De keksoz esansyel pour en maryaz dire

1, 2. (a) Pour konbyen letan maryaz ti’n ganny plàn pour dire? (b) Ki mannyer sa i posib?

KAN Bondye ti ini sa premye zonm ek sa premye fanm dan maryaz, ti napa nanryen ki ti endike ki sa linyon ti pou zis tanporer. Adan ek Ev ti pou viv ansanm pour lavi. (Zenez 2:24) Pour en maryaz akseptab dan lizye Bondye i devret en linyon ant en zonm ek en fanm. Sel rezon ki Labib i donnen pour divorse avek posibilite pour remarye, se si enn oubyen tou le de in annan relasyon seksyel an deor maryaz.​—Matye 5:32.

² Eski i posib pour de dimoun viv ere ansanm kontinyelman pour touzour? Wi. Labib i fer resorti de keksoz esansyel, ki ede pour fer sa posib. Si tou le de, sa mari ek sa madanm i met zot an pratik, zot pou resevwar boner e bokou byenfe. Lekel sa de keksoz esansyel?

 3. Ki sa trwa kalite lanmour ki bann dimoun marye i devret devlope?

³ Premye keksoz esansyel se lanmour. Sa ki enteresan se ki Labib i mansyonn diferan kalite lanmour. Premye se lafeksyon profon e personnel pour en dimoun, en kalite lanmour ki egziste ant de zanmi pros. (Zan 11:3) En lot kalite i sa lanmour ki devlope ant bann manm fanmiy. (Romen 12:10) Trwazyenm i lanmour romantik ki en dimoun i kapab annan pour en dimoun lot sèks. (Proverb 5:15-20) Sirman, en mari ek en madanm i devret devlop sa trwa kalite lanmour. Me i annan en katriyenm kalite lanmour, ki pli enportan ki lezot.

 4. Ki sa katriyenm kalite lanmour?

⁴ Dan sa parti Labib ki’n ganny ekrir an Grek, sa mo pour katriyenm kalite lanmour i a·gaʹpe. Sa mo in ganny servi dan 1 Zan 4:8, kot i dir nou: “Bondye i lanmour.” Annefe, “nou kontan akoz Bondye in kontan nou an premye.” (1 Zan 4:19) En Kretyen i premyerman devlop en tel lanmour pour Zeova e apre pour son prosen. (Mark 12:29-31) Sa mo a·gaʹpe i osi ganny servi dan Efezyen 5:2, ki dir: “Les zot lavi ganny kontrole par lanmour, parey Kris in kontan nou e i’n donn son lavi pour nou.” Zezi ti dir ki sa kalite lanmour pou idantifye son bann vre disip: ‘Dimoun pou war ki zot mon bann disip si zot annan lanmour [a·gaʹpe] pour kanmarad.’ (Zan 13:35) Remark osi lafason ki a·gaʹpe dan 1 Korentyen 13:13 i ganny servi: “Sa trwa keksoz i reste: lafwa, lesperans ek lanmour. Me dan tou, lanmour [a·gaʹpe] i pli gran.”

5, 6. (a) Akoz lanmour i pli gran ki lafwa ek lesperans? (b) Nonm serten rezon akoz lanmour pou ede fer en maryaz dire.

⁵ Kwa ki fer sa lanmour a·gaʹpe pli gran ki lafwa ek lesperans? I ganny dirize par bann prensip​—bann prensip drwat—​ki ganny trouve dan Parol Bondye. (Psonm 119:105) Dapre pwennvi Bondye, lanmour agape i en lentere pour fer sa ki byen e bon pa zis pour nou me pour lezot osi. Nou devret annan sa lanmour pour tou dimoun ki swa zot merite oubyen non. En tel lanmour i ed bann dimoun marye pour swiv sa konsey Labib: “Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad.” (Kolosyen 3:13) De dimoun marye i annan e devlop “en gran lanmour [a·gaʹpe] pour kanmarad parski [sa kalite] lanmour i kouver en kantite pese.” (1 Pyer 4:8) Remarke ki lanmour i kouver bann fot. I pa elimin zot, vi ki napa imen enparfe ki pa fer fot.​—Psonm 130:3, 4; Zak 3:2.

⁶ Ler en koup marye i devlop en tel kalite lanmour pour Bondye e pour kanmarad, zot maryaz pou dire e ere, parski “lanmour i reste pour touzour.” (1 Korentyen 13:8) Lanmour i “soud tou keksoz parfetman ansanm dan larmoni.” (Kolosyen 3:14) Si ou’n marye, konman ou avek ou msye ouswa ou madanm i kapab devlop sa kalite lanmour? Lir Parol Bondye ansanm, e koz lo la. Etidye legzanp lanmour ki Zezi in kite e esey imit li, par reflesir e azir parey li. Anplis, asiste bann renyon Kretyen, kot Parol Bondye i ganny ansennyen. Deplis, priy Bondye pour ed ou devlop sa kalite lanmour siperyer, ki en fri son lespri sen.​—Proverb 3:5, 6; Zan 17:3; Galat 5:22; Ebre 10:24, 25.

 7. Ki savedir respe, e lekel ki devret demontre respe dan maryaz?

⁷ Si de dimoun ki’n marye i vreman kontan kanmarad, alor zot pou osi annan respe pour kanmarad, e respe i sa dezyenm keksoz esansyel pour en maryaz ere. Respe in ganny dekrir konman “annan konsiderasyon pour lezot, oubyen onor zot.” Parol Bondye i konsey bann Kretyen, enkli bann mari ek madanm: “Setaki montre plis respe pour kanmarad.” (Romen 12:10) Zapot Pyer ti ekrir: “Zot osi bann msye, zot devre viv dan larmoni sakenn avek son madanm e rekonnet ki bann madanm i annan en natir pli feb. Tret zot avek respe.” (1 Pyer 3:7) Madanm i ganny konseye pour “respekte son mari.” (Efezyen 5:33) Si ou anvi onor en dimoun, ou zantiy avek li, ou respekte son dinite ek son lopinyon, e ou pare pour fer nenport keksoz rezonnab ki i demann ou.

8-10. Konman respe pou ede fer en linyon maryaz stab e ere?

⁸ Bann ki anvi rezwir en maryaz ere i demontre respe pour kanmarad par pa “pran ka zis avek zot prop lentere, me osi avek lentere [zot msye ouswa zot madanm].” (Filipyen 2:4) Zot pa konsider sa ki bon zis pour zot menm​—ki apel egois. Plito, zot konsider sa ki pli meyer pour sa lot dimoun. An realite, lentere zot msye ouswa zot madanm i vin premye.

⁹ Respe pou ed bann dimoun marye pour rekonnet bann diferans dan pwennvi. I pa rezonnab pour ekspekte de dimoun annan menm pwennvi lo tou keksoz. Sa ki kapab enportan pour en mari i kapab pa sitan enportan pour son madanm, e sa ki en madanm i kontan i kapab pa sa ki son mari i kontan. Me zot tou le de zot devret respekte pwennvi ek swa kanmarad, osi lontan ki sa i reste dan limit lalwa ek prensip Zeova. (1 Pyer 2:16; vwar Filemon 14.) Deplis, sakenn i devret respe dinite kanmarad par pa fer bann fars oubyen remark ki imilye kanmarad, ki swa an piblik oubyen an prive.

¹⁰ Wi, lanmour pour Bondye e pour kanmarad ensi ki respe i de keksoz esansyel pour en maryaz reisi. Ki mannyer zot kapab ganny aplike dan serten laspe pli enportan dan lavi maryaz?

11. Dapre Labib, lekel ki sef dan en fanmiy?

¹¹ Labib i dir nou ki zonm ti ganny kree avek bann kalite ki pou fer li vin en bon sef fanmiy. Alor, zonm i responsab devan Zeova pour byennet spirityel e fizik son madanm ek son zanfan. I bezwen fer bann bon desizyon ki reflekte lavolonte Zeova e i bezwen donn legzanp konman en dimoun ki atase avek Bondye. “Bann madanm, zot devre obei zot mari, parey zot obei Senyer. Parski en mari i sef son madanm parey Kris i sef legliz.” (Efezyen 5:22, 23) Toutfwa, Labib i dir ki zonm osi i annan en sef, Enn ki annan lotorite lo li. Zapot Pol ti ekrir: “Mon oule ki zot konpran ki Kris i sef tou zonm, ki en mari i sef son madanm e Bondye i sef Kris.” (1 Korentyen 11:3) En mari ki saz i aprann egzers son lotorite par imit son prop sef, Zezi Kri.

12. Ki bon legzanp Zezi ti donnen konsernan soumisyon e egzers lotorite?

¹² Zezi osi i annan en sef, Zeova, e i soumet avek Li dan en fason apropriye. Zezi ti dir: “Mon pa pe esey fer sa ki mwan mon oule, me sa ki sa enn ki’n anvoy mwan i oule.” (Zan 5:30) Pa i en legzanp ekselan! Zezi i “premye-ne tou kreasyon.” (Kolosyen 1:15) I ti vin Mesi. I ti pou vin Sef kongregasyon bann Kretyen swazir ek Lerwa swazir Rwayonm Bondye, parlao tou lanz. (Filipyen 2:9-11; Ebre 1:4) Kantmenm i ti annan en tel pozisyon e i ti pe esper bann gran keksoz dan lefitir, Zezi konman en zonm pa ti sever, strik, oubyen demann tro bokou. I pa ti dominer, pe konstaman rapel son bann disip ki zot ti bezwen obeir li. Zezi ti annan lanmour ek konpasyon, espesyalman anver bann ki’n akable avek problenm. I ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.” (Matye 11:28-30) Pa i ti gou dan son konpanni!

13, 14. Ki mannyer en bon mari i kapab imit Zezi ler i pe egzers son lotorite?

¹³ I ti a byen si en mari ki anvi son fanmiy ere i konsider bann bon kalite Zezi. En bon mari pa sever, ni dominer, e i pa abiz son lotorite par maltret son madanm. Okontrer, i kontan e onor li. Si Zezi ti ‘annan limilite dan son leker,’ en mari i annan plis rezon pour koumsa akoz kontrerman avek Zezi, i fer bann fot. Kan i fer sa, i anvi ki son madanm i konpran li. Alors, en mari ki annan limilite i admet son bann fot, kantmenm i kapab difisil pour li dir sa parol: “Ekskiz mwan, ou annan rezon.” En madanm pou vwar li pli fasil pour respekte lotorite en mari ki modes e ki abes son lekor olye ki en mari ki orgeye e antete. Demenm, en madanm ki annan respe i osi demann lekskiz kan i annan tor.

¹⁴ Bondye ti kree bann fanm avek bann bon kalite ki i kapab servi pour kontribye pour fer en maryaz ere. En mari ki rezonnab pou rekonnet sa e i pa pou anpes son madanm demontre sa bann bon kalite. Bokou madanm i tant pour pli sansib e annan plis konpasyon, bann kalite ki neseser pour kapab pran swen avek en fanmiy e pour antretenir bann relasyon imen. Souvan, en madanm i pli kapab fer en lakour vin en landrwa agreab pour viv. Sa fanm debrouyer ki ganny dekrir dan Proverb sapit 31, i annan bokou bon talan ek kalite merveye, e son fanmiy i benefisye plennman. Akoz? Parski son mari “in met konfyans” dan li.​—Proverb 31:10, 11.

15. Ki mannyer en mari i kapab demontre lanmour ek respe parey Kris pour son madanm?

¹⁵ Dan serten kiltir, zot bokou met lanfaz lo lotorite sa mari, ki fer ki menm demann li en kestyon i ganny konsidere konman mank respe. I kapab ki i tret son madanm preske parey en lesklav. En tel fason egzers lotorite pa anmenn en bon relasyon non selman avek son madanm me osi avek Bondye. (Vwar 1 Zan 4:20, 21.) De lot kote, serten mari i neglize pour egzers zot lotorite, zot les zot madanm diriz lakour. En mari ki soumet byen avek Kris, pa eksplwat son madanm oubyen mank respe pour son dinite. Plito, i imit lanmour dezenterese Zezi e i fer sa ki Pol ti konseye: “Zot, bann mari, kontan zot madanm parey Kris in kontan legliz e in donn son lavi pour li.” (Efezyen 5:25) Zezi Kri in telman kontan son bann disip ki i’n mor pour zot. En bon mari pou esey imit sa latitid zenere, rod byennet son madanm, olye fer dominer avek li. Ler en mari i soumet avek Kris e i demontre lanmour ek respe parey Kris, son madanm pou ganny motive pour soumet avek li.​—Efezyen 5:28, 29, 33.

16. Ki bann kalite ki i en madanm i devret demontre dan son relasyon avek son mari?

¹⁶ En pe letan apre ki Adan ti’n ganny kree, “Zeova Bondye ti dir: ‘I pa bon pour zonm reste tousel. Mon pou fer en led ki adapte avek li.’” (Zenez 2:18) Bondye ti kree Ev pour li vin konman “en led,” non pa konman en konpetiter. Maryaz pa ti pou parey en bato ki annan de kaptenn ki pe fer konpetisyon. En mari ti pou egzers lotorite avek lanmour, e en madanm ti pou manifeste lanmour, respe, ek soumisyon volonterman.

17, 18. Dan ki fason en madanm i kapab en vre led pour son mari?

¹⁷ Toutfwa, en bon madanm i plis ki zis soumet. I esey vin en vre led, en sipor pour son mari kan i annan bann desizyon pour son mari pran. Evidaman, sa i pli fasil pour li ler i dakor avek bann desizyon son mari. Me menm kan i pa dakor, son sipor i kapab ed desizyon son mari pour reisi.

¹⁸ En madanm i kapab ed son mari pour vin en bon sef dan lezot fason. I kapab eksprim son lapresyasyon pour bann zefor ki son mari in fer pour dirize, olye kritik li oubyen fer li santi ki i pa zanmen kapab satisfer li. Par azir avek son mari dan en fason pozitif, i devret rapel ki en “lespri bon e trankil” i “annan en gran valer devan Bondye,” pa zis dan lizye son mari. (1 Pyer 3:3, 4; Kolosyen 3:12) Me si sa mari i pa Temwen Zeova? Ki swa i Temwen Zeova oubyen non, Labib i ankouraz bann madanm “pour kontan zot mari ek zot zanfan, pour ki zot a rezonnab, byen tenir zot, konn byen okip zot lakour, obei zot mari, pour ki personn pa mal koz parol Bondye.” (Tit 2:4, 5) An ka en sitiasyon ki enplik son konsyans, sa mari ki pa Temwen Zeova pou pli kapab respekte pozisyon son madanm si sa sitiasyon i ganny prezante avek “douser ek profon respe.” Serten mari in ‘aksepte lafwa san laparol. Zot in war ki zot madanm in kondwi zot dan en fason drwat e avek respe.’​—1 Pyer 3:1, 2, NW, 15; 1 Korentyen 7:13-16.

19. Ki en madanm pou fer si son mari i demann li pour kas lalwa Bondye?

¹⁹ Si par egzanp en mari i demann son madanm pour fer en keksoz ki Bondye i defann? Si sa i arive, sa madanm i devret rapel ki Bondye i son pli gran Sef. I imit legzanp bann zapot kan lotorite ti demann zot pour vyol lalwa Bondye. Akt 5:29 i fer resorti: “Pyer avek lezot zapot ti reponn, ‘Nou devre obei Bondye plito ki zonm.’”

20. Dan ki laspe enportan ki lanmour ek respe i esansyel?

²⁰ Lanmour ek respe i esansyel dan en lot laspe lavi maryaz​—kominikasyon. En bon mari pou dyalog avek son madanm. I pou pare pour ekout son bann problenm, sa ki i’n fer, son pwennvi lo diferan keksoz. Sa madanm i bezwen en tel keksoz. En mari ki pran letan pour koz avek son madanm e vreman ekout sa ki i dir, i demontre son lanmour ek respe pour li. (Zak 1:19) Serten i konplent ki zot mari i pas en pti gin letan pour fer konversasyon avek zot. Sa i fer lapenn. Sertennman, dan sa letan kot dimoun i tre okipe, bann mari i kapab pe travay bokou letan an deor lakour, e sitiasyon ekonomik i kapab fer ki serten madanm osi i anploye. Me en koup marye i bezwen rezerv letan pour kanmarad. Sansan, zot kapab vin endepandan avek kanmarad e sa i kapab anmenn bann problenm serye sirtou si zot santi ki zot bezwen en lot dimoun an deor zot maryaz pour ekout zot.

21. Ki mannyer bon fason koze i ede pour gard lavi maryaz ere?

²¹ Lafason ki bann madanm ek mari i kominik avek kanmarad i enportan. “Bann parol agreab i . . . dou e i parey en gerizon pour lezo.” (Proverb 16:24) Ki swa ou msye ouswa ou madanm i Temwen oubyen non, sa konsey Labib i aplike: ‘Ki zot parol i touzour agreab e sezonnen avek disel.’ Sa i vedir ki i annan bon gou. (Kolosyen 4:6, NW) Si enn in pas en lazournen difisil, enn de parol zantiy e rekonfortan sorti kot son msye ouswa son madanm i kapab fer li bokou dibyen. “En parol ki ganny dir dan son moman apropriye, i parey ponm lor dan bann skilptir an larzan.” (Proverb 25:11) Ton lavwa ek swa parol i tre enportan. Par egzanp, dan lakoler ek en ton dominer, enn i kapab dir avek lot: “Ferm sa laport, mon dir ou!” Me pa i pou pli byen ‘sezonnen avek disel’ si ou dir sa parol dan en bon fason, “Eski ou kapab ferm sa laport, silvouple?”

22. Ki latitid bann koup i bezwen pour kapab mentenir bon kominikasyon?

²² Bon kominikasyon i en sikse kan i annan bann parol dou, bann regar ek bann pti zes zantiy, labonte, konprenezon, ek tandres. Par travay dir pour mentenir bon kominikasyon, zot tou le de zot pou santi zot lib pour eksprim zot bezwen, e zot kapab rekonfort e ed kanmarad dan bann moman dekourazman oubyen presyon. Parol Bondye i ankouraz nou: “Koz dan en fason rekonfortan avek bann ki dekouraze.” (1 Tesalonisyen 5:14, NW) I pou annan moman kot sa mari i dekouraze e letan kot sa madanm osi i dekouraze. Zot kapab “koz dan en fason rekonfortan,” pour batir enn a lot.​—Romen 15:2.

23, 24. Konman ki lanmour ek respe i ede ler i annan bann dezakor? Donn en legzanp.

²³ En koup ki manifeste lanmour ek respe pa pou vwar tou dezakor konman en defi. Zot pou fer tou pour zot pa ‘tret kanmarad dir.’ (Kolosyen 3:19) Zot tou le de zot devret rapel ki “en larepons, letan i dou, i detourn lakoler.” (Proverb 15:1) Fer atansyon ki ou pa abes oubyen kondann ou msye ouswa ou madanm kan i eksprim son santiman pli profon. Plito, vwar sa konman en loportinite pour konpran pli byen son pwennvi. Ansanm, esey travay lo bann diferans e ariv lo en bon konklizyon.

²⁴ Rapel sa lokazyon ler Sara ti sizer avek son mari, Abraam, en solisyon pour en serten problenm ki i pa ti tonm dakor avek. Me Bondye ti dir Abraam: “Ekout son lavwa.” (Zenez 21:9-12) Abraam ti fer sa, e i ti ganny beni. Pareyman, si en madanm i sizer en keksoz ki diferan avek sa ki son mari i annan antet, sa mari i devret omwen ekoute. Anmenmtan, en madanm pa devret domin konversasyon me i devret ekout sa ki son mari i annan pour dir. (Proverb 25:24) En mari ouswa en madanm ki toultan ensiste lo son prop pwennvi i montre mank lanmour ek respe.

25. Konman ki bon kominikasyon i kontribye dan bann laspe entim pour fer lavi maryaz ere?

²⁵ Bon kominikasyon i osi enportan an sa ki konsern relasyon seksyel. Egoism e mank kontrol lo lekor i kapab seryezman gat sa relasyon pli entim dan maryaz. Kominikasyon fran, ansanm avek pasyans, i esansyel. Kan sakenn i sers byennet kanmarad, sèks i rarman en problenm grav. Dan sa domenn e osi dan lezot domenn, “personn pa devret rod son prop lentere, me lentere son prosen.”​—1 Korentyen 7:3-5; 10:24.

26. Menm si tou maryaz i annan son botan ek son movetan, konman ki ekout Parol Bondye pou ed bann koup marye pour ere?

²⁶ Parol Bondye i ofer bon konsey! Sertennman, tou maryaz pou annan son botan ek son movetan. Me ler bann dimoun marye i soumet avek panse Zeova, parey i ganny revele dan Labib, e baz zot relasyon lo lanmour ek respe, zot kapab annan konfyans ki zot maryaz pour dire e ere. Alor, zot pa pou zis onor kanmarad me osi Loter maryaz, Zeova Bondye.