Jila Yize Yalita Kuwayila Zambi

 1. Iya watamba kutulweza jila yize yalita kuwayilamo Zambi?

MAYINGELEJA anji kakwamba ngwo kakulongesa umwenemwene hakutwala kuli Zambi. Alioze chino, hi chamwenemwene ko, mumu kakulongesa yuma yalisa hakutwala ku chize Zambi apwa ni chize twatamba kumuwayila. Kuchi mutuhasa kunyingika jila yize yalita kuwayilamo Zambi? Yehova wika mwe mahasa kutulweza chize twatamba kumuwayila.

 2. Kuchi muhasa kunyingika jila yize yalita kuwayilamo Zambi?

² Yehova hanatwehe Mbimbiliya kashika mutuhasa kunyingika jila yize yalita kumuwayila. Nyi walilongesa Mbimbiliya, Yehova makukwasa hanga uyuke ku malongeso jenyi, mumu kakuzanga.—Izaia 48:17.

 3. Yika Zambi anazange hanga tulinge?

³ Atu amwe kakwamba ngwo Zambi kakutayiza uwayilo weswe, alioze Yesu kakalongesele chocho. Iye kambile ngwenyi: “Hi mweswe ko mamba kuli yami ngwenyi, Mwene, Mwene, makanjila mu Wanangana wa malilu, alioze yoze wakulinga upale wa Tata yoze uli mu malilu.” Kashika chili chilemu kunyingika upale wa Zambi ni kuulinga. Chino chili chikuma chilemu mumu Yesu katesele waze keshi kwononokena Zambi ni yilianyi, ‘akwa-kulinga uhulia.’—Mateu 7:21-23.

 4. Yika Yesu ambile hakutwala ku kulinga upale wa Zambi?

⁴ Yesu katutowezele ngwenyi nyi twazanga kulinga upale wa Zambi, mutupwa ni yeseko. Kambile ngwenyi: “Njilenu ku chikolo chikehe: mumu chikolo chize chatwala ku kwonwona, chinene, ni ye jila kuyatoha, ni waze akunjilamo anji, alioze chikolo chize chatwala ku mwono, chikehe, ni ye jila yikehe, ni waze akuyiwana akehe.” (Mateu 7:13, 14) Chikolo chikehe, hanji jila yize yalita kuwayilamo Zambi, yakusongwela ku mwono wa mutolo. Chikola chinene hanji jila yipi yakuwayilamo Zambi, yakusongwela ku kufwa. Alioze Yehova keshi kuzanga mutu niumwe hanga afwe. Aye kanahane uhashi kuli atu eswe hanga amunyingike.—2 Petulu 3:9.

 5. Kuchi muhasa kunyingika atu waze akuwayila Zambi mu jila yize yalita?

⁵ Yesu kambile ngwenyi mutuhasa kunyingika atu waze akuwayila Zambi mu jila yize yalita. Twakwaanyingika ha kuhengwola yize ayo afuliela ni yize akulinga. Aye yamba ngwenyi: “Ku mihuko yo kumunukanyingika.” Yamba nawa ngwenyi: “Mitondo yeswe yipema kuyakwima mihuko yipema.” (Mateu 7:16, 17) Chino kuchishi kulumbunuka ngwo waze akuwayila Zambi kali atu angunu. Alioze tuvumbi twa Zambi kakufupa kulinga yuma yize yalita mashimbu eswe ku mwono wo. Haliapwila tutalenu yuma yize muyitukwasa kunyingika atu waze akuwayila Zambi mu jila yize yalita.

6, 7. Mumu liaka uwayilo wa mwenemwene wakukatuka mu Mbimbiliya? Nawa yika chilweza cha Yesu chinatulongesa?

⁶ Uwayilo wetu watamba kukatuka mu Mbimbiliya. Mbimbiliya yinambe ngwo: “Yisoneko yeswe yapwa we mwiku wa Zambi, neyo kuyafumbuka ha kulongesa, ni ha kukumika, ni ha kululamisa, ni ha kufumba mu ululi: hanga mutu wa Zambi akapwe mukwa kujama wakutela liakulu yitanga yeswe yipema.” (2 Timoteu 3:16, 17) Postolo Paulu yasonekena akwa-Kristu ngwenyi: “Muze nwatambwile liji lia Sango lia Zambi kuli yetu, nwalitambwile ngwenu, chamwenemwene liji lia Zambi, hi lia atu ko.” (1 A-Tesalonika 2:13) Uwayilo wamwenemwene wakukatuka wika mu Liji lia Zambi, Mbimbiliya. Ushi kukatuka ku manyonga ja atu, ndako hanji chuma cheswacho.

⁷ Yuma yeswe yize Yesu alongesele yakatukile mu Liji lia Zambi. (Tanga Yoano 17:17.) Iye kanji-kanji te kakutongola Yisoneko. (Mateu 4:4, 7, 10) Tuvumbi amwenemwene a Zambi kakukaula chilweza cha Yesu, nawa yuma yeswe yize akulongesa yakukatuka mu Mbimbiliya.

 8. Yika Yesu atulongesele hakutwala ku kuwayila Yehova?

⁸ Twatamba kuwayila wika Yehova. Mukanda wa Samu 83:18 unambe ngwo: “Akanyingike ngwo, yena wika uli ni jina lia Yehova, uli mwe Chitunda Helu lia hashi heswe.” Yesu kazangile hanga atu anyingike Zambi wamwenemwene, nawa kaalongesele jina lienyi. (Tanga Yoano 17:6.) Yesu yamba ngwenyi: “Ukawayile Mwene Zambi ye. Iye wika ukamulingile.” (Mateu 4:10) Kashika, twakukaula chilweza cha Yesu mumu tuli tuvumbi twa Zambi. Twakuwayila wika Yehova ni kuzachisa jina lienyi, ni kulongesa akwetu jina lia Zambi ni yuma yize makalinga hali yetu.

9, 10. Kuchi twakusolola zango kuli umwe ni mukwo?

⁹ Twatamba kusolola zango liamwenemwene kuli atu. Yesu kalongesele tumbaji twenyi hanga alizange umwe ni mukwo. (Tanga Yoano 13:35.) Chipwe ngwe twatwama kweswako, tukwete ndako jalisa, chipwe tuli yiswale hanji pichi nihindu twakulizanga umwe ni mukwo. Zango lietu kuli umwe ni mukwo liakutununga hanga tupwe mandumbu ni mapangi. (A-Kolosu 3:14) Kashika kutushi kwasa jita hanji kushiha atu. Mbimbiliya yinambe ngwo: “Ana a Zambi ni ana a Ndiapu kanasoloka. Mweswawo keshi kulinga ululi hi wa kuli Zambi ko, ni yoze keshi kuzanga ndumbwenyi.” Yinambe nawa ngwo: “Chatutamba kulizanga umwe ni mukwo. Hi ngwe Kene ko se iye wapwile wa kuli mwe chingulungulu, washihile mwanakwo.”—1 Yoano 3:10-12; 4:20, 21.

¹⁰ Twakuzachisa shimbu, tachi ni yikumba yetu hanga tulikwase ni kulikolweza umwe ni mukwo. (A-Hepreu 10:24, 25) Twakulinga yuma “yipema kuli atu eswe.”—A-Ngalishia 6:10.

 11. Mumu liaka twakutayiza Yesu ngwetu ye jila yize yakutwala kuli Zambi?

¹¹ Twatamba kwononokena Yesu mumu iye ye jila yize yakutwala kuli Zambi. Mbimbiliya yinambe ngwo: “Ulamwino wakuhi muli mukwo niumwe: mumu chipwe jina lieka liakuhi kushi lia lilu, nilimwe, lize hanalihana hakachi ka atu; atulamwine nalio.” (Yilinga 4:12) Mu Kapitulu 5 wa mukanda uno, twalilongesanga ngwetu, Yehova katumine Yesu hanga ahane mwono wenyi ngwe ukuule kuli atu waze akwononoka. (Mateu 20:28) Yehova hanasakula Yesu hanga apwe Mwanangana yoze makayula hashi heswe. Kashika Mbimbiliya yinatulweza ngwo, nyi tunazange hanga tukatwame ni mwono wa mutolo, twatamba kwononokena Yesu.—Tanga Yoano 3:36.

 12. Mumu liaka kutushi kulinga yuma ya mafwefwe?

¹² Kutwatambile kulinga yuma ya mafwefwe. Yesu kakalingile yuma ya mafwefwe. Muze apwile mu cheseko, aye yalweza Pilatu mwanangana Ka-Roma ngwenyi: “Wanangana wami hi wa hashi ko.” (Tanga Yoano 18:36.) Chizechene ngwe Yesu, ni yetu twakushishika ku Wanangana wa mu malilu, ha mukunda wa chikuma chino, chipwe ngwe twatwama kweswako, yetu kutushi kulinga yuma ya mafwefwe. Chipwe chocho, Mbimbiliya yinatutoweza hanga twononokene “waze ali ni poko ya kuyula,” hanji manguvulu. (A-Roma 13:1) Twakwononokena shimbi ja mu chifuchi muze twatwama. Alioze nyi shimbi jacho mujilimika ni ja Zambi, etu twakukaula chilweza cha apostolo, waze ambile ngwo: “Chatutamba kwononoka kuli Zambi, hi kuli atu ko.”—Yilinga 5:29; Marku 12:17.

 13. Mumu liaka twakwambujola Wanangana wa Zambi?

¹³ Twakufuliela ngwetu Wanangana wa Zambi we wika muukahwisa lamba hano hashi. Yesu kambile ngwenyi, “sango lino lipema lia Wanangana,” kumaliambujola hashi heswe. (Tanga Mateu 24:14.) Kukushi unguvulu wa atu hano hashi uze muhasa kulinga yuma yize Wanangana wa Zambi muukalinga hali yetu. (Samu 146:3) Yesu katulongesele hanga twite Wanangana wa Zambi muze ambile ngwenyi: ‘Wanangana Zambi wize. Upale wenyi ulingiwe hashi chizechene ngwe unalingiwa mwilu.’ (Mateu 6:10) Mbimbiliya yinatulweze ngwo, Wanangana wa Zambi muukanongesa manguvulu eswe a atu, “alioze wene muukakola wa mutolo.”—Daniele 2:44.

 14. Aya waze akuwayila Zambi mu jila yize yalita?

¹⁴ Muze hiwalilongesa yikuma yino, achilihule kama: ‘Aya waze akuchiza malongeso jo mu Mbimbiliya? Aya waze akulweza akwo jina lia Zambi? Aya waze akusolola zango lingunu kuli umwe ni mukwo ni kufuliela ngwo Zambi katumine Yesu hanga atulamwine? Aya waze keshi kulinga yuma ya mafwefwe? Aya waze akwambujola ngwo, Wanangana wa Zambi we wika muukahwisa lamba lize twakumona? Kali wika Yela ja Yehova.—Izaia 43:10-12.

 15. Yika twatamba kulinga nyi tunazange hanga Zambi atayize uwayilo wetu?

¹⁵ Kufuliela wika ngwo Zambi kwali kuchakumbanyine. Mumu chipwe andemoniu no kakufuliela ngwo Zambi kwali, alioze ayo keshi kumwononokena. (Tiangu 2:19) Nyi mutufupa hanga Zambi atayize uwayilo wetu, kutwatambile wika kufuliela ngwetu iye kwali, alioze twatamba nawa kulinga yuma yize iye anatwite.

 16. Mumu liaka twatamba kwehuka uwayilo wa mahuza?

¹⁶ Mba Zambi atayize uwayilo wetu, twatamba kwehuka uwayilo wa mahuza. Profeta Izaia kasonekene ngwenyi: “Tuhukenu mukachi ko, lihandununenu no.” (Izaia 52:11; 2 A-Korindu 6:17) Ha mukunda wa chino, kashika twakwehuka yuma yeswe ya uwayilo wa mahuza.

 17, 18. “Babilonya Yinene” yika, nawa mumu liaka watamba kutuhukamo kawashi-washi?

¹⁷ Uwayilo wa mahuza yika? Uli uwayilo weswe uze wakulongesa atu hanga awayile Zambi mu jila yize kuyalite ni Liji lienyi. Mbimbiliya yinavuluka uwayilo weswe wa mahuza ngwo, “Babilonya Yinene.” (Usolwelo 17:5) Mumu liaka? Mumu malongeso anji a uwayilo wa mahuza kaputukile mu mbonge ya Babilonya muze Sanga lia Meya ha matangwa ja Noa te hiliapalika. Malongeso jacho kalitanjile hashi heswe. Chakutalilaho, atu waze te atunga mu Babilonya te kakuwayila tuzambi atatu. Ni musono nawa, uwayilo unji wa mahuza wakulongesa ngwo Zambi kali mutatu (Trindade), alioze Mbimbiliya yakulongesa pundu ngwo, kuli Zambi umuwika wamwenemwene, Yehova, nawa ngwo Yesu kali Mwanenyi. (Yoano 17:3) Atu waze te atunga mu Babilonya te kakufuliela nawa ngwo, mutu kakwete chimwe chuma chize chakununga ni mwono nyi mujimba wenyi wafwa, nawa ngwo mahasa kumona lamba mu chitende cha kahia. Alioze longeso lino hi liamwenemwene ko.—Tala Maliji Akusongo 14, 17, ni 18.

¹⁸ Zambi hanambe ngwo kwasala hakehe hanga onone uwayilo weswe wa mahuza. Haliapwila yena hi wanyingika mumu liaka watamba kutuhuka kawashi-washi mu uwayilo wa mahuza? Yehova Zambi kanazange hanga utuhukemo halipwila mumu hikwasala shimbu likehe.—Usolwelo 18:4.

 19. Kuchi Yehova makufunga nyi wakwata chiyulo cha kumuwayila?

¹⁹ Muze mukwata chiyulo cha kutuhuka mu uwayilo wa mahuza, hanga uwayile Yehova, amwe masepa ni asoko je hanji kechi kuhasa kunyingika mumu liaka wakwata chiyulo chacho, mahasa kukuhungumiona. Alioze Yehova kechi kukombeka. Mupwa mu usoko unene wa hashi eswe uze atu jamo akwete zango kuli umwe ni mukwo, ni kupwa ni kutalatala cha mwono wa mutolo mu paraisu. (Marku 10:28-30) Amwe masepa ni asoko je waze analimika ni yena ha mukunda wa kuwayila Yehova, kulutwe lia matangwa no mahasa kulilongesa Mbimbiliya.

 20. Mumu liaka chili chilemu kuwayila Zambi mu jila yize yalita?

²⁰ Hi kwasala hakehe, Zambi mahwisa upi weswe, nawa Wanangana wenyi uyule hashi eswe. (2 Petulu 3:9, 13) Wano makapwa mashimbu chiseke! Atu eswe makawayila Yehova mu jila yize iye akuzanga hanga tumuwayilemo. Kashika chili chilemu kwehuka uwayilo wa mahuza haliapwila ni kuwayila Zambi mu jila yize yalita.