Let pour Filemon

1 Delapar Pol, en prizonnyen akoz Kris Zezi ek nou frer Timote, pour Filemon nou frer ki nou kontan ki travay ansanm avek nou, 2 nou ser Afya, Arsip ki en solda Kris ansanm avek nou e pour sa kongregasyon ki zwenn kot ou lakaz:

3 Ki Bondye nou Papa ek nou Senyer Zezi Kri i donn zot lape ek labonte ekstraordiner.*

4 Mon touzour remersye mon Bondye ler mon koz lo ou dan mon lapriyer, 5 akoz mon pe toultan tann koz lo lafwa ki ou annan dan Senyer Zezi ek lanmour ki ou annan pour li ek tou bann sen. 6 Mon priye ki sa menm lafwa ki ou annan parey lezot i a kapab pous ou pour rekonnet ki tou bon keksoz ki nou annan i vin atraver Kris. 7 Mon frer, mon dan en gran lazwa e i’n vreman rekonfort mwan ler mon’n tann koz lo ou lanmour, parski ou’n vreman ankouraz bann sen.*

8 Pour sa rezon, menm si mon annan lotorite an sa ki konsern Kris pour donn ou lord pour fer sa ki byen, 9 mon plito sipliy ou akoz ou lanmour vi ki mon’n vye e mon osi en prizonnyen akoz Kris Zezi. 10 Mon sipliy ou an faver mon garson Onezim akoz mon’n vin parey en papa pour li dan prizon.* 11 Oparavan i pa ti itil pour ou, me aprezan i itil pour ou ek mwan. 12 Mon pe fer sa enn ki annan en plas spesyal dan mon leker* retourn kot ou.

13 Mon ti a kontan gard li isi avek mwan pour ki i kapab pran ou plas pour servi mwan pandan ki mon dan prizon akoz sa bon nouvel. 14 Me mon pa anvi fer nanryen san ou konsantman, pour ki ou kapab fer sa bon aksyon akoz ou menm ou anvi fer li me pa akoz ou ganny forse pour fer li. 15 Petet i pour sanmenm rezon ki i ti sove pour en pe letan,* pour ki ou reganny li pour touzour, 16 pa selman konman en lesklav, me plito konman en frer. Mon kontan li e ou ou pou kontan li plis ankor konman en lesklav e osi konman en disip Senyer. 17 Alor, si ou konsider mwan konman ou zanmi, byen resevwar li parey ou ti pou resevwar mwan. 18 Deplis, si i’n fer ou okenn ditor ouswa i dwa ou okenn keksoz, mwan ki pou rann ou. 19 Mwan Pol, mon pe ekri avek mon prop lanmen: Mon pou rann ou tou sa ki i dwa ou. Mon pa bezwen dir ou ki ou dwa mwan ou lavi. 20 Wi, mon frer, fer mwan sa faver o non Senyer, ankouraz mwan* akoz Kris.

21 Ler mon pe ekri sa, mon annan konfyans ki ou pou fer sa ki mon’n demande e menm plis ki sa ankor. 22 Deplis, prepar en plas pour mwan osi, parski mon swete ki gras a zot lapriyer mon pou kapab retourn kot zot.*

23 Epafras i fer ou salanm, i dan prizon avek mwan akoz Kris Zezi. 24 Mark, Aristark, Demas ek Lik, ki travay ansanm avek mwan i fer ou salanm osi.

25 Ki zot leta lespri i ganny beni avek labonte ekstraordiner nou Senyer Zezi Kri.