Psonm

 2 Lav mwan konpletman e tir mon fot.

Pirifye mwan akoz mon pese.

 3 Parski mon konn byen mon bann fot

E mon pese i toultan la devan mwan.*

 4 Mon’n fer pese kont ou, sirtou kont ou.*

Mon’n fer sa ki mal dan ou lizye.

Alor, ou annan rezon ler ou kondann mwan

E ou zizman i zis.

 5 Gete! Depi ki mon’n ne, mon koupab akoz mon fot.

Depi zour ki mon egziste dan vant mon manman, mon dan pese.

 6 Ou kontan ler en dimoun i annan en leker senser.

Ansenny mwan pour ki dan fon mon leker, mon annan vre lasazes.

 7 Servi lizop* pour pirifye mwan akoz mon pese pour ki mon vin prop.

Lav mwan pour ki mon vin pli blan ki lanez.

 8 Fer mwan tann bann dimoun ki dan lazwa e ki pe selebre,

Pour ki mon kapab dan lazwa menm si ou’n kraz mon bann lezo.

 9 Kasyet* ou figir pour ki ou pa vwar mon bann pese

E efas tou mon bann fot.

10 O Bondye, donn mwan en leker pir

E sanz mon fason panse pour ki mon reste fidel.

11 Pa rezet mwan

E pa tir ou lespri sen lo mwan.

12 Redonn mwan lazwa akoz ou mon sover,

Fer mwan annan sa dezir pour obei ou.

13 Mon pou ansenny bann ki fer pese sa ki fer ou plezir

Pour ki zot retourn kot ou.

14 O Bondye, Bondye ki sov mwan, pardonn mwan akoz mon’n touy en dimoun,

Pour ki mon kapab koz lo ou ladrwatir avek lazwa.

15 O Zeova, ouver mon labous,

Pour ki mon kapab loue ou.

16 Parski pa sakrifis ki ou oule, si non mon ti pou’n donn ou.

Ou pa pran plezir dan lofrann brile.

17 Sakrifis ki Bondye i kontan i en lespri fatige.

O Bondye, ou pa pou rezet* en dimoun ki annan en leker kase e ki dan lapenn.

18 Akoz ou labonte, fer sa ki bon pour Siyon.

Konstri bann miray Zerizalenm.

19 Alor ou pou pran plezir dan bann sakrifis ladrwatir,

Bann lofrann brile ek sakrifis ki ganny brile konpletman

E bann toro pou ganny ofer lo ou lotel.