Tangwa lia Upatwilo—Yika Linalumbunuka?

KUCHI wakunyonga hakutwala ku Tangwa lia Upatwilo? Atu anji kakunyonga ngwo mutu ni mutu makamutwala ku ngunja ya Zambi. Ngwo kwenako makasopesa mutu ni mutu. Ngwo amwe makaya mu malilu akwo ngwo makaambila mu mukahia ka mutolo. Alioze, Mbimbiliya kuyishi kulongesa chocho hakutwala ku Tangwa lia Upatwilo. Liji lia Zambi linasolola shimbu liacho ngwo hi shimbu lia kuvwisa woma ko, alioze shimbu lipema nawa lia uwahiso wa yuma.

Ha mukanda wa Usolwelo 20:11, 12, postolo Yoano kanasolola Tangwa lia Upatwilo ngwenyi:“Namwene ngunja yinene yitoma, ni yoze watwamineho, kumeso jenyi lilu ni hashi yachinyine; kuyawanyine chihela. Namwene afu, anene ni akepe, kanamana kulutwe lia ngunja. Apakwile mikanda, mba apakwile mukanda ukwo, uze wa mwono. Apatwilile afu ku yuma yize yasonewene mu mikanda, nikulita ni yitanga yo.” Ngaji anasolola ha chisoneko chino iya?

Yehova Zambi mwe Ngaji munene wa atu. Chipwe chocho iye hanahana mulimo wa upatwilo kuli mutu yoze makaulinga. Kulita ni Mukanda wa Yilinga 17:31, postolo Paulu kambile ngwo: “Hanasela lie tangwa muze makasopesa akwa yifuchi yeswe ya hashi mu ululi kuli mwe lunga yoze hanamuselacho.” Ngaji wacho kali Yesu Kristu yoze ahindwishile ku afu. (Yoano 5:22) Mashimbu aka Tangwa lia Upatwilo mulikaputuka? Mashimbu angahi mulikalinga?

Mukanda wa Usolwelo unasolola ngwo Tangwa lia Upatwilo muliputuka ha kuhwa cha jita ya Armagedone, muze makanongesa yuma yeswe yipi ya Satana hano hashi.a (Usolwelo 16:14, 16; 19:19–20:3) Ha kuhwa cha Armagedone, Satana ni andemoniu jenyi makaakasa ni kwaasa mu jondo ha kanunu ka miaka. Ha mashimbu jacho atu 144,000 makapwa mu malilu hanga akapwe ngaji ni ‘kuyula hamwe ni Kristu ha miaka 1,000. (Usolwelo 14:1-3; 20:1-4; A-Roma 8:17) Tangwa lia Upatwilo kulichi kapwa tangwa lia 24 a maola. Alioze mulikalinga kanunu ka miaka.

Ha unji wa kanunu wacho wa miaka, Yesu Kristu ‘makapatwila akwa mwono ni afu.’ (2 Timoteu 4:1) ‘Akwa mwono makapwa “Mbunga yinene” yize makalamwina ha Armagedone. (Usolwelo 7:9-17) Postolo Yoano kamwene nawa “afu . . . kanamana kulutwe lia ngunja” lia upatwilo. Ngwe chize Yesu alakenyene, ni uhashi wa uhindukilo, atu “eswe ali mu mafuka makevwa liji lienyi, makatuhuka.” (Yoano 5:28, 29; Yilinga 24:15) Upatwilo wacho kuchi muukapwa?

Kulita ni usolwelo wa postolo Yoano, “apakwile mikanda,” ni ‘afu apatwilile ku yuma yize yasonewene mu mikanda, nikulita ni yitanga yo.’ (Usolwelo 20:12) Shina mikanda yacho hali yitanga yikulu yize atu alingile? Ka, atu kechi kaapatwila kulita ni yuma yize alingile muze te kanda achifwa. Kuchi tunachinyingika? Mbimbiliya yinambe ngwo: “Mumu mutu nyi hanafu hanatusuka ku shili.” (A-Roma 6:7) Waze makahinduka makapwa ni mwono uze kuushi ni mulonga wa shili niumwe. Ha chino, mikanda yacho muyihasa kulumbunuka shimbi jikwo ja Zambi ja kulutwe lia matangwa. Mba akatwame ni mwono wa miaka yeswe, waze makasala ni mwono ha Armagedone ni waze makaahindwisa, eswe ndo akononokene ku shimbi ja Zambi, hamwe ni shimbi jeswajo jaha jize Yehova makahana ha kanunu ka miaka. Chochene, atu makapatwila nikulita ni yuma yize makalinga ha mashimbu ja Tangwa lia Upatwilo.

Ha mashimbu a Tangwa lia Upatwilo tununu twa atu makapwa ni uhashi wo utangu wa kunyingika upale wa Zambi ni kutwama nikulita ni shimbi jenyi. Chino chinalumbunuka ngwo mukukapwa mulimo unene wa kulongesa atu. Chochene, ‘atu makalilongesa ululi.’ (Izaia 26:9) Chipwe chocho hi atu eswe ko makatwama nikulita ni upale wa Zambi. Mukanda wa Izaia 26:10 unambe ngwo: ‘Chipwe masolola vumbi kuli chingulungulu, nihindu iye kechi kalilongesa ululi. Mu chifuchi chalulama kechi kalinga ululi, nawa kechi kamona uhenya wa Yehova.’ Mashimbu a Tangwa lia Upatwilo yingulungulu makaanongesa mba kechi kaahindwisa nawa.—Izaia 65:20.

Kusongo lia Tangwa lia Upatwilo, atu waze makasala ni “mwono” makapwa atu angunu. (Usolwelo 20:5) Mashimbu a Tangwa lia Upatwilo, atu makaawahisa hanga akapwe angunu. (1 A-Korindu 15:24-28) Mba hi mukukapwa cheseko chakasula. Satana makamutusula mu zuwo lienyi lia ususu ni kumutayiza apiangule atu ha chisuho chakasula. (Usolwelo 20:3, 7-10) Waze makalimika nenyi makazuka chilakenyo cha mu Mbimbiliya chize chinambe ngwo: “Akwa ululi kumakazuka chifuchi, kumakatwamamo ku miaka ya mutolo.” (Samu 37:29) Chochene, Tangwa lia Upatwilo mulikapwa tangwa lipema chinji kuli atu eswe waze ashishika!