Armagedon​—En Konmansman merveye

SA MO “Armagedon” i sorti dan sa lekspresyon Ebre “Har–​Magedon,” oubyen “Montanny Megido.” I trouve dan Revelasyon 16:16, ki dir: “Bann lespri ti rasanble bann lerwa dan en landrwa ki apel Armagedon dan langaz Ebre.” Lekel ki rasanble kot Armagedon, e akoz? Dan Revelasyon 16:14, zis de verse avan verse 16, nou lir: ‘Bann lerwa lo later an antye’ i rasanble zot ‘pour konbat kan sa gran zour Bondye Toupisan pou arive.’ I toutafe normal ki sa i fer demann serten kestyon byen enteresan. Kote sa “bann lerwa” i lager? Pour ki rezon zot lager e avek ki sennla? Eski zot pou servi zarm destriksyon lamas, parey bokou dimoun i krwar? Eski i pou annan dimoun ki pou sirviv Armagedon? Annou les Labib reponn.

Lefe ki “Montanny Megido” i ganny mansyonnen, eski sa i vedir ki Armagedon pou ariv lo en serten montanny dan Mwayen Oriyan? Non. Premyerman, sa montanny pa vreman egziste. Sa landrwa kot ansyen Megido ti ete, i zis en pti oter apepre 20 met oter parlao sa vale akote li. Deplis, sa landrwa otour Megido pa ase gran pour pran tou sa “bann lerwa later, avek zot larme.” (Revelasyon 19:19) Me Megido ti sa landrwa kot serten pli gro batay ki’n fer gran sanzman dan listwar Mwayenn Oriyan in arive. Alor, sa non Armagedon i ganny servi pour reprezant en konfli ki pou fer en gran sanzman, kot i tre evidan lekel ki pou ganny laviktwar.—Vwar bwat “Megido—En Senbol apropriye” lo paz 5.

Armagedon pa kapab zis en konfli antre bann nasyon isi lo later. Sa i akoz Revelasyon 16:14 i dir ki “bann lerwa lo later an antye” i form en sel group “pour konbat kan sa gran zour Bondye Toupisan pou arive.” Dan son profesi, Zeremi i dir ki “sa bann ki Zeova i touye” pou “depi en bout later ziska en lot bout later.” (Zeremi 25:33) Alor, Armagedon i pa en lager imen ki ariv zis dan en serten landrwa dan Mwayenn Oriyan. I lager Zeova, e i pou ariv dan lemonn antye.

Me remarke ki dan Revelasyon 16:16, Armagedon i “en landrwa.” Dan Labib, sa mo en “landrwa” i kapab vedir en kondisyon oubyen en sitiasyon. Ler lemonn antye i ini ansanm pour opoz Zeova, i sanmenm sa sitiasyon ki sa mo “Har-Magedon” i vedir. (Revelasyon 12:6, 14) Zour Armagedon, tou nasyon lo later i ralye ansanm kont “bann larme lesyel” anba komandan “Rwa-de-rwa, Senyer-de-senyer.” Sa i Zezi Kri li menm.—Revelasyon 19:14, 16.

Me ki nou pou dir konsernan sa konsep ki Armagedon pou en masak ki enplik zarm destriksyon lamas oubyen en kolizyon avek en lobze dan lespas? Eski en Bondye lanmour pou les imen ek zot demer, later, sibir en lafen terib konmsa? Non. Bondye in klerman dir ki i pa ti kree later “pour nanryen ditou,” me ki i’n “fer li pour dimoun reste lo la.” (Izai 45:18; Psonm 96:10) Zour Armagedon, Zeova pa pou detrir nou plannet par en gro dife. Okontrer, i pou ‘detri bann ki pe detri later.’—Revelasyon 11:18.

Kan Armagedon?

Kan Armagedon pou arive? Pandan plizyer santenn lannen, dimoun in envant diferan kalite leksplikasyon pour reponn sa kestyon. Egzamin Liv Revelasyon ansanm avek lezot parti dan Labib i kapab ed nou konnen ki Labib i dir konsernan kan sa lager tre enportan pou arive. Revelasyon 16:15 i asosye Armagedon avek larive Zezi konman en voler. Zezi li menm ti servi sa legzanp pour dekrir son larive pour pas zizman lo sa lemonn.—Matye 24:43, 44; 1 Tesalonisyen 5:2.

Parey lakonplisman bann profesi Labib i montre, depi 1914 nou pe viv dan bann dernyen zour sa sistenm.a Ler sa ki Zezi ti apel ‘gran ladetres’ i arive, sa pou endike ki sa bann dernyen zour pe fini. Labib pa dir ki kantite letan gran ladetres pou dire, me bann maler ki i anmennen pou pli pir ki okenn keksoz ki sa lemonn in deza vwar. Gran ladetres pou fini avek Armagedon.—Matye 24:21, 29.

Vi ki Armagedon i lager ‘Bondye Toupisan,’ alor napa nanryen ki imen i kapab fer pour anpes li arive. Zeova in met en “letan fikse” pour sa lager konmanse. “I pa pou an retar.”—Abakouk 2:3.

En Bondye ki drwat i fer en Lager ki zis

Me akoz Bondye pou fer en lager dan lemonn antye? Armagedon i relye tre pros avek enn son bann kalite prensipal. Sa i lazistis. Labib i dir: “Zeova i kontan lazistis.” (Psonm 37:28) I’n vwar tou sa bann lenzistis ki’n arive dan listwar imen e i annan tou rezon pour mekontan. Alor i’n apwent son Garson pour fer en lager ki zis, pour retir konpletman sa move sistenm.

Zis Zeova ki kapab fer en lager ki vreman zis kot bann dimoun drwat, nenport ki bor zot kapab ete lo later, pou ganny proteze. (Matye 24:40, 41; Revelasyon 7:9, 10, 13, 14) Deplis, zis li ki annan sa drwa pour enpoz son lotorite lo later antye, akoz sa i son kreasyon.—Revelasyon 4:11.

Ki kalite lafors Zeova pou servi kont son bann lennmi? Nou pa konnen. Me nou konnen ki Zeova i annan sa mwayen pour kraz bann move nasyon konpletman. (Zob 38:22, 23; Tsefanya 1:15-18) Parkont bann adorater Bondye lo later pa pou partisip dan sa lager. Sa vizyon dan Revelasyon sapit 19 i montre ki selman bann larme lesyel ki pou partisip avek Zezi Kri dan sa batay. Pou napa en serviter Bondye lo later ki pou pran par.—2 Kronik 20:15, 17.

En Bondye Lasazes i donn sifizaman Lavertisman

Ki nou pou dir aprezan lo bann sirvivan? An realite personn pa neseserman bezwen ganny detrir zour Armagedon. Zapot Pyer ti fer sa remark: “Nou Senyer . . . pa oule ki personn i ganny detri, me ki tou dimoun i arive repanti.” (2 Pyer 3:9) Zapot Pol ti osi dir ki Bondye i “oule ki tou [sort] dimoun i ganny sove e ganny konnesans laverite.”—1 Timote 2:4.

Pour sa arive, avek lasazes Zeova in fer sir ki sa “Bonn Nouvel Rwayonm” i ganny anonse dan plizyer santenn langaz partou lo later. Dan tou kwen later, dimoun pe ganny sa loportinite pour zot sirviv e ganny sove sa zour. (Matye 24:14; Psonm 37:34; Filipyen 2:12) Sa bann ki aksepte sa bon nouvel i kapab sirviv Armagedon e viv pour touzour dan en kondisyon parfe dan paradi lo later. (Ezekyel 18:23, 32; Tsefanya 2:3; Romen 10:13) Pa sanmenm ki nou ekspekte avek en Bondye lanmour?—1 Zan 4:8.

Eski en Bondye Lanmour i kapab Lager?

Me en kantite dimoun i demande akoz en Bondye lanmour pou anmenn lanmor ek destriksyon lo bokou dimoun. Nou kapab konpar sa sitiasyon avek en lakaz ki’n ganny enfeste avek pes. Eski ou pa pou dakor ki en met lakaz ki konsyansye i bezwen ekstermin sa bann pes pour protez lasante ek byennet son fanmiy?

Pareyman, akoz sa profon lafeksyon ki Zeova i annan pour imen, lager Armagedon i bezwen arive. Bondye i oule fer later vin en paradi e fer limanite vin parfe e viv dan lape, san ki ‘personn i fer zot tranble.’ (Mika 4:3, 4; Revelasyon 21:4) Alor, ki fodre fer avek sa bann ki menas lape ek sekirite zot prosen? Bondye i bezwen elimin sa bann “pes,” setadir sa bann dimoun ki vreman move e pa oule sanze. I bezwen fer sa pour byennet bann ki i kontan e ki fer sa ki drwat.—2 Tesalonisyen 1:8, 9; Revelasyon 21:8.

Ozordi laplipar konfli ek versman disan i rezilta bann dirizan imen enparfe ek zot lanbisyon egois pour lentere zot prop nasyon. (Eklezyast 8:9) Dan pe rod fason pour vin pli for, sa bann gouvernman pa enterese ditou avek sa Rwayonm ki Bondye in etablir. Napa lendikasyon ki zot pou soumet zot anba lotorite Bondye ek Kris. (Psonm 2:1-9) Alor, sa bann kalite gouvernman i bezwen ganny retire pour prepar semen pour dominasyon drwat Rwayonm Zeova dan lanmen Kris. (Danyel 2:44) Armagedon i bezwen arive pour rezourd enn fwa pour tou sa kestyon konsernan lekel ki annan drwa diriz later ek bann imen.

Aksyon ki Zeova pou pran zour Armagedon pou dan byennet limanite. Avek sa sitiasyon lemonn ki pe kontinyen deteryore, zis dominasyon parfe Bondye ki pou satisfer konpletman bezwen limanite. Selman par mwayen son Rwayonm ki vre lape ek prosperite pou fleri. Dan ki kondisyon sa lemonn pou vini si en zour Bondye pa pran aksyon? Pa laenn, vyolans, ek lager pou kontinyen ravaz limanite zis parey in leka pandan sa plizyer santenn lannen dominasyon zonm? An realite, lager Armagedon i enn parmi bann pli bon keksoz ki kapab arive pour nou!—Lik 18:7, 8; 2 Pyer 3:13.

Sa Lager ki met en Lafen avek tou Lager

Armagedon pou akonpli en keksoz ki okenn lezot lager pa’n zanmen deza fer. I pou met en lafen avek tou lager. Lekel ki pa anvi vwar sa zour kot lager pou vin en keksoz lepase? Me malgre tou zefor ki zonm in fer, nou pa vwar okenn lafen avek lager. Tou sa zefor anven ki zonm i esey fer pour met en lafen avek lager i zis fer nou vwar ki parol Zeremi i vre. I ti dir: “Mon konnen, O Zeova, ki semen en imen pa pour li. I pa pour en imen ki pe marse pour diriz son lepa.” (Zeremi 10:23) Konsernan sa ki Zeova pou akonpli, Labib i promet: “I pe fer arete lager ziska dan bann landrwa pli lwen lo later. I kas lark e i koup lans an morso. I bril bann saret dan dife.”—Psonm 46:8, 9.

Ler bann nasyon i servi zot bann zarm danzere kont kanmarad e menas lanvironnman, Kreater later pou pran aksyon. Sa i zour ki Labib i apel Armagedon! (Revelasyon 11:18) Alor, sa lager pou akonpli sa ki bann serviter fidel Bondye in zis espere pandan tou sa letan. I pou zistifye sa drwa ki Zeova, Propriyeter later, i annan pour diriz tou son kreasyon.

Alor, bann dimoun ki kontan ladrwatir pa per Armagedon. Okontrer, i donn nou rezon pour annan lespwar. Lager Armagedon pou netway e retir tou koripsyon ek mesanste lo later e kree semen pour en nouvo sistenm drwat anba dominasyon Rwayonm Bondye dirize par Kris. (Izai 11:4, 5) Olye en lafen efreyan, Armagedon pou mark en konmansman merveye pour bann dimoun drwat ki pou viv pour touzour lo later dan paradi.—Psonm 37:29.

[Not anba lo paz]

[Bwat/Portre lo paz 5]

MEGIDO​—EN SENBOL APROPRIYE

Ansyen Megido ti en landrwa stratezik, e apartir sa landrwa ou kapab vwar klerman rezyon was Vale fertil Yizreel dan nor Izrael. Sa landrwa ti kontrol larout komers e militer bann nasyon ki ti bezwen pas par sa landrwa. Pour sa rezon ki bokou nasyon ti lager pour kapab pran kontrol Megido. Dan son liv Cities of the Biblical World​—Megiddo, Profeser Graham Davies i ekrir: “Bann marsan ek imigran sorti dan tou direksyon ti . . . fasilman ganny akse avek lavil Megido; me anmenmtan, si i ti ase for, i ti kapab kontrol akse par mwayen sa bann larout e alor diriz lafason ki komers ek lager i deroule. I pa sirprenan alor ki [sa lavil] ti . . . en posesyon ki zot ti souvan lager pour gannyen e i ti ganny byen proteze ler i ti ganny konkerir.”

Listwar Megido ti konmans byen lontan ler plis ki 3,500 zan pase dirizan Ezipsyen Thutmose 3 ti defet bann dirizan Kananeen dan sa landrwa. Son listwar i kontinyen pandan sa plizyer santenn lannen ki’n pase ziska 1918 ler Zeneral Edmund Allenby ti defet larme Tirk. I ti kot Megido ki Bondye ti fer Ziz Barak defet Lerwa Yabin ki ti en Kananeen. (Ziz 4:​12-​24; 5:​19, 20) Bor kote lanmenm la ki Ziz Gideonn ti defet bann Madyanit. (Ziz 7:​1-22) I ti dan sa landrwa osi, ki Lerwa Aazya ek Yosiya ti ganny touye.​—2 Lerwa 9:​27; 23:29, 30.

Alor i apropriye ki Armagedon i ganny asosye avek sa landrwa, vi ki i ti sa landrwa kot plizyer lager enportan ti deroule. I en senbol apropriye pour reprezant sa laviktwar konplet ki Bondye pou gannyen lo tou son bann lennmi.

[Portre]

Pictorial Archive (Near Eastern History) Est.

[Portre lo paz 7]

Armagedon pou mark en konmansman merveye

[Portre lo paz 7]

Partou lo later, dimoun pe ganny averti e ganny loportinite pour sirviv Armagedon