Gete! Sa serviter ki Zeova in aprouve

“Gete! Mon serviter, . . . ki mon’n aprouve!”—IZA. 42:1.

1. Ki pep Zeova i ganny ankouraze pour fer, sirtou ki Memoryal pe aprose e akoz?

ANMEZIR ki sa zour pour komemor lanmor Kris i aprose, pep Bondye i ganny ankouraze pour swiv sa konsey zapot Pol pour, “gard nou regar fikse lo Zezi, sa enn ki linisyater nou lafwa.” Pol ti osi azoute: “Mazin en pe, ki mannyer i’n siport sitan lopozisyon delapar bann peser. E pa dekouraze, ni dezespere.” (Ebr. 12:2, 3) Mazinen ouswa egzamin byen ki mannyer Kris ti reste fidel e finalman donn son lavi konman en sakrifis, sa pou ed bann Kretyen swazir ek zot konpanyon lezot mouton pour kontinyen servi Zeova fidelman e pour “pa dekouraze.”—Konpar Galat 6:9.

2. Ki nou kapab aprann atraver sa seri profesi Izai ki relye avek Garson Bondye?

² Zeova ti enspir profet Izai pour ekrir en seri profesi ki ti relye direkteman avek son Garson. Sa bann profesi pou ed nou, “gard nou regar fikse lo [Zezi] linisyater nou lafwa, e ki anmenn li ziska perfeksyon.”a Zot donn bann detay lo son personnalite, son soufrans e sa pozisyon ki i’n gannyen konman nou Lerwa ek Sover. Zot pou amelyor nou konprenezon lo Memoryal ki pou ganny komemore sa lannen, Zedi le 9 Avril, apre soley kouse.

Sa Serviter in ganny idantifye

3, 4. (a) Dan liv Izai, ki sa mo “serviter” i vedir? (b) Ki mannyer Labib i idantifye sa Serviter ki’n ganny mansyonnen dan Izai sapit 42, 49, 50, 52 ek 53?

³ Sa mo “serviter” i aparet plizyer fwa dan liv Izai. Parler i vedir sa profet li menm. (Iza. 20:3; 44:26) Parfwa i aplik avek nasyon Izrael oubyen Zakob. (Iza. 41:8, 9; 44:1, 21) Me ki nou pou dir lo sa bann profesi ekstraordiner konsernan sa Serviter ki’n ganny mansyonnen dan Izai sapit 42, 49, 50, 52 ek 53? Dan Lekritir Grek Kretyen, sa Serviter Zeova i ganny klerman idantifye kan i ganny dekrir dan sa bann sapit. I enteresan pour note ki sa zofisye Etyopyen ki ganny mansyonnen dan liv Akt ti pe lir enn sa bann profesi ler Filip sa evanzelizater ti ganny gide par lespri sen pour apros li. Apre ki sa zofisye ti’n lir sa pasaz ki aprezan dan Izai 53:7, 8, i ti demann avek Filip: “Dir mwan, silvouple, lo lekel ki sa profet pe koze? Eski i pe koz lo li[ ]menm ou lo en lot dimoun?” Deswit Filip ti eksplik li ki Izai ti pe koz konsernan Mesi, setadir Zezi.—Akt 8:26-35.

⁴ Ler Zezi ti ankor en pti baba, en zonm drwat ki ti apel Simeon ti ganny gide par lespri sen pour dir ki ‘Zezi, sa zanfan’ ti pou vin “en lalimyer pour ekler bann nasyon,” parey i ti’n ganny predir dan Izai 42:6 e 49:6. (Lik 2:25-32) Deplis, Zezi ti ganny imilye sa zour swar ki i ti ganny zize e sa ti’n ganny predir dan Izai 50:6-9. (Mat. 26:67; Lik 22:63.) Apre Lapannkot lannen 33 N.L., zapot Pyer ti klerman idantifye Zezi konman “serviter” Zeova. (Iza. 52:13; 53:11; lir Akt 3:13, 26) Ki nou kapab aprann atraver sa profesi konsernan Mesi?

Zeova i form son Serviter

5. Ki formasyon sa Serviter ti gannyen?

⁵ Enn parmi bann profesi Izai konsernan Serviter Bondye i donn leklersisman lo sa relasyon pros ant Zeova ek son Garson premye ne avan ki i ti vin lo later. (Lir Izai 50:4-9.) Sa Serviter li menm ti fer konnen ki Zeova pe kontinyen form li, ler i ti dir: “I ouver mon zorey pour antann parey bann ki’n ganny ansennyen [oubyen “disip,” not anba lo paz.].” (Iza. 50:4) Pandan tou sa letan, Serviter Zeova ti ekout son Papa, i ti ganny ansennyen par li e i ti vin en disip obeisan. Pa i en loner pour ganny ansennyen par Kreater liniver!

6. Ki mannyer sa Serviter ti montre ki i ti annan en lobeisans total anver son Papa?

⁶ Dan sa profesi, sa Serviter ti koz konsernan son Papa konman “Souvren Senyer Zeova.” Sa i montre ki sa Serviter ti rekonnet ki Zeova i Souvren liniver. Pour demontre son lobeisans total anver son Papa, i ti dir: “Souvren Senyer Zeova li menm in ouver mon zorey, e mwan mon pa’n rebele. Mon pa’n tourn dan lot direksyon.” (Iza. 50:5) I “ti vin en zouvriye abil akote [Zeova]” pour kree liniver ek imen. Sa “zouvriye abil . . . ti toultan kontan devan [Zeova], e i ti pe kontan Son bon later, e . . . plezir [Garson Bondye] ti annan pour fer avek bann garson zonm.”—Prov. 8:22-31.

7. Kwa ki montre ki sa Serviter ti annan konfyans dan sipor son Papa ler i ti pas dan bann leprev?

⁷ Sa formasyon ki sa Serviter ti gannyen e son lanmour pour bann imen ti prepar li pour vin lo later e pour kapab fer fas avek bann gro lopozisyon. I ti kontinyen trouv plezir pour fer lavolonte son Papa, menm kan i ti pe ganny persekite. (Ps. 40:8; Mat. 26:42; Zan 6:38) Tou dilon son bann leprev lo later, Zezi ti annan konfyans ki i ti pou ganny laprouvasyon ek sipor son Papa. Parey profesi Izai ti predir, Zezi ti kapab dir: “Sa Enn ki konsider mwan drwat i pros. Lekel ki kapab lalit avek mwan? . . . Gete! Souvren Senyer Zeova li menm pou ed mwan.” (Iza. 50:8, 9) Sirman Zeova ti ed son Serviter fidel tou dilon son minister lo later, parey en lot profesi Izai i montre.

Minister sa Serviter lo later

8. Kwa ki prouve ki Zezi ti “sa enn ki [Zeova in] swazir” parey ti’n ganny predir dan Izai 42:1?

⁸ Labib i dir nou sa ki ti arive ler Zezi ti batize lannen 29 N.L.: “Lespri Sen ti desann lo li . . . [e en] lavwa sorti dan lesyel, ti dir: ‘Ou[ ]menm mon Garson byenneme, mon’n met dan ou tou mon lazwa.’” (Lik 3:21, 22) Alor Zeova ti klerman idantifye “sa enn ki [i]’n swazir.” (Lir Izai 42:1-7.) Ler i ti lo later, Zezi ti akonplir sa profesi dan en fason remarkab. Dan son Levanzil, Matye ti sit sa bann parol ki dan Izai 42:1-4 e i ti aplik zot avek Zezi.—Mat. 12:15-21.

9, 10. (a) Ki mannyer Zezi ti akonplir Izai 42:3 ler i ti lo later? (b) Ki mannyer Kris ti “anmenn lazistis” ler i ti lo later e kan ki i “etablir lazistis lo later”?

⁹ Bann sef relizye Zwif ti konsider bann dimoun ordiner parmi bann Zwif konman enferyer. (Zan 7:47-49) Sa bann dimoun ti ganny trete dan en fason brit, zot ti kapab ganny konpare avek bann “pti banbou kraze” oubyen “en lalanp ki pe fimen” e ki pros pour tennyen. Me Zezi ti demontre konpasyon anver bann pov ek bann ki ti pe soufer. (Mat. 9:35, 36) I ti zantiman ofer zot sa lenvitasyon, an dizan: “Vin kot mwan zot tou ki fatige e ki pe anmenn en fardo e mwan, mon a donn zot repo.” (Mat. 11:28) Deplis Zezi ti “anmenn lazistis,” par ansenny bann standar Zeova lo sa ki byen ek mal. (Iza. 42:3) I ti osi montre ki Lalwa Bondye ti bezwen ganny aplike dan en fason rezonnab e avek mizerikord. (Mat. 23:23) Zezi ti osi demontre lazistis dan son predikasyon, i pa ti fer okenn lapliferans, i ti pres avek bann ris ensi ki bann pov.—Mat. 11:5; Lik 18:18-23.

¹⁰ Profesi Izai i osi predir ki “sa enn ki [Zeova in] swazir” “i etablir lazistis lo later.” (Iza. 42:4) Konman Lerwa dan Rwayonm Bondye, i pou byento detrir tou bann rwayonm politik e ranplas zot par son dominasyon drwat. I pou anmenn en nouvo lemonn, kot “pou annan lazistis.”—2 Pyer 3:13; Dan. 2:44.

“En lalimyer” ek “en garanti”

11. Dan ki sans Zezi ti “en lalimyer pour bann nasyon” dan premye syek ziska dan nou letan?

¹¹ Dan lakonplisman Izai 42:6, Zezi ti vreman prouve ki i ti “en lalimyer pour bann nasyon.” Ler i ti lo later, i ti anmenn lalimyer spirityel premyerman pour bann Zwif. (Mat. 15:24; Akt 3:26) Me Zezi ti dir: “Mwan[ ]menm lalimyer lemonn.” (Zan 8:12) I ti vin lalimyer lemonn pour bann Zwif ek bann nasyon, pa zis par anmenn leklersisman spirityel me osi par ofer son lavi parfe konman en sakrifis pour tou dimoun. (Mat. 20:28) Apre son rezireksyon, i ti demann son bann disip pour vin son bann temwen “ziska tou bann landrwa pli elwannyen lo later.” (Akt 1:8) Pandan zot minister, Pol ek Barnabas ti sit sa lekspresyon “lalimyer pour bann nasyon” e zot ti aplik sa profesi avek sa travay predikasyon ki zot ti pe akonplir parmi bann dimoun ki pa ti Zwif. (Akt 13:46-48; konpar Izai 49:6) Sa travay i ankor pe ganny fer anmezir ki bann frer swazir Zezi lo later ek zot bann konpanyon i pres sa bon nouvel e ed bann dimoun pour annan lafwa dan Zezi, sa “lalimyer pour bann nasyon.”

12. Ki mannyer Zeova ti donn son Serviter “konman en garanti pour bann nasyon”?

¹² Dan sa menm profesi, Zeova ti dir avek son Serviter ki i’n swazir: “Mon pou protez ou e mon pou donn ou konman en garanti pour lepep.” (Iza. 42:6) Satan in fer bokou zefor pour touy Zezi e anpes li termin son minister lo later, me Zeova ti protez li ziska ler i ti lemoman pour li mor. (Mat. 2:13; Zan 7:30) Apre Zeova ti resisit Zezi e donn li konman “en lalyans,” oubyen garanti pour bann dimoun lo later. Sa promes serye ti donn lasirans ki sa Serviter fidel Bondye ti pou kontinyen konman “en lalimyer pour bann nasyon,” par delivre bann ki dan fernwanr spirityel.—Lir Izai 49:8, 9.b

13. Dan ki fason Zezi ti delivre “bann ki pe reste dan fernwanr” pandan son minister lo later e ki mannyer i pe kontinyen fer sa?

¹³ An armoni avek sa garanti, sa Serviter ki Zeova in swazir ti pou “ouver lizye bann aveg,” “tir sa prizonnyen dan kaso,” e delivre “bann ki pe reste dan fernwanr.” (Iza. 42:7) Pandan son minister lo later, Zezi ti fer sa par devwal bann fo tradisyon relizye e pres sa bon nouvel Rwayonm. (Mat. 15:3; Lik 8:1) Alor i ti delivre bann Zwif dan lesklavaz spirityel e zot ti vin son bann disip. (Zan 8:31, 32) Pareyman Zezi in ed plizyer milye dimoun ki pa ti Zwif pour konn laverite. I ti demann son bann disip pour “ale e fer tou pep vin . . . bann disip.” I ti promet ki i pou avek son bann disip ziska konklizyon sa sistenm. (Mat. 28:19, 20) Dan son pozisyon dan lesyel, Kris Zezi pe siperviz sa travay predikasyon dan lemonn antye.

Zeova ti met anler son “serviter”

14, 15. Akoz e ki mannyer Zeova ti met anler son Serviter?

¹⁴ Me dan en lot profesi an rapor avek sa Serviter ki ti pou vin Mesi, Zeova ti dir: “Gete! Mon serviter pou azir avek bon zizman. I pou ganny en o pozisyon e i pou sirman ganny met anler e vin pli enportan.” (Iza. 52:13) Akoz lobeisans total ki son Garson ti demontre anver Son souvrennte e son fidelite anba sa leprev pli difisil, Zeova ti met li anler.

¹⁵ Zapot Pyer ti ekrir sa konsernan Zezi: “I’n mont dan lesyel, e i’n asize dan kote drwat Bondye, kot bann lanz ek tou lotorite ek pisans dan lesyel in ganny soumet avek li.” (1 Pyer 3:22) Pareyman, zapot Pol ti ekrir: “I ti aksepte viv dan limilite e montre li obeisan ziska lanmor, menm lanmor lo [“en poto martir,” NW], pour sa rezon Bondye in elev li pli o ki tou, e donn li en non pli enportan ki tou lezot non, pour ki devan non Zezi tou sa ki dan lesyel, lo later e dan lemonn pli ba ki later i tonm azenou, e ki tou lalang i proklanmen, ki Zezi-Kri i Senyer pour laglwar Bondye, Papa.”—Fili. 2:8-11.

16. Ki mannyer Zezi ti “vin pli enportan an 1914 e ki i’n akonplir depi sa letan?

¹⁶ An 1914, Zeova ti donn Zezi en pozisyon ankor pli o. I ti “vin pli enportan” ler Zeova ti fer li vin Lerwa dan son Rwayonm. (Ps. 2:6; Dan. 7:13, 14) Alors depi sa letan, Kris pe kontinyen “diriz o milye [son] bann lennmi.” (Ps. 110:2) Premyerman i ti demontre son dominasyon lo Satan ek son bann demon, par zet zot lo later. (Rev. 12:7-12) Alor konman sa pli Gran Siris, Kris ti delivre en pti group son bann frer lo later dan lanmen “Gran Babilonn.” (Rev. 18:2; Iza. 44:28) Atraver sa travay predikasyon ki i pe dirize dan lemonn antye sa in permet rasanbleman son bann frer spirityel “leres desandans” e plizyer milye “lezot mouton” ki ganny konsidere konman konpanyon fidel sa “pti troupo.”—Rev. 12:17; Zan 10:16, NW; Lik 12:32.

17. Ki nou’n aprann ziska aprezan atraver letid profesi Izai konsernan sa “serviter”?

¹⁷ Letid sa bann profesi remarkab dan liv Izai i’n sirman ogmant nou lapresyasyon pour nou Lerwa ek Sover, Zezi Kri. Son lobeisans konman en garson dan son minister lo later ti reflekte sa formasyon ki i ti gannyen ler i ti dan lesyel avek son Papa avan i ti vin lo later. I ti prouve ki i ti “lalimyer pour bann nasyon” par son minister e par sa travay predikasyon ki i’n dirize ziska aprezan. Parey nou pou vwar apre, en lot profesi konsernan sa Serviter ki ti pou vin Mesi i montre ki i ti pou soufer e donn son lavi pour nou prop dibyen. Sa i en keksoz ki nou devret egzamin byen anmezir ki Memoryal son lanmor pe aprose.—Ebr. 12:2, 3.

[Not anba lo paz]

Revizyon

• Lekel sa “serviter” ki’n ganny mansyonnen dan profesi Izai e ki mannyer nou konnen?

• Ki formasyon sa Serviter ti gannyen avek Zeova?

• Ki mannyer Zezi i “en lalimyer pour bann nasyon”?

• Ki mannyer sa Serviter ti ganny met anler?

[Portre lo paz 21]

Filip ti klerman idantifye sa “serviter” ki’n ganny mansyonnen par Izai konman Zezi, sa Mesi

[Portre lo paz 23]

Konman sa Serviter ki Zeova in swazir, Zezi ti demontre konpasyon anver bann pov e bann ki ti pe soufer

[Portre lo paz 24]

Zezi in ganny glorifye par son Papa e in vin Lerwa dan Rwayonm Bondye