Rod Ladwratir pou protez nou

‘Kontinyen rod plito . . . ladrwatir Bondye.’—MATYE 6:33.

 1, 2. Ki desizyon sirprenan en zenn Kretyen ti fer, e akoz i ti fer sa desizyon?

EN ZENN madanm Lazi ti pe travay konman en sekreter dan en biro gouvernman. I ti fer byen son travay, antre travay boner, e i pa ti fer pares. Me apre en serten letan zot ti evalye sa pos travay pour vwar si i neseser gard li vi ki sa plas ti zis pour en pe letan. Sef sa departman ti dir sa zenn madanm ki i pou anploy li permanan e menm donn li en pli bon pozisyon, si i annan en relasyon imoral avek li. Sa zenn madanm ti refize fer sa, menm si sa ti pou kout li son plas travay.

² Eski desizyon sa zenn madanm Kretyen pa ti fer sans? Non, i ti pe byen swiv parol Zezi: ‘Kontinyen rod plito . . . ladrwatir Bondye.’ (Matye 6:33) Pour li, swiv bann prensip drwat ti pli enportan ki ganny en pli bon pozisyon par komet imoralite seksyel.—1 Korentyen 6:18.

Lenportans Ladrwatir

 3. Kisisa ladrwatir?

³ “Ladrwatir” i enplik reste atase avek bann prensip moral e lonnekte. Dan Labib, sa mo Grek ek Ebre pour “ladrwatir” i donn lide sa ki drwat ouswa sa ki byen dapre en standar. I pa vedir ki en dimoun i ziz son lekor dapre son prop standar. (Lik 16:15) I drwat dapre standar Zeova, savedir i ladrwatir Bondye.—Romen 1:17; 3:21.

 4. Akoz ladrwatir i enportan pour en Kretyen?

⁴ Akoz ladrwatir i enportan? Parski Zeova ki en “Bondye ki drwat,” i donn son faver son pep ler zot demontre ladrwatir. (Psonm 4:1; Proverb 2:20-22; Abakouk 1:13) Okenn dimoun ki kontinyen fer sa ki mal pa kapab annan en relasyon pros avek Bondye. (Proverb 15:8) Pour sa rezon, zapot Pol ti ankouraz Timote: “Gard ou lekor kont sa bann pasyon lazenes, e fer zefor pour posed [ladrwatir, NW]” ansanm avek lezot kalite tre enportan. (2 Timote 2:22) I pour sa menm rezon osi, ki ler Pol ti fer en lalis diferan parti nou lekipman batay spirityel, i ti enkli ‘ladrwatir konman en proteksyon lo nou pwatrin.’—Efezyen 6:14.

 5. Ki mannyer bann imen enparfe i kapab rod ladrwatir?

⁵ Byensir, napa personn ki drwat dan en sans konplet. Nou tou nou’n erit pese avek Adan, e nou tou nou peser, e nou pa’n ne avek ladrwatir. Kantmenm sa, Zezi ti dir ki nou devret rod ladrwatir. Ki mannyer sa i posib? Sa i posib akoz Zezi ti donn son lavi parfe konman en sakrifis pour nou e si nou montre lafwa dan sa sakrifis, Zeova i pare pour pardonn nou pese. (Matye 20:28; Zan 3:16; Romen 5:8, 9, 12, 18) Akoz sa, Zeova i aksepte nou ladorasyon si nou konn son bann standar drwat e fer nou mye pour obeir zot, e priy pour led pour sirmont nou febles. (Psonm 1:6; Romen 7:19-25; Revelasyon 7:9, 14) Sa i vreman rekonfort nou!

Ladrwatir dan en Lemonn ki move

 6. Akoz lemonn ti en landrwa danzere pour bann premye Kretyen?

⁶ Bann disip Zezi ti fer fas avek en sitiasyon difisil ler zot ti ganny sa travay pour vin son temwen dan “bann landrwa pli elwannyen lo later.” (Akt 1:8) Zot teritwar an antye ti “dan pouvwar dyab.” (1 Zan 5:19) Sa lemonn sa letan ti’n ganny anvair avek sa move lespri ki Satan i promote, e bann Kretyen ti pou ekspoze avek son lenfliyans ki ti kapab kontamin zot. (Efezyen 2:2) Pour zot, sa lemonn ti en landrwa danzere. Se selman par rod plito ladrwatir Bondye ki zot ti pou kapab andire e reste san defo. Laplipar Kretyen sa letan ti andire, me detrwa ti kit “semen ladrwatir.”—Proverb 12:28; 2 Timote 4:10.

 7. Ki responsabilite en Kretyen i annan ki fer li bezwen reziste bann move lenfliyans sa lemonn?

⁷ Eski lemonn i en landrwa ki mwen danzere pour bann Kretyen ozordi? Pa ditou! Okontrer i pli koronpi ki i ti ete dan premye syek. Deplis, Satan in ganny zete lo later e pe lager for kont bann Kretyen swazir, “leres desandans sa fanm . . . ki obei konmannman Bondye e ki fidel avek temwanyaz Zezi.” (Revelasyon 12:12, 17) Satan i osi atak nenport dimoun ki siport sa “desandans.” Anmenmtan, bann Kretyen pa kapab sov sa lemonn. Menm si zot pa form parti sa lemonn, zot bezwen viv ladan. (Zan 17:15, 16) Zot bezwen pres dan sa lemonn pour rod sa bann dimoun ki annan leker senser e ansenny zot pour vin disip Kris. (Matye 24:14; 28:19, 20) Alor, lefe ki bann Kretyen pa kapab evit konpletman bann lenfliyans koronpi dan sa lemonn, zot bezwen reziste zot. Annou egzamin kat sa bann move lenfliyans.

Latrap Limoralite

 8. Akoz bann Izraelit ti konmans ador bann bondye Moabit?

⁸ Ver lafen zot 40 an dan dezer, en gran kantite Izraelit ti abandonn “semen ladrwatir.” Zot ti’n vwar Zeova azir plizyer fwa pour delivre zot, e pa ti mank bokou letan pour zot antre dan Later Promiz. Me dan sa moman enportan, zot ti konmans servi bann bondye Moabit. Akoz? Zot ti les bann move “dezir” domin zot. (1 Zan 2:16) Labib i dir: “Lepep ti konmans annan relasyon imoral avek bann fiy Moab.”—Nonm 25:1.

 9, 10. Ki sitiasyon ozordi ki fer li enportan pour toultan kit antet pouvwar koronpi bann move dezir?

⁹ Sa levennman i montre fason ki bann move dezir i kapab afekte bann ki pa vizilan. Nou devret pran aker sa leson, sirtou ki konmela laplipar dimoun i konsider limoralite konman en fason viv ki akseptab. (1 Korentyen 10:6, 8) En rapor sorti Letazini i dir: “Avan 1970, viv an menaz ti en keksoz ilegal dan tou leta Letazini. Ozordi i’n vin en keksoz normal pour fer. Plis ki lanmwatye tou bann koup ki pe marye pour premye fwa in viv an menaz avan zot marye.” Pa zis dan en pei ki menaz ek lezot pratik imoral i egziste. Zot egziste partou dan lemonn, e malerezman, serten Kretyen in swiv sa semen e zot in menm perdi zot pozisyon dan kongregasyon Kretyen.—1 Korentyen 5:11.

¹⁰ Deplis, limoralite pe ganny ankouraze partou kote. Bann film ek progranm televizyon i sizere ki i toutafe normal pour bann zenn fer sèks avan marye. Bann relasyon omoseksyel i ganny montre konman en keksoz normal. Deplis, pli ale bokou film pa kasyet nanryen ler zot montre bann aksyon seksyel. I osi fasil pour ganny bann portre dimoun ki pe fer sèks lo Internet. Par egzanp, en zournalis ti raporte ki son pti garson set an ti arive sorti lekol e avek leksitasyon dir son papa ki en zanmi lekol in trouv en sit Internet ki montre bann madanm touni pe fer sèks. Sa papa ti soke. Me an realite, ki kantite zanfan ki trouv sa bann sit san dir nanryen zot paran? Deplis, ki kantite paran ki konnen sa ki annan dan bann zwe video ki zot zanfan pe zwe? Dan bokou zwe video popiler i annan limoralite, vyolans ek grigri.

11. Ki mannyer en fanmiy i kapab ganny proteze kont limoralite dan sa lemonn?

¹¹ Ki mannyer en fanmiy i kapab reziste sa bann kalite “divertisman” degradan? Par rod plito ladrwatir Bondye, rezet okenn keksoz imoral. (2 Korentyen 6:14; Efezyen 5:3) I enportan ki bann paran i vey sa ki zot zanfan i fer e fer antre dan zot zanfan en lanmour pour Zeova ek son bann lalwa drwat. Sa pou donn zot lafors pour rezet pornografi, zwe video pornografik, film imoral, ek lezot move tantasyon.—Deterononm 6:4-9.a

Danze Lenfliyans Dimoun dan Kominote

12. Ki problenm ki ti leve dan premye syek?

¹² Ler Pol ti Lis dan Lazi, i ti fer en mirak pour geri en zonm. Dapre sa resi: “Ler bann dimoun ti war sa ki Pol ti’n fer, zot ti kriye dan langaz Likaonyen, ‘Bann bondye in pran laform zonm e zot in desann kot nou.’ Zot ti donn Barnabas non zot bondye Zeis, e Pol li zot ti donn li non bondye Ermes, akoz se li ki ti port-parol.” (Akt 14:11, 12) Plitar sa menm lafoul ti anvi touy Pol ek Barnabas. (Akt 14:19) I kler ki bann dimoun dan sa kominote ti fasilman les zot kanmarad enfliyans zot. Ler serten dimoun dan sa rezyon ti vin Kretyen, i paret ki zot pa ti abandonn zot tandans siperstisye. Dan son let pour bann Kretyen Kolos, Pol ti averti kont “ladorasyon bann lanz.”—Kolosyen 2:18.

13. Ki serten koutim en Kretyen i devret evite, e ki mannyer nou kapab trouv sa lafors pour fer sa?

¹³ Ozordi, bann vre Kretyen i osi bezwen evit bann koutim popiler baze lo bann fo konsep relizye ki kont bann prensip Kretyen. Par egzanp, dan serten pei bokou seremoni popiler ki ganny fer zour nesans en baba e ler en dimoun i mor, i baze lo sa mansonz ki nou annan en nanm ki viv apre lanmor. (Eklezyast 9:5, 10) I annan pei kot i en koutim pour fer sirkonsizyon lo bann zenn fiy. Sa i en pratik ki kriyel, ki pa neseser, e ki pa an armoni avek sa swen ranpli avek lanmour ki bann paran Kretyen i merit donn zot zanfan. (Deterononm 6:6, 7; Efezyen 6:4) Ki mannyer bann Kretyen i kapab reziste presyon dan kominote e rezet sa bann kalite pratik? Par met tou zot konfyans dan Zeova. (Psonm 31:6) Sa Bondye drwat pou fortifye e pran swen avek sa bann ki dir li senserman: “Ou mon landrwa refiz ek mon landrwa proteksyon, mon Bondye dan ki mon pou met konfyans.”—Psonm 91:2; Proverb 29:25.

Pa oubliy Zeova

14. Ki lavertisman Zeova ti donn bann Izraelit zis avan zot ti antre dan Later Promiz?

¹⁴ En pe letan avan ki bann Izraelit ti antre dan Later Promiz, Zeova ti averti zot pour pa oubliy li. I ti dir: “Veye ki ou pa oubliy Zeova ou Bondye pangar ou pa gard son bann komannman ek son zizman ek son lalwa ki mon pe donn ou ozordi. Pangar ou manze e vreman rasazye, ou konstri zoli lakaz e reste ladan, pangar ou gro zannimo ek pti zannimo i ogmante, e ou ganny plis larzan ek lor, e tou sa ki pour ou i ogmante; e pangar ou [vin orgeye] e ou oubliy Zeova ou Bondye.”—Deterononm 8:11-14.

15. Ki mannyer nou kapab fer sir ki nou pa pe oubliy Zeova?

¹⁵ Eski i kapab ariv en keksoz en pe parey ozordi? Wi, si nou pa byen etablir nou priyorite. Me si nou rod ladrwatir Bondye, vre ladorasyon pou vin keksoz pli enportan dan nou lavi. Parey Pol i ankouraz nou pour fer, nou pou ‘servi byen tou lokazyon ki prezant avek nou’ e nou pou akonpli nou minister, an gardan antet ki letan i kourt. (Kolosyen 4:5; 2 Timote 4:2) Me si detann oubyen lanmizman i vin pli enportan pour nou ki asiste renyon ek predikasyon, nou kapab oubliy Zeova dan le sans ki nou konsider li dezyenm dan nou lavi. Pol ti dir ki dan bann dernyen zour, zonm pou “kontan plezir plis ki Bondye.” (2 Timote 3:4) Bann Kretyen senser i egzamin zot lekor regilyerman pour fer sir ki zot pa pe ganny enfliyanse par sa kalite latitid.—2 Korentyen 13:5.

Fer atansyon en Leta Lespri endepandan

16. Ki sa move leta lespri ki Ev ek serten dan letan Pol ti demontre?

¹⁶ Dan zarden Edenn, Satan ti reisi atir dezir egois Ev pour vin endepandan. Ev ti anvi fer son prop desizyon konsernan sa ki byen ek mal. (Zenez 3:1-6) Dan premye syek, serten dan kongregasyon Korent ti annan sa menm leta lespri endepandan. Zot ti krwar ki zot ti annan plis konnesans ki Pol, e dan en zar pe monk zot, Pol ti apel zot bann zapot ki pas zot pour siperyer.—2 Korentyen 11:3-5; 1 Timote 6:3-5.

17. Ki mannyer nou kapab evite devlop en leta lespri endepandan?

¹⁷ Dan lemonn ozordi, bokou i antete, ‘gonfle avek lorgey,’ e serten Kretyen in ganny enfliyanse par sa latitid. Serten in menm arive opoz laverite. (2 Timote 3:4; Filipyen 3:18) Dan vre ladorasyon, i enportan ki nou les Zeova gid nou e nou korpere avek ‘lesklav fidel e pridan’ ek bann ansyen dan kongregasyon. Sa i en fason pour rod ladrwatir e i protez nou pour pa devlop en leta lespri endepandan. (Matye 24:45-47; Psonm 25:9, 10; Izai 30:21) Kongregasyon bann Kretyen swazir i en “pilye ek sipor laverite.” Zeova in etablir sa kongregasyon pour protez e gid nou. (1 Timote 3:15) Ler nou rekonnet son rol enportan, sa pou ed nou pour “pa fer nanryen par lespri egois” me pour soumet avek lavolonte drwat Zeova.—Filipyen 2:2-4; Proverb 3:4-6.

Vin bann Imitater Zezi

18. Dan ki fason nou ganny ankouraze pour imit Zezi?

¹⁸ Dan en fason profetik, Labib i dir sa lo Zezi: “Ou’n kontan ladrwatir e ou ay lemal.” (Psonm 45:7; Ebre 1:9) Sa i en bon latitid pour nou imite! (1 Korentyen 11:1) Zezi pa ti zis konn standar drwat Zeova; i ti kontan zot. Alor ler Satan ti tant li dan dezer, san ezite e dan en fason ferm Zezi ti refize abandonn “semen ladrwatir.”—Proverb 8:20; Matye 4:3-11.

19, 20. Ki bon rezilta nou gannyen ler nou rod ladrwatir?

¹⁹ I vre, bann move dezir i kapab for. (Romen 7:19, 20) Me si ladrwatir i presye pour nou, sa pou fortifye nou kont lemal. (Psonm 119:165) En profon lanmour pour ladrwatir pou protez nou ler nou fer fas avek sa ki mal. (Proverb 4:4-6) Mazinen, sak fwa ki nou soumet avek tantasyon, nou donn Satan en laviktwar. Annou plito reziste li e donn laviktwar Zeova!—Proverb 27:11; Zak 4:7, 8.

²⁰ Akoz zot rod ladrwatir, bann vre Kretyen i “ranpli avek bann bon kalite” ki fer zot donn laglwar Bondye. (Filipyen 1:10, 11) Zot vin ‘konpletman nouvo, kree dan resanblans Bondye e dimoun i war ki zot viv dan en fason drwat e sen dapre laverite.’ (Efezyen 4:24) Zot pour Zeova e zot viv pour servi li, pa pour fer plezir zot lekor. (Romen 14:8; 1 Pyer 4:2) Sanmenm ki gouvern zot panse ek aksyon. Zot vreman fer leker zot Papa dan lesyel kontan!—Proverb 23:24.

[Not anba lo paz]

Eski ou kapab eksplike?

• Akoz i enportan pour rod ladrwatir?

• Ki mannyer en Kretyen enparfe i kapab rod ladrwatir?

• Nonm serten keksoz dan lemonn ki en Kretyen i bezwen evite.

• Dan ki fason nou ganny proteze ler nou rod ladrwatir?

[Portre lo paz 28]

Pour bann disip Zezi, sa lemonn ti en landrwa danzere

[Portre lo paz 29]

Bann zanfan ki aprann kontan Zeova pou ganny lafors pour reziste limoralite

[Portre lo paz 30]

Serten Izraelit ti oubliy Zeova apre ki zot ti prospere dan Later Promiz

[Portre lo paz 31]

Parey Zezi, bann Kretyen i ay lemal