BIOGRAFI

Zeova in vreman ed mwan

Rakonte par Kenneth Little

Mwan avek mon madanm Evelyn, nou ti debarke dan tren Hornepayne dan nor Ontario, Kanada. I ti gran maten e i ti vreman fer fre. En frer ti vin sers nou e apre en bon pti gadyak avek li, son madanm ek son garson, nou ti donn temwannyaz portanport dan lanez. Sa zour apremidi, mon ti donn mon premye diskour konman en sirveyan rezyonal. Zis senk nou ki ti la, ti napa personn ankor ki ti vini.

MENM si ti napa bokou ki ti asiste pour ekout sa diskour an 1957, sa pa ti fatig mon. Mon’n toultan timid. Anfet, ler mon ti ankor zenn mon ti abitye kasyet ler bann envite ti vin kot nou, menm si mon ti konn zot.

Ou kapab sirprann pour konnen ki laplipar mon bann responsabilite dan lorganizasyon Zeova in obliz mwan pour enterakte avek bokou dimoun, ki swa mon bann zanmi oubyen menm bann ki mon pa konnen. Anfet, mon’n kontinyen lite avek sa santiman timidite e sa mank konfyans dan mon lekor, alor mon pa kapab vant mon lekor si mon’n reisi desarz bann responsabilite ki mon’n gannyen. O kontrer, mon’n vwar realizasyon promes Zeova: “Mon pou fortifye ou, wi mon pou ed ou, mon pou vreman tyonbo ou avek mon lanmen drwat ladrwatir.” (Iza. 41:10) En fason prensipal ki Zeova in ed mwan i atraver sipor nou bann frer ek ser ki nou pou koz lo la, me pour konmanse annou koz lo letan mon ti ankor zanfan.

I TI SERVI EN LABIB EK EN PTI LIV NWANR

En zour Dimans bomaten byen ansoleye, an 1940, Elsie Huntingford ti vin pres kot nou laferm dan sid was Ontario. Mon manman ki ti ouver laport tandis ki mon papa ki ti timid parey mwan menm ti pe asize anndan ansanm avek mwan pe ekoute. Mon papa ti panse ki Ser Huntingford ti en vander e ki mon manman ti pou aste en keksoz ki nou pa ti bezwen, finalman i ti al kot laport pour dir ki nou pa enterese. Ser Huntingford ti demande: “Eski zot pa ti a kontan en letid Labib?” Mon papa ti reponn: ‘Byensir nou enterese pour etidye Labib.’

I ti pou napa en pli bon moman pour Ser Huntingford vizit nou. Mon paran ti bann manm byen aktif dan United Church of Canada e zot ti’n fek deside pour kite. Akoz? Parski dan fwaye legliz, en minis relizye ti met en lalis tou bann ki fer donasyon dapre kantite ki zot in donnen. Mon paran ki ti napa bokou larzan, ti parmi bann dernyen lo lalis e bann ansyen dan legliz ti met presyon lo zot pour donn plis. Parski i ti anvi gard son louvraz, en lot minis dan legliz ti admet ki i pa ti ansenny bann keksoz ki i ti vreman krwar ladan. Pour sa rezon, nou ti kit sa legliz me nou ti kontinyen rod en fason pour satisfer nou bezwen spirityel.

Vi ki travay bann Temwen Zeova ti’n ganny restrikte Kanada, Ser Huntingford ti fer en letid Labib avek nou fanmir par servi zis Labib e bann not ki i ti annan dan en pti liv nwanr. Pli tar kan i ti realize ki nou pa ti pou denons li avek lotorite, i ti donn nou bann piblikasyon baze lo Labib. Apre sak letid nou ti kasyet byen nou bann piblikasyon.a

Menm si ti annan lopozisyon e lezot lobstak, Ser Huntingford ti devoue pour pres sa bon nouvel. Son devouman ti enpresyonn mwan e ti pous mwan pour pran laverite o serye. Enn an apre ki mon paran ti’n batize konman Temwen Zeova, mon osi mon ti batize. Mon ti batiz le 27 Fevriye 1949 dan en loz an metal ki bann fermye ti servi pour donn delo zot zannimo. Sa letan mon ti annan 17 an. Apre sa mon ti determinen pour pran servis a plen tan.

ZEOVA IN ED MWAN POUR PRAN KOURAZ

Mon ti ezite pour pran servis pionye deswit. Mon ti’n konvenk mon lekor ki mon ti bezwen ganny en pe larzan pour mon fer pionye, alor mon ti travay dan en lofis dan labank pour en pe letan. Par kont, konman en zenn ki pa ti eksperyanse, deswit kan mon ti ganny mon larzan mon ti depanse. Alor, en frer ki apel Ted Sargent ti ankouraz mon pour pran kouraz e met lafwa dan Zeova. (1 Kron. 28:10) Avek sa lankourazman, mon ti konmans fer pionye mwan Novanm 1951. Mon ti annan zis 40 dolar, en bisiklet dezyenmmen ek en nouvo sak. Me Zeova ti toultan fer sir ki mon ti ganny sa ki mon ti bezwen. Mon vreman apresye ki Ted ti ankouraz mwan pour pran servis pionye. Sa ti fer mon ganny lezot benediksyon pli tar.

En zour swar lafen dimwan Out 1952, mon ti ganny en koud telefonn sorti Toronto. Biro brans Temwen Zeova Kanada ti envit mwan pour konmans servi dan Betel an Septanm. Menm si mon ti timid e zanmen mon ti’n deza vizit en biro brans, mon ti eksite akoz lezot pionye ti’n dir mwan bann bon keksoz lo Betel. Deswit mon ti santi konmsi mon kot mwan.

“MONTRE BANN FRER KI OU ENTERESE AVEK ZOT”

De-z-an apre ki mon ti’n ariv Betel, mon ti vin kordinater konsey ansyen dan plas Frer Bill Yacos dan en kongregasyon Toronto. A laz 23 an, mon ti santi ki mon ti zis en garson bet bet ki’n grandi lo laferm. Me avek limilite ek lanmour Frer Yacos ti montre mwan ki pour fer e Zeova ti vreman ed mwan.

Frer Yacos, en frer byen plen avek en zoli sourir ti enterese avek dimoun. I ti kontan bann frer ek ser e bann frer ek ser ti kontan li. Regilyerman i ti al kot zot lakour me pa zis ler zot ti annan problenm. Bill Yacos ti ankouraz mwan pour fer menm parey e pour travay ansanm avek bann frer ek ser dan predikasyon. I ti dir: “Ken, montre bann frer ki ou enterese avek zot. Sa pou kouver bokou ou bann febles.”

MON MADANM I DEMONTRE LANMOUR FIDEL

Zeova in ed mwan dan en fason spesyal depi Zanvye 1957. Sa mwan mon ti marye avek Evelyn, en ser ki ti dan katorzyenm laklas Lekol Gilead. Avan nou marye, i ti pe servi dan en provens Quebec ki koz franse. Sa bann letan Quebec ti ganny kontrole par bann legliz Katolik Romen. Alor Evelyn ti annan en latas difisil, me i ti reste fidel avek Zeova e osi avek son latas.

Evelyn in osi reste fidel avek mwan. (Efe. 5:31) Anfet, son fidelite ti ganny teste deswit apre ki nou ti’n marye. Nou ti’n fer plan pour al Florida, Leta-z-ini, me sa zour apre nou maryaz, biro brans ti demann mwan pour asiste en renyon ki ti dire pour en semenn Betel Kanada. Byensir sa renyon ti enterfer avek nou plan, me nou de Evelyn ti anvi fer nenport kwa ki Zeova ti demann nou pour fer. Alor, nou ti kennsel nou lindemyel. Pandan sa semenn i ti al prese o bor biro brans. Menm si sa teritwar ti sitan diferan konpare avek Quebec, i ti persevere.

A lafen sa semenn mon ti ganny en sirpriz, mon ti ganny anvoye konman sirveyan rezyonal dan nor Ontario. Mon ti’n fek marye, mon ti annan zis 25 an e mon ti napa bokou leksperyans, me nou ti ale avek konfyans dan Zeova. Dan milye liver Kanada, nou ti al lo en tren aswar avek detrwa sirveyan rezyonal byen eksperyanse ki ti pe retourn dan zot servis. Zot ti vreman ankouraz nou. En frer ti menm ensiste ki nou pran sa konpartiman ki i ti’n rezerve pour limenm pour dormi dan tren, pour ki nou pa ti pou bezwen reste asize lannwit antye. Landmen bomaten, zis 15 zour apre nou maryaz, nou ti al vizit sa pti group ki ti Hornepayne, parey mon ti rakonte pli boner.

I ti pou annan plis sanzman pour mwan ek Evelyn. Kan mon ti pe servi konman sirveyan rezyonal akonpannyen par mon madanm an 1960, mon ti ganny en lenvitasyon pour asiste trannsiszyenm laklas Lekol Gilead pour fer en kour ki ti dire dis mwan ki ti pou konmans an Fevriye 1961 Brooklyn, New York. Byensir mon ti eksite, me mon lakontantman ti diminyen lefet ki Evelyn pa ti’n ganny envite. O kontrer, parey lezot madanm dan menm sityasyon, Evelyn ti ganny demande pour ekrir en let pour dir ki i ti pare pour separe pour omwen dis mwan. Evelyn ti plere, me nou ti dakor ki mon ti bezwen asiste sa lekol e i ti kontan ki mon ti pou ganny bann bon formasyon dan Lekol Gilead.

Antretan, Evelyn ti servi kot biro brans Kanada. I ti annan sa privilez pour partaz en lasanm avek en ser Kretyen swazir ki apel Margaret Lovell. Byensir, nou ti mank kanmarad en kantite. Me avek led Zeova nou ti kapab abitye dan nou servis. Lefet ki i ti pare pour sakrifye nou letan ansanm pour nou kapab pli itil pour Zeova ek son lorganizasyon ti vreman enpresyonn mwan.

Apre ki mon ti Gilead pour apepre trwa mwan, Frer Nathan Knorr, ki ti pe diriz travay predikasyon ki ti pe ganny fer dan lemonn antye ti ofer mon en zoli lenvitasyon. I ti demann mwan si mon ti pou kit Lekol Gilead e retourn Kanada pour servi konman en enstrikter Lekol Minister Rwayonm kot biro brans pour en pe letan. Frer Knorr ti dir mwan ki mon pa ti oblize aksepte sa lenvitasyon. Mon ti kapab termin Lekol Gilead si mon ti anvi e petet apre ganny anvoye konman misyonner. I ti osi dir ki si mon deside pour retourn Kanada mon kapab pa zanmen ganny envite Gilead ankor e avek letan i tre probab ki mon ti pou reganny anvoye dan kongregasyon. I ti les mwan deside ki mon ti pou fer apre ki mon ti’n koz avek mon madanm lo la.

Vi ki Evelyn ti’n deza dir mwan son pwennvi lo bann responsabilite teokratik, deswit mon ti dir Frer Knorr, “Nou kontan pour fer nenport kwa ki lorganizasyon Zeova i anvi nou fer.” Nou’n toultan santi ki malgre nou annan nou preferans, nou devret pare pour al servi nenport landrwa kot lorganizasyon Zeova i anvoy nou.

Alor, an Avril 1961 mon ti kit Brooklyn e mon ti retourn Kanada konman enstrikter Lekol Minister Rwayonm. Pli tar, nou ti konmans servi konman manm lafanmir Betel. Apre mon ti ganny en sirpriz kan mon ti ganny en lenvitasyon pour asiste karantyenm laklas Gilead ki ti pou konmans 1965. Ankor enn fwa, Evelyn ti bezwen ekrir en let pour montre ki i aksepte nou separe. Me detrwa semenn pli tar, nou ti kontan kan Evelyn ti resevwar son prop lenvitasyon pour asiste sa lekol ansanm avek mwan.

Apre ki nou ti’n ariv Lekol Gilead, Frer Knorr ti dir nou ki bann etidyan ki ti pe aprann Franse parey nou ti pou ganny anvoye Lafrik. Par kont, pandan seremoni graduation nou ti reganny anvoye Kanada. Mon ti ganny swazir konman nouvo kordinater Komite Brans. Vi ki mon ti annan zis 34 an mon ti fer Frer Knorr rapel ki “mon ankor zenn.” Me i ti reasir mwan. Depi o konmansman mon ti esey demann lezot frer pli eksperyanse dan Betel konsey avan ki mon ti fer bann desizyon enportan.

BETEL EN LANDRWAR POUR APRANN E POUR ANSENNYEN

Servis dan Betel in donn mwan en gran loportinite pour aprann avek lezot. Mon respekte e vreman admir lezot manm lo Komite Brans. Mon’n osi ganny enfliyanse dan en bon fason avek sa plizyer santenn frer ek ser Kretyen ki swa zenn oubyen aze ki nou’n konnen isi kot Biro brans e dan plizyer lezot kongregasyon kot nou’n servi.

Servis dan Betel in permet mwan pour ansenny lezot e fortifye zot lafwa. Zapot Pol ti dir Timote: “Reste ferm dan sa ki ou’n aprann.” I ti osi dir: “Sa ki ou’n tann mwan anonse devan en kantite temwen, konfye li avek bann zonm konfyans ki ava kapab zot osi ansenny lezot.” (2 Tim. 2:2; 3:14) Parfwa serten Kretyen i demann mwan ki leson mon’n aprann pandan sa 57 an ki mon’n servi dan Betel. Larepons senp ki mon donn zot i, “Ou bezwen volonter e deswit fer sa ki lorganizasyon Zeova i anvi ou fer e depan lo Zeova pour ed ou.”

I konmsi mon fek antre Betel yer konman en zenn garson timid san okenn leksperyans. Me, tou sa bann lannen Zeova in ‘tyonbo mon lanmen drwat.’ I espesyalman ed mwan atraver labonte ek led bann konpannyen Kretyen ki vin a tan par kontinyen asir mwan pour “pa bezwen per. Mwan mon pou ed ou.”​—Iza. 41:13.

[Not anba lo paz]

[Portre lo paz 16]

[Sorti kot]

Canada Science and Technology Museum

[Portre lo paz 17]

Kot nou laferm dan sid was Ontario

[Portre lo paz 17]

Mon paran ti aksepte laverite par temwannyaz portanport e ti batize an 1948

[Portre lo paz 17]

Mon ti sirprann pour ganny envite Betel an 1952

[Portre lo paz 18]

Mwan ek Evelyn nou ti marye an 1957

[Portre lo paz 19]

Pe fer teks pour lazournen pour lafanmir Betel Kanada