I ti “gard tousala dan son leker”

1, 2. Dekrir vwayaz Mari e eksplike akoz sa ti’n bezwen vreman difisil pour li.

MARI pa kapab ganny en bon pozisyon lo sa bourik, nek i pe bouz bouze pour esey fer li konfortab. I fer sepa konbyen erdtan zot pe vwayaze. Zozef i devan pe esey marse menm pour ariv ziska zot destinasyon Betleenm ki ankor en bon pti zistans. Tanzantan, Mari i santi son pti baba pe vire dan son vant.

² Labib i dir ki Mari ti pros pour ganny son pti baba. (Lik 2:5, 6) Zis esey imazin Mari ek Zozef pe vwayaze atraver bann plantasyon. Kekfwa serten fermye ki pe laboure oubyen senmen pa oule krwar ler zot vwar en madanm avek en gro vant pe fer en vwayaz koumsa. Akfer Mari ti bezwen kit Nazaret e fer sa gran vwayaz?

 3. Ki responsabilite Mari ti gannyen e ki nou pou aprann avek li?

³ Tou ti konmanse detrwa mwan pase kan sa zenn fiy Zwif ti ganny en responsabilite ki personn pa ti pou zanmen ganny ankor. I ti pou donn nesans en zanfan ki ti pou vin Mesi, Garson Bondye! (Lik 1:35) Ler i ti pros pour li ganny son pti baba, lanmenm la ki zot ti ganny demande pour fer sa vwayaz. Dan tousala, Mari ti pou fer fas avek bann defi ki ti pou teste son lafwa. Annou vwar sa ki ti fer li reste for spirityelman.

4, 5. (a) Akoz Zozef ek Mari ti al Betleenm? (b) Sa lord ki Sezar ti donnen ti ede akonpli ki profesi?

⁴ Pa zis Zozef ek Mari ki ti pe vwayaze. Sezar Ogis ti’n resaman ordonnen ki en lanrezistreman i ganny fer dan sa pei. Bann dimoun ti bezwen al dan sa lavil kot zot ti ne pour zot ganny anrezistre. Ki ti reaksyon Zozef? Sa resi i dir: “Alor, Zozef ti kit Nazaret dan Galile, pour al dan lavil David, ki ti apel Betleenm dan Zide, akoz Zozef ti en desandans David.”​—Lik 2:1-4.

⁵ I pa ti par azar ki Sezar ti donn sa lord a sa moman. En profesi ki ti’n ganny ekrir set syek avan sa ti’n predir ki Mesi ti pou ne Betleenm. I enteresan pour konnen ki i ti annan en lavil ki ti apel Betleenm ki ti zis 11 kilomet avek Nazaret. Par kont, sa profesi ti spesifye ki Mesi ti pou ne “Betleenm Efrata.” (Lir Mika 5:2.) Depi Nazaret ziska sa pti vilaz, en dimoun ti pou bezwen vwayaz atraver bann montanny apepre 130 kilomet an pasan par Samari. Sanmenm sa Betleenm kot Zozef ti bezwen ale pour ganny anrezistre, parski sa ti sa landrwa kot Lerwa David zanset Zozef ek son madanm Mari ti sorti.

6, 7. (a) Akoz i ti’n kapab difisil pour Mari al Betleenm? (b) Konman madanm Zozef, ki diferans ti annan dan desizyon ki Mari ti bezwen fer? (Vwar osi not anba lo paz.)

⁶ Eski Mari ti pou siport Zozef dan son desizyon pour obeir sa lord? Apre tou, sa traze ti pou difisil pour li. I paret ki i ti o konmansman Oktob, alor i kapab ki zot ti pou ganny bann pti lapli anmezir ki letan sek ti pe terminen. De plis, zot ti vreman bezwen monte pour al Betleenm akoz Betleenm ti anler lo montanny ki ti apepre 760 met oter ki en bon pti grenpe ler ou’n marse pour detrwa zour. Anfet, i ti pou pran plis letan ki labitid, akoz Mari ti pou bezwen poze plizyer fwa. A sa moman, en zenn fiy ti pou prefere reste kot lakour, kot i ti pou annan fanmir ek zanmi ki ti pou ed li kan i ti pou konmans santi douler lakousman. San dout, i ti bezwen kouraz pour fer sa traze.

⁷ Toudmenm, Lik ti ekrir ki “Zozef ti al laba pour anrezistre li, avek Mari.” I osi dir ki Mari ti’n marye avek Zozef, parey i ti’n ganny promet. (Lik 2:4, 5, NW) Konman madanm Zozef, sa ti annan en gran lefe lo bann desizyon ki Mari ti fer. I ti vwar son msye konman son sef spirityel e i ti demontre lapresyasyon pour son rol konman en madanm pour ed e siport li dan son bann desizyon.a I ti volonterman obei son msye e dan sa fason i ti demontre lafwa.

 8. (a) Kwa ankor ki ti’n kapab ankouraz Mari pour al Betleenm avek Zozef? (b) Dan ki fason Mari i en bon legzanp pour bann Kretyen fidel?

⁸ Kwa ankor ki ti’n kapab motiv Mari pour obeir? Eski i ti konn sa profesi ki Mesi ti pou ne Betleenm? Labib pa dir, me i posib, akoz bokou parmi bann sef relizye e dimoun an zeneral ti konn sa. (Mat. 2:1-7; Zan 7:40-42) Mari ti konn byen Lekritir. (Lik 1:46-55) Ki swa Mari ti deside pour fer sa traze pour obeir son msye ouswa akoz i ti en lord Sezar, en profesi Zeova oubyen pour tou le trwa rezon, an tou le ka, i’n kit en bon legzanp. Zeova i apresye bann msye ek madanm ki annan limilite e ki pare pour obeir. Dan nou letan, kot en kantite dimoun pa vwar li enportan pour soumet, Mari i en bon legzanp pour bann Kretyen fidel partou kote.

9, 10. (a) Ki Zozef ek Mari ti kapab pe mazinen kan zot ti pe apros Betleenm? (b) Akoz Zozef ek Mari ti al reste dan en park bef?

⁹ Mari ti’n bezwen santi li soulaze kan i ti konmans vwar Betleenm. Petet, Mari ek Zozef ti pe mazin listwar sa pti vilaz anmezir ki zot ti mont sa montanny e pas o bor bann pye zoliv ki ti parmi bann dernyen pye fri pour ganny rekolte dan lannen. Sa vilaz ti tro pti pour ganny enkli parmi bann lavil Zida, zis parey profet Mika ti’n dir. Pourtan, i sa menm landrwa kot Boaz, Naomi e pli tar David ti ne plis ki mil an pase.

¹⁰ Ler zot ti ariv laba, Mari ek Zozef ti vwar sa pti vilaz ranpli avek dimoun. I ti annan lezot dimoun ki ti’n fini arive pour anrezistre avan zot, alor i ti napa landrwa pour zot reste.b Zot ti napa swa me pas lannwit dan en park bef. Nou kapab mazin sa langwas ki Zozef ti ladan ler i ti vwar son madanm pe soufer e deplizanpli sa douler ti pe vin pli for ankor. Se la, dan sa park bef ki i ti konmans ganny douler lakousman.

11. (a) Akoz bann manman i kapab konpran soufrans Mari? (b) Ki sa de fason ki Zezi ti “premye-ne”?

¹¹ Pa tou manman i kapab konpran soufrans Mari! Apepre 4,000 an avan sa, Zeova ti’n predir ki bann madanm ti pou soufer pandan lakousman akoz zot in erit pese. (Zen. 3:16) Napa okenn levidans ki montre ki sa ti en leksepsyon pour Mari. Resi Lik pa donn okenn detay me i zis dir : “I ti donn nesans son premye zanfan.” (Lik 2:7) Sa ti son “premye” zanfan, premye parmi plizyer zanfan Mari, apepre set an tou. (Mark 6:3) Me sa enn ti diferan. I pa ti zis son premye ne i ti osi “ premye-ne tou kreasyon,” sel Garson byenneme Bondye!​—Kol. 1:15.

12. Kote Mari ti met son pti baba ler i ti ne e ki mannyer larealite ti diferan avek sa bann portre ek senn nesans Zezi ki nou vwar konmela?

¹² I ti a sa moman ki sa resi ti azout en detay ki bokou i konnen: “I ti met li alonze dan en loz.” (Lik 2:7) Souvandfwa, bann portre ek bann senn nesans Zezi ki ou kapab vwar dan lemonn antye i pa reflekte larealite. Annou vwar sa ki ti vreman arive. En loz i sa keksoz ki zannimo i manz ladan. Mazinen ki sa fanmir ti pe reste dan en park bef, kot ti napa bon loder ek lizyenn. Lekel sa paran ki ti pou swazir en tel landrwa pour ganny son pti baba si i ti annan en lot swa? Tou paran i oule sa ki pli bon pour son zanfan. Konbyen plis ankor Mari ek Zozef ti pou kontan sa ki pli bon pour Garson Bondye!

13. (a) Dan ki fason Zozef ek Mari ti servi sa ki zot ti annan mannyer zot kapab? (b) Ki mannyer bann bon paran ozordi i kapab annan menm priyorite ki Mari ek Zozef?

¹³ Par kont, zot pa ti konsantre lo zot sityasyon, zot ti zis servi sa ki zot ti annan mannyer zot ti kapab. Remarke ki Mari li menm ti pran swen avek son pti baba, i ti anvlop li dan en tapi e met li dan sa loz pour li dormi e fer sir ki son pti baba pa ti ganny fre e ki i ti sen e sof. Mari pa ti pou les son sityasyon fatig li e anpes li fer son mye pour pran swen avek son pti baba. Mari ek Zozef ti osi konnen ki pran swen spirityelman avek zot garson ti pou sa keksoz pli enportan ki zot ti kapab fer pour li. (Lir Deterononm 6:6-8.) Ozordi osi, bann bon paran i vwar sa konman en priyorite e zot donn zot zanfan en ledikasyon spirityel dan en lemonn ki pa fatig li avek Bondye.

14, 15. (a) Akoz sa bann berze ti sitan kontan pour vwar sa pti baba? (b) Ki sa bann berze ti fer apre ki zot ti’n vwar Zezi dan loz?

¹⁴ Landrwa kot Mari ek Zozef ti ete ti byen trankil me en sel kou, bann berze ti antre pour vin vwar sa fanmir espesyalman sa pti baba. Sa bann zonm ti eksite e zot ti dan lazwa. Zot ti’n degaze sorti kot zot ti pe vey zot mouton lo montanny.c Zozef ek Mari ti sirprann kan zot ti tann bann berze rakont sa bann leksperyans merveye. Lo sa montanny aswar ler zot ti pe vey mouton, en lanz ti’n aparet avek zot. Laglwar Zeova ti’n ekler toultour e sa lanz ti’n dir zot ki Kris oubyen Mesi ti’n fek ne Betleenm. Zot ti vwar sa pti baba ki ti’n ganny anvlope dan en tapi dan en loz. Apre en keksoz pli ekstraordiner ankor ti arive kan en gran kantite lanz ti aparet e glorifye Bondye!​—Lik 2:8-14.

¹⁵ San dout, sa bann zonm ki ti annan limilite ti taye pour al Betleenm! I ti’n bezwen en plezir pour vwar sa nouvo ne parey lanz ti’n dir zot. Zot pa ti kit sa bon nouvel pour zot menm. “Zot ti rakonte . . . Tou dimoun ki ti tann sa ki bann berze ti dir, ti etonnen.” (Lik 2:17, 18) Dan sa letan, bann sef relizye ti mepriz bann berze. Me pour Zeova, bann zonm fidel ki ti annan limilite ti annan bokou valer. Ki lefe sa vizit ti annan lo Mari?

16. Ki mannyer nou konnen ki Mari ti reflesir bokou e akoz sa ti vreman enportan?

¹⁶ Mari ti’n bezwen fatige apre tou sa douler lakousman, me i ti ekout byen atantivman tou sa ki ti pe ganny dir. Me i pa ti zis ekoute, “Mari ti gard tousala dan son leker e ti medit bokou lo la.” (Lik 2:19) Sa zenn madanm ti’n bezwen reflesir bokou lo la. I ti konnen ki mesaz sa lanz ti enportan. Son Bondye, Zeova ti anvi ki Mari i konnen lekel vreman son garson e ki kantite enportan i ti ete. Alor, i ti fer plis ki zis ekoute. I ti gard tou sa parol dan son leker pour li kapab kontinyelman reflesir lo la dan bann mwan ek lannen ki ti pou swiv. Lefet ki Mari ti fer sa, sa ti’n bezwen ed li gard son lafwa tou dilon son lavi.​—Lir Ebre 11:1.

17. Ki mannyer nou kapab imit legzanp Mari kot i konsern bann laverite dan Labib?

¹⁷ Eski ou pou swiv legzanp Mari? Dan Labib, i annan bokou bann laverite vreman enportan. Me sa bann laverite sorti kot Zeova pa pou fer nou okenn dibyen si nou pa pran zot aker. Nou fer sa par lir Labib regilyerman, pa zis parey nenport ki liv me konman Parol Bondye. (2 Tim. 3:16) Parey Mari, nou bezwen gard sa bann laverite presye dan nou leker e medit lo la. Si nou medit lo sa ki nou lir dan Labib e rod fason pour aplik bann konsey Zeova pli byen, sa pou nouri nou lafwa e fer li vin pli for ankor.

18. (a) Ki mannyer Mari ek Zozef ti obei Lalwa Moiz ler Zezi ti ankor en pti baba? (b) Ki sa lofrann ki Zozef ek Mari ti fer kot tanp ti revele lo zot sityasyon finansyel?

¹⁸ Ler Zezi ti annan wit zour, Mari ek Zozef ti anmenn zot pti baba pour li ganny sirkonsi parey Lalwa Moiz ti demande. Sa zour, zot ti apel li Zezi parey zot ti’n ganny demande. (Lik 1:31) Karantyenm zour apre son nesans, zot ti al kot tanp Zerizalenm, ki apepre dis kilomet avek Betleenm e ofer lofrann pirifikasyon ki Lalwa ti demann avek bann dimoun pov, setadir en per tourtrel oubyen de pizon. Menm si Mari ek Zozef ti’n kapab santi zot anbarase pour ofer en per tourtrel dan plas en kabri ki petet lezot paran ti kapab ofer, zot ti met zot lakanmizri de kote e zot ti fer sa ki zot ti kapab. An tou le ka zot ti ganny bann bon lankourazman kan zot ti laba.​—Lik 2:21-24.

19. (a) Ki mannyer Simeon ti donn Mari plis keksoz pour gard dan son leker? (b) Ki ti reaksyon Ann kan i ti vwar Zezi?

¹⁹ En zonm aze ki ti apel Simeon ti apros Mari e dir li bann lezot keksoz ankor ki ti annan bokou valer pour li gard dan son leker. I ti’n ganny promet ki i ti pou vwar Mesi avan ki i mor e lespri sen Zeova ti montre li ki sa pti baba ti li menm sa Sover. Simeon ti osi averti Mari konsernan sa douler ki i ti pou bezwen santi en zour. I ti dir Mari ki i ti pou santi konmsi en lepe ti pou pers li. (Lik 2:25-35) Menm si sa parol ti ase for, sa ti’n kapab ed li toudmenm pour andire ler sa moman difisil ti pou arive plis ki trant an pli tar. Apre Simeon, en madanm profet ki ti apel Ann ti vwar Zezi e i ti konmans koz lo li avek tou dimoun ki ti annan sa lespwar ki delivrans Zerizalenm ti pou arive.​—Lir Lik 2:36-38.

20. Akoz i ti en bon desizyon pour anmenn Zezi Zerizalenm?

²⁰ Pa Mari ek Zozef ti fer en bon desizyon pour anmenn zot zanfan kot tanp Zeova Zerizalenm! Sa ti premye fwa me pa dernyen fwa ki Zezi ti al kot tanp akoz tou son lavi i ti pou fidelman al kot tanp Zeova. Kan zot ti laba, zot ti donn zot meyer e zot ti ganny bann lenstriksyon ek lankourazman. Sirman, Mari ti kit tanp sa zour ranpli avek lafwa, son leker ranpli avek bann keksoz spirityel pour medit lo la e partaz avek lezot.

21. Parey Mari, ki mannyer nou kapab asire ki nou lafwa pou vin deplizanpli for?

²¹ I en bon keksoz ozordi pour vwar bann paran imit sa legzanp. Pareyman, bann paran Kretyen i fidelman anmenn zot zanfan bann renyon. Sa bann paran i fer sa ki zot kapab pour ankouraz lezot. Kan zot sorti renyon zot santi zot pli for, zwaye e zot annan bokou keksoz pour partaze avek lezot. Pa i en plezir pour zwenn avek nou bann frer ek ser. Si nou fer sa, parey Mari, nou lafwa pou vin deplizanpli for.