cho kachiwanyine nawa mwilu. Ndragau munene amunyashine hashi, mwe kapela wa shakulu, jina lienyi ngwo, Ndiapu kanda Satana, mwe mukwa kupiangula yifuchi yeswe ya hashi. Amunyashine ndo hashi, ni angelo jenyi hamwe nenyi.”—Usolwelo 12:7-9.

Mu malilu mwakapwile sambukila. Muze mwene atangile mutu hano hashi, umwe mungelo yapwa ni nyonga lia kuzanga amuwayile, mba yehuka Yehova, ni kulipwisa mwene Satana, kulumbunuka ngwo “Chimika.” Mba hakupalika cha mashimbu angelo akwo yalichinga nenyi ni kulimika ni Yehova mba yapwa andemoniu. Ha upi wo, yaalimika ni Yehova ni kulingisa atu ahone kushishika ku usongwelo wa zango wa Yehova.

Satana ni angelo jenyi kali atu api nawa kakwete uswi unji. Ayo kali akwa-kole ja atu nawa e akuneha lamba linji hano hashi. Chakutalilaho, Satana kashihile yimuna ni tuvumbi a lunga washishika Yombi. Yashaha nawa ana jenyi kumi ni umwe “chijimbi munene” yoze wapuzwile zuwo lize apwilemo. Satana yalamba nawa Yombi ni “mahute api, chize ku yiliato ndo ha mbanda-mutwe.”—Yombi 1:7-19; 2:7.

Kwasala hakehe, Satana kumamwonwona. Kukatuka hazehene amunyashine hano hashi, iye kananyingika kanawa ngwenyi “mwaka ukepe wika ali nawo.” (Usolwelo 12:12) Satana hanamupatwila. Ali lili sango lipema chinji!

“Yena . . . [Yesu] walanjile kuli Zambi ni manyinga je, amwe a ku mavungu eswe, ni ku malimi eswe, ni kuli atu eswe, ni ku minyachi yeswe, mba wapwishile kuli Zambi yetu wanangana ni asasendote, mba kumakayula hashi.”—Usolwelo 5:9, 10.

Ngwe chize ahindwishile Yesu ku ufwe ni kumwaha mwono wa mu malilu, kuli akwo nawa waze makahindwisa. Yesu yalweza apostolo jenyi ashishika ngwenyi: ‘Ngunayi mukunululikila muhela. Mungwiza cheka nawa, mungukanutambula kuli yami mwene: hanga kuze yami nguli, kuzekwene ni yenu nawa nukapwe.’—Yoano 14:2, 3.

Waze akuya mu malilu kali ni chitela chize akuyilamo. Hamuwika ni Yesu, ayo makalinga umwe unguvulu wa Mianangana uze muukayula hashi heswe ni kuneha yiwape kuli atu eswe. Uno we Wanangana Yesu alwezele tumbaji twenyi apwe ni kulemba, ngwo: “Tata nuli mu malilu, jina lienu lipwe lisandu. Wanangana wenu wize. Upale wenu ulingiwe hashi chizechene ngwe unalingiwa mwilu.”—Mateu 6:9, 10.

“[Yami Postolo Yoano] nevwile liji linene liakukatuka mwilu ngwo, Talenu, zuwo lia Zambi lili hamwe ni atu, . . . Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.”—Usolwelo 21:3, 4.

Usolwelo uno wa uprofeto unamika ha mashimbu waze Wanangana wa Zambi, uze akusongwela kuli Yesu ni kuli waze akuhindwisa ni kuya mu malilu, muukanongesa chiyulo cha Satana ni kupwisa hashi paraisu. Yuma yize yakuneha yinyengo ni yikola kuli atu kuyichikapwako nawa. Chipwe kufwa makachichizaho.

Mba yika mutwamba ha tununu a tununu twa atu waze hanafu, waze keshi ni kutalatala cha kuya mu malilu? Ha amwe mashimbu a kulutwe, noo makaahindwisa hanga akapwe ni kutalatala cha mwono wa mutolo mu Paraisu hano hashi.—Luka 23:43.