Ngakchia cu khuaruah khawhnak, tuaktan khawhnak asiloah hngalhnak le ṭih a nungmi thil hrial awkah sining an ngei lo. Cucaah ngakchia pakhat hlen le tlaihhrem cu a fawi tuk. Tlaihhrem a hmangmi hna nih ngakchia kha nangmah palh a si, thuh dingmi a si, mi sin na chim zongah ahohmanh nih an in zum lai lo asiloah an in bawm lai lo ti bantukin a phunphun in an hlen hna. Asiloah upa le ngakchia nupa sinak tuah cu pakhat le pakhat i dawt langhternak a si tiah an ti hna. Cu bantuk lihbia nih ngakchia ruahnak kha a hrawh khawh i kum tampi tiang zumhlonak a ngeihter khawh. Tlaihhrem a tongmi ngakchia nih amah le amah kha a rawkralmi, a thurhnawmmi, dawtnak le hnemhnak hmuh awkah aa tlak lomi in aa ruah men lai. Tlaihhremnak nih midang kha caan saupi tiang harnak a pek khawhmi hna cu khuaruahhar awk a si lo. Mah sualnak cu a ṭha lo tukmi a si. Cu bantuk ṭhatlonak a karhmi nih ‘zaangfahnak a ngei lomi’ “miṭhalo le chungthu lengnal pawl” in a khatmi ni hmanung bik caan ah kan nung ti kha a langhter.—2 Tim. 3:1-5, 13. w19.05 15 ¶7-8

Jesuh nih zeiti lam in dah a cawnpiak hna? Pakhatnak, mi kha a biachim in a cawnpiak hna. A chimmi bia cu hmual an ngei tuk. Zeicahtiah Pathian kong biatak, nunnak i aa tinhnak taktak kong le sifah harnak vialte a tawngtham hngami Pathian Pennak kong kha a chim. (Luka 24:19) Jesuh nih a tuahsernak zongin a cawnpiak hna. A nunning in a zultu hna nih zeitindah an nun awk a si ti kha a langhter. (Johan 13:15) Jesuh nih zeitikah dah a cawnpiak hna? Vawleicung phungchim rian a ṭuan lioah a cawnpiak hna. (Matt. 4:23) A thawhṭhan hnu tlawmpal zongah a zultu pawl kha a cawnpiak hna. Tahchunhnak ah, a zultu 500 leng sinah a lang i miphun vialte kha “ka zultu ah va ser hna u” tiah nawl a pek hna. (Matt. 28:19, 20; 1 Kor. 15:6) Jesuh nih vancung a kai hnuah Khrihfabu lu in a zultu pawl kha lamhruainak a pek zungzal hna. Tahchunhnak ah, AD 96 hrawngah Khrih nih lamkaltu Johan kha chiti thuhmi Khrihfa hna thapek awk le ruahnak cheuh awkah a rak fial.—Kol. 1:18; Biat. 1:1. w19.05 3 ¶4-5

Tuchan ah mi tampi nih an nunnak caah tangka a za in an ngeih nakhnga fakpi in rian an ṭuan a hau. Unau tampi zong an chungkhar herhmi thil bawmh awkah suimilam tampi chung rian an ṭuan a hau. Cheukhat cu nifatin rianṭuan kalnak ca le rian a dih hnu inn ṭinnak caah suimilam tampi an hman. Mi tampi cu an chungkhar bawmh awkah tangka kawlnak caah pumsalei rian kha fakpi in an ṭuan. Chun nitlak rian an ṭuan caah unau pawl cu an tha a ba tuk. Cucaah pumpak hlathlainak an tuah ti lo. Baibal le kan cauk hna hmangin pumpak hlathlainak tuah awkah a caan kan pek a hau. Jehovah he a ṭhami pehtlaihnak ngeih le zungzal nunnak hmuh kan duh ahcun mah cu a biapi tukmi a si. (1 Tim. 4:15) Cheukhat cu zingka tein an tho i a daih lio caan le ṭha tein an tuaktan khawh lio caan ah pumpak hlathlainak kha an tuah. Cheukhat nih hlathlainak kha zanlei ah an tuah i an tuahmi kong kha ruah awkah minit tlawmpal chung a caan an pek. w19.05 26 ¶1-2