Yilwekelo ya Malongeso a Mukanda Wakuzachisa ha Kukunguluka cha Mwono Wetu ni Mulimo Wetu
6-12 MAIO
YIKUMA YILEMU YA MU LIJI LIA ZAMBI | 2 A-KORINDU 4-6
“Kutushi Kulezumioka”
(2 A-Korindu 4:16) Kashika kutushi kulezumioka; alioze kachi chamwenemwene mutu wetu wa haze unatepuluka hindu tangwa ha tangwa kakupwisa mwaha mwe mutu wa muchima.
w04 15/8 25 ¶16-17
Kanda Ulezumioka Chipwe Ngwe Unahongo
16 Kufunga ufulielo wetu chili chilemu. Nyi tuli ni usepa upema ni Yehova Zambi, mutuhasa kuhonga ku musunya, alioze tuchi kuhonga kumuwayila. Yehova “kakuhana ngolo kuli mukwa kulezumuka, kakuwezela tachi kuli yoze keshi ndundo.” (Izaia 40:28, 29.) Postolo Paulu, yoze wamwene umanunuko wa maliji wano yasoneka ngwenyi: “Kutushi kulezumioka; alioze kachi chamwenemwene mutu wetu wa haze unatepuluka hindu tangwa ha tangwa kakupwisa mwaha mwe mutu wa muchima.”—2 A-Korindu 4:16.
17 Tala liji lize anazachisa ngwo, “tangwa ha tangwa.” Liji lino linasolola ngwo, twatamba kuyuka matangwa eswe ha ukwaso uze Yehova akutwaha. Umwe ndumbu wa pwo yoze wakalakalile ni ushishiko weswe ngwe Mishionaliu ha 43 a miaka, kapwile ni kupinda ni yikatalo ya kuhonga ha mashimbu anji, chipwe chocho kakechele kuwayila Yehova. Yamba ngwenyi: “Yingupwa ni ndako ya kuhinduka chimenemene, hachino, shimbu kanda nguchilinga mulimo weswewo, te nakuchiza mashimbu hanga ngulembe kuli Yehova ni kutanga Liji lienyi. Ndako yino, ye yakungukwasa kunyongonona ndo musono.” Mutuhasa kujikijila ha ndundo ja Yehova nyi twapwa ni ndako ya kulemba “tangwa ha tangwa” ni kupukuna ha yitanga ni yilakenyo yenyi.
(2 A-Korindu 4:17) Mumu lamba lietu lilelu, lia kashimbu kano kakepekepe, akulinga hali yetu kulumbama chahiana cha uhenya wa mutolo;
it-3 256
Kunyongonona
Chili chilemu nawa kunyongonona ha kutalatala chetu cha mwono wa mutolo mu paraisu, muze kutuchi kapwa nawa ni shili. Chipwe ngwe akwa-kole jetu matushiha, hindu kutalatala chetu kuchishi kuhwa. (Ro 5:4, 5; 1Te 1:3; Uso 2:10) Lamba lize twakumona haliapwila lili likepe nyi twalitesa ni umanunuko wa yilakenyo yino ya mwono wa mutolo. (Ro 8:18-25) Nyi twanyonga ha mwono wa mutolo uze mutukapwa nawo, mutuhasa kunyongonona ha lamba lieswalio, chipwe ngwe lili linji, alioze ‘lia kashimbu kakepe.’ (2Ko 4:16-18) Kwiuluka ngwetu, yeseko yino yili ya kashimbu kakepe ni kukakaminya ha kutalatala chetu, muchitukwasa tuhone kuhonga ni kwehuka Yehova Zambi yetu.
(2 A-Korindu 4:18) se kutushi kutala ha yuma yize yakumoneka, alioze ha yuma yize kuyamonekene: mumu yuma yize yakumoneka, ya shimbu wika, alioze yize kuyamonekene, ya mutolo.
Kuhengwola Yikuma Yilemu ya mu Mbimbiliya
(2 A-Korindu 4:7) Alioze chuma chino chahiana ndando tuli nacho mu yikwachilo ya uma, hanga kuhiana cha tachi chikapwe cha kuli Zambi, hi cha kuli yetwene ko.
w12 1/2 28-29
“Ivwisa Yehova Kuwaha”
David Splane wa mu Chizavu cha Tusongo, kahanjikile ha mutwe wa mu Chisoneko chino. (2 A-Korindu 4:7) Chuma chize anasolola mu versu yino yika chinalumbunuka? Shina chili chinyingi, nyi mana? David Splane yakumbulula ngwenyi, “Ka.” Chuma chize Paulu ambile chili, “uvumbiko” wa “kwambulula umwenemwene.” (2 A-Korindu 4:1, 2, 5) Ndumbu Splane yeulula alongi ngwo, tukweji atano waze alinga ha kulilongesa, kaakwasa hanga alinge kanawa mulimo wo wa shimbu lieswe mu munda. Nawa ngwo katamba kulemesa chinji mulimo wacho.
Ndumbu Splane yamba nawa ngwo, “yikwachilo ya uma” yinalumbunuka mujimba wetu wa musunya. Yatesa yikwachilo ya uma ni yikwachilo ya oru. Yikwachilo ya oru keshi kuyizachisa chinji. Alioze yikwachilo ya uma, kakuyilinga hanga ayizachise matangwa eswe. Nyi twasa chuma mu chikwachilo cha oru, mutuhasa kulihulikila wika ha chikwachilo chacho, kuhiana ha chuma chize twasamo. Ndumbu Splane yamba nawa ngwenyi, “Yenu kunwatambile kulihulikila hali yenwene. Amu nuli mishionaliu, nwatamba kukwasa atu hanga alemese Yehova. Yenu nwakulikehesa, nuli ngwe yikwachilo ya uma.”
(2 A-Korindu 6:13) Ha kukundulula chino (ngunahanjika ngwe kuli ana jami), mbunge jenu jikatohe nawa.
w09 15/11 21 ¶7
Nungenu ni Kukolesa Zango lia Undumbu
7 Yika mutwamba hali yetu? Kuchi mutuhasa ‘kutohwesa mbunge jetu’ ha kusolola zango lia undumbu? Kota chakupwa chashi atu waze ali ni miaka yimwika hanji a ku vungu limuwika kulizanga umwe ni mukwo. Nawa atu waze akuzanga kulinga yuma yimuwika kanji-kanji kakuzanga kupalika mashimbu hamuwika. Alioze nyi yuma yize twakuzanga muyituhandununa ni mandumbu akwo, twatamba ‘kutohwesa mbunge yetu’ hanga tusolole zango lia undumbu. Kashika chili chilemu kulihula ngwetu: ‘Shina kuchishi kuhasa kwambujola hanji kulinga yuma yeka ni mandumbu waze hi masepa jami ko? Mu Zuwo lia Wanangana, shina kuchishi kukundama kuli atu aha, ha kunyonga ngwami, chitangu ayo katamba kusolola yitanga yize ngunazange mba apwe masepa jami? Shina nakumeneka tushinakaji ni akweze?’
Kutanga Mbimbiliya
(2 A-Korindu 4:1-15) Kashika se uvumbiko uno tuli nawo, nikulita ni keke yino hitunawane, kutushi kulezumioka. 2 Alioze hitunalitunu yuma ya kuhengama ya sonyi. Kutwendele ni kalimbavuli, chipwe kutwalongesele liji lia Zambi ni kalimbalimba. Alioze ha kwambulula umwenemwene, twakusoloka kanawa ku mbunge ja atu eswe kumeso ja Zambi. 3 Nyi kachi sango lietu linafukiwa, linafukiwa kuli waze anatoko. 4 Muli ayo zambi ya mwakono hanapupuchisa manyonga ja waze kasolo kufuliela, hanga kupanguka cha Sango Lipema lia uhenya wa Kristu, mwenawo che kulifwa cha Zambi, kuchichi kapanguka hali ayo. 5 Mumu kutushi kuliambujola yetwene, alioze twakwambujola Kristu Yesu iye mwe Mwene, ni yetu ngwe ndungo jenu mumu hali Yesu. 6 Mumu Zambi yoze wambile ngwenyi, Pangu lipanguke mu milima, mwenawo hanapanguka mu mbunge jetu, mukutwaha kupanguka cha chinyingi cha uhenya wa Zambi ku meso ja Yesu Kristu. 7 Alioze chuma chino chahiana ndando tuli nacho mu yikwachilo ya uma, hanga kuhiana cha tachi chikapwe cha kuli Zambi, hi cha kuli yetwene ko. 8 Kakutushata chikolo sali ni sali, hindu kutushi kufwenyoka. Twakukakashana, hindu kutushi kwecha kutalatala chetu. 9 Kakutuhungumiona, hindu Zambi keshi kutwehuka. Twakulambama hashi, hindu kahashile kutwonwona. 10 Matangwa eswe twakumbata mu mujimba wetu kufwa cha Yesu, hanga mwono nawa wa Yesu ukasoloke mu mujimba wetu. 11 Mumu shimbu tuli ni mwono, kakutukunjika ku kufwa matangwa eswe mumu hali Yesu, hanga mwono nawa wa Yesu ukasoloke mu musunya wetu wa kufwa. 12 Chocho kufwa kuchakulinga muli yetu, alioze mwono kuwakulinga muli yenu. 13 Alioze se tuli ni spiritu yimuwika ya ufulielo, nikulita ni chize chinasonewa ngwo, Nafulielele, kashika nahanjikile; ni yetu nawa tunafuliela, kashika twakuhanjika. 14 Tunanyingika yoze wahindwishile Mwene Yesu kristu makatuhindwisa yetu nawa hamwe ni Yesu, kumakatuhetesa kumeso jenyi hamwe ni yenu. 15 Mumu yuma yeswe niyenu, hanga lie vumbi lino linayi nikwoka kuli anji, likalumbamise kusakwila ha uhenya wa Zambi.
13-19 MAIO
YIKUMA YILEMU YA MU LIJI LIA ZAMBI | 2 A-KORINDU 7-10
“Mulimo Wetu wa Kuhana Ukwaso”
(2 A-Korindu 8:1-3) Chikwo nawa mandumbu, tunanunyingika vumbi lia Zambi lize ahanyine ku yikungulwila ya mu Masendonia; 2 mumu mu lamba linji lia yihungumiona kulumbama cha uwahililo wo ni uswale wo wunji walumbamine ku upite wa kuvungumiona cho. 3 Mumu nikulita ni kuhasa cho ha kupala cha ayoene,
w98 1/11 25 ¶1
“Zambi Kakuzanga Chihanyi wa Kusehejela”
Chitangu, Paulu yalweza A-Korindu hakutwala kuli A-Masendonia, waze asolwele chilweza chipema ha kulihana mu mulimo wa kuhana ukwaso. Yasoneka ngwenyi: “Mu lamba linji lia yihungumiona kulumbama cha uwahililo wo ni uswale wo wunji walumbamine ku upite wa kuvungumiona cho.” A-Masendonia kakaashinjilile mba ahane ukwaso. Kashika, Paulu ambile ngwenyi, “aliumbile kuli yetu ni kulemba chinji ha kutwala ku vumbi lino nikulianyina.” Zango lia A-Masendonia liakusoloka chinji ha kunyingika ngwo, chipwe ha “uswale wo wunji” ayo kahanyine.—2 A-Korindu 8:2-4.
Mulimo Wetu wa Kuhana Ukwaso
HA mwaka 46 M.J., mu Yundeya yimupwa zala yinji. A-Yunda waze tumbaji twa Yesu, te keshi ni mbongo ja kulanda kulia. Kapwile ni zala yinji, nawa te mahasa kufwa ha mukunda wa zala yacho. Alioze, te hikwasala hakehe hanga amone ukwaso wa Yehova, mu mutapu uze tumbaji akwo te kanda achimona kama. Yika te muyilingiwa?
(2 A-Korindu 8:4) aliumbile kuli yetu ni kulemba chinji ha kutwala ku vumbi lino nikulianyina ha kukwasa kuli asandu.
Mulimo Wetu wa Kuhana Ukwaso
4 Paulu kasonekene mu mukanda wa Korindu wamuchaali ngwenyi, akwa-Kristu kali ni milimo yaali. Chipwe ngwe mukanda uno kausonekenene wika akwa-Kristu akuwayisa ni spiritu, musono maliji wano kanatale nawa hali “mapanga akwo” a Kristu. (Yoa. 10:16) Chihanda chitangu cha mulimo wetu chili, “uvumbiko wa uwanyino,” hanji mulimo wa kwambujola ni kulongesa atu. (2 Kori. 5:18-20; 1 Timo. 2:3-6) Chihanda chamuchaali cha mulimo wetu chili, ‘uvumbiko wa ukwaso.’ Chekwamba, hano Paulu te kanahanjika ha mulimo wa kuhana ukwaso, uze twakulinga hanga tuhane ukwaso kuli mandumbu jetu akwa-Kristu waze akupalika mu luyinda. (2 Kori. 8:4) Hakutwala ku maliji wano anavuluka ngwo, “uvumbiko wa uwanyino” ni ‘uvumbiko wa ukwaso,’ liji “uvumbiko” kakulilumbununa mu Ngregu ngwo, di·a·ko·niʹa. Mumu liaka chino chili ni ulemu?
5 Ha kuzachisa liji lizeliene lia Ngregu hakutwala ku milimo yino yaali yilemu, Paulu katesele mulimo wa kuhana ukwaso ni milimo yikwo yize te akulinga mu chikungulwila cha akwa-Kristu. Iye kambile ngwenyi: “Kuchili kulipalikila cha uvumbiko, alioze Mwene umuwika. Kuchili kulipalikila cha milimo, alioze Zambi umuwika, yoze wakulingisa yuma yeswe muli eswe. . . . Alioze Spiritu umuwika kakulingisa yino yuma yeswe.” (1 Kori. 12:4-6, 11) Kwamba pundu, Paulu katesele milimo ya mu chikungulwila ni mulimo “usandu.” (Roma 12:1, 6-8) Kashika kutushi kukomoka ha kunyingika ngwo, iye kazachishile mashimbu jenyi “nikuvumbika asandu”!—Roma 15:25, 26.
6 Paulu yakwasa A-Korindu hanga anyingike ngwo mulimo wa kuhana ukwaso unalingi chihanda ku mulimo wo wa kwambujola ni kuwayila Yehova. Iye yamba ngwenyi: Akwa-Kristu waze akuhana ukwaso kakuchilinga mumu “ha kuzeyela cha kutayiza . . . . Sango Lipema lia Kristu.” (2 Kori. 9:13) Akwa-Kristu kakukwasa mandumbu jo a mu ufulielo mumu kakuzanga kukaula longeso lia Kristu. Ngwe chize Paulu ambile, yitanga yo yipema hali mandumbu jo yili yilayi ya “vumbi liahiana lia Zambi.” (2 Kori. 9:14; 1 Petu. 4:10) Hakutwala ku kukwasa mandumbu waze anahono ni mulimo wa kuhana ukwaso, Kaposhi wa Kutalila 1 wa Março, 1976, kambile ngwo: “Twatamba kupwa ni shindakenyo ngwetu, Yehova Zambi ni Mwanenyi Yesu kakulemesa mulimo uno.” Kashika, mulimo wetu wa kuhana ukwaso uli ulemu chinji mu mulimo wetu usandu.—Roma 12:1, 7; 2 Kori. 8:7; Hepre. 13:16.
(2 A-Korindu 9:7) Mutu mweswe akahane nikulita ni chize hanapale mu mbunge yenyi: hi ni wuli ko, hanji ngwe hamukapwola: mumu Zambi kakuzanga chihanyi wa kusehejela.
Kuze Kwakukatuka Mbongo Jize Akukwasa Najo Mulimo wa Wanangana
10 Chitangu, twakuhana milambu kulita ni uhashi wetu mumu twakuzanga Yehova, nawa tunazange kulinga “yuma yize ya kupemena kumeso jenyi.” (1 Yoano 3:22) Yehova kakuwahilila chinji ni mutu yoze wakuhana ni mbunge yeswe. Tutalenu yize postolo Paulu ambile hakutwala ku kuhana cha akwa-Kristu. (Tanga 2 A-Korindu 9:7.) Mukwa-Kristu wamwenemwene keshi kumushinjila mba ahane. Alioze, kakuhana kulita ni “chize hanapale mu mbunge yenyi.” Che kwamba, kakuhana muze manyonga ha yize yinahono kuli mandumbu ni chize mahasa kwakwasa kulita ni uhashi wenyi. Yehova kakulemesa chinji mutu yoze wakulinga chino. Kwamba pundu, “Zambi kakuzanga chihanyi wa kusehejela.” Mbimbiliya jikwo jakwamba ngwo: “Zambi kakuzanga mutu yoze wakuhana ni uwahililo.”
Kuhengwola Yikuma Yilemu ya mu Mbimbiliya
(2 A-Korindu 9:15) Tusakwilenu kuli Zambi ha chawana chenyi chize keshi kuhasa kuchambujola.
w16 15/1 12 ¶2
Echa ‘Chawana cha Zambi Chize Chahiana’ Hanga Chikuyule
2 Paulu te kananyingika ngwenyi ukuule wa Yesu we unatwehe shindakenyo ngwo, yilakenyo yeswe ya Yehova muyikamanunuka. (Tanga 2 A-Korindu 1:20.) Chekwamba, chawana chenyi chahiana hanji “chize keshi kuhasa kuchambujola” chinalumbunuka ukuule wa Yesu ni yuma yeswe ya upeme ni zango lia ushishiko lize Yehova akutusolwela. Chawana chacho chili chikalu kuchilumbunuuna mu maliji ashi. Yika chawana chino chatamba kulinga hali yetu? Nawa kuchi chawana chino chatamba kutukolweza muze tunalilulieka hakutwala ku chiwayino cha kufwa cha Kristu chize muchikalingwa ha tangwa Liamatatu 23 lia Março 2016?
(2 A-Korindu 10:17) “Alioze mweswawo malisamba akalisambe muli Mwene.”
g99 7/8 20-21
Shina Kulizata Chili Chipi?
Mu Yisoneko ya Ngregu ya akwa-Kristu (Novo Testamento), liji kau·khá·o·mai, analumbununa ngwo, “kulizata, kulinangamisa, ni kulisuta,” kakulizachisa mu jila yipema ni mu jila yipi. Chakutalilaho, Paulu kambile ngwenyi, mutuhasa ‘kulisamba ha kusela mbunge ha uhenya wa Zambi.’ Yamba nawa ngwenyi: “Mweswawo malisamba akalisambe muli [Yehova].” (A-Roma 5:2; 2 A-Korindu 10:17) Chino chinalumbunuka kulizata ha kunyingika ngwetu, Yehova kali Zambi yetu. Kulizata chacho muchitukwasa hanga tufumanyise jina lienyi lisandu ni lufuma wenyi.
Kutanga Mbimbiliya
(2 A-Korindu 7:1-12) Kashika se yilakenyo yino tuli nayo, akwetu a zango, tulipemesenu ku luchisa mweswe wa musunya ni spiritu, tukamanunune usandu ni woma kumeso ja Zambi. 2 Tutambulenu mu mbunge jenu. Kutwalingile chipi kuli niumwe, kutwapihishile niumwe, kutwongele niumwe. 3 Chambile chino hanga ngunuhise: mumu hingunambe kulu ngwami, Yenu nuli mu mbunge jetu tukafwe hamuwika, tukatwame ni mwono hamuwika. 4 Hamu linji nguli nalio lia kuhanjika kuli yenu, kulisamba chami chinene ha kutwala kuli yenu. Ngunazala too ni sambukila. Ngunalumbama kuhiana chikolo mu uwahililo mu luyinda wetu mweswe. 5 Mumu chipwe muze twahetele ku Masendonia, mu mijimba yetu kutwahwimine, alioze twapinjile sali ni sali; haze kwapwile kulitachika, muchima mwapwile woma. 6 Hindu Zambi yoze wakutakamisa akwa kuhonga, watuhuzulwile ha kuheta cha Titu. 7 Kuchapwile ngwe kuheta chenyi wika, alioze nawa ni kuwaha chize amuwahishile nacho muli yenu, shimbu atwambulwilile usona wenu, ni kunenganyana chenu ni zango lienu lia tachi kuli yami: chocho nawahililile kuhiana. 8 Mumu chipwe nanuvwishile chinyengo ni mukanda wami, haliapwila chachivwilile kupiha. Chipwe hatangu napihililile (mumu ngunamono mukanda uze wanuvwishile chinyengo, chipwe ha shimbu wika), 9 haliapwila ngunawahilila. Chawahililile mumu ha kunuvwisa chinyengo; alioze nanuvwishile chinyengo hanga nukalikonyeke; mumu nanuvwishile chinyengo nikulita ni Zambi, hanga kunuchi kafulwa nichimwe kuli yetu. 10 Mumu chinyengo cha kulita ni upale wa Zambi kuchakulinga kulikonyekena ku ulamwino, chize kechi kachipihilila nawa: alioze chinyengo cha hano hashi kuchakulinga kufwa. 11 Mumu chikuma chino-chene, cha kunuvwisa chinyengo nikulita ni upale wa Zambi, talenu kulipupwisa chipwahaha chalingile muli yenu, ewa, kulisambisa chipwahaha! Ewa, kwivwa kupiha chinene chipwahaha! Ni woma upwahaha! Ni usona upwahaha! Ni tachi ja mbunge jipwahaha! Ni kulikala chipwahaha! Kweswe hinwasamba ha chuma chino. 12 Chocho chipwe nasonekene kuli yenu, chasonekene mumu hali yoze walingile chipi, alioze hanga zango lietu kuli yenu likanulumbunuke kumeso ja Zambi.
MAIO 20-26
YIKUMA YILEMU YA MU LIJI LIA ZAMBI | 2 A-KORINDU 11–13
“Lumbambo mu Mujimba wa Paulu”
(2 A-Korindu 12:7) Ni ha mukunda wa unene wahiana wa usolwelo, kuchina mungulinangamisa kuhiana naye, anguhele lumbambo mu mujimba; kanganda ka Satana; hanga akangumbufule, kuchina mungulinangamisa kuhiana naye.
w08 15/6 3-4
Chipwe Ngwe Kali ni Ulelu Nihindu Kali ni Tachi
Postolo Paulu, kavumbi washishika, yeta kuli Yehova hanga amuchize “lumbambo mu mujimba” wenyi, lumbambo wacho kota te umwe musongo uze te ushi kuhwa. Iye yaliumba kuli Zambi katatu keswe hanga achize cheseko chacho. Chipwe ngwe kutwanyingikine kapinda wacho anatesa ni lumbambo, nihindu te kakukwika Paulu kwivwa chiseke mu mulimo wa Yehova. Paulu yatesa kapinda wacho ngwe kumumbufula mashimbu eswe. Yehova yamukumbulula ngwenyi: “Vumbi liami linate hali yena; mumu tachi jami kakujipwisa jingunu mu ulelu.” Yehova kakachijile lumbambo wacho mu mujimba wa Paulu. Iye yanunga ni kapinda wacho, alioze yamba ngwenyi: “Muze mungulela, hohene mungupwa ni tachi.” (2 Kori. 12:7-10) Yika Paulu te anambe kwamba?
(2 A-Korindu 12:8, 9) Ha chuma chino naliumbile kuli Mwene katatu, hanga chikatuke kuli yami. 9 Alioze iye wambile kuli yami ngwenyi, Vumbi liami linate hali yena; mumu tachi jami kakujipwisa jingunu mu ulelu. Kashika ni kuwaha chahiana mungulisamba shinaho mu ulelu wami, hanga tachi ja Kristu jikatwame hali yami.
w06 15/12 24 ¶17-18
Yehova Kakuhana ‘Spiritu Yisandu Kuli Waze Mamwita’
17 Zambi yakumbulula kulemba cha Paulu ngwenyi: “Vumbi liami linate hali yena; mumu tachi jami kakujipwisa jingunu mu ulelu.” Paulu yamba ngwenyi: “Ni kuwaha chahiana mungulisamba shinaho mu ulelu wami, hanga tachi ja Kristu jikatwame hali yami.” (2 A-Korindu 12:9; Samu 147:5) Ha chino, Paulu yanyingika ngwenyi, kupalikila muli Kristu, Zambi kamuhele tachi hanga jimufunge. Musono, Yehova kakukumbulula yilemba yetu ngwe chize akumbulwile ya Paulu. Kakufunga tuvumbi jenyi kupalikila mu tachi jenyi.
18 Ufunge uze Yehova akutwaha kupalikila mu “tachi ja Kristu,” kuushi kukinda yeseko yetu. Alioze, wakutufunga ku spiritu, ku yuma yipi ya hano hashi, ni ku miheto ya Satana. (Usolwelo 7:9, 15, 16) Kashika, chipwe ngwe unapinda ni yimwe yipikalo yize ‘kuyishi kuhwa,’ pwako ni shindakenyo ngwe, Yehova kanayinyingika, nawa ‘kakukumbulula muteto we.’ (Izaia 30:19; 2 A-Korindu 1:3, 4) Paulu yasoneka ngwenyi: “Zambi iye wamwenemwene, mba kechi katayiza akanweseke kuhiana chize munuhasa; alioze hamwe ni cheseko makanumwesa jila ya kutuhukamo hanga nukahase kunyongonona.”—1 A-Korindu 10:13; A-Fwilipu 4:6, 7.
(2 A-Korindu 12:10) Kashika nakuwaha ni ulelu, ni sau, ni huli, ni yihungumiona, ni kupinda, mumu hali Kristu: mumu muze mungulela, hohene mungupwa ni tachi.
“Kakuhana Ngolo Kuli Mukwa Kulezumuka”
8 Tanga Izaia 40:30. Mutuhasa kunyingika yuma yinji, chipwe chocho, kutuchi kuhasa kuyilinga wika ku tachi jetu. Lino lie longeso lize yetweswe twatamba kulilongesa. Postolo Paulu te kakwete uhashi wakulinga yuma yinji, alioze kakahashile kulinga yuma yeswe yize te akuzanga. Muze alwezele Yehova chize te anevwu, Yehova yamulweza ngwenyi: ‘Tachi jami kakujipwisa jingunu mu ulelu.’ Paulu kanyingikine yize Yehova amulwezele, kashika ambile ngwenyi: “Muze mungulela, hohene mungupwa ni tachi.” (2 A-Korindu 12:7-10) Yika iye ambile kwamba?
9 Paulu te kanyingika ngwenyi kwapwile yimwe yize te keshi kuhasa kulinga ku tachi jenyi wika. Te kanafupiwa ukwaso wa umwe yoze ukwete ndundo jinji. Spiritu yisandu ya Zambi te muyihana ndundo kuli Paulu muze malela. Nawa te muyimukwasa chinji lume. Spiritu ya Zambi nawa te muyihana Paulu ndundo ja kulinga yuma yize te iye kechi kuhasa kulinga ni tachi jenyi wika. Yino muyihasa kulingiwa ni kuli yetu. Muze Yehova matwaha spiritu yenyi yisandu, mutupwa ni tachi!
Kuhengwola Yikuma Yilemu ya mu Mbimbiliya
(2 A-Korindu 12:2-4) Ngunanyingika mutu muli Kristu, kumi ni miaka yiwana kunyima, nyi mu mujimba chanyingikine: nyi shina haze lia mujimba chanyingikine, Zambi kananyingika), iye amupindumwine ndo mwilu mwamuchitatu. 3 Ngunanyingika mutu umwe (nyi mu mujimba nyi shina haze lia mujimba chanyingikine, Zambi kananyingika), 4 ngwe chize amupindumwine mwilu mu Paraisu. Kuze evwile maliji aze kahashile kuahanjika atu; te katayijile atu kuahanjika.
Yihula ya Waze Akutanga Mikanda Yetu
“Mwilu mwamuchitatu” anasoneka mu mukanda wa 2 A-Korindu 12:2 kota munalumbunuka Wanangana wa Mesaya uze uli mu moko ja Yesu hamwe ni 144,000, uze anavuluka nawa ngwo, “malilu aha.”—2 Petu. 3:13.
Kanavulukamo ngwo, “mwilu mwamuchitatu” mumu Wanangana wacho walisa chinji ni ma wanangana akwo, unahiane mawanangana eswe.
“Paraisu” yize Paulu “amupindumwine” mu usolwelo kota yinalumbunuka, (1) Paraisu yize muyikapwa hano hashi, (2) paraisu ya ku spiritu yize muyikapwako, yinene chinji kuhiana yize yiliko musono, ni (3) “paraisu ya Zambi” mu malilu. Paraisu jeswe aji mujikapwako hashi haha.
(2 A-Korindu 13:12) Limenekenu umwe ni mukwo ni mukwo ni mbeju yisandu.
it-1 325
Mbeju
“Mbeju Yisandu.” Akwa-Kristu atangu te kakuliaha “mbeju yisandu” (Ro 16:16; 1Ko 16:20; 2Ko 13:12; 1Te 5:26) hanji “mbeju ya zango” (1Pe 5:14), kota te kakuliahayo malunga ni malunga, mapwo ni mapwo. Kulimeneka chino cha akwa-Kristu, kota te chinalite ni ndako ya A-Hepreu waze te akulimeneka ni mbeju. Chipwe ngwe Yisoneko kuyishi kulumbununa mu yimako-yimako, “mbeju yisandu” hanji “mbeju ya zango” kota te yakusolola zango ni kulinunga chize akwa-Kristu apwile nacho mu chikungulwila.—Yo 13:34, 35.
Kutanga Mbimbiliya
(2 A-Korindu 11:1-15) Ngunazange nuhase kulihumikiza ni uzuzuki ukepe; alioze chamwenemwene nwakulihumikiza. 2 Mumu ngunanuvwila ukwa umwe wa kuli Zambi: mumu nanulakenyene kuli lunga umuwika hanga ngukanutumbikile kuli Kristu ngwe virgem wa kulinanga. 3 Alioze ngunevu woma, kuchina ku chuma chimwe, chizechene ngwe kapela wongele Eva ni kalimbavuli kenyi, chocho mapihisa manyonga jenu ku kukutuwika cha mbunge ni kulinga cha kulitumbikila kuli Kristu. 4 Mumu nyi umwe meza nikwambujola umwe Yesu mukwo, yoze kutwamwambujolele, chipwe hanji munutambula spiritu umwe weka, yoze yetu kunwamutambwile, hanji sango limwe lieka, lize kunwatambwile, te munulinga kanawa ni kulihumikiza, kumanyi? 5 Mumu ngunashinginyeka yami mwene chasalile nichimwe kunyima lia apostolo a lufuma. 6 Alioze chipwe nguli chikukumi ha kuhanjika, ha yinyingi chasalile kunyima. Alioze chino hitunachisolola kuli yenu pundu. 7 Hanji navulumwine nyi? Mumu nalikehesele hanga yenu akanunangamise, mumu nambujolele Sango Lipema lia Kristu kuli yenu chawana, nyi? 8 Nazangile kunukwasa yenu; kashika natambwile ku yikungulwila yikwo, nikutambula fweto kuli ayo, hanga ngukanukwase yenu. 9 Muze napwile hamwe ni yenu, nahonene, chalemenene niumwe; mumu mandumbu, muze ejile ku Masendonia, anguhele chize nahonene. Mu yuma yeswe nalifungile hanga chichi kanulemena, chocho mungukalifunga nawa. 10 Nikulita ngwe umwenemwene wa Kristu uli muli yami, niumwe kechi kanguholesa ha kulisamba chino mu yifuchi ya Akeya. 11 Kuchi te? Mumu chishi kunuzanga, nyi? Zambi kananyingika. 12 Alioze chize nakulinga, chizechene mungukalinga hanga ngukajike jila ya waze akuzanga kulisamba; hanga muze malisamba, akaawane chizechene ngwe yetu. 13 Mumu wano kanapu apostolo ja mahuza, akwa kulinga tulimbalimba, nikulihipula ngwe apostolo ja Kristu. 14 Mba kuchatushimine, mumu chipwe Satana kakulihipula ngwe mungelo wa pangu. 15 Kashika kuchatushimine nyi kachi tuvumbi twenyi nawa malihipula ngwe tuvumbi twa ululi. Songo lio kumulikapwa nikulita ni yitanga yo.
27 MAIO–2 JUNHO
YIKUMA YILEMU YA MU LIJI LIA ZAMBI | A-NGALASHIA 1–3
“Nalimikine Nenyi Meso ni Meso”
(A-Ngalashia 2:11-13) Muze Petulu ahetele ku Andiakia, nalimikine nenyi meso ni meso mumu mwene walihishile. 12 Mumu shimbu amwe a kuli Tiangu te kanda aheta, iye walile hamwe ni akwa mavungu. Alioze muze o haheta, wakatukile nikulihandununa, se wevwile woma wa akwa ungalami. 13 A-Yunda akwo alingile ni ulembekese chizechene hamwe nenyi; chocho chipwe Mbarnabe wahungumukine ku ulembekese wo.
w17 15/4 27 ¶16
Shina Wakusolola Ululi Ngwe Yehova?
16 Tanga A-Ngalashia 2:11-14. Petulu kapwile ni kwivwila atu woma. (Yishima 29:25) Iye kanyingikine kanawa chize Yehova te akwivwa hali akwa-Mavungu. Chipwe chocho, kapwile ni kwivwa woma ngwo, akwa-Kristu A-Yunda ngalami waze akatukile ku Yerusaleme te mamunyongena upi, mumu lia kupwa hamwe ni akwa-Kristu waze te akwa-Mavungu. Postolo Paulu yalweza Petulu ngwenyi kali chilembekese. Mumu liaka? Mumu Paulu kevwile chize Petulu apwile ni kukalila akwa-Mavungu ha ku kukunguluka chize chapwile ku Yerusaleme ha mwaka 49. (Yilinga 15:12; A-Ngalashia 2:13.) Kuchi te mevwa akwa-Kristu waze hi A-Yunda ko ha katonde yoze Petulu asolwele? Shina ayo te katamba kutalinga ha chikuma chacho? Kutala Petulu kachi katokesele yiteli yenyi mumu lia uhenge wacho?
(A-Ngalashia 2:14) Alioze muze namwene ngwe kendele ni ululi nikulita ni umwenemwene wa Sango Lipema, nambile kuli Petulu kumeso ja eswe ngwami, Nyi yena, uli Ka-Yunda, wakwenda ngwe mukwa mavungu, hi ngwe Ka-Yunda ko, kuchi te wakushinjika akwa mavungu akende ngwe A-Yunda?
w13 15/3 5 ¶12
Waze Akuzanga Yehova, “Nichimwe Muchiatalingisa Chakuhi”
12 Petulu kasolwele ngwenyi, kakuvwila atu woma. Chipwe ngwe ha mashimbu amwe katalingile, nihindu yanunga ni kushishika kuli Yesu ni Yehova. Chakutalilaho, iye kalitunyine Mwata wenyi hakachi ka mbunga, katatu keswe. (Luka 22:54-62) Hakupalika cha mashimbu, Petulu kakasolwele yitanga ya Ukristu, ha kulengulula akwa-Kristu a ku Mavungu ni kwamona ngwe keshi ulemu kuhiana akwa-Kristu A-Yunda. Alioze, postolo Paulu yamona kanawa chikuma chino, te kukushi chitela cha kusolola katonde mu chikungulwila. Yitanga yize Petulu asolwele te yipi. Shimbu Paulu eche hanga yitanga yino yipinjise chikungulwila, hazehene, yalikumika ni Petulu meso ni meso. (Ngala. 2:11-14) Shina Petulu kevwile uli ni kwecha kulingila Zambi? Ka. Yatayiza chiyulo cha Paulu, yanunga ni kulingila Zambi.
Kuhengwola Yikuma Yilemu ya mu Mbimbiliya
(A-Ngalashia 2:20) Hananguhachila ha kulusu hamwe ni Kristu; hi yami ko nawa nguli ni mwono, alioze Kristu yoze watwama muli yami. Mba mwono uze nguli nawo mu mujimba, nguli nawo mu ufulielo wa kuli mwe Mwana Zambi, yoze wanguzangile, yoze waliechele hali yami.
w14 15/9 16 ¶20-21
Lingila Zambi ni Ushishiko Weswe Chipwe Ngwe Unapalika mu “Luyinda Munji”
20 Yika mba mutwamba hakutwala ku miheto? Chakutalilaho, kuchi mutuhasa kukumba yinyengo? Jila yimwe yili kupukuna ha ukuule. Postolo Paulu neye che apwile ni kulinga. Ha mashimbu amwe te kakwiva yinyengo yinji. Alioze, te kananyingika ngwenyi, Kristu kakafwilile atu angunu, alioze akwa-shili. Paulu neye kapwile hakachi ka akwa-shili jacho. Iye yasoneka ngwenyi: “Mwono uze nguli nawo . . . nguli nawo mu ufulielo wa kuli mwe Mwana Zambi, yoze wanguzangile, yoze waliechele hali yami.” (Ngala. 2:20) Kwamba pundu, Paulu te kakufuliela ha ukuule. Kapwile ni shindakenyo ngwenyi ukuule te wakumuyukisa.
21 Hanji muhasa kupwa ni nyonga ngwe lia postolo Paulu. Alioze, nyi wanyingika ngwe, ukuule uli chawana cha Yehova, muchikuyukisa chinji. Chino kuchalumbunukine ngwo, yinyengo muyihwa kawashi-washi. Anji a kuli yetu mutupinda ni muheto uno ndo hashi haha. Alioze nyingika ngwe: Fweto makalihana wika kuli waze manyongonona. Tangwa lia uhenya wa Wanangana wa Zambi linakundama, mulikaneha sambukila ni kupwisa atu eswe angunu. Kashika, sako tachi hanga ukapwe mu Wanangana wacho, chipwe ngwe mupalika mu lamba linji.
(A-Ngalashia 3:1) Enu A-Ngalashia kunushi mana! Iya hananwongo? Yenu kwe kumeso jenu asolwele pundu Yesu Kristu wa kuhachila ha kulusu.
it-2 171
Mukanda wa A-Ngalashia
Maliji wano a Paulu anambe ngwo, “Enu A-Ngalashia kunushi mana,” kaso kusolola ngwo, iye te kananyongo ha limwe vungu, hanji atu waze akatukile ku sango ya mbonge ya Ngalashia. (Nga 3:1) Alioze, Paulu te kanakumika amwe atu a mu yikungulwila ya mu mbonge yacho, ha mukunda wa kupianguka ni ndako ya Uyunda, atu jacho te A-Yunda waze apwile ni kufupa ululi woene kupalikila mu shimbi ya Mose, shimbu te afupe ululi kulita ni ufulielo wo ha usendo waha. (2:15–3:14; 4:9, 10) Mu “yikungulwila ya mu Ngalashia” yize Paulu asonekenene, mwapwile atu a ku mavungu anji (1:2), ngwe A-Yunda, akwa-mavungu akwo, yilima, ni akwa-vungu lia céltica. (Yi 13:14, 43; 16:1; Nga 5:2) Eswe te kakwavuluka ngwo, akwa-Kristu A-Ngalashia, mumu te katwama mu ngiza ya chifuchi cha Ngalashia. Atu wano e Paulu te akusonekena sango jacho, mumu te kanaanyingika kanawa, hi waze ko kanyingikine.
Kutanga Mbimbiliya
(A-Ngalashia 2:11-21) Muze Petulu ahetele ku Andiakia, nalimikine nenyi meso ni meso mumu mwene walihishile. 12 Mumu shimbu amwe a kuli Tiangu te kanda aheta, iye walile hamwe ni akwa mavungu. Alioze muze o haheta, wakatukile nikulihandununa, se wevwile woma wa akwa ungalami. 13 A-Yunda akwo alingile ni ulembekese chizechene hamwe nenyi; chocho chipwe Mbarnabe wahungumukine ku ulembekese wo. 14 Alioze muze namwene ngwe kendele ni ululi nikulita ni umwenemwene wa Sango Lipema, nambile kuli Petulu kumeso ja eswe ngwami, Nyi yena, uli Ka-Yunda, wakwenda ngwe mukwa mavungu, hi ngwe Ka-Yunda ko, kuchi te wakushinjika akwa mavungu akende ngwe A-Yunda? 15 Yetu se tuli A-Yunda ku chisemewa, hi yivulumunyi ko a ku mavungu, 16 Hindu tunanyingika ngwetu, Mutu keshi kumupwisa mukwa ululi ku yitanga ya shimbi, alioze ha kufuliela Yesu Kristu. Chipwe yetu twafulielele Kristu Yesu, hanga akatupwise akwa ululi ku ufulielo kuli Kristu: hi ku yitanga ya shimbi ko: mumu ku yitanga ya shimbi kechi kapwisa mutu niumwe mukwa ululi. 17 Alioze kachi shimbu twafupile atupwise akwa ululi muli Kristu, chipwe yetwene matuwana ni utanguko, acho Kristu te kanapu kavumbi ka shili, nyi? Ka, pundu! 18 Mumu nyi kachi mungutunga cheka nawa yuma yize napuzwile, kachi mungulipwisa chitanguke. 19 Mumu ami ku shimbi nafwile ku shimbi, hanga ngupwe ni mwono kuli Zambi. 20 Hananguhachila ha kulusu hamwe ni Kristu; hi yami ko nawa nguli ni mwono, alioze Kristu yoze watwama muli yami. Mba mwono uze nguli nawo mu mujimba, nguli nawo mu ufulielo wa kuli mwe Mwana Zambi, yoze wanguzangile, yoze waliechele hali yami. 21 Chishi kupwisa vumbi lia Zambi liamokomoko: mumu nyi kachi ululi muupwa wa ku Shimbi ya Mose, kachi kufwa cha Kristu muchipwa chamokomoko.