Jehovah ṭih timi cu amah kan dawt tuk caah a lung a lawmhter lo dingmi zei thil hmanh tuah lo kha a si. Jehovah mithmai ṭha kan hmuh khawh nakhnga a hmaan le hmaan lo kong le biatak le lihbia aa thleidannak kong kha hlathlai duhnak kan ngeih a hau. (Ptb. 2:3-6; Heb. 5:14) Pathian nakin minung kha kan ṭih deuh hna ahcun biatak in kan pial kho. Jehovah nih Israel mi sinah kaan pek hna lai tiah bia a kamhmi hna ram a ngiatu mi 12 kong kha ruat hmanh. Mingiatu pahra nih Jehovah nakin Kanaan mi pawl kha an ṭih deuh hna. Cucaah a dang Israel mi pawl kha hitin an ti hna: “Kan do kho hna lai lo, zeitintiah kanmah nakin an ṭhawng deuh.” (Nam. 13:27-31) Minung hmuhnak ahcun Kanaan mi pawl cu an ṭhawng deuh ti cu a hmaan ko. Asinain Israel mi nih an ral pawl an tei hna lai lo tiah a timi hna cu Jehovah kong a ruat lomi an si. w24.07 9 ¶5-6

Jehovah biaceihnak dihlak kha tling tein zumh khawh a si maw? A si. Abraham nih ṭha tein a hngalthiam bantuk in Jehovah cu “vawleicung dihlak bia a ceihtu,” fimnak tling a ngei i zaangfahnak in a khatmi a si. A Fapa kha ṭha tein a cawnpiak i mi vialte biaceih awkah rian a pek. (Joh. 5:22) A Pa he, a Fapa he minung pakhat cio i an lungthin kha an hmuh khawh. (Matt. 9:4) Cucaah mi pakhat cio bia an ceih hna tikah “ding tein” thil an tuah lai. Jehovah le a biakhiahnak dihlak kha zumh awkah bia khiak hna u sih. Kannih cu biaceih khawhnak sining kan ngei lo i anih cu an ngei ti kha kan hngalh. (Isa. 55:8, 9) Cucaah Jehovah le a Fapa biaceihnak dihlak kha kan zumh khawh. Cun kan Siangpahrang Jesuh nih a Pa dinnak le zaangfahnak tling tein aa zohchunh ti zong kan hngalh.—Isa. 11:3, 4. w24.05 7 ¶18-19

Bia hmaan le biatak chim a biapitnak kong kha Jesuh le Nathanael an i ton hmasa bik lio kong in kan hngalh khawh. Filip nih Jesuh ton ding in a hawikom Nathanael a ratpi lioah cinken awk tlak thil cheukhat a rak cang. Jesuh nih Nathanael kha a hmu bal lo nain hitin a ti: “Israel mi taktak a simi khi zoh hmanh u; amah khi hlenthawinak lungthin zeihmanh a ngei lomi a si.” (Joh. 1:47) Jesuh nih Nathanael cu a dingfelmi a si ti kha a hngalh. Kanmah bantuk in anih zong mitlinglo a si ko nain titer a hmang lo i zei thil paoh ah a dingfelmi a si. Mah kha Jesuh nih a duh i cucaah Nathanael kha a thangṭhat. Salm 15 ah langhtermi, Jehovah lung a lawmhtermi thil tam deuh cu midang zeitindah kan pehtlaih hna timi he aa pehtlaimi a si. Salm 15:3 ah Jehovah thlam ah khual a si dingmi cu “mi congoih a hmang lo i a hawikom cung ah ṭhatlonak a tuah lo i a innpa kong ah bia a vahpi lo” tiah a ti. Midang kha kan congoih hna ahcun mah nih harnak a pek khawh hna.—Jeim 1:26. w24.06 10 ¶7, 9; 11 ¶10