Kote ou kapab trouv vre Gidans spirityel?

“SI OU pou swiv en larelizyon zis akoz i en tradisyon ou fanmiy, dan sa ka, akoz ou pa swazir larelizyon ki nou zanset ti pratike 2,000 an pase?” Rodolphe ti demande. Sa ti fer sa zenn ki ti pe ekout li riye.

Rodolphe i dir: “Pour mwan, mon relasyon avek Bondye i en keksoz ki tre enportan. Mon pa dakor ditou avek sa lide ki mon devret aksepte bann krwayans relizye par tradisyon, zis akoz mon bann fanmiy ki ti viv dis oubyen menm plizyer santenn lannen pase ti pratik sa kalite larelizyon.” Rodolphe ti’n byen reflesir; akoz i pa ti aksepte larelizyon konman en tradisyon ki son paran i pas avek li.

Menm si ozordi dimoun pa pe neseserman aksepte larelizyon zot paran, lamazorite dimoun i ankor reste atase avek larelizyon zot fanmiy. Me eski i toultan byen pour reste atase avek krwayans relizye ki nou paran i annan? Ki Labib i dir?

Apre 40 an dan dezer, Zozye ki ti siksed Moiz, ti met en swa devan bann Izraelit. I ti dir: “Aprezan si i pa byen dan zot lizye pour servi Zeova, swazir zot menm ozordi lekel ki zot pou servi, si bann bondye ki zot zanset lot kote Larivyer ti servi oubyen bann bondye bann Amorit dan sa pei kot zot pe reste. Me mwan ek mon fanmiy, nou pou servi Zeova.”—Zozye 24:15.

Enn sa zanset ki Zozye ti mansyonnen ti Tera. Li i ti papa Abraam e i ti reste dan lavil Our, ki sa letan ti sitye les avek Larivyer Efrat. Labib pa koz bokou lo Tera, apard ki i ti ador lezot bondye. (Zozye 24:2) Menm si son garson Abraam pa ti konn byen plan Bondye, i ti pare pour kit son lavil natal ler Zeova ti demann li pour fer sa. Wi, Abraam ti swazir en larelizyon ki ti diferan avek pour son papa. Vi ki i ti azir dan sa fason, Abraam ti resevwar benediksyon ki Bondye ti’n promet li, e i ti vin sa dimoun ki bokou larelizyon i rekonnet konman ‘papa tou sa ki krwar’ dan Bondye.—Romen 4:11.

Labib i osi rakont dan en fason pozitif zistwar en zanset Zezi Kri apele Rit. I ti en fanm Moabit ki ti marye avek en Izraelit. Plitar Rit ti vin en vev e i ti bezwen fer en swa: reste dan son prop pei oubyen retourn avek son belmer an Izrael. Rit ti rekonnet ki ladorasyon Zeova ti pli siperyer ki ladorasyon zidol ki son paran ti pratike. Alor i ti dir avek son belmer: “Ou pep pou vin mon pep, e ou Bondye mon Bondye.”—Rit 1:16, 17.

Dictionnaire de la Bible i fer komanter lo lenportans sa resi dan Labib. I eksplike ki sa resi i montre konman ki en fanm etranze, ne parmi en pep payen agresif, ki nasyon Izrael pa ti kontan ditou, ti vin en zanset Lerwa David gras a gidans Bondye. Sa ti arive akoz son lanmour pour pep ek ladorasyon Zeova. Rit pa ti ezite pour swazir en larelizyon ki ti diferan avek son paran, e akoz sa desizyon i ti ganny benediksyon Bondye.

Resi dan Labib ki koz konsernan bann premye Kretyen i pli byen montre akoz bann disip Zezi ti abandonn larelizyon zot zanset. Dan son diskour konvenkan, zapot Pyer ti envit son lodyans pour “sanz zot lavi e ki sakenn ant zot i ganny batize o non Zezi-Kri.” (Akt 2:37-41) Legzanp Sol, en Zwif ki ti persekit bann Kretyen, i enn parmi bann legzanp pli remarkab. Pandan ki i ti pe al Damas, i ti vwar Kris dan en vizyon. Apre sa, Sol li menm ti vin en Kretyen e i ti ganny rekonnet konman zapot Pol.—Akt 9:1-9.

Laplipar premye Kretyen pa ti eksperyans menm keksoz ki Pol ti pas ladan. Toudmenm, zot tou zot ti bezwen abandonn swa larelizyon Zwif oubyen ladorasyon diferan kalite bondye payen. Bann ki ti aksepte pour vin Kretyen ti fer li apre ki zot ti’n byen konn laverite, souvan apre bann gran diskisyon konsernan rol Zezi konman Mesi. (Akt 8:26-40; 13:16-43; 17:22-34) Sa bann premye Kretyen ti klerman ganny enformen ki zot bezwen fer sanzman dan zot lavi. Sa lenvitasyon ti ganny ofer avek tou dimoun, Zwif konman non Zwif, me mesaz ti reste parey. Pour fer plezir Bondye, i ti neseser pour swiv en nouvo kalite ladorasyon e vin Kretyen.

Sakenn i bezwen fer son Swa

Dan premye syek, bann Kretyen ti bezwen annan kouraz pour rezet tradisyon relizye zot fanmiy e asosye avek en larelizyon ki bann Zwif ensi ki bann Romen ti sikannen. Sa ti enkli rezet larelizyon Zwif, ladorasyon lanperer ek ladorasyon bann bondye payen ki ti egziste sa letan. Sa swa ti osi fer zot ganny bann persekisyon terib. Ozordi i demann sa menm kalite kouraz parey Hippolyte Simon, en levek Katolik sorti Clermont-Ferrand ti eksplike dan son liv (Vers une France païenne?), pour en dimoun pa les li ganny anbete par sa mantalite pour fer sa ki tou dimoun i fer. I demann kouraz pour form parti avek Temwen Zeova, en pti larelizyon ki parler i ganny kritike.

Paul, en zennonm sorti Bastia Corsica, ti ganny elve dan larelizyon Katolik. Tanzantan i ti pran par dan bann aktivite legliz, parey fennsifer pour anmas larzan pour en lorganizasyon saritab Katolik. Paul ti anvi pli byen konpran Labib. Alor i ti dakor pour diskit regilyerman lo Labib avek Temwen Zeova. Avek letan, i ti realize ki sa ki i ti pe aprann ti kapab anmenn bann byenfe dirab pour li. Alor, Pol ti aksepte tou sa ki Labib i dir e i ti vin en Temwen Zeova. Son paran ti respekte son swa, ki pa’n afekte zot relasyon fanmiy.

Amélie i reste dan sid Lafrans. Son aryer granmer ti deza Temwen Zeova. Akoz i ti swazir pour aksepte krwayans relizye son paran? I dir: “Ou pa vin en Temwen Zeova akoz ou paran i Temwen Zeova oubyen ou gran paran ti Temwen Zeova. Me en bo zour ou realize ki, ‘sa i mon larelizyon akoz sa i mon konviksyon.’ ” Parey bokou lezot zenn Temwen Zeova, Amélie i konnen ki son konviksyon relizye i fer son lavi annan en bi e i en sours lazwa.

Akfer aksepte Gidans Bondye

Dan liv Proverb, sapit 6, verse 20 i ankouraz bann ki anvi fer plezir Bondye: “Mon garson, obzerv komannman ou papa, e pa abandonn lalwa ou manman.” Olye demann nou pour obeir san kestyonnen, sa konsey i ankouraz bann zenn pour aksepte gidans Bondye par aprofondi zot lafwa e par pran zot prop pozisyon pour Bondye. Zapot Pol ti envit son bann konpanyon pour “egzamin tou keksoz,” setadir pour verifye si sa ki zot ti pe ganny ansennyen ti an armoni avek Parol Bondye ek Son lavolonte, e pour azir dapre sa konnesans.—1 Tesalonisyen 5:21.

Ki swa zot in ganny elve dan en lakour Kretyen oubyen non, sa plis ki sis milyon Temwen Zeova, zenn konman vye, in fer en tel desizyon. Atraver en letid Labib, zot in dekouver bann bon larepons pour zot kestyon. Par egzanp, zot konnen akoz zot lo later. Zot in osi ganny en konprenezon kler lo sa ki Bondye i oule pour limanite. Ler zot in ganny sa konnesans, zot in aksepte gidans Bondye e fer zot mye pour fer Son lavolonte.

Ki swa ou abitye lir sa magazin oubyen non, akoz ou pa aksepte led ki Temwen Zeova pe ofer ou pour ed ou egzamin gidans spirityel dan Labib. Si ou fer sa, ou pou kapab ‘goute e vwar konman Zeova i bon’ e ou pou ganny sa konnesans ki anmenn ver lavi eternel, ler ou aplik li.—Psonm 34:8; Zan 17:3.

[Portre lo paz 3]

Kat zenerasyon en fanmiy Temwen Zeova Lafrans

[Portre lo paz 5]

Rit ti swazir pour servi Zeova olye bann bondye son zanset