Leskiz​—En mwayen pour fer lape

“DEBORAH Tannen, en gran ekriven popiler e spesyalis langaz dan Liniversite Georgetown an Washington, D.C. ti ekrir: “Leskiz i pwisan. I rezourd konfli san servi vyolans, regle bann dezakor ant bann nasyon, permet bann gouvernman rekonnet soufrans zot bann sitwayen, e gard bann bon relasyon avek lezot.”

Labib i konfirmen ki en leskiz senser i souvannfwa en mwayen efikas pour rearanz en relasyon. Par egzanp, dan parabol Zezi, kot en garson ti kit son papa pour al fer fize son leritaz, kan i ti retourn seli e ofer en leskiz ki sorti dan fon son leker, son papa ti plis ki pare pour resevwar li ankor dan son lakour. (Lik 15:17-​24) Wi, en dimoun pa devret zanmen tro fyer ki i pa kapab abes li, pour demann leskiz e rod pardon. Byensir, pour bann dimoun ki abes zot senserman, demann leskiz i pa en keksoz tro difisil pour fer.

Lafors en Leskiz

Abigail, ki ti en madanm pridan dan lepok bann Izraelit, i donn en legzanp pour montre lafors ki en leskiz i annan, kantmenm son leskiz ti pour en keksoz mal ki son msye ti’n fer. Ler i ti pe viv dan dezer, David, ki plitar ti vin lerwa Izrael, ansanm avek son bann zonm ti protez en troupo ki ti pour Nabal, msye Abigail. Alors, kan bann zonm David ti demann Nabal dipen ek delo, i ti pous zot e menm dir bann remark blesant. David ti ankoler, e i ti anmenn 400 zonm pour al lager kont Nabal ek son lakour. Kan Abigail ti tann sa, i ti al kot David. Ler i ti vwar David, i tonm dan son lipye, son latet bese e apre dir: “Lo mwan, O mon senyer, ki sa fot i vini; e, silvouple, les ou lesklav koze, e ekout parol ou lesklav.” Apre, Abigail ti eksplik sa ki ti’n arive e donn David manze ek bwar konman en kado. Avek sa, David ti dir: “Al kot ou anpe. Gete, mon’n ekout ou lavwa pour mon kapab annan konsiderasyon pour ou.”​—1 Samyel 25:​2-​35.

Latitid ki Abigail ti’n demontre pour abes li par demann leskiz pour move kondwit son msye ti protez son lakour. David ti menm remersye li pour anpes li komet mert. Menm si pa Abigail ki ti’n tret David ek son bann zonm dan en move fason, i ti aksepte blanm pour son fanmiy e i ti fer lape avek David.

Zapot Pol i en lot legzanp en dimoun ki ti konnen kan pour demann leskiz. En fwa, i ti bezwen defann son lekor devan Sannedren, gran lakour Zwif. Gran pret Ananyas ki ti’n ankoler avek bann parol fran ki Pol ti’n dir, ti ordonn sa bann ki ti pe debout obor Pol pour zifle li dan son labous. Alor, Pol ti dir li: “Bondye pou zifle ou, ou miray blansi! Ou pe asiz la pour ziz mwan dapre lalwa, e oumenm, ou kas lalwa an donnan en lord kont lalwa pour zifle mwan.” Ler bann dimoun ki ti pe regarde ti akiz Pol pour ensilte gran pret, sa zapot ti imedyatman admet son fot, an dizan: “Mon bann frer, mon pa ti konnen, ki i ti Gran-Pret. Parski Lekritir i dir: ‘Ou pa devre mal koz sef ou pep.’ ”​—Akt 23:​1-5.

Sa ki Pol ti dir​—ki sa enn ki’n ganny apwente konman ziz pa devret servi vyolans⁠—ti byen. Kantmenm sa, i ti demann leskiz, akoz san ki i ti pran kont, i ti pe koz avek gran pret dan en mannyer ki kapab montre mank respe.a Leskiz Pol ti donn loportinite Sannedren pour ekout sa ki i ti annan pour dir. Vi ki Pol ti konnen ki ti annan diskisyon parmi bann manm lakour, i ti dir zot ki i ti pe ganny zize akoz son krwayans dan rezireksyon. Finalman, plis problenm ti leve, akoz bann Farizyen ti konmans siport Pol.​—Akt 23:​6-​10.

Ki nou kapab aprann dan sa de legzanp Labib? Dan tou le de ka, bann lekspresyon regre byen onnet ti donn loportinite pour plis kominikasyon. Alor leskiz i kapab ed nou pour fer lape. Sirman, kan nou admet nou fot e demann leskiz pour domaz ki’n kapab arive, sa i donn loportinite pour fer bann konversasyon konstriktif.

‘Me mon pa’n fer nanryen mal’

Ler nou vwar ki en dimoun in ofanse par sa ki nou’n dir oubyen fer, nou kapab santi ki sa dimoun i pa rezonnab oubyen i tro sansib. Toudmenm, Zezi ti konsey son bann disip: “Si alor, ou vin prezant Bondye ou lofrann devan lotel, e ki la ou rapel ki ou frer i annan keksoz kont ou, kit ou lofrann devan lotel, e al fer lape avek ou frer; apre retournen e prezant ou lofrann.”​—Matye 5:​23, 24.

Par egzanp, en frer i kapab santi ki ou’n fer en keksoz kont li. Dan en sitiasyon koumsa, Zezi i dir ki ou bezwen ale e “fer lape avek ou frer,” ki swa ou santi ou’n bles li oubyen non. Dapre teks Grek, sa mo ki Zezi in servi la ‘i vedir rekonsilyasyon apre konfli.’ (Vine’s Expository Dictionary of Old and New Testament Words) Vreman, ler de dimoun i an konfli, i kapab ki tou le de i annan tor, vi ki tou le de i enparfe e annan tandans pour fer fot. Dan sa ka, i demann rekonsilyasyon.

Pwen ki pe fer resorti se pa lekel ki byen oubyen lekel ki mal, me lekel ki pran linisyativ pour fer lape. Ler zapot Pol ti remarke ki bann Kretyen an Korent ti pe anmenn zot konpanyon Kretyen devan lakour konsernan bann diferans personnel tel parey bann dezakor finansyel, i ti koriz zot: “Akoz zot pa plito siport en pe lenzistis? Akoz zot pa les zot plito ganny vole?” (1 Korentyen 6:7) Menm si Pol ti dir sa pour dekouraz bann konpanyon Kretyen pour aret ekspoz zot bann diferans personnel devan lakour, prensip i kler: Lape parmi bann konpanyon Kretyen i pli enportan ki prouve lekel ki byen e lekel ki mal. Gard sa prensip antet i fer li pli fasil pour demann leskiz pour en mal ki en dimoun i panse nou’n komet kont li.

Fodre annan Senserite

Parkont, serten dimoun i tro servi bann parol leskiz. Par egzanp, an Zapon sa mo sumimasen, en lekspresyon tipik ki ganny servi pour demann leskiz, i ganny tande en kantite fwa. I menm kapab ganny servi pour eksprim rekonesans, kot en dimoun i santi li anbarase akoz i pa’n kapab retourn en faver ki’n ganny montre anver li. Akoz i tro popiler, serten dimoun i kapab santi ki sa mo i ganny servi tro souvan e kapab demande si sa bann ki pe dir li i vreman senser. Plizyer kalite fason demann leskiz i osi kapab paret ganny servi tro bokou dan lezot kiltir.

Dan nenport langaz, i enportan pour senser ler pe demann leskiz. Lafason ki sa parol i ganny dir e ton lavwa i devret transmet sa regre ki ou resanti. Dan son Sermon lo montanny, Zezi Kri ti ansenny son bann disip: “Dir wi kan i wi, oubyen non kan i non. Tou sa ki zot dir an plis i sorti kot dyab.” (Matye 5:​37, nou ki’n met an italik.) Si ou demann leskiz, fodre ou senser! Par egzanp: En zonm dan laliny kot kontwar tyek pasaz lo erport ti demann leskiz ler son bagaz ti tap avek en madanm devan li dan laliny. Enn de minit plitar, ler laliny ti bouze, sa valiz ti tous avek sa madanm ankor. Ankor enn fwa, sa zonm ti demann leskiz poliman. Ler sa ti ariv ankor, en zonm ki sa madanm ti pe vwayaz avek ti dir li ki si sa lot zonm ti vreman serye dan sa ki i ti’n dir, i ti devret fer sir ki son bagaz pa tous avek li ankor. Vreman, en leskiz senser i devret akonpannyen avek en determinasyon pour pa repet sa fot.

Si nou senser, ler nou demann leskiz fodre ki nou pare pour aksepte okenn keksoz mal ki’n arive, rod pardon, e fer en zefor pour repar sa domaz otan ki posib. An retour, sa enn ki’n ganny blese i devret pare pour pardonn sa dimoun ki’n bles li e ki’n repantir. (Matye 18:21, 22; Mark 11:25; Efezyen 4:​32; Kolosyen 3:​13) Vi ki tou le de i enparfe, pour fer lape i kapab pa toultan vin fasil. Toutfwa, leskiz i kontribye pour fer lape.

Ler en Leskiz pa apropriye

Menm si bann lekspresyon regre ek sagren i apez tansyon e i kontribye pour fer lape, en dimoun pridan i evite servi bann tel lekspresyon ler i pa apropriye pour fer li. Sipoze, par egzanp, ki sa size i enplik ou fidelite anver Bondye. Ler Zezi Kri ti lo later, i “ti aksepte viv dan limilite e montre li obeisan ziska lanmor, menm lanmor lo [poto].” (Filipyen 2:8) Me i pa ti rod rezon pour li kouver son bann krwayans pour evit bann persekisyon. I pa ti ofer en leskiz ler gran pret ti demann li: “O non Bondye vivan nou demann ou pour dir nou, si oumenm Mesi, Garson Bondye?” Olye ki rod leskiz tou kanmi kanmi, Zezi ti reponn avek kouraz: “Oumenm ou’n dir. Me mon dir zot, dezorme zot pou war Fis-de-Lonm pe asize lo kote drwat Toupisan. Zot pou osi war li pe vini lo nyaz dan lesyel.” (Matye 26:63, 64) Kot i ti kapab vin enfidel avek son Papa, Zeova, Zezi pa ti zanmen konsider sa lide pour gard lape avek sa gran pret.

Bann Kretyen i montre respe ek loner pour bann dimoun dan lotorite. Kantmenm sa, zot pa bezwen rod leskiz pour zot lobeisans anver Bondye e pour lanmour ki zot annan pour zot bann frer ek ser.​—Matye 28:19, 20; Romen 13:​5-7.

Napa Nanryen ki pou anpes Lape

Denozour, nou fer bann fot akoz nou’n erit lenperfeksyon ek pese avek nou zanset, Adan. (Romen 5:​12; 1 Zan 1:​10) Kan zot ti rebel kont zot Kreater, Adan ek Ev ti vin peser. Pourtan, okonmansman zot ti parfe e san pese. Me selman, Bondye in promet pour reetablir sitiasyon imen dan perfeksyon. I pou retir pese ek tou son bann lefe.​—1 Korentyen 15:56, 57.

Zis mazinen ki sa pou vedir! Dan son konsey lo mannyer servi nou lalang, Zak, demi frer Zezi ti dir: “Si en dimoun pa komet lerer dan sa ki i dir i en dimoun parfe ki kapab met en labrid [oubyen en kontrol] avek son lekor an antye.” (Zak 3:2) En zonm parfe i kapab kontrol son lalang afen ki i pa bezwen demann leskiz akoz i’n mal servi li. I “kapab met en labrid avek son lekor an antye.” Pa i pou merveye kan nou’n vin parfe! Alors, pou nepli annan lobstak pour fer lape ant bann dimoun. An atandan, letan nou pe ofer en leskiz senser e apropriye pour en mal ki’n ganny komet, sa pou ede pour fer lape.

[Not anba lo paz]

[Portre lo paz 5]

Ki nou kapab aprann atraver legzanp Pol?

[Portre lo paz 7]

Kan tou dimoun pou’n parfe, napa nanryen ki pou anpes lape