“Bann etranze” dan en move lemonn

“[Avek] lafwa . . . zot ti deklare ki zot ti bann etranze e bann egzile lo later.”​—EBR. 11:13.

 1. Ki Zezi ti dir konsernan lafason ki son bann disip ti pou konsider sa lemonn?

KONSERNAN son bann disip, Zezi ti dir: “Zot dan lemonn.” Me i ti osi eksplike: “Zot pa fer parti lemonn parey mwan mon pa fer parti lemonn.” (Zan 17:11, 14) Alor, Zezi ti pe montre klerman ki mannyer son bann vre disip ti pou konsider Satan ek son lemonn. (2 Kor. 4:4) Menm si zot ti viv dan sa move lemonn, zot pa ti pou form parti sa lemonn. Anfet, zot ti pou parey bann “etranze ek vwayazer.”​—1 Pyer 2:11.

Zot ti viv konman bann “etranze”

2, 3. Akoz nou kapab dir ki Enok, Noe, Abraam ek Sara ti parey bann “etranze e bann egzile lo later”?

² Depi o konmansman listwar imen, i ti evidan ki bann serviter fidel Zeova ti toultan diferan avek bann dimoun ki ti otour zot. Par egzanp, avan Deliz, Enok ek Noe ti “mars avek sa vre Bondye.” (Zen. 5:22-24; 6:9) Avek kouraz, zot tou le de zot ti anons bann mesaz zizman Zeova kont lemonn Satan. (Lir 2 Pyer 2:5; Zid 14, 15.) Lefet ki zot ti mars avek Bondye dan en move lemonn, Enok “ti fer plezir Bondye” e Noe “ti montre li san defo parmi son bann kontanporen.”​—Ebr. 11:5; Zen. 6:9.

³ Ler Bondye ti demann Abraam ek Sara pour kit zot lavi konfortab dan lavil Our bann Kaldeen, zot ti pare pour ale e menm aksepte pour viv konman bann vwayazer dan en pei etranze. (Zen. 11:27, 28; 12:1) Zapot Pol ti ekrir: “Par lafwa, Abraam ti obei kan Bondye ti apel li pour sorti pour al dan en lot pei ki i ti pou resevwar konman leritaz. I ti kit son prop pei san konnen kote i ti pe ale. Par lafwa, i ti reste konman en etranze dan sa pei ki i ti’n ganny promet. I ti reste anba latant avek Izaak ek Zakob konman zeritye menm promes.” (Ebr. 11:8, 9) Zapot Pol ti dir sa konsernan sa bann serviter fidel Zeova: “Zot tou, zot in mor dan lafwa, san ki zot i’n resevwar sa bann keksoz ki zot in ganny promet, me zot in war de lwen e zot in rezoui. Zot ti deklare ki zot ti bann etranze e bann egzile lo later.”​—Ebr. 11:13.

En lavertisman pour bann Izraelit

 4. Ki lavertisman Bondye ti donn bann Izraelit avan zot ti antre dan later Promiz?

⁴ Avek letan, bann Izraelit, bann desandans Abraam ti vin bokou. Zot ti vin en nasyon avek bann lalwa ek en pei. (Zen. 48:4; Det. 6:1) I ti enportan ki pep Izrael pa zanmen oubliye ki Zeova ti vre Propriyeter zot pei. (Lev. 25:23) Anfet, i ti konmsi zot ti pe viv lo later zot Propriyeter e zot ti bezwen respekte son desizyon. Deplis, zot ti osi bezwen mazinen ki “zonm pa viv zis lo dipen tousel,” andotmo, zot pa ti devret les bann keksoz materyel fer zot oubliy Zeova. (Det. 8:1-3) Avan ki zot ti antre dan Later Promiz, Bondye ti donn zot sa lavertisman: “La sa ki pou arive ler Zeova ou Bondye pou fer ou antre dan sa pei ki i ti promet pour donn ou zanset, Abraam, Izaak ek Zakob, ou pou ganny bann gran e zoli lavil ki ou pa’n konstri, bann lakaz ranpli avek keksoz ki ou pa’n met ladan, bann pwi ki ou pa’n fouye, bann pye rezen ek pye zoliv ki ou pa’n plante, e ou pou manze ziska ki ou rasazye, me veye ki ou pa oubliy Zeova.”​—Det. 6:10-12.

 5. Akoz Zeova ti rezet Izrael e anver lekel i ti demontre son faver?

⁵ Sa lavertisman ti fer sans. Dan letan Neemya, serten Levit ti rapel avek laont sa ki ti arive apre ki bann Izraelit ti antre dan Later Promiz. Apre ki pep Izrael ti konmans reste dan bann lakaz byen konfortab e ganny en kantite manze ek diven, zot ti “manze, zot ti rasazye e zot ti vin gra.” Zot ti rebel kont Bondye e menm touy bann profet ki Zeova ti’n anvoye pour averti zot. Pour fini kont, Zeova ti les zot lennmi atak zot. (Lir Neemya 9:25-27;a Ose. 13:6-9) Pli tar, ler bann Romen ti pe dirize, bann Zwif enfidel ti menm touy Mesi. Zeova ti rezet zot e i ti plito demontre son faver anver en nouvo nasyon, setadir, Izrael spirityel.​—Mat. 21:43; Akt 7:51, 52; Gal. 6:16, NW.

“Pa fer parti lemonn”

6, 7. (a) Ki mannyer ou pou eksplik sa ki Zezi ti dir konsernan son bann disip ek lemonn? (b) Akoz bann vre Kretyen pa ti pou kapab form parti lemonn Satan?

⁶ Parey nou’n vwar pli boner dan sa lartik, Zezi Kri, sef kongregasyon ti fer kler ki son bann disip ti pou separe avek sa move lemonn Satan. En pti pe letan avan son lanmor, Zezi ti dir son bann disip: “Si zot, zot ti fer parti lemonn, lemonn ti pou kontan son byen. Me parski, zot pa fer parti lemonn, parski mon’n swazir zot e mon’n retir zot dan lemonn, sanmenm rezon akoz ki i ay zot.”​—Zan 15:19.

⁷ Anmezir plis dimoun ti vin Kretyen, eski zot ti bezwen vin parey lemonn, aksepte son bann pratik e form parti sa lemonn? Non! Nenport ki landrwa kot zot ti reste, zot ti bezwen montre ki zot diferan avek lemonn. Trant an apre lanmor Kris, zapot Pyer ti ekrir bann Kretyen ki ti pe reste dan diferan provens Lanpir Romen. I ti dir: “Mon bann byenneme, mon demann zot antan ki etranze ek vwayazer, gard zot kont bann dezir natir imen ki fer lager kont zot lam. Zot devre annan bonn kondwit parmi bann payen.”​—1 Pyer 1:1; 2:11, 12.

 8. Ki mannyer en istoryen ti dekrir lafason ki lemonn an zeneral ti vwar bann Kretyen dan premye syek?

⁸ En istoryen ki apel Kenneth Latourette, ti konfirmen ki bann Kretyen dan premye syek ti parey bann “etranze ek vwayazer” dan Lanpir Romen. I ti ekrir ki pandan sa trwa premye syek, bann Kretyen ti toultan bezwen fer fas avek bann gro persekisyon. Zot ti ganny akize lo diferan sarz. Vi ki zot pa ti partisip dan bann selebrasyon payen, sa bann Kretyen ti ganny konsidere konman bann dimoun ki pa krwar dan Bondye. Deplis, zot pa ti partisip dan diferan laspe lavi lasosyete parey bann lafet payen, divertisman popiler ki ti relye avek bann krwayans ek pratik payen ek limoralite, e pour sa rezon dimoun ti dir ki zot pa kontan lezot.

Pa profit lemonn

 9. Konman bann vre Kretyen, ki nou fer pour montre ki nou kontan lezot?

⁹ Eski sityasyon bann Kretyen ozordi i diferan? An rapor avek ‘sa move lemonn aktyel,’ nou annan menm determinasyon, nou reste separe avek sa lemonn parey bann Kretyen dan premye syek. (Gal. 1:4) Akoz sa, bokou dimoun pa konpran nou e serten i menm pa kontan nou. Me pourtan, eski pa i evidan ki nou nou kontan lezot. Pa i akoz nou kontan lezot ki nou al devan laport dimoun e napa zefor ki nou pa fer pour kontakte sak dimoun pour koz avek zot lo “sa Bonn Nouvel Rwayonm.” (Mat. 22:39; 24:14) Nou fer sa akoz nou konvenki ki Rwayonm Zeova avek Kris konman lerwa pou dirize byento e met en lafen avek dominasyon imen, i pou ranplas li avek en nouvo lemonn.​—Dan. 2:44; 2 Pyer 3:13.

10, 11. (a) Dan ki sans nou profite dan lemonn? (b) Nonm serten fason ki bann Kretyen vizilan i montre ki zot pa profit sa lemonn o maksimonm.

¹⁰ Vi ki nou konnen lafen sa move lemonn i pros, konman bann serviter Zeova, nou realize ki i pa vo lapenn perdi letan pour rod en plas dan sa lemonn. Nou swiv konsey Pol: “Bann frer, la sa ki mon oule dir. Letan i kourt, fodre ki . . . bann ki pe aste [i] fer konmsi zot napa nanryen, e bann ki pe profite dan lemonn, [i] fer konmsi zot pa ganny okenn profi, parski lemonn konman i ete, pa pou dir lontan.” (1 Kor. 7:29-31) Me dan ki sans bann Kretyen i kapab profite dan lemonn? Zot fer sa kan zot servi teknolozi modern ek bann mwayen telekominikasyon pour propaz konnesans lo Labib dan lemonn antye dan plizyer santenn langaz. Zot osi profite akoz zot travay dan lemonn pour pran swen avek zot lekor ek zot fanmir. Zot aste zis bann keksoz neseser e menm aksepte serten servis ki sa lemonn i ofer. Me, zot fer konmsi zot pa pe ganny okenn profi oubyen zot pa pe profit sa lemonn o maksimonm dan sa sans ki zot posesyon ek zot louvraz i annan son plas apropriye dan zot lavi, me i pa sa keksoz pli enportan.​—Lir 1 Timote 6:9, 10.

¹¹ Bann Kretyen ki reste vizilan i evite profit sa lemonn o maksimonm an rapor avek letid avanse. Bokou dimoun dan lemonn i konsider letid avanse konman sa sel semen pour ganny en lavi konfortab e ganny rekonnet dan lasosyete. Me nou bann Kretyen, nou viv parey bann etranze e nou annan bann lobzektif diferan. Nou evite “annan lorgey.” (Rom. 12:16; Zer. 45:5) Vi ki nou bann disip Zezi, nou swiv sa lavertisman ki i ti donnen: “Kontinyen gard ou lizye ouver e fer atansyon tou sort kalite konvwatiz, akoz menm ler en dimoun i annan annabondans son lavi pa depan lo sa ki i posede.” (Lik 12:15) Pour sa rezon, bann zenn Kretyen i ganny ankouraze pour pourswiv bann lobzektif spirityel. Zot pou al lekol ziska en nivo ki pou permet zot pran swen avek zot lekor ek zot bann bezwen de baz. Dan sa fason, zot met zot pare pour servi Zeova avek tou zot ‘leker, nanm, lespri ek lafors.’ (Lik 10:27) Ler zot fer sa zot “vin ris devan Bondye.”​—Lik 12:21; Matye 6:19-21.

Pa les traka lavi anvair ou

12, 13. Si nou ekout parol Zezi dan Matye 6:31-33, ki mannyer sa i disteng nou avek bann dimoun dan lemonn?

¹² Bann serviter Zeova i diferan avek bann dimoun dan lemonn dan lafason ki zot konsider bann keksoz materyel. Lo sa size, Zezi ti dir son bann disip: “Alor pa bezwen pran traka e demann zot lekor, ‘Ki nou pou manze? Ki nou pou bwar? Ki nou pou mete?’ Bann payen ki rod tousala. Me zot Papa ki dan lesyel i konn tou sa ki zot bezwen. Rod plito Rwayonm Bondye ek son lazistis, e limenm i a donn zot anplis tou lezot keksoz osi.” (Mat. 6:31-33) Leksperyans i montre ki bokou nou bann frer ek ser Kretyen in vwar ki mannyer nou Papa ki dan lesyel in donn zot sa ki zot bezwen.

¹³ “Devosyon avek lakontantman i anmenn benefis.” (1 Tim. 6:6, New International Version) Sa i tou lekontrer avek lafason ki lemonn i panse ozordi. Par egzanp, bokou zenn ki marye i ekspekte ganny tou keksoz deswit; en lakaz oubyen en apartman avek tou son pake, en zoli loto ek tou bann dernyen lekipman elektronik. Me, bann Kretyen ki viv konman bann etranze dan sa lemonn i annan bann dezir rezonnab ki adapte avek sa ki zot kapab gannyen. I vreman byen ki bokou in pare pour sakrifye bann keksoz materyel pour zot kapab depans plis letan ek lenerzi dan servis Zeova konman bann proklanmater devoue. Lezot i servi konman bann pionye, betelit, misyonner, sirveyan rezyonal e distrik. Pa nou vreman apresye sa servis ki nou bann frer ek ser Kretyen i fer!

14. Ki leson nou kapab aprann avek parabol Zezi lo senmer?

¹⁴ Dan son parabol lo en senmer, Zezi ti dir ki “traka, plezir lavi ek larzan” i kapab touf parol Bondye dan nou leker e fer nou pa prodwi fri. (Mat. 13:22) Si nou viv parey bann etranze e nou kontant nou avek sa ki nou annan, nou pa pou tonm dan sa latrap. Anfet, sa pou ed nou annan en ‘bon lizye,’ setadir enn ki get en sel landrwa, ki konsantre selman lo Rwayonm Bondye e met li premye dan nou lavi.​—Mat. 6:22.

“Lemonn pou disparet”

15. Ki zapot Zan ti dir ki pou annan en lefe lo lafason ki nou vwar keksoz ek nou kondwit dan sa lemonn aktyel?

¹⁵ En rezon prensipal ki nou, konman bann vre Kretyen, nou konsider nou lekor konman bann “etranze ek vwayazer” dan sa lemonn i akoz nou konvenki ki i pa reste bokou letan pour li egziste. (1 Pyer 2:11; 2 Pyer 3:7) Swa ki nou fer dan lavi, nou dezir ek aspirasyon i depan lo sa fason vwar keksoz. Zapot Zan ti ankouraz son bann frer ek ser Kretyen pour pa kontan lemonn oubyen bann keksoz dan lemonn, akoz “lemonn pou disparet ek tou son bann dezir; me sa ki fer lavolonte Bondye [pou] reste eternelman.”​—1 Zan 2:15-17.

16. Ki mannyer nou montre ki nou’n ganny met dekote konman en pep spesyal?

¹⁶ Zeova ti dir bann Izraelit ki si zot ti obeir li, zot ti pou vin son “propriyete spesyal parmi tou lezot pep.” (Egz. 19:5) Ler zot ti fidel, bann Izraelit ti diferan avek tou lezot nasyon dan lafason ki zot ti viv e ador Bondye. Pareyman ozordi, Zeova in swazir en pep ki konpletman diferan avek sa lemonn Satan. Parol Bondye i dir nou: “Abandonn [zot] move lavi ek son bann move dezir, . . .  viv en lavi rezonnab, zis e fidel avek Bondye lo sa later. La ki mannyer nou devre viv an atandan sa gran Zour, kan laglwar nou gran Bondye ek nou Sover Zezi-Kri pou paret. Zezi-Kri, annefe, i’n donn son prop lavi pour nou, pour delivre nou dan tou mal e pirifye nou konman en pep ki apartenir a li, en pep zele pour fer dibyen.” (Tit 2:11-14) Sa “pep” pe reprezant bann Kretyen swazir e plizyer milyon ‘lezot mouton’ ki ed zot e siport zot.​—Zan 10:16.

17. Akoz bann Kretyen swazir ek zot bann konpanyon pa pou zanmen regrete ki zot in viv konman bann etranze dan sa move lemonn?

¹⁷ Sa “gran Zour” ouswa zoli lespwar ki bann Kretyen swazir pe espere i sa moman kot zot pou dirize ansanm avek Kris dan lesyel. (Rev. 5:10) Ler sa promes pour ganny lavi eternel lo later pou’n ganny akonplir, lezot mouton pou nepli bann etranze dan en move lemonn. Zot pou annan bann zoli lakaz e bokou keksoz pour manze e bwar. (Ps. 37:10, 11; Iza. 25:6; 65:21, 22) Kontrerman avek bann Izraelit, zot pa pou zanmen oubliye ki tou sa la i sorti kot Zeova “Bondye later antye.” (Iza. 54:5) Ni bann Kretyen swazir, ni lezot mouton pa pou regrete ki zot ti bann etranze dan sa move lemonn.

[Not anba lo paz]

Ki ou pou reponn?

• Dan ki fason bann zonm fidel dan lepase ti viv konman bann etranze?

• Ki mannyer bann Kretyen dan premye syek ti konport zot an rapor avek lemonn?

• Dan ki fason bann vre Kretyen pa profit sa lemonn o maksimonm?

• Akoz nou pa pou zanmen regrete ki nou’n viv konman bann etranze dan sa move lemonn?

[Portre lo paz 21]

Bann Kretyen dan premye syek ti rezet konpletman bann divertisman vyolan e imoral