Esther

4 Mordekai nih mah kong cu a theih tikah a puan kha a thleh, buri puan aa aih i vutcam aa phulh. Cun khua laifang ah a kal i ngaihchia ngai le aw thangpi in a ṭap. 2 Buri puan i aih in siangpahrang kutka ah ahohmanh luh khawh a si lo caah siangpahrang kutka tiang lawng a kal. 3 Siangpahrang nawl chuahmi a phanhnak peng kip ah Judah mi cu an ngaih a chia, rawl an ul i an ṭap, an hram. Mi tampi cu buri puan le vutcam cung ah an ril. 4 Siangpahrang nu Esther cu a bultawltu nu hna le tildit mi hna nih mah kong an chimh tikah a lungre a thei tuk. Cun Mordekai kha buri puan canah hruk ding thilpuan a kuat nain a duh lo. 5 Siangpahrang nih Esther zohkhenh awkah rian a pekmi tildit pa Hathak kha Esther nih a auh i zei thil dah a cang ti hngalh awkah Mordekai sinah a thlah.

6 Cucaah Hathak cu siangpahrang kutka hmai i khua chung tual ah a ummi Mordekai sinah a kal. 7 Mordekai nih a cangmi thil vialte cu a rak chimh dih, cun Judah mi hna hrawh awkah siangpahrang chawhlawn khonnak inn ah tangka mah zat ka pek lai tiah Haman nih bia aa kammi kong zong a chimh. 8 Judah miphun hrawh dih ding timi Shushan* khua i nawl chuahmi ca zong a pek. Mah ca hi Esther na va hmuhsak lai i thil sining kha na va chimh lai, cun siangpahrang sinah va kal seh law a mithmai ṭha hmuh awkah va nawl seh, a miphun caah amah theng nih va nawl seh tiah Hathak kha bia a cah.

9 Hathak cu a rak kir ṭhan i Mordekai nih a cahmi kha Esther cu a chimh. 10 Mah tikah Esther nih Hathak kha Mordekai sinah hitin a va chimhter ṭhan: 11 “Siangpahrang nih auh loin innchung tual ah a lutmi pa an si ah, nu an si ah ahopaoh caah nawlbia pakhat lawng a um: Mah cu thihdan a si i siangpahrang nih sui bawifung a hlerpiak lawng ah a nung kho lai. Mah kha siangpahrang salle le a ukmi peng chung ah a ummi vialte nih an hngalh ko. Siangpahrang nih a ka auh lonak hi ni 30 a si cang.”

12 Esther chimmi bia kha Mordekai cu an chimh tikah, 13 “Siangpahrang inn i ka um caah a dang Judah mi pawl an luat lo hmanh ah kei cu ka luat ko lai tiah i ruat hlah. 14 Atu caan ah dai tein na um ko ahcun Judah mi caah bawmhnak le luatnak cu lam dang in a ra ko lai, asinain nangmah le na pa chungkhar cu nan rawk lai. Siangpahrang nu na hun simi cu hi bantuk caan caah hin a si kho men dahkaw, aho nih dah a hngalh?” tiah Esther cu a cah.

15 Mah tikah Esther nih Mordekai kha hitin a ti: 16 “Shushan khua ah a ummi Judah mi vialte kha pum hna law keimah caah rawl ul u. Nithum chung chun he, zan he zeihmanh ei hlah u, ding hlah u. Kei zong a ka bultawltu nu pawl he rawl kan ul ve lai. Nawlbia he aa ralchanhmi a si ko nain siangpahrang sinah ka lut lai, ka thih ah thih si ko seh.” 17 Mah hnuah Mordekai cu a ṭin i Esther nih a cahmi ning in a tuah.