Zeremi

7 Zeova ti koz avek Zeremi e i ti dir: 2 “Debout dan baro kot lakaz Zeova e anons sa mesaz laba, ‘Pep Zida antye ki antre dan sa bann baro pour al azenou devan Zeova, ekout sa ki Zeova i dir. 3 La sa ki Zeova Sef larme, Bondye Izrael, i dir: “Sanz zot fason fer ek zot bann aksyon e mon pou les zot kontinyen reste dan sa landrwa. 4 Pa bezwen krwar bann dimoun ki koz manti e dir, ‘Sa i* tanp Zeova, tanp Zeova, tanp Zeova!’ 5 Parski si zot vreman sanz zot fason fer ek zot bann aksyon, si zot vreman fer ki i annan lazistis ant en dimoun ek son prosen, 6 si zot pa maltret bann etranze, bann orfelen* ek bann vev, si zot pa touy* bann dimoun inosan dan sa landrwa e si zot aret ador lezot bondye ki pou fer zot prop maler, 7 mon pou les zot kontinyen reste dan sa landrwa, dan sa pei ki mon ti donn zot bann zanset pour touzour.”’”*

8 “Me zot zot krwar bann dimoun ki koz manti e sa pa pou donn zot okenn byenfe. 9 Eski zot kapab vole, komet mert, fer adilter, fer fo serman, ofer bann sakrifis* avek Baal e ador bann bondye ki zot pa konnen 10 e apre zot vin debout devan mwan dan sa lakaz ki port mon non e dir, ‘Nou pou ganny sove,’ menm si zot pe fer tou sa bann keksoz degoutan? 11 Eski dapre zot, sa lakaz ki port mon non in vin en lakaz* voler? Mon’n vwar sa pour mwan menm.” La sa ki Zeova in dir.

12 “‘Me al kot mon landrwa Silo kot mon ti fer mon non ganny glorifye pour premye fwa e gete ki mon’n fer avek li vi ki mon pep Izrael ti fer bann move keksoz. 13 Me zot ti kontinyen fer tou sa bann keksoz e menm si mon ti koz avek zot plizyer fwa,* zot pa ti ekoute. Mon ti kontinyen apel zot, me zot pa ti oule reponn.’ La sa ki Zeova in dir. 14 ‘Alor sa ki mon ti fer avek Silo, mon pou osi fer parey avek sa lakaz ki port mon non, sa lakaz ki zot annan konfyans ladan e avek sa landrwa ki mon ti donn zot ek zot bann zanset. 15 Mon pou tir zot devan mwan zis parey mon ti fer avek tou zot bann frer, tou desandans Efraim.’

16 “Me ou, pa bezwen priy pour sa pep. Pa bezwen demann mwan led oubyen fer lapriyer oubyen sipliy mwan pour sa pep, parski mon pa pou ekout ou. 17 Eski ou pa vwar sa ki zot pe fer dan bann lavil Zida e dan bann semen Zerizalenm? 18 Bann garson pe anmas dibwa, bann papa pe alim dife e bann madanm pe prepar lapat pour fer gato pour ofer avek Larenn Lesyel* e zot pe ofer bann lofrann diven* avek lezot bondye pour ofans mwan. 19 ‘Me eski zot pe fer mwan ditor?’* La sa ki Zeova in dir. ‘Pa zot pe fer zot menm ditor e anmenn laont lo zot menm?’ 20 Alor la sa ki Souvren Senyer Zeova i dir, ‘Gete! Mon pou devid mon gran lakoler lo sa landrwa, lo bann dimoun e lo bann zannimo, lo bann pye dibwa dan lakanpanny e lo bann rekolt. Mon lakoler pou brile e i pa pou kalmi.’

21 “La sa ki Zeova Sef larme, Bondye Izrael, i dir, “ Ale, met zot bann lofrann brile* ansanm avek lezot sakrifis e apre manz sa lavyann. 22 Parski sa zour ki mon ti fer zot bann zanset sorti Lezip, mon pa ti dir zot nanryen oubyen donn zot lord konsernan bann lofrann brile ek bann sakrifis. 23 Me mon ti donn zot sa lord: “Obei sa ki mon’n dir e mon pou vin zot Bondye e zot pou vin mon pep. Zot devret fer tou sa ki mon demann zot pour fer pour ki tou keksoz i al byen pour zot.”’ 24 Me zot pa ti ekoute oubyen ouver zot zorey. O kontrer, zot ti swiv bann plan ki zot ti fer zot menm,* zot ti antete e zot ti swiv zot move leker e zot ti retourn an aryer e zot pa ti al devan, 25 depi zour ki zot bann zanset ti sorti Lezip ziska ozordi. Alor tou le zour mon ti kontinyen* anvoy tou mon bann profet kot zot. 26 Me zot pa ti oule ekout mwan e zot pa ti ouver zot zorey. O kontrer, zot ti antete* e zot ti pli pir ki zot bann zanset!

27 “Ou pou dir zot tou sa bann keksoz, me zot pa pou ekout ou. Ou pou kriy zot, me zot pa pou reponn ou. 28 Ou pou dir zot, ‘Sa i sa nasyon ki pa’n obei sa ki Zeova zot Bondye in dir zot e ki pa ti oule aksepte disiplin. Fidelite in disparet e personn pa koz lo la.’*

29 “Koup ou seve ki pa’n ganny koupe* e zet li. Sant en kantik dey lo bann montanny parski Zeova in rezet sa zenerasyon ki’n fer li vreman ankoler e i pou abandonn zot. 30 ‘Parski pep Zida in fer sa ki mal dan mon lizye.’ La sa ki Zeova in dir. ‘Zot in met zot bann zidol degoutan dan sa lakaz ki port mon non pour fer li vin enpir. 31 Zot in konstri bann landrwa ladorasyon* ki dan Tofet, ki dan Vale Garson Inonm* pour zot bril zot bann garson ek zot bann fiy dan dife, en keksoz ki mon pa’n donn zot lord pour zot fer e ki mon pa’n zanmen mazin lo la.’*

32 La sa ki Zeova i dir: “‘Alor gete! En letan pe vini kot i pou nepli ganny apele Tofet oubyen Vale Garson Inonm,* me i pou ganny apele Vale bann dimoun ki’n ganny touye. Zot pou anter bann dimoun mor dan Tofet ziska ki i nepli annan plas pour anter dimoun. 33 Bann zwazo dan lesyel ek bann zannimo sovaz lo later pou manz lekor bann dimoun parmi sa pep ki’n mor e i pou napa personn pour pous zot. 34 Mon pou fer ki dimoun pou nepli tann bann dimoun ki pe selebre e ki dan lazwa, lavwa nouvo marye ek nouvel marye dan bann lavil Zida e dan bann semen Zerizalenm, parski sa pei pou ganny detrir.’”