Psonm

Pour direkter lanmizik. Maskil.* En sanson David ler Doeg en Edonmit ti al dir Sail ki David ti’n al kot lakaz Aimelek.

52 Ou zonm for, akoz ou fer vantar pour bann move keksoz ki ou’n fer?

Lanmour fidel Bondye i dire tou dilon lazournen.

2 Ou lalang i koupe parey en razwar,

I fer konplo pour fer sa ki mal e anbet lezot.

3 Ou pli kontan sa ki mal ki sa ki byen

E ou koz manti plis ki ou dir laverite. (Sela)

4 Ou ki annan en lalang ki anbet lezot,

Ou kontan tou parol ki fer ditor!

5 Sanmenm sa Bondye pou detri ou enn fwa pour tou.

I pou tyonbo ou e tir ou dan ou latant.

I pou derasin ou dan pei bann dimoun vivan. (Sela)

6 Bann dimoun ki fer sa ki byen pou vwar sa e zot pou vreman etonnen.

Zot pou riy sa enn ki fer sa ki mal e dir:

7 “La en dimoun ki pa’n rod proteksyon Bondye,

Me i ti annan konfyans dan son gran larises

E i ti depan lo bann konplo ki i’n fer.”*

8 Me mwan mon pou parey en zoli pye zoliv dan lakaz Bondye.

Mon annan konfyans dan lanmour fidel Bondye pour touzour e touzour.

9 Mon pou loue ou pour touzour akoz sa ki ou’n fer.

Devan bann dimoun ki fidel avek ou,

Mon pou annan lespwar dan ou non, parski sa i byen.