LESON 56
Kontinyen gard linite dan kongregasyon
Ler nou parmi nou bann frer ek ser Kretyen, nou santi parey Lerwa David: “Gete! Pa i bon e agreab pour bann frer reste ansanm dan linite!” (Psonm 133:1) Me nou linite pa vin par azar. Nou tou nou bezwen zwe nou rol pour gard sa linite.
1. Kwa ki remarkab parmi pep Bondye?
Si ou asiste renyon kongregasyon dan en lot pei, petet ou pa pou konpran sa langaz me ou pou santi ou alez dan plizyer fason. Akoz? Akoz nou servi menm piblikasyon partou dan lemonn pour etidye Labib. Nou osi fer zefor pour demontre lanmour kanmarad. Nenport ki landrwa nou reste, nou tou nou “loue non Zeova e ador li ansanm dan linite.”—Zefanya 3:9.
2. Ki ou kapab fer pour ki i annan linite?
“Kontan kanmarad en kantite avek tou zot leker.” (1 Pyer 1:22) Ki mannyer ou kapab aplik sa konsey? Olye konsantre lo defo lezot, rod bann bon kalite dan zot. Olye pas letan zis avek bann ki kontan menm keksoz avek ou, esey aprann konn lezot frer ek ser ki diferan avek ou. Nou kapab osi fer bokou zefor pour retir okenn move santiman oubyen fo konsep ki nou annan lo lezot.—Lir 1 Pyer 2:17.a
3. Ki ou pou fer ler ou ganny en dezakor avek en frer oubyen ser Kretyen?
Nou ini me nou osi enparfe. Parfwa i arive ki nou dezapwent kanmarad oubyen menm bles lezot. Alor Parol Bondye i demann nou pour “kontinyen . . . pardonn kanmarad.” I azoute: “Parey Zeova in volonterman pardonn zot, zot osi zot devret fer parey.” (Lir Kolosyen 3:13.) Nou nou’n bles santiman Zeova en kantite fwa e pourtan i toultan pardonn nou. Alor i ekspekte ki nou pardonn nou bann frer ek ser. Si ou realize ki ou’n bles en dimoun, pran linisyativ pour rezourd sa problenm.—Lir Matye 5:23, 24.b
AL PLI O PROFON
Rod bann fason ki ou kapab kontribye pour gard linite ek lape dan kongregasyon.
Ki ou pou fer pour fer lape?
4. Rezet bann fo konsep oubyen move santiman lo lezot
Nou anvi kontan tou nou bann frer ek ser. Me petet nou bezwen fer bokou zefor pour nou aksepte en dimoun ki diferan avek nou. Kwa ki kapab ede? Lir Akt 10:34, 35 e apre reponn sa bann kestyon:
Zeova i aksepte tou sort kalite dimoun konman son Temwen. Ki lefe sa i devret annan lo lafason ki ou vwar lezot ki diferan avek ou?
Ki fo konsep oubyen move santiman dimoun dan ou rezyon i annan anver lezot ki ou ti a kontan evite?
Lir 2 Korentyen 6:11-13 e apre reponn sa kestyon:
Ki mannyer ou krwar ou kapab vin pli pros avek bann frer ek ser ki diferan avek ou?
5. Pardonn volonterman e fer lape
Zeova i pardonn nou volonterman menm si nou nou pa pou zanmen bezwen pardonn li. Lir Psonm 86:5 e apre reponn sa bann kestyon:
Ki mannyer Zeova i pardonnen?
Akoz ou apresye bokou pardon Zeova?
Ki bann sityasyon ki kapab fer li difisil pour nou reste anpe avek lezot?
Ki mannyer nou kapab imit Zeova e reste ini avek nou bann frer ek ser? Lir Proverb 19:11 e apre reponn sa kestyon:
Ler en dimoun i fatig ou oubyen menm fer ou ankoler, ki ou ti kapab fer pour amelyor sa sityasyon?
Parfwa nou kapab ofans lezot. Ki nou devret fer ler sa i arive? Zwe sa VIDEO e apre reponn sa kestyon.
Dan sa video, ki sa ser ti fer pour fer lape?
6. Rod sa ki bon dan ou bann frer ek ser
Ler nou vin pli pros avek nou bann frer ek ser, nou konn zot bann pwen for ek zot febles. Ki mannyer nou kapab konsantre lo zot bann pwen for? Zwe sa VIDEO e apre reponn sa kestyon.
Kwa ki kapab ed ou vwar bann bon kalite dan ou bann frer ek ser?
Zeova i konsantre lo nou bann bon kalite. Lir 2 Kronik 16:9a e apre reponn sa kestyon:
Ki mannyer ou santi ler ou konnen ki Zeova i konsantre lo ou bann bon kalite?
Menm en zoli dyanman i annan son defo. Kantmenm sa i annan bokou valer. Pareyman, tou nou bann frer ek ser i enparfe me zot presye pour Zeova
SERTEN DIMOUN I DIR: “Avan mon pardonn en dimoun fodre i montre mwan ki vreman i regrete.”
Akoz nou devret toultan pare pour pardonn lezot?
REZIMEN
Ou kapab ede pour gard linite dan kongregasyon par pardonn tou ou bann frer ek ser e montre ki ou kontan zot.
Revizyon
Ki mannyer ou kapab retir okenn move santiman oubyen fo konsep ki ou annan lo lezot?
Ki ou pou fer si ou ganny en dezakor avek en frer oubyen ser Kretyen?
Akoz ou anvi pardonn lezot parey Zeova i fer?
FER PLIS RESERS
Vwar ki mannyer en legzanp ki Zezi ti servi i kapab ed nou aret ziz lezot.
Eski nou bezwen demann leskiz menm si nou santi nou pa’n fer nanryen mal?
“Leskiz—En mwayen pour fer lape” (Latour Veyer 1 Novanm 2002)
Vwar ki mannyer serten in aprann tret lezot san fer lapreferans.
Aprann ki mannyer ou kapab rezourd bann problenm personnel ki ou gannyen avek lezot avan ki i vin en problenm pour kongregasyon.
a Lezot lenformasyon No. 6 i montre ki mannyer lanmour i anpes bann Kretyen transmet bann maladi ki kontazye.
b Lezot lenformasyon No. 7 i koz lo ki mannyer pour rezourd bann problenm biznes e legal.