Fortifye kanmarad

“Zot in vin en led fortifyan pour mwan.”—KOLOSYEN 4:11, NW.

1, 2. Akoz bann zanmi Pol ti vizit li dan prizon kantmenm i ti kapab danzere pour zot?

I KAPAB danzere pour ou zanmi avek en dimoun ki dan prizon, menm si ou zanmi in ganny met dan prizon par lenzistis. Bann zofisye prizon i kapab pa fye ou. Zot kapab get tou sa ki ou fer pour fer sir ki ou pa pe komet okenn lofans. Alors, i demann kouraz pour ou kontinyen gard kontak avek ou zanmi e vizit li dan prizon.

² Pourtan, se sa ki serten zanmi zapot Pol ti fer apepre 1,900 an pase. Zot pa ti ezite vizit Pol dan prizon pour donn li rekonfor ek lankourazman ki i ti bezwen e fortifye li spirityelman. Lekel sa bann zanmi fidel? Ki nou kapab aprann atraver zot kouraz, fidelite, ek lanmitye?—Proverb 17:17.

“En Led fortifyan”

3, 4. (a) Lekel sa senk zanmi Pol, e ki zot ti vini pour li? (b) Kisisa en “led fortifyan”?

³ Annou retourn dan lannen 60 N.L. Zapot Pol i dan prizon an Ronm lo fo lakizasyon konmkwa i ankouraz rebelyon. (Akt 24:5; 25:11, 12) Pol i idantifye oubyen mansyonn senk Kretyen ki i dir ti siport li: Tisik, son anvoye personnel sorti dan rezyon Lazi e ‘en serviter ansanm avek li dan travay Senyer’; Onezim, “sa byenneme e frer fidel” sorti an Kolos; Aristark, sorti Tesalonik an Masedwann ki en letan ti “dan prizon” avek Pol; Mark kouzen Barnabas ki ti akonpanny Pol dan son vwayaz misyonner e ekriven Levanzil ki port son non; e Zistis ki ti travay avek Pol “pour Rwayonm Bondye.” Konsernan sa senk dimoun, Pol i dir: “Zot in vin en led fortifyan pour mwan.”—Kolosyen 4:7-11, NW.

⁴ Sa ki Pol ti dir konsernan led ki son bann zanmi fidel ti donn li i profon. I ti servi en mo Grek (pa·re·go·riʹa) ki’n ganny tradwir “led fortifyan,” ki ganny trouve zis dan sa verse dan Labib. Sa mo i annan plizyer sans e i ti ganny servi sirtou dan konteks medikal.a I kapab ganny tradwir ‘konsolasyon, rekonfor, oubyen soulazman.’ Sanmenm ki Pol ti bezwen e se sanmenm ki sa senk zonm ti donn li.

Akoz Pol ti bezwen “en Led fortifyan”

5. Kantmenm i ti en zapot, ki Pol ti bezwen, e ki nou tou nou bezwen detanzaot?

⁵ Petet serten i sirprann pour konnen ki Pol, ki ti en zapot, ti bezwen ganny fortifye. Pourtan i ti bezwen. I vre ki Pol ti annan en lafwa for. I ti’n pas atraver bokou labi fizik, i ti’n ganny bate plis ki lezot, souvan i ti pre avek lanmor, e i ti soufer dan lezot fason osi. (2 Korentyen 11:23-27) Kantmenm sa, i ti en imen, e tou imen en serten letan dan zot lavi i bezwen rekonfor e bezwen ki zot lafwa i ganny fortifye avek led lezot. Sa ti leka menm pour Zezi. Dernyen sware avan i ti mor, en lanz ti aparet avek li an Zetsemane e “ankouraz li.”—Lik 22:43.

6, 7. (a) Lekel ki ti dezapwent Pol an Ronm e lekel ki ti ankouraz li? (b) Ki kalite servis bann frer Kretyen Pol ti rann li an Ronm, ki ti vreman “en led fortifyan” pour li?

⁶ Pol osi ti bezwen ganny fortifye. Kan i ti ariv Ronm konman en prizonnyen, i pa ti ganny byen resevwar par dimoun son prop ras. An zeneral, sa bann Zwif pa ti akeyir sa mesaz Rwayonm. Apre ki bann sef Zwif ti’n vizit Pol dan sa landrwa ki i ti’n ganny anprizonnen, resi dan Akt i rakonte: “I annan ki ti aksepte sa ki i ti pe dir, me i annan ki pa ti krwar. Zot pa ti tonm dakor avek kanmarad e . . . zot ti . . . ale.” (Akt 28:17, 24, 25) Pol ti bezwen sagren en kantite akoz sa bann dimoun ti mank lapresyasyon pour faver ki Zeova ti’n demontre anver zot! Nou kapab vwar son santiman lo sa size dan let ki i ti ekrir kongregasyon Ronm detrwa lannen avan sa: “Wi, mon dan en gran tristes e mon annan en sagren kontinyel dan mon leker. Mon ti a swete ki mon ti a modi e separe avek Kris pour mon bann frer [bann Zwif], mon prop ras.” (Romen 9:2, 3) Toudmenm, an Ronm i ti trouv bann vre konpanyon fidel, ki zot kouraz ek lafeksyon ti rekonfort son leker. Zot ti son bann vre frer spirityel.

⁷ Ki mannyer sa senk frer ti vreman en led fortifyan? Zot pa ti evit Pol zis akoz i ti dan prizon. Okontrer, avek lanmour zot ti pare pour rann li serten servis, fer bann keksoz ki li menm personnelman i pa ti kapab fer akoz i ti dan prizon. Par egzanp, zot ti vin konman bann mesaze pour Pol, anmenn son bann let ek lenstriksyon dan bann diferan kongregasyon. Zot ti anmenn bann rapor ankourazan kot Pol konsernan bann frer an Ronm ek lezot landrwa. Petet zot ti anmenn bann keksoz ki Pol ti bezwen parey lenz lafreser, bann roulo, ek keksoz pour ekrir avek. (Efezyen 6:21, 22; 2 Timote 4:11-13) Tou sa bann led ti fortifye e ankouraz sa zapot pandan son letan dan prizon. An retour, li osi i ti kapab “vin en led fortifyan” pour lezot, enkli bann kongregasyon antye.—Romen 1:11, 12.

Ki mannyer nou kapab vin “en Led fortifyan”

8. Ki leson nou kapab aprann lefe ki Pol ti admet avek limilite ki i bezwen “en led fortifyan”?

⁸ Ki nou kapab aprann atraver sa resi lo Pol ek son senk konpanyon travay? Annou vwar en leson an partikilye: I demann kouraz ek sakrifis pour al ed lezot kan zot dan maler. Deplis, i demann limilite pour rekonnet ki nou bezwen led kan nou dan bann moman difisil. Pol pa ti zis admet ki i bezwen led me i ti osi aksepte sa led avek lapresyasyon e i ti felisit bann ki ti ed li. I pa ti konsider aksepte led lezot konman en siny febles oubyen en laont lo son par. Nou osi nou pa devret santi koumsa. Si nou dir nou pa zanmen bezwen led fortifyan, alors nou pa en dimoun normal. Mazinen ki legzanp Zezi i montre ki menm en dimoun parfe i kapab parfwa bezwen kriye pour ganny led.—Ebre 5:7.

9, 10. Ki dibyen i fer kan en dimoun i admet i bezwen led, e ki lefe sa i kapab fer lo lezot dan lafanmiy e dan kongregasyon?

⁹ Kan bann ki annan responsabilite dan kongregasyon i admet ki zot annan zot limit e ki zot depan lo sipor lezot, sa i anmenn bon rezilta. (Zak 3:2) I fortifye relasyon ant bann ki annan lotorite ek bann ki soumet avek sa lotorite, e promot en kominikasyon amikal e fran. Limilite bann ki pare pour aksepte led i vin konman en legzanp pour lezot ki dan menm sitiasyon swiv. I montre ki bann ki annan lotorite dan kongregasyon i imen zot osi e nou kapab apros zot san ezite.—Eklezyast 7:20.

¹⁰ Par egzanp, letan zanfan i konnen ki zot paran osi ti fer fas avek problenm ek tantasyon kan zot ti ankor zenn, zot kapab vwar li pli fasil pour aksepte led zot paran kan zot pe rankontre bann problenm parey. (Kolosyen 3:21) Sa i fer ki paran ek zanfan i kapab konmans annan en bon kominikasyon antre zot. Bann solisyon baze lo Labib i kapab ganny partaze dan en fason pli efikas e ganny aksepte pli fasilman. (Efezyen 6:4) Pareyman, bann manm kongregasyon i pli pare pour resevwar led bann ansyen kan zot realize ki bann ansyen osi i fer fas avek problenm, lafreyer, ek lenkyetid. (Romen 12:3; 1 Pyer 5:3) La ankor, sa bon kominikasyon i kapab ganny etablir, bann konsey baze lo Labib i kapab ganny partaze, e an rezilta lafwa i kapab ganny fortifye. Pa bliye ki nou bann frer ek ser i bezwen ganny fortifye plis ki zanmen oparavan.—2 Timote 3:1.

11. Akoz sitan bokou dimoun ozordi i bezwen “en led fortifyan”?

¹¹ Nenport landrwa kot nou reste, nenport ki ki nou ete, oubyen nenport ki laz nou annan, nou tou nou pou rankontre serten presyon en zour dan nou lavi. Sa i form parti sa lemonn ozordi. (Revelasyon 12:12) Sa bann kondisyon ki afekte nou fizikman oubyen emosyonnelman i kapab teste nou lafwa. Bann sitiasyon difisil i kapab arive dan travay, kot lekol, dan fanmiy, oubyen dan kongregasyon. En maladi grav oubyen en move leksperyans dan lepase i kapab lakoz en presyon. Si ou msye oubyen madanm, en ansyen, oubyen en zanmi i ankouraz ou par en parol rekonfortan e en keksoz ki i’n fer pour ede, pa sa i rekonfort ou! I parey en latizann lo en lapo ki grate! Alors, si ou remarke ki enn ou frer i dan en tel kondisyon, vin son led fortifyan. Oubyen si en problenm enkyetan pe fatig ou, demann led bann ki kalifye spirityelman.—Zak 5:14, 15.

Ki mannyer Kongregasyon i kapab ede

12. Ki nou tou dan kongregasyon nou kapab fer pour fortifye kanmarad?

¹² Tou dimoun dan kongregasyon, enkli bann zenn, i kapab fer keksoz pour ede. Par egzanp, ler ou regilye dan renyon e dan predikasyon sa i fortifye lafwa lezot en kantite. (Ebre 10:24, 25) Ou fidelite dan servis sakre i montre ki ou fidel avek Zeova e ki ou pe reste eveye spirityelman malgre bann difikilte ki ou kapab pe rankontre. (Efezyen 6:18) Sa fidelite i kapab fortifye lezot.—Zak 2:18.

13. Akoz serten i vin inaktif, e ki nou kapab fer pour ed zot?

¹³ Parfwa, presyon lavi oubyen lezot difikilte i kapab fer serten ralanti oubyen vin inaktif dan predikasyon. (Mark 4:18, 19) Petet nou pa vwar sa bann inaktif dan kongregasyon. Me selman i kapab ki dan zot leker zot ankor kontan Zeova. Ki nou kapab fer pour fortifye zot lafwa? Bann ansyen i kapab ofer led par vizit zot. (Akt 20:35) Lezot manm dan kongregasyon i kapab ganny demande pour ede zot osi. Sa bann vizit i kapab sa latizann ki zot bezwen, dan en sans, pour redonn lafors bann ki feb dan lafwa.

14, 15. Ki konsey Pol i donnen konsernan fortifye lezot? Donn en legzanp en kongregasyon ki ti aplik sa konsey.

¹⁴ Labib i demann nou pour “ankouraz bann ki timid [“dekouraze,” NW ], ed bann ki feb.” (1 Tesalonisyen 5:14) Petet sa bann ki dekouraze i santi ki zot nepli annan kouraz pour sirmont bann lobstak ki zot rankontre lo zot tousel. Eski ou kapab ofer ou led? Sa lekspresyon “ed bann ki feb” in ganny tradwir “tenir for” oubyen “reste atase avek.” Zeova i apresye e kontan tou son mouton. I pa pran zot pour en nanryen ditou, e i pa oule ki okenn ant zot i elwannyen avek li. Eski ou kapab ed kongregasyon pour “tenir for” bann ki feb spirityelman ziska ki zot en pe pli for?—Ebre 2:1.

¹⁵ En ansyen ti vizit en koup marye ki ti inaktif pour sis an. Sa ansyen i ekrir: “Sa lentere ranpli avek lanmour ki kongregasyon antye ti demontre anver zot ti annan en sitan gran lefe lo zot ki i ti ankouraz zot pour retourn dan troupo.” Ki mannyer sa ser ki ti inaktif avan sa i santi konsernan vizit bann manm kongregasyon? I dir: “Sa ki ti ed nou revin aktif ankor se ki sa bann frer ki ti vizit nou e osi bann ser ki ti akonpanny zot pa ti tant pour ziz oubyen kritik nou. Okontrer, zot ti konpran nou e zot ti ankouraz nou atraver bann teks Labib.”

16. Lekel ki touzour pare pour ed bann ki bezwen lafors?

¹⁶ Wi, en Kretyen i kontan pour vin en led fortifyan pour lezot. Deplis, kan nou sitiasyon pou sanze, nou osi nou pou ganny fortifye avek nou bann frer ek ser. Me parfwa i kapab arive ki nou bann frer ek ser pa touzour disponib kan nou bezwen led. Toudmenm, nou kapab ganny lafors avek en sours ki touzour disponib e toultan pare pour ede. Sa se Zeova.—Psonm 27:10.

Zeova —Pli gran Sours Lafors

17, 18. Dan ki fason Zeova ti fortifye son Garson, Zezi Kri?

¹⁷ Letan i ti lo poto, Zezi ti kriye: “Papa, dan ou lanmen, mon remet mon lespri!” (Lik 23:46) Apre i ti mor. Pli boner, i ti’n ganny arete e son bann zanmi ti’n abandonn li akoz lafreyer ti’n pran zot. (Matye 26:56) Zezi ti vwar li li tousel. Zis son Papa dan lesyel ki ti pou kapab donn li lafors ki i ti bezwen. I ti’n byen fer pour met son konfyans dan Zeova. Son Papa ti rekonpans li pour son fidelite par soutenir li fidelman.—Psonm 18:25; Ebre 7:26.

¹⁸ Pandan minister Zezi lo later, Zeova ti donn son Garson sa ki i ti bezwen pour reste fidel ziska son lanmor. Par egzanp, zis apre ki Zezi ti ganny batize, pour mark konmansman son minister, i ti tann son Papa eksprim son laprouvasyon e konfirm Son lanmour pour li. Kan Zezi ti bezwen sipor, Zeova ti anvoy bann lanz pour fortifye li. Kan Zezi ti fer fas avek son pli gran leprev alafen son lavi lo later, Zeova ti tann son lapriyer ek siplikasyon. Byensir, tousala ti en led fortifyan pour Zezi.—Mark 1:11, 13; Lik 22:43.

19, 20. Ki lasirans nou annan ki Zeova pou fortifye nou kan nou bezwen son lafors?

¹⁹ Zeova i osi anvi vin nou pli gran Sours lafors. (2 Kronik 16:9) Li ki sa vre Sours tou lenerzi ek lafors, i kapab vin en led fortifyan pour nou dan en moman kritik. (Izai 40:26) Lager, lamizer, maladi, lanmor, oubyen nou prop lenperfeksyon i kapab met nou anba en kantite presyon. Kan bann leprev dan lavi i paret pli for ki nou, parey en “lennmi ki for,” Zeova i kapab vin nou lafors ek nou pwisans. (Psonm 18:17; Egzod 15:2) I annan en keksoz ki kapab vin en gran led pour nou. Sa se son lespri sen. Par mwayen son lespri, Zeova i kapab donn “lafors sa ki fatige” pour ki zot kapab “leve avek lezel, parey bann leg.”—Izai 40:29, 31.

²⁰ Lespri Bondye i lafors pli pwisan dan liniver. Pol ti dir: “Mon kapab fer fas avek tou par [li, NW ] ki donn mwan lafors.” Wi, nou Papa lanmour dan lesyel i kapab ranpli nou avek “sa pisans ki napa son parey” pour nou kapab andir bann problenm difisil ziska ki i fer “tou keksoz a-nef” dan sa Paradi ki i’n promet tre byento.—Filipyen 4:13; 2 Korentyen 4:7; Revelasyon 21:4, 5.

[Not anba lo paz]

Eski ou rapel?

• Ki mannyer bann frer an Ronm ti vin en “led fortifyan” pour Pol?

• Konman nou kapab vin en “led fortifyan” dan kongregasyon?

• Konman ki Zeova i nou pli gran Sours lafors?

[Portre lo paz 29]

Bann frer ti vin “en led fortifyan” pour Pol par fidelman donn li zot sipor, lankourazman, e rann li servis

[Portre lo paz 31]

Bann ansyen i donn legzanp an sa ki konsern fortifye troupo