Zeova i nou Souvren Senyer!

“Mon’n pran refiz dan Souvren Senyer Zeova.”—PS. 73:28.

1. Kwa ki Pol ti pe refer avek ler i ti dir sa parol dan 1 Korentyen 7:31?

“LEMONN parey i ete, pa pou dir lontan.” Se sa ki zapot Pol ti dir. (1 Kor. 7:31) Dan sa lekspresyon “lemonn parey i ete” dan langaz Grek, Pol ti pe konpar sa lemonn avek en pyes teat kot dan sak senn bann akter pe zwe zot rol konman bon oubyen move dimoun ziska ki senn i sanze.

2, 3. (a) Avek kwa nou kapab konpar sa defi konsernan souvrennte Zeova? (b) Ki kestyon nou pou egzaminen?

² Ozordi, bann levennman dan lemonn i parey en pyes teat pli enportan ki’n deza annan e ou pe zwe en rol ladan. Sa bann levennman i relye sirtou avek zistifikasyon souvrennte Bondye. Pour ed nou konpran, nou kapab servi legzanp en sityasyon ki egziste petet dan serten pei. Lo en kote, i annan en gouvernman ki’n ganny etablir pour ki i annan lord. Me dan lot kote, i annan en lorganizasyon koronpi ki pe dominen e toler frod, vyolans, ek krim. Sa lorganizasyon i en defi pour souvrennte sa gouvernman e i teste fidelite tou sitwayen dan sa pei.

³ En sityasyon parey i enplik tou kreasyon Bondye. En kote, i annan gouvernman “Souvren Senyer Zeova.” (Ps. 71:5) Me limanite pe ganny menase par en lorganizasyon ki ganny dirize par “dyab.” (1 Zan 5:19) Sa lorganizasyon i en defi pour gouvernman Bondye e i teste fidelite tou dimoun ki siport dominasyon Bondye. Ki mannyer keksoz in ariv koumsa? Akoz Bondye in permet sa arive? Ki nou kapab fer personnelman akoz sa sityasyon?

De kestyon i ganny souleve

4. Ki sa de kestyon ki relye avek kanmarad ki enplik tou kreasyon Bondye?

⁴ Dan sa bann levennman ki enplik kreasyon Bondye, i annan de kestyon ki’n ganny souleve ki relye avek kanmarad: Sa i souvrennte Zeova ek lentegrite bann imen. Dan Labib, Zeova i souvan ganny apele “Souvren Senyer.” En psalmis ki ti annan konfyans total dan li ti sante: “Mon’n pran refiz dan Souvren Senyer Zeova.” (Ps. 73:28) Sa mo “Souvrennte” i vedir en dominasyon oubyen pouvwar ki pli o ki lezot. En souvren i annan sa pli o lotorite. I annan bann bon rezon pour nou vwar Zeova konman sa Bondye Siprenm.—Dan. 7:22.

5. Akoz nou devret ganny pouse pour siport souvrennte Zeova?

⁵ Konman Kreater, Zeova ki Souvren later ek liniver antye. (Lir Revelasyon 4:11.) Zeova i nou Ziz, sa enn ki fer Lalwa ek Lerwa akoz zis li menm ki okip sa trwa fonksyon alafwa setadir i zize, fer lalwa e ansarz sa gouvernman iniversel. (Iza. 33:22) Vi ki li ki’n kree nou e nou depan lo li, nou devret konsider li konman nou Souvren Senyer. Nou pou anvi siport li dan sa pli o pozisyon ki i annan si nou touzour gard antet ki “Zeova li menm in etablir son tronn dan lesyel; e son rwayote i domin lo tou keksoz.”—Ps. 103:19; Akt 4:24.

6. Ki si sa lentegrite?

⁶ Pour siport souvrennte Zeova, nou bezwen gard nou lentegrite anver li. Sa mo “lentegrite” i donn sa lide en keksoz ki konplet e san defo moralman. En dimoun ki gard son lentegrite i en dimoun ki san repros e drwat. Patrias Zob ti en dimoun koumsa.—Zob 1:1.

Ki mannyer sa bann levennman ti konmanse

7, 8. Ki mannyer Satan ti kestyonn drwa Zeova pour dirize?

⁷ Apepre 6,000 an pase, en lanz ti kestyonn drwa Zeova pour dirize. Se en dezir egois pour ganny adore ki ti motiv sa rebel pour dir sa ki i ti dir e fer sa ki i ti fer. I ti enfliyans sa premye koup imen, Adan ek Ev pour azir dan en fason enfidel anver souvrennte Bondye e i ti esey sali non Zeova e akiz Li konmkwa i ti’n koz manti. (Lir Zenez 3:1-5.a) Sa rebel ti vin sa gran Adverser, Satan (Opozan), Dyab (sa enn ki fer kalonmni), serpan (tronper) e dragon (sa enn ki devore).—Rev. 12:9.

⁸ Satan ti fer son lekor vin sa sef ki opoz dominasyon Zeova. Pour fer fas avek sa defi, ki Souvren Senyer Zeova ti pou fer? Eski deswit i ti pou detrir sa trwa rebel setadir Satan, Adan ek Ev? Sirman i ti annan pouvwar pour fer sa e si i ti azir koumsa i ti pou’n montre klerman lekel ki annan sa pli gran pouvwar. Sa ti pou’n osi montre ki Zeova ti’n dir laverite konsernan pinisyon ki i ti dir zot zot ti pou gannyen si zot ti kas son lalwa. Akoz Bondye pa ti pran en tel aksyon?

9. Kwa ki Satan ti kestyonnen?

⁹ Lefet ki Satan ti koz manti e fer Adan ek Ev vir ledo avek Bondye, i ti kestyonn drwa ki Zeova i annan pour demann bann imen pour obeir li. Deplis, par fer nou premye paran dezobeir Bondye, Satan ti osi kestyonn fidelite tou lanz ek imen. Parey i ti leka pour Zob ki ti fidel anver souvrennte Zeova, Satan ti pretann ki i ti pou kapab fer tou imen vir ledo avek Bondye.—Zob 2:1-5.

10. Lefet ki Bondye pa’n enpoz son souvrennte deswit, ki sa in permet?

¹⁰ Lefet ki Zeova pa’n detrir Satan toudswit pour montre ki i annan sa pli gran lotorite, i’n donn Satan letan pour donn laprev son lakizasyon. Bondye in osi donn bann imen sa loportinite pour demontre zot fidelite anver son souvrennte. Ki’n arive pandan tou sa bann syek ki’n pase? Satan in met an plas en lorganizasyon pwisan e koronpi. Finalman Zeova pou detrir sa lorganizasyon ek Dyab e donn laprev ki i annan sa drwa pour dirize konman Souvren. Zeova ti telman asire ki tou keksoz ti pou byen marse ki i ti predir sa ki i ti pou fer zis apre sa rebelyon dan zarden Edenn.—Zen. 3:15.

11. Ki plizyer imen in fer pour montre ki zot respekte souvrennte Zeova?

¹¹ En kantite imen in demontre lafwa e gard zot lentegrite par siport souvrennte Zeova e sanktifye son non. Parmi sa bann serviter ki ti gard zot lentegrite i annan Abel, Enok, Noe, Abraam, Sara, Moiz, Rit, David, Zezi, bann premye disip Kris ek plizyer milyon lezot ankor. Sa bann serviter Bondye ki siport son souvrennte i prouve ki Satan i en manter e retir okenn repros ki Dyab in anmennen lo non Zeova ler i ti vant son lekor pour dir ki i kapab fer tou imen vir ledo avek Bondye.—Prov. 27:11.

I pou sirman arive

12. Ki mannyer nou kapab asire ki Bondye pa pou toler mesanste pour touzour?

¹² Nou kapab asire ki byento Zeova pou montre ki i Souvren liniver. I pa pou toler mesanste pour touzour e nou konnen ki nou pe viv dan bann dernyen zour. Zeova ti pran aksyon avek bann move dimoun dan letan Deliz. I ti detrir Sodonm ek Gomor, Faraon ek son lafors militer, Sisera ek son larme e Senakerib ek son larme Asiryen pa ti reisi kont sa enn Tre O. (Zen. 7:1, 23; 19:24, 25; Egz. 14:30, 31; Ziz 4:15, 16; 2 Rwa. 19:35, 36) Alor nou kapab annan konfyans ki Zeova pa pou permet ki dimoun i kontinyen napa respe e kontinyen maltret son bann Temwen. Deplis, aprezan nou pe vwar levidans siny prezans Zezi ek konklizyon sa sistenm.—Mat. 24:3.

13. Ki mannyer nou kapab fer sir ki nou pa ganny detrir ansanm avek bann lennmi Zeova?

¹³ Pour evite ki nou ganny detrir ansanm avek bann lennmi Bondye, nou devret reste fidel anver souvrennte Zeova. Ki mannyer nou kapab fer sa? Par reste separe avek dominasyon Satan ki koronpi e refize les sa bann ki siport li fer nou per. (Iza. 52:11; Zan 17:16; Akt 5:29) Zis anba sa bann kondisyon ki nou kapab siport souvrennte nou Papa dan lesyel. Nou annan sa lespwar pour ganny sove ler Zeova i retir okenn repros ki’n ganny anmennen lo son non e prouve ki i Souvren Liniver.

14. Ki detay nou gannyen dan diferan parti Labib?

¹⁴ I annan bann detay konsernan limanite ek souvrennte Zeova tou dilon Labib. Sa trwa premye sapit i koz lo kreasyon ek lafason ki zonm ti tonm dan pese, tandis ki sa trwa dernyen sapit i koz lo ki mannyer imen pour revin parfe. Bann lezot paz ant i donn bann detay konsernan bann pa ki Souvren Senyer Zeova in pran pour akonplir son plan pour limanite, later ek liniver. Zenez i montre ki mannyer Satan ek mesanste in antre dan lemonn e dernyen parti liv Revelasyon i montre ki mannyer mesanste pou ganny eliminen e lavolonte Bondye pou ganny fer lo later parey dan lesyel. An realite, Labib i fer resorti akoz nou fer pese e mor, ki mannyer zot pou ganny retire lo later antye e ganny ranplase par lazwa ki pou annabondans kot bann dimoun ki gard zot lentegrite pou ganny lavi eternel.

15. Pour nou kapab benefisye ler sa bann levennman ki relye avek souvrennte Bondye i fini, ki nou merit fer?

¹⁵ Byento senn sa lemonn pou sanz konpletman. Rido pou fermen e sa pyes teat ki’n dire pour plizyer syek ki relye avek souvrennte pou ariv ver son lafen. Satan pou ganny tire lo lasenn, i pou finalman ganny detrir e lavolonte Bondye pou sirman ganny fer partou. Me pour kapab benefisye avek sa kantite benediksyon ki Parol Bondye in predir, nou bezwen siport souvrennte Zeova konmela menm. Nou bezwen swazir lekel ki nou pou siporte. Pour nou kapab dir: “Zeova i avek mwan,” nou bezwen reste lo son kote.—Ps. 118:6, 7.

Nou kapab gard nou lentegrite!

16. Akoz nou kapab annan lasirans ki i posib pour bann imen gard zot lentegrite anver Bondye?

¹⁶ Nou kapab siport souvrennte Zeova e gard nou lentegrite, akoz zapot Pol ti ekrir: “Tou tantasyon ki’n ariv zot i arive normalman avek en dimoun. Me Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.” (1 Kor. 10:13) Ki kalite tantasyon Pol ti koz lo la e ki mannyer Bondye i donn mwayen pour nou kapab siporte?

17-19. (a) Ki sityasyon ki ti fer bann Izraelit fer pese dan dezer? (b) Akoz i posib pour nou gard nou lentegrite anver Zeova?

¹⁷ Parey Labib i fer resorti dan ka bann Izraelit dan dezer, zot “tantasyon” ti vin atraver bann sityasyon ki kapab fer nou kas lalwa Bondye. (Lir 1 Korentyen 10:6-10.) Bann Izraelit ti’n kapab reziste tantasyon, me sa pa ti leka. Ler Zeova ti fer mirak e donn zot sifizaman kay pour en mwan zot ti annan en “move dezir.” Menm si sa pep pa ti’n ganny lavyann pour en pe letan, Bondye ti donn zot dekwa lamann pour manze. Me, zot ti les zot ganny tante par zot vorasite e pa ti kontrol lakantite kay ki zot ti anmase.—Nom. 11:19, 20, 31-35.

¹⁸ Avan sa, ler Moiz ti pe resevwar Lalwa lo Montanny Sinai, bann Izraelit ti vin bann adorater zidol, zot ti partisip dan ladorasyon pti bef e diverti dan en fason ki eksit move dezir. Lefet ki Moiz, zot sef, pa ti la, i ti napa personn pour anpes bann Izraelit ganny tante. (Egz. 32:1, 6) Zis avan antre dan Later Promiz, plizyer milye Izraelit ti ganny tante avek bann madanm Moabit e zot ti komet limoralite seksyel. Akoz sa, plizyer milye Izraelit ti mor pour zot pese. (Nom. 25:1) Parler, pep Izrael ti les zot ganny tante par konplent zanmen fini. En fwa zot ti koz kont Moiz e osi kont Bondye li menm. (Nom. 25:1, 9) Akoz zot move pwennvi, pep Izrael ti menm mirmire ler Kora, Datann, Abiram ek bann ki ti siport zot ti ganny egzekite, zot ti vwar sa enzis. Pour fini kont, 14,700 Izraelit ti mor par en fleo ki Bondye ti anvoy lo zot.—Nom. 16:41, 49.

¹⁹ Napa enn sa bann tantasyon ki nou’n fek mansyonnen ki bann Izraelit pa ti pou kapab reziste. Sa pep ti les zot ganny tante akoz zot ti perdi lafwa, zot ti’n oubliy Zeova, lafason ki i ti’n demontre lanmour par pran swen avek zot, e ki i touzour fer sa ki drwat. Parey dan ka bann Izraelit, sa tantasyon ki nou fer fas avek i arive normalman avek tou imen. Si nou fer sifizaman zefor pour reziste sa bann tantasyon e depan lo Bondye pour soutenir nou, nou pou kapab gard nou lentegrite. Nou kapab annan lasirans ki sa pou leka akoz “Bondye i fidel” e i pa pou permet ki nou ganny “tante plis ki nou kapab siporte.” Zeova pa pou zanmen permet ki nou tonm dan en sityasyon ki pou fer li enposib pour nou imen fer son lavolonte.—Ps. 94:14.

20, 21. Ler nou ganny tante, ki mannyer Bondye i donn nou “mwayen pour sorti”?

²⁰ Pour nou kapab reziste tantasyon, Zeova i donn nou en “mwayen pour sorti.” Par egzanp, bann persekiter i kapab fer nou soufer fizikman pour esey fer nou abandonn nou lafwa. Ler nou pas atraver bann sityasyon parey nou kapab ganny tante pour fer konpromi akoz nou anvi evite ganny plis bate, tortire oubyen menm touye. Par kont, dapre sa lasirans ki Pol i donn nou dan 1 Korentyen 10:13, nou konnen ki sityasyon kot nou ganny tante i zis tanporer. Zeova pa pou les sa sityasyon ariv en staz kot nou pa pou kapab reste fidel anver li. Bondye i kapab fortifye nou lafwa e donn nou lafors spirityel ki nou bezwen pour gard nou lentegrite.

²¹ Zeova i soutenir nou par mwayen son lespri sen. Son lespri sen i osi fer nou rapel bann verse Labib ki nou bezwen pour nou kapab reziste tantasyon. (Zan 14:26) Alors, nou pa pou ganny anbete pour swiv en move semen. Par egzanp, nou konpran sa kestyon ki ti ganny souleve konsernan souvrennte Zeova ek lentegrite bann imen. Lefet ki bokou dimoun i konn sa, en kantite i ganny sipor Bondye pour reste fidel ziska lanmor. Me pa akoz zot in mor ki zot in sorti dan sa sityasyon, me plito Zeova ki’n ed zot e i’n fer li posib pour zot andire ziska lafen san ki tantasyon i fer zot tonbe. I kapab fer parey pour nou. Anfet, i osi servi son bann lanz fidel konman son serviter “ki ganny anvoye pour donn led tou bann ki devre ganny sove.” (Ebr. 1:14) Parey sa lot lartik pou montre, zis bann ki gard zot lentegrite ki kapab annan sa lespwar pour ganny sa zoli privilez pour siport souvrennte Bondye pour touzour. Nou pou kapab parmi sa bann dimoun si nou reste atase avek Zeova konman nou Souvren Senyer.

[Not anba lo paz]

Ki ou reponn?

• Akoz nou devret rekonnet Zeova konman nou Souvren Senyer?

• Ki i vedir pour gard nou lentegrite anver Bondye?

• Ki mannyer nou konnen ki Zeova pou byento montre ki se li ki annan drwa dirize?

• Dapre 1 Korentyen 10:13, akoz i posib pour gard nou lentegrite?