Bann Avangou lo Rwayonm Bondye i vin en Realite

“Zot annan rezon port bokou latansyon lo [bann parol profetik] parski i konman en lalimyer ki briye dan en fernwanr.”—2 PYER 1:19.

 1. Ki problenm ki egziste dan lemonn ozordi?

PROBLENM par isi, problenm par laba. Sanmenm sa pli gro topik dan lemonn ozordi. Depi problenm dan lanatir ziska problenm teroris, tousala i paret napa en solisyon. Menm larelizyon pa’n kapab fer nanryen dan sa domenn. Anfet, souvannfwa zot fer problenm vin pli pir ankor akoz zot tro fanatik, ogmant laenn e fer dimoun konn zis zot pei. Wi, zis parey ti ganny predir, “en fernwanr epe” in kouver “bann pep.” (Izai 60:2) Me anmenmtan, plizyer milyon dimoun i get lavenir avek konfyans. Akoz? Parski zot port latansyon lo bann parol profetik, parey “en lalimyer ki briye dan en fernwanr.” Zot les “parol” Bondye oubyen son mesaz, ki dan Labib gid zot lavi.—2 Pyer 1:19.

 2. Dapre profesi Danyel “konsernan letan lafen,” lekel ki kapab konpran plan Bondye?

² “Bokou pou rode, e sa vre konnesans pou an abondans. Bokou pou lav zot e fer zot vin blan, e zot pou ganny rafinen. Bann ki mesan pou sirman mal azir, e ni en dimoun mesan pa pou konpran; me bann ki annan bon zizman pou konpran.” Sa i parol ki profet Danyel ti ekrir “konsernan letan lafen.” (Danyel 12:4, 10) Zis bann ki “rode” oubyen etidye seryezman Parol Bondye, aksepte son bann standar e fer zefor pour fer Son lavolonte, ki kapab konpran bann keksoz spirityel.—Matye 13:11-15; 1 Zan 5:20.

 3. Ki laverite enportan bann etidyan Labib ti arive konpran dan bann lannen 1870?

³ Byen boner dan bann lannen 1870, avan ki “bann dernyen zour” ti konmanse, Zeova ti donn plis leklersisman lo sa ‘sekre konsernan Rwayonm Bondye’ ki dan lesyel. (2 Timote 3:1-5; Matye 13:11) Dan sa letan, kontrerman avek lopinyon lamazorite dimoun, en group etidyan Labib ti arive konpran ki retour Kris ti pou envizib. Apre ki i pou’n vin lerwa dan lesyel, Zezi pou retournen dan le sans ki i pou port son latansyon lo later. Son bann disip ti pou vwar en siny ki ti pou endik zot ki Zezi i la dan en fason envizib.—Matye 24:3-14.

Bann Avangou i vin vre

 4. Ki mannyer Zeova in fortifye lafwa son bann serviter ozordi?

⁴ Transfigirasyon ti en zoli avangou laglwar Kris dan son Rwayonm. (Matye 17:1-9) Sa vizyon ti fortifye lafwa Pyer, Zak ek Zan, vi ki sa letan bokou ti’n aret swiv Zezi akoz i pa ti fer serten keksoz ki zot ti anvi i fer. Pareyman, dan sa bann dernyen zour ki nou pe viv ladan, Zeova in fortifye lafwa son bann serviter par donn zot plis leklersisman lo lakonplisman sa vizyon remarkab ek plizyer profesi ki relye avek sa vizyon. Annou vwar serten sa bann vizyon ek profesi ki fortifye nou lafwa.

 5. Lekel sa zetwal lizour, kan e ki mannyer i ti ‘leve’?

⁵ Zapot Pyer ti pe refer avek sa transfigirasyon ler i ti ekrir: “De plis nou posed parol pli sir bann profet, e zot annan rezon port bokou latansyon lo la, parski i konman en lalimyer ki briye dan en landrwa fernwanr ziska ki lizour i arive e zetwal granmaten i leve.” (2 Pyer 1:19) Sa zetwal lizour oubyen sa “zetwal briyan gran-maten,” i reprezant Zezi Kri. (Revelasyon 22:16) I ti ‘leve’ an 1914 kan Rwayonm Bondye ti ne dan lesyel, e sa ti konmansman en nouvo letan. (Revelasyon 11:15) Dan sa transfigirasyon, Moiz ek Eliya ti aparet e koz avek Zezi. Ki zot reprezante?

 6, 7. Ki Moiz ek Eliya i reprezante dan sa transfigirasyon, e ki detay enportan Labib i fourni lo zot?

⁶ Vi ki Moiz ek Eliya ti la kan Kris ti montre son laglwar, alors sa de temwen fidel i bezwen pe reprezant sa bann ki pou dirize ansanm avek Zezi dan son Rwayonm. Sa konprenezon ki i annan lezot ki pou dirize avek Zezi i an akor avek sa vizyon ki Danyel ti gannyen kot i ti vwar Mesi vin lerwa. I ti vwar “en dimoun parey Fis-de-Lonm” pe ganny “en Rwayonm ki pou reste pour en letan endefini” avek “Ansyen bann Zour,” Zeova. Me remarke ki Danyel ti vwar apre. I ti ekrir: “Rwayonm, dominasyon ek grander bann rwayonm anba tou lesyel ti ganny donnen avek bann sen sa enn Tre O.” (Danyel 7:13, 14, 27) Wi, plis ki 500 zan avan sa transfigirasyon, Bondye ti revele ki serten bann “sen” ti pou ganny en par dan Rwayonm Kris.

⁷ Lekel sa bann sen dan vizyon ki Danyel ti gannyen? Zot sa bann ki zapot Pol ti dir: “Lespri limenm i konfirm sa ki dan nou lespri, ki nou zanfan Bondye. E si nou son bann zanfan, alor nou osi son bann zeritye: zeritye Bondye, e zeritye ansanm avek Kris, parski si nou soufer avek li, avek li, nou osi ganny glorifye.” (Romen 8:16, 17) Sa bann sen pa lot ki bann disip Zezi ki’n ganny swazir. Zezi ti dir dan liv Revelasyon: “Sa ki ganny laviktwar mon pou akord li asiz avek mwan lo mon tronn, parey mwan mon’n ganny laviktwar e mon’n asiz avek mon papa lo son tronn.” Sa bann venker ki an tou i annan 144,000 pou resisite e ansanm avek Zezi zot pou diriz later antye.—Revelasyon 3:21; 5:9, 10; 14:1, 3, 4; 1 Korentyen 15:53.

 8. Ki mannyer bann Kretyen swazir pe fer en travay parey avek sa ki Moiz ek Eliya ti fer, e ki rezilta sa in anmennen?

⁸ Me akoz Moiz ek Eliya i reprezant bann Kretyen swazir? Sa i akoz, kan bann Kretyen swazir i ankor lo later, zot fer en travay parey avek sa ki Moiz ek Eliya ti fer. Par egzanp, menm si zot ganny persekite zot pa aret zot servis konman Temwen Zeova. (Izai 43:10; Akt 8:1-8; Revelasyon 11:2-12) Parey Moiz ek Eliya, avek kouraz zot fer dimoun rekonnet fo larelizyon, anmenmtan zot ankouraz bann ki senser pour ador Bondye. (Egzod 32:19, 20; Deterononm 4:22-24; 1 Lerwa 18:18-40) Eski zot travay in raport fri? Definitivman! Apard ki ede rod lezot Kretyen swazir, zot in ed plizyer milyon lezot “mouton” pour aksepte lotorite Kris.—Zan 10:16; Revelasyon 7:4.

Kris i ranport Laviktwar

 9. Ki mannyer Revelasyon 6:2 i dekrir Zezi ozordi?

⁹ Konmela, Zezi i nepli en senp imen ki pe marse lo en bourik, me i en Lerwa pwisan. I ganny dekrir konman en personnaz ki pe mont en seval. Dan Labib sa i reprezant lager. (Proverb 21:31) Revelasyon 6:2 i dir: “Mon ti war en seval blan. Sa ki ti pe mont li ti annan en fles dan son lanmen, e zot ti donn li en kouronn; i ti ale konman en venker e pour ganny laviktwar.” Anplis ki sa, psalmis David ti dir sa lo Zezi: “Zeova pou anvoy ou baton lafors ki sorti Siyon par dir: ‘Al diriz omilye ou bann lennmi.’ ”—Psonm 110:2.

10. (a) Ki bon depar Zezi ti fer lo son semen laviktwar? (b) Ki mannyer premye laviktwar Zezi i afekte lemonn antye?

¹⁰ Premye laviktwar ki Zezi ti gannyen ti lo son pli gran lennmi, Satan ek son bann demon. Zezi ti tir zot dan lesyel e zet zot lo later. Vi ki zot konnen ki zot letan i kourt, sa bann move lespri pe tir zot lakoler lo limanite, e sa i fer annan en kantite soufrans. Dan liv Revelasyon, sa bann soufrans i ganny reprezante par trwa lezot zonm ki pe mont zot seval. (Revelasyon 6:3-8; 12:7-12) Parey Zezi ti dir dan son profesi konsernan sa ‘siny ki pou endik lafen sa sistenm,’ laparisyon sa trwa seval in anmenn lager, lafanmin ek lepidemi. (Matye 24:3, 7; Lik 21:7-11) Parey avan lakousman, sa bann “douler” pou kontinyen ogmante ziska ki Kris i ‘totalman ganny laviktwar’ par detrir tou lorganizasyon Satan konpletman.a—Matye 24:8.

11. Ki mannyer listwar kongregasyon Kretyen i prouve ki Kris in vin Lerwa?

¹¹ En lot levidans ki Zezi in vin lerwa, se ki i’n kapab protez kongregasyon Kretyen, pour ki i akonpli sa komannman pour pres sa bon nouvel lo Rwayonm Bondye dan lemonn antye. Menm si nou ganny opoze severman avek bann gouvernman ek Gran Babilonn ki reprezant tou fo larelizyon dan lemonn antye, sa travay predikasyon pa’n arete. Sa ki pli enteresan ankor se ki sa travay in ganny akonpli lo en pli gran lesel ki zanmen oparavan. (Revelasyon 17:5, 6) Pa sa i en gran levidans ki Zezi pe rennyen!—Psonm 110:3.

12. Akoz laplipar dimoun pa konpran ki Kris i la dan en fason envizib?

¹² I malere pour dir ki laplipar dimoun, enkli plizyer milyon ki dir zot Kretyen, pa arive konpran ki sa bann gran levennman ki pe arive lo later ozordi i annan serten sinifikasyon. Zot menm boufonn bann ki koz lo Rwayonm Bondye. (2 Pyer 3:3, 4) Akoz? Parski Satan in avegle zot lespri. (2 Korentyen 4:3, 4) Annefe, depi byen lontan Satan in konmans avegle bann ki ti pretann dir zot Kretyen par fer zot vin dan fernwanr spirityel. I ti menm fer zot abandonn sa lespwar presye ki zot ti annan dan sa Rwayonm.

Perdi Lespwar dan Rwayonm

13. Ki rezilta sa fernwanr spirityel ti anmennen?

¹³ Zezi ti predir ki parey move zerb ki ganny senmen parmi dible, bann ki ti’n rezet laverite ti pou antre dan kongregasyon Kretyen e fer bokou tonbe. (Matye 13:24-30, 36-43; Akt 20:29-31; Zid 4) Avek letan, sa bann swadizan Kretyen ti pratik sa ki bann payen ti fer. Zot ti aksepte bann lafet ek lansennyman payen. Zot ti menm dir ki tousala i form parti larelizyon “Kretyen.” Par egzanp, Nwel i sorti dan seremoni ki bann payen ti fer pour ador bondye soley ek Satern. Me kwa ki ti pous sa bann swadizan Kretyen pour aksepte sa selebrasyon payen? The New Encyclopædia Britannica (1974) i dir: “Nwel, ki en lafet pour selebre nesans Zezi, ti ganny etablir akoz zot ti konmans krwar ki Kris pa pou retournen.”

14. Ki mannyer sa ki Origen ek Augustine ti ansennyen lo Rwayonm Bondye i pa korek?

¹⁴ Annou osi egzaminen ki mannyer sa mo “rwayonm” in ganny mal enterprete. Sa liv The Kingdom of God in 20th-Century Interpretation i dir: “Origen [en profeser dan trwazyenm Syek] ti sanz lafason ki Kretyen ti servi sa mo rwayonm, par dir ki i dominasyon Bondye dan nou leker.” Lo kwa Origen ti baz son lansennyman? I pa ti baze lo Labib, me plito ‘lo bann lide filozofi ek pwennvi lemonn ki vreman diferan avek fason ki Zezi ek bann premye Kretyen ti krwar.’ Dan son travay, De Civitate Dei (Lavil Bondye), Augustine sorti Hippo (354-430 N.L.) ti dir ki legliz li menm ki Rwayonm Bondye. Sa bann pwennvi ki pa baze lo Labib ti fer li posib pour bann legliz ki pretann zot Kretyen kapab mel dan politik. Zot ti servi sa kalite pouvwar pour plizyer syek e souvan zot ti servi li dan en fason kriyel.—Revelasyon 17:5, 18.

15. Ki mannyer Galat 6:7 in ganny akonpli lo bann legliz ki pretann zot Kretyen?

¹⁵ Aprezan, bann legliz ozordi pe rekolte sa ki zot in senmen. (Galat 6:7) I paret ki bokou pe perdi zot pouvwar ek zot bann fidel. Sa i ase evidan Lerop. Dapre zournal Christianity Today, “aprezan bann gran katedral Lerop i nepli ganny [servi] konman bann landrwa ladorasyon, me konman bann mize ki touris i vizite.” Sa pe osi arive dan bann lezot parti lemonn. Ki sa i fer nou konpran lo bann fo larelizyon? Eski i pou zis disparet akoz i pa ganny sipor? Ki mannyer vre ladorasyon pou ganny afekte?

Met pare pour gran Zour Bondye

16. Ki sinifikasyon sa bann laenn ki pe ogmante kont Gran Babilonn?

¹⁶ Zis parey lafimen ek lasann ki pe sorti dan en volkan i endike ki sa volkan pe al pete, pareyman sa bann laenn anver larelizyon dan bokou pei, i en lendikasyon ki fo larelizyon i pros pour trouv son lafen. Byento, Zeova pou fer bann group politik ini ansanm pour zot detrir sa prostitye, Gran Babilonn. (Revelasyon 17:15-17; 18:21) Eski bann vre Kretyen i devret per sa levennman ek lezot laspe dan sa “gran ladetres” ki pou arive apre? (Matye 24:21, NW ) Non, zot pa devret per. Annefe, zot pou annan tou rezon pour dan lazwa kan Bondye i azir kont bann move dimoun. (Revelasyon 18:20; 19:1, 2) Konman en legzanp, annou konsider Zerizalenm dan premye syek ek bann Kretyen ki ti viv dan sa lavil sa lepok.

17. Akoz bann serviter fidel Zeova i kapab fer fas avek lafen sa sistenm avek konfyans?

¹⁷ Bann Kretyen ki ti reste eveye spirityelman, pa ti soke oubyen per ler larme Romen ti anserkle Zerizalenm lannen 66 N.L. Vi ki zot ti seryezman etidye Parol Bondye, ‘zot ti konnen ki son destriksyon ti pros.’ (Lik 21:20) Zot ti osi konnen ki Bondye ti pou delivre zot. Kan larme Romen ti anserkle lavil pour premye fwa, bann Kretyen ti sove. (Danyel 9:26; Matye 24:15-19; Lik 21:21) Pareyman ozordi, bann ki konn Bondye e ki obeir son Garson, avek konfyans zot kapab fer fas avek lafen sa sistenm. (2 Tesalonisyen 1:6-9) Annefe, kan gran ladetres pou konmanse, avek lazwa zot pou ‘dres zot e lev zot latet anler, akoz zot delivrans pe aprose.’—Lik 21:28.

18. Ki pou arive kan Satan pou lans en dernyen latak lo pep Zeova?

¹⁸ Apre ki Gran Babilonn in ganny detrir, Satan ki ganny apele Gog sorti Magog pou lans en dernyen latak kont pep Zeova ki anpe. Bann ki dan kote Satan pou ekspekte ganny en laviktwar fasil, zis “parey nyaz ki pe al kouver later.” Me zot pou ganny en gro sok! (Ezekyel 38:14-16, 18-23) Zapot Zan ti ekrir: “Mon ti war lesyel ouver, e la en seval blan ti aparet. Sa ki ti pe mont li ti apel Fidel e Vre . . . Dan son labous i sorti en lepe byen koupe ki i pou servi pour frap bann nasyon avek.” Sa “Rwa-de-rwa” ki pa kapab ganny defet, pou delivre bann serviter fidel Zeova e detrir tou zot bann lennmi. (Revelasyon 19:11-21) Pa sa pou en finisyon merveye pour akonpli sa transfigirasyon!

19. Ki lefe laviktwar Kris pou annan lo son bann disip fidel e ki zefor zot devret fer la konmela menm?

¹⁹ Sa zour, Zezi pou ganny ‘admire par tou bann ki’n krwar’ li. (2 Tesalonisyen 1:10) Eski ou ti a kontan parmi sa bann ki pou admir Garson Bondye pour son laviktwar? Alor, kontinyen batir ou lafwa e ‘met ou pare, akoz Fis-de-Lonm pou vini ler ki ou pa pe ekspekte li.’—Matye 24:43, 44.

Vey byen

20. (a) Ki mannyer nou kapab montre ki nou apresye ‘lesklav fidel e pridan,’ ki en provizyon sorti kot Bondye? (b) Ki bann kestyon nou devret demann nou lekor?

²⁰ ‘Lesklav fidel e pridan’ pe kontinyelman ankouraz pep Bondye pour reste vizilan lo plan spirityel e pour zot vey byen. (Matye 24:45, 46; 1 Tesalonisyen 5:6) Eski ou apresye sa bann rapel ki vin zis atan? Eski ou mazin zot ler ou pe deside kwa ki ou pou met premye dan ou lavi? Ou kapab demann ou lekor: ‘Dan en sans spirityel, eski mon kapab vwar Garson Bondye pe dirize dan lesyel? Eski mon kapab vwar li pe met pare pour anmenn zizman lo Gran Babilonn ek larestan sistenm Satan?’

21. Pour ki rezon petet serten in les zot vizyon spirityel vin sonm, e ki zot pa devret tarde pou fer?

²¹ Serten ki ti pe asosye avek pep Zeova in les zot vizyon spirityel vin sonm. Eski i kapab sa in arive akoz zot mank pasyans oubyen landirans parey serten bann premye disip Zezi? Eski petet traka lavi, tay deryer keksoz materyel oubyen persekisyon ki’n afekte zot? (Matye 13:3-8, 18-23; Lik 21:34-36) Kekfwa i annan ki’n vwar serten lenformasyon ki ‘lesklav fidel e pridan’ i pibliye difisil pour konpran. Si enn sa bann keksoz in ariv avek ou, nou ankouraz ou pour pa tarde etidye Parol Bondye avek devouman e sipliy Zeova pour ou kapab reganny en bon relasyon avek li.—2 Pyer 3:11-15.

22. Ler ou’n egzamin sa transfigirasyon ek lezot profesi, ki lefe sa in fer lo ou?

²² Bann disip Zezi ti ganny sa transfigirasyon kan zot ti bezwen lankourazman. Ozordi nou ganny fortifye par bann keksoz ki pli spektakiler ki sa vizyon. Sa i lakonplisman sa transfigirasyon ek plizyer lezot profesi. Anmezir ki nou reflesir lo sa bann gran levennman ek son sinifikasyon pour lavenir, avek tou nou leker annou dir sa ki zapot Zan ti dir: “Amenn! Vini, Senyer Zezi!”—Revelasyon 22:20.

[Not anba lo paz]

Eski ou rapel?

• Ki en group etidyan Labib ti arive konpran lo retour Kris an 1870?

• Ki mannyer sa transfigirasyon in ganny akonpli?

• Ler Zezi in konmans ganny laviktwar, ki lefe sa in annan lo lemonn ek kongregasyon Kretyen?

• Ki nou bezwen fer si nou anvi sirviv kan Zezi i konpletman ganny laviktwar?

[Portre lo paz 9]

En vizyon i vin vre

[Portre lo paz 10]

Eski ou konnen ki ti arive kan Zezi ti konmans ganny laviktwar?