Lakle pour en fanmir ere

Koz avek ou zanfan lo seks

Alicia,a en zenn fiy adolesan i dir: “Parler mon zis anvi konn serten keksoz lo seks, me mon santi ki si mon demann mon paran kestyon, zot riske krwar ki mon pe fer en keksoz mal.”

Inez, manman Alicia i dir: “Mon ti pou byen kontan asize e koz avek mon fiy lo seks, me i telman okipe avek son bann keksoz personnel. I difisil pour trouv en letan kot i lib.”

DENOZOUR, seks i partou kote, lo televizyon, dan bann film e i ganny mete lo bann gran plakar piblisite. I paret ki sel landrwa kot nou pa koz lo sa size i dan konversasyon ant paran ek zanfan. En zenn Kanada ki apel Michael i dir: “Mon ti pou byen kontan si bann paran ti konsyan ki degre efreyan e anbarasan i ete pour nou koz avek zot lo seks. I pli fasil pour koz avek en zanmi lo la.”

Souvan, zis parey zot zanfan, paran i tant pour ezite pour konmans koz lo seks. Dan son liv Beyond the Big Talk, Debra Haffner, en spesyalis lasante i dir: “Bokou paran in dir mwan ki zot in aste en kek liv baze lo seksyalite oubyen ladolesans, zot met sa liv dan lasanm sa zenn e zot pa’n zanmen koz lo la ankor.” Debra Haffner i dir ki sa mesaz ki paran i anvi pas avek zot zanfan i kler: “Nou anvi ou konn keksoz lo ou lekor e lo seks; me nou zis pa anvi koz avek ou lo la.”

Si ou en paran, ou pa devret annan sa kalite latitid. Wi, i vreman enportan ki ou menm ou koz avek ou zanfan lo seks. Egzamin trwa rezon akoz:

1. Definisyon seks in sanze. James ki annan 20-t-an i dir: “Konmela dimoun nepli donn sa definisyon senp lo seks, setadir ki i sa relasyon seksyel ki en msye ek madanm marye i annan. Denozour i annan seks par labous, seks par deryer, cybersex (kot internet i ganny servi pour anvoy bann portre ek mesaz endesan) e menm ‘sexting’ lo telefonn (lesanz bann mesaz oubyen portre ki antyerman baze lo seks).”

2. Tre probab depi byen zenn ou zanfan pou tann move lenformasyon lo seks. En manman ki apel Sheila i dir: “Desito ki zot konmans lekol zot pou tann koz lo seks e zot pa pou annan sa menm pwennvi ki ou ti a kontan zot annan.”

3. Ou zanfan i annan kestyon lo seks, me petet zot pa pou anvi konmans koz lo la avek ou. Ana, en zenn fiy 15 an Brezil i dir: “Fransman, mon pa ni konnen ki mannyer mon pou konmans koz lo seks avek mon paran.”

Konman paran, ou annan sa responsabilite sorti kot Bondye pour koz avek ou zanfan lo seks. (Efezyen 6:4) I vre, i kapab anbarasan pour zot tou le de koz lo la. Me de lot kote, bokou zenn pou dakor avek Danielle, en zenn fiy 14 an ki dir: “Nou anvi aprann keksoz lo seks avek nou paran, pa avek serten ansenyan ouswa atraver bann progranm lo televizyon.” Alor, ki mannyer ou kapab koz avek ou zanfan lo sa size ki en pe anbarasan pour koz lo la me ki byen enportan?b

Dapre zot laz

Amwen ki zot pa zwenn personn, zanfan i tann koz lo seks depi byen zenn. Sa ki pli enkyetan ankor, se ki dan sa “bann dernyen zour” bann move dimoun pe “fer plis progre dan sa ki mal.” (2 Timote 3:1, 13) I malere pour dir ki bokou zanfan i ganny abize seksyelman avek bann adilt.

Alor, i vreman enportan pour ou konmans enstrir ou zanfan depi ler i ankor ptipti. Renate, en manman Lalmanny i dir: “Si ou espere ziska ki zot pros pour ariv laz adolesan, tre probab zot pa pou anvi koz fasilman avek ou akoz sa kanmizri ki zot kapab santi dan letan ladolesans.” Sa ki ou merit fer se ki ou devret donn ou zanfan sa lenformasyon apropriye dapre zot laz.

Pour bann zanfan ki pa ankor konmans lekol: Konsantre plis lo ansenny li non son parti prive e montre li klerman ki personn napa drwa tous son parti prive. Julia, en manman Meksiko i dir: “Depi laz 3-z-an mon ti konmans ansenny mon pti garson lo la. Zis lefet ki mon ti konnen ki bokou ansenyan, nennenn zanfan ek lezot pli gran zanfan ti kapab fer li ditor, sa ti enkyet mwan en kantite. I ti neseser pour li konnen pour ki i kapab protez son lekor avek bann enkoni.”

ESEY SA: Form ou zanfan pour ki i kapab reponn dan en fason ferm si en dimoun i esey vin zwe avek son parti prive. Par egzanp, ou kapab ansenny ou zanfan pour dir: “Pa fer sa! Mon pou dir!” Asir ou zanfan ki i touzour pli byen ki i vin dir ou sa ki sa dimoun in fer, menm si sa dimoun i promet ki i pou donn li bann kado ouswa menas li.c

Pour bann zanfan primer: Sezi byen sa loportinite kan i sa laz pour ptitapti fer li konn plis lo sa size. En papa ki apel Peter i donn sa konsey: “Avan konmans koz lo la, gete kwa ki zot deza konnen e si zot anvi konn plis. Pa fors zot pour koz lo la. Si ou souvan pas letan avek ou zanfan, ou pou vwar ki sa size pou sorti natirelman.”

ESEY SA: Fer bann pti konversasyon tanzantan lo sa size olye dir tou keksoz ansanm en sel kou. (Deterononm 6:6-9) Dan sa fason ou pa pou touf ou zanfan avek en ta lenformasyon. Deplis, anmezir zot grandi zot pou annan sa lenformasyon ki zot bezwen dapre zot laz ek matirite.

Pour bann adolesan: Sa letan i lemoman pour fer sir ki ou zanfan i konn byen konsernan laspe fizik, emosyonnel e moral an rapor avek seks. Ana, sa fiy 15 an ki nou’n mansyonnen pli boner i dir: “Bann fiy ek garson kot mon lekol pe deza sorti avek kanmarad. Mon krwar ki konman en Kretyen, mon merit ganny ase lenformasyon lo sa size. I vre ki i kapab anbarasan pour koz lo seks, me i en keksoz ki mon devret konnen.”d

Atansyon: Bann zenn i tant pour ezite demann kestyon akoz zot per pangar zot paran i krwar zot pe fer sa ki mal. Sanmenm ki en papa ki apel Steven ti dekouver. I ti dir: “Nou garson ti per pour koz lo seks, me plitar nou ti dekouver ki i ti per pangar nou annan doutans lo son konportman. Nou ti fer li konpran ki nou pa ti pe koz lo sa bann size akoz nou ti soupsonn li, me akoz nou ti anvi fer sir ki i konpran byen sa size pour li pa les personn met presyon lo li.”

ESEY SA: Olye bonbard ou adolesan avek en bann kestyon direk lo en laspe ki relye avek seks, demann li ki son bann kanmarad lekol i panse lo seks. Par egzanp, ou kapab dir: “Bokou dimoun i krwar ki en dimoun ki pe fer seks par labous pa pe vreman fer seks. Eski koumsa ki bann zenn kot lekol i santi?” Tre probab bann tel kestyon pou donn ou adolesan sa sans pour koz lo sa size e eksprim son pwennvi lo la.

Pa kanmi pour koz lo sa size delika

I vre, koz avek ou zanfan lo seks i kapab enn parmi sa bann size pli delika ki ou bezwen koz lo la. Me i vreman vo lapenn. En manman ki apel Diane i dir: “Avek letan, ou pou nepli anbarase, e i pou menm donn ou sa loportinite pour vin pli pros avek ou zanfan.” Steven, ki nou’n mansyonnen pli boner i dakor an dizan: “I vin pli fasil pour koz lo bann size delika parey seks si tanzantan ou koz avek ou zanfan lo nenport size ki kapab leve dan fanmir. I touzour annan sa pti lanbarasman, me en bon konversasyon kot nanryen pa ganny kasyet i enportan dan en fanmir Kretyen.”

[Not anba lo paz]

[Bwat lo paz 14]

DEMANN OU LEKOR . . 

Lir sa bann komanter ki lezot zenn dan lemonn in donnen e apre sa demann ou lekor sa bann kestyon ki swiv apre.

• “Mon paran i dir mwan lir bann lartik ki koz lo seks, apre apros zot si mon annan okenn kestyon pour demande. Mon ti pou pli kontan si zot ki koz avek mwan plis lo la.”—Ana, Brezil.

Akoz ou krwar i enportan pour fer plis ki zis donn ou zanfan liv pour lir?

• “Mon konn en ta move keksoz lo seks, keksoz ki mon krwar ni menm mon papa napa en lide lo la. I pou dan sok si mon demann li kestyon lo la.”—Ken, Kanada.

Akoz ou zanfan i kapab per pour koz avek ou konsernan en lenkyetid ki i annan?

• “Zour ki mon ti ganny sa kouraz pour demann mon paran en kestyon lo seks, zot ti reponn mwan dan zar pour akiz mwan e dir: ‘Akfer ou pe demann sa? Ki ou’n fer?’”—Masami, Zapon.

Ler ou zanfan i demann ou en kestyon lo seks, dan ki fason ou reaksyon i kapab ouver laport pour lezot konversasyon a lavenir ouswa ferm sa laport?

• “I ti pou ede si mon paran ti reasir mwan ki kan zot ti mon laz zot ti pe demann sa bann menm kestyon e ki i normal pour mwan demann sa bann kestyon mwan osi.”—Lisette, Lafrans.

Dan ki fason ou kapab ed ou zanfan santi li alez pour ki i santi li pli konfortab pour koz avek ou lo seks?

• “Mon manman li i pou demann mwan kestyon lo seks, me avek en bon ton lavwa. Mon santi ki sa i enportan, akoz dan sa fason sa zanfan pa pou santi ki i pe ganny zize.”—Gerald, Lafrans.

Ki ton lavwa ou servi kan ou pe koz avek ou zanfan lo seks? Eski ou bezwen fer sanzman?