Nunga ni Kusolwela Akwenu Zango

 1. Yuma yika yinasolola musono ngwo, atu anji keshi ni zango?

MBIMBILIYA yaprofetezele ngwo, ha matangwa a kusula, atu amwe te kechi kupwa ni “zango lia atu.” (2 Timo. 3:1, 3) Uprofeto wacho unamanunuka musono. Chakutalilaho, yisemi anji kakulivwila kole mumu hanalilakula, chino nawa chakutwala ana anyonge ngwe keshi kwazanga kuli yisemi jo. Chipwe asoko waze atwama ku zuwo limuwika mahasa kulivwa ngwe kali ukawo. Umwe mukwa kuhana yiyulo kuli asoko yamba ngwenyi: “Kuli yisemi anji waze keshi kuhanjika ni ana jo, alioze kakupalikisa mashimbu anji ha kuzachisa computador, tablet, telefone ni kulinga yiheho yikwo nawa.” Kashika, “chipwe ngwe asoko wano katwama mu zuwo limuwika, nihindu keshi kulinyingika kanawa.”

2-3. (a) Kulita ni A-Roma 12:10, aya twatamba kusolwela zango? (b) Yika mutulilongesa ha mutwe uno?

² Kutwazangile kwimbulula yitanga ya atu musono, yakuhona kupwa ni zango. (Roma 12:2) Alioze, twatamba kuzanga chinji asoko jetu, hamwe ni mandumbu jetu a mu ufulielo. (Tanga A-Roma 12:10.) Liji lifwilenu ni utu, yika linalumbunuka? Liji lino, kakulizachisa hanga alumbunune usepa upema uze atu ali nawo mu usoko. Lino lie zango lize twatamba kusolola kuli mandumbu jetu a mu ufulielo. Muze twakusolola zango lia undumbu, twakukolesa kulinunga chetu chize chinalingi chihanda mu uwayilo wamwenemwene.—Mika 2:12.

³ Tutalenu chize yilweza ya mu Mbimbiliya muyitukwasa kusolola zango liacho.

 4. Kuchi Tiangu 5:11, unatukwase kunyingika zango lize Yehova akwete hali yetu?

⁴ Mbimbiliya yakusolola yitanga yipema ya Yehova. Chakutalilaho, yakwamba ngwo, “Zambi iye zango.” (1 Yoa. 4:8) Chitanga chino chakutukoka kuli iye. Alioze, Mbimbiliya yakulongesa nawa ngwo, Yehova “wa too ni vumbi.” (Tanga Tiangu 5:11.) Maliji wano kanasolola ngwo, Yehova kakutuzanga chinji!

 5. Kuchi Yehova akusolola keke, nawa kuchi muhasa kumwimbulula?

⁵ Mukanda wa Tiangu 5:11 unatongola vumbi, hamwe ni chitanga chikwo cha Yehova, keke. (Kutuhu. 34:6) Yehova kakutusolwela keke yenyi ha kukonekena shili yetu. (Samu 51:1) Mu Mbimbiliya, liji keke, kulishi kutala wika ha kukonekena. Keke chili chitanga chize mutu akupwa nacho mu mbunge muze akumona umwe kali mu ponde, hachino, mazanga kumukwasa. Zango lize Yehova akutusolwela, linahiane zango lize mama akwete hali mwanenyi. (Iza. 49:15) Keke yakutwala Yehova hanga atukwase muze tuli mu ponde. (Samu 37:39; 1 Kori. 10:13) Mutuhasa kusolola keke hali mandumbu jetu, ha kwakonekena muze akutulinga yuma yipi chakuhona kwatulikila toto. (Efwe. 4:32) Jila yilemu yakusolwelamo keke kuli mandumbu jetu, yili kwakwasa muze anapalika mu ukalu. Twakwimbulula Yehova yoze wakusolola zango ni keke kuli atu eswe.—Efwe. 5:1.

 6. Kuchi Jonata ni Ndawichi asolwele ngwo kakulizanga umwe ni mukwo?

⁶ Mbimbiliya yinasolola ngwo, atu yihenge no mahasa kusolola zango ni kupwa ni usepa upema. Tutalenu chilweza cha Jonata ni Ndawichi. Mbimbiliya yinambe ngwo: “Mbunge ya Jonata yiyilinunga ni mbunge ya Ndawichi. Jonata yamuzanga ngwe mbunge yenyi mwene.” (1 Samue. 18:1) Yehova kasakwile Ndawichi hanga asalakane Saulu ha Wanangana. Muze Saulu anyingikine sango jacho, yaputuka kuvwila ukwa Ndawichi, nawa yafupa kumushiha. Alioze Jonata kakakwashile tato kufupa kushiha Ndawichi. Jonata ni Ndawichi kanakalilakenya kununga ni kupwa masepa ni kulikwasa mashimbu eswe umwe ni mukwo.—1 Samue. 20:42.

 7. Yuma yika te muyihasa kukwika Jonata kulikata ni Ndawichi?

⁷ Chili kukomoka chinji kunyingika ngwo, Jonata ni Ndawichi kapwile ni usepa upema chipwe ngwe, kwapwile yuma yinji yize te muyihasa kwahandununa. Chakutalilaho, Jonata kapwile mukulwana wa Ndawichi wa miaka 30. Jonata kachi kanyongene ngwenyi, kuchatambile kulikata ni kanuke yoze keshi kunyingika yuma yinji ku mwono. Alioze, Jonata kapwile ni manyonga eka, kapwile ni kuvumbika Ndawichi.

 8. Mumu liaka mutuhasa kwamba ngwetu, Jonata kapwile sepa mupema kuli Ndawichi?

⁸ Jonata kachi kapwile ni kuvwila Ndawichi ukwa, mumu te mwana wa Mwanangana Saulu, iye mwe wapwile ni ulite wa kusalakana tato ha wata. (1 Samue. 20:31) Alioze, Jonata kapwile mukwa-kulikehesa ni kushishika kuli Yehova. Kashika, yakwasa chiyulo cha Yehova, cha kusakula Ndawichi hanga apwe Mwanangana. Kapwile nawa ni kushishika kuli Ndawichi, chipwe ngwe tato Saulu kapwile ni kupihilila chinji.—1 Samue. 20:32-34.

 9. Shina Jonata kamwene Ndawichi ngwe mukwa-kole yenyi? Lumbununa.

⁹ Jonata kapwile ni kuzanga chinji Ndawichi, kashika te keshi kumumona ngwe mukwa-kole yenyi. Jonata kapwile ni utotombo wa kwasa mivi, nawa kapwile kajita wa hamu. Atu te kakwamba ngwo, Jonata ni tato Saulu, “tambu lio liahianyine lia pupa, tachi jo jahianyine ja ndumba.” (2 Samue. 1:22, 23) Kashika, Jonata te mahasa kulilamba ha pambo, mumu lia lufuma wenyi. Alioze, iye te keshi kulitesa ni akwo hanji kwatulikila toto. Jonata kapwile ni kukomoka chinji hamu ni ufulielo uze Ndawichi apwile nawo muli Yehova. Kwamba pundu, Jonata kaputukile kuzanga chinji Ndawichi, muze ashihile Ngoliate. Kuchi musono mutuhasa kusolola zango liacho kuli mandumbu jetu?

10. Liji “lizangenu ni mbunge yeswe” yika linalumbunuka?

¹⁰ Mbimbiliya yinambe ngwo: “Lizangenu ni mbunge yeswe.” (1 Petu. 1:22) Yehova kakutwaha chilweza chipema. Zango lienyi hali yetu liapwa likolo chinji, kashika, nyi twanunga ni kushishika kuli iye, kechi katwehuka nilimwe tangwa. (Roma 8:38, 39) Mu limi lia Ngregu, liji “ni mbunge yeswe,” liakuhana nyonga lia mutu yoze unalikolweza hanga asolole zango. Ha mashimbu amwe, hi chashi ko kusolola zango kuli mandumbu jetu, kashika, twatamba “kusa tachi.” Muze akwetu matuvwisa kupihia, twatamba ‘kulihumikiza umwe kuli mukwo mu zango. Kufunga muya wa sambukila, ni tachi jeswe, kununga cha spiritu.’ (Efwe. 4:1-3) Muze twakusa tachi hanga tufunge “muya wa sambukila,” chino chakutukwasa tuhone kulihulikila ha uhenge wa mandumbu jetu. Kashika, tulikolwezenu kumona mandumbu jetu ngwe chizechene Yehova akwamona.—1 Samue. 16:7; Samu 130:3.

11. Mumu liaka ha mashimbu amwe chakupwa chikalu chinji kusolola zango?

¹¹ Hi chashi ko kusolola zango mashimbu eswe kuli mandumbu jetu, chipi-chipi nyi tunanyingika ulelu wo. Kota akwa-Kristu amwe a ku sekulu yitangu, kapalikile mu kapinda wacho. Chakutalilaho, Evotia ni Sentiki, kota kakapinjile ha “kukilikita hamwe ni [Paulu] mu sango lipema.” Alioze, muze kwasolokele kapinda, ayo yahona kulivwashana. Kashika, Paulu yaatoweza hanga apwe “ni mbunge yimuwika muli Mwene.”—Fwili. 4:2, 3.

12. Kuchi mutuhasa kusolola zango kuli mandumbu jetu?

¹² Musono, kuchi mutuhasa kusolola zango kuli mandumbu jetu? Muze twakunyingika kanawa mandumbu jetu, chakupwa chashi kulihulumba hali ayo ni kwasolwela zango. Mutuhasa kulikata no chipwe ngwe tuli ni miaka yalisa, nawa a ku minyachi yalisa. Twiwulukenu ngwetu, Jonata kapwile mukulwana wa Ndawichi wa miaka 30, chipwe chocho, yapwa masepa apema. Kashika, mu chikungulwila mutuhasa kulikata ni makulwana chipwe ni akweze. Nyi twachilinga, mutusolola ngwetu, twakuzanga “mandumbu” eswe.—1 Petu. 2:17.

13. Mumu liaka mutuhasa kulikata chinji ni mandumbu amwe, akwo ka?

¹³ Shina kusolola zango kuli mandumbu eswe, chinalumbunuka ngwo, twatamba kulikata ni mandumbu eswe mu chikungulwila? Ka, hi chocho ko. Hi chipi ko kusakula mandumbu waze mutulikata no mumu lia yuma yalifwa yize tukwete. Yesu kasanyikine apostolo jenyi eswe ngwenyi, “tusendo,” alioze, kapwile ni kuzanga chinji Yoano. (Yoa. 13:23; 15:15; 20:2) Alioze, chino kuchalumbunukine ngwo, Yesu kapwile ni kulemesa chinji Yoano kuhiana apostolo akwo. Chakutalilaho, muze Yoano ni Tiangu etele kuli Yesu chihela chilemu mu Wanangana wa Zambi, iye yaakumbulula ngwenyi: “Kutwama ku chindume chami hanji ku chimeso chami, hi nichami ko kuhana.” (Marku 10:35-40) Chizechene ngwe Yesu, kutwatambile kulemesa hanji kuzanga chinji masepa jetu kuhiana mandumbu akwo. (Tia. 2:3, 4) Nyi twachilinga, kutuchi kukwasa chikungulwila cha akwa-Kristu chilinunge.—Yunda. 17-19.

14. Kulita ni A-Fwilipu 2:3, yika muyihasa kutukwasa tuhone kulitesa ni mandumbu jetu?

¹⁴ Kusolola zango kuli mandumbu jetu, chakutukwasa kuhona kulitesa no. Twiwulukenu ngwetu, Jonata te keshi kufupa kulitesa ni Ndawichi hanji kumumona ngwe mukwa-kole yenyi. Kashika, yetweswe twatamba kwimbulula chilweza cha Jonata. Kanda tuvwila ukwa mandumbu jetu, mumu lia utotombo wo, “alioze ni mbunge ya kulikehesa, mweswe anyonge ngwenyi, mukwetu wanguhiana.” (Tanga A-Fwilipu 2:3.) Kanda tuvulama ngwetu, yetweswe mutuhasa kulinga yimwe hanga tukwase chikungulwila. Kulikehesa, muchitukwasa kulihulikila ha upeme wa mandumbu jetu ni kuyuka ha yilweza yo ya ushishiko.—1 Kori. 12:21-25.

15. Yika walilongesa ha chilweza cha pangi Tanya ni usoko wenyi?

¹⁵ Muze twakupwa mu yeseko, Yehova kakututakamisa kupalikila muli mandumbu jetu. Tutalenu yize yalingiwile kuli umwe usoko, uze wapwile ha kukunguluka cha mambonge, cha mwaka 2019, ku Estados Unidos, chapwile ni mutwe unambe ngwo, “Zango Kulishi Kuhwa”! Tanya, pangi yoze uli ni ana atatu yamba ngwenyi: “Te tunayi ku hotel muze mashinyi a mutu mukwo apupile mashinyi jetu. Yetweswe twakalemanyine, chipwe chocho twevwile woma unji. Kashika yitutuhuka mu mashinyi ni kumana ku sesa lia tapalo. Hazehene, yitumona umwe mutu kanatusanyika hanga tunjile mu mashinyi jenyi, kumana kapwile ndumbwetu, yoze neye te unakatuka ku kukunguluka cha mambonge. Yikusoloka nawa mandumbu akwo. Mandumbu atano a ku Suécia, no yamanyisa mashinyi jo. Mapangi waze ejile, yangukangayika hamwe ni mwanami, ni zango lieswe! Yingwalweza ngwami, munuhasa kuya tuli kanawa, alioze ayo yanunga hazehene ni yetu ndo haze mandotolo ejile, nawa yatuhula nyi twapwile ni yuma yeswe yize te mutufupiwa. Chipwe ngwe twapwile ha mashimbu akalu, nihindu twamwene zango lia Yehova. Kashika, yuma yize twapalikile, yakolesele zango lietu hali Yehova ni hali mandumbu jetu.” Shina unewuluka mashimbu waze umwe ndumbu akukwashile muze te unafupiwa ukwaso?

16. Mumu liaka twatamba kusolola zango kuli umwe ni mukwo?

¹⁶ Tutalenu yize yakulingiwako muze twakulisolwela zango umwe ni mukwo. Twakutakamisa mandumbu jetu muze anapalika mu yipikalo. Twakukolesa kulinunga chize chili hali atu ja Zambi. Twakusolola ngwetu, tuli tumbaji twa Yesu nawa chino chakukoka atu waze ali ni mbunge ya kulikehesa mu uwayilo wamwenemwene. Chahiana ulemu, twakuhalisa Yehova, “Tato ya keke, kanda Zambi ya kulembejeka cheswe.” (2 Kori. 1:3) Kashika, tunungenu ni kusolola zango mashimbu eswe!