“Zot mon bann temwen”

“Zeova i dir: ‘Zot mon bann temwen.’”​—IZA. 43:10.

ESKI OU KAPAB REPONN?

Ki mannyer bann Izraelit ti bann temwen pour Zeova?

Ki non Bondye i vedir?

Ki mannyer nou kapab demontre lapresyasyon pour sa privilez pour port non sen Bondye?

1, 2. (a) Kisisa en temwen e ki medya pa’n kapab dir dimoun? (b) Akoz Zeova pa depan lo medya?

KISISA en temwen? En diksyonner i donn sa definisyon: “En dimoun ki vwar en levennman e rakont sa ki’n arive.” Par egzanp, dan lavil Pietermaritzburg, Sidafrik, en zournal ki aprezan koni konman The Witness pe ganny pibliye pour plis ki 160 an. Sa non i apropriye, vi ki bi sa zournal i pour rakont egzakteman bann levennman ki arive dan lemonn. Sa editer ki ti konmans pibliy The Witness ti promet ki sa zournal pou dir “laverite, tou laverite e ryen ki laverite.”

² Me malerezman, medya dan lemonn i inyor oubyen menm deform bann fe pli enportan dan listwar imen. Sertennman zot pa’n dir laverite lo Bondye tou pwisan e sa ki in fer. Par lentermedyer son profet Ezekyel dan lepase, Bondye ti dir: “Bann nasyon pou bezwen konnen ki mwan mon Zeova.” (Ezek. 39:7) Me Souvren Liniver pa depan lo medya. I annan preski wit milyon Temwen ki koz lo li avek dimoun dan tou nasyon konsernan sa ki i’n fer dan lepase e pe fer ozordi pour imen. Sa gran kantite Temwen i osi anons sa ki Bondye in promet pour akonplir dan lavenir afen ki tou imen lo later i ganny beni. Ler nou fer sa travay predikasyon vin nou priyorite, nou montre ki nou bann vre Temwen Zeova parey i ganny fer resorti dan Izai 43:10 ki dir: “Zeova i dir: ‘Zot mon bann temwen, wi mon serviter ki mon’n swazir.’”

3, 4. (a) Kan ki bann Etidyan Labib ti ganny en nouvo non e ki mannyer zot ti santi konsernan sa? (Vwar portre lo paz 23.) (b) Ki kestyon nou pou egzaminen aprezan?

³ Pa i en privilez pour port non Zeova, sa “Lerwa eternel” ki dir: “Sa i mon non pour touzour e se koumsa ki mon pou ganny mazinen pour zenerasyon apre zenerasyon”! (1 Tim. 1:17; Egz. 3:15; konpar Eklezyast 2:16.) An 1931, bann Etidyan Labib ti ganny apele Temwen Zeova. Apre sa, en kantite let remersiman ti ganny pibliye dan nou magazin. En kongregasyon Kanada ti ekrir: “I ti eksitan pour ganny sa bon nouvel ki nou port sa non ‘temwen Zeova’ e sa in renouvle nou determinasyon pour viv annakor avek sa nouvo non.”

⁴ Ki mannyer ou kapab demontre lapresyasyon pour sa privilez ki ou annan pour port non Bondye? Eski ou kapab eksplike dan ki konteks Labib nou’n ganny sa non, Temwen Zeova?

BANN TEMWEN BONDYE DAN LEPASE

5, 6. (a) Dan ki fason bann paran Izraelit ti pou bann temwen pour Zeova? (b) Kwa ankor ki bann paran Izraelit ti ganny demande pour fer e akoz sa i osi aplik pour bann paran ozordi?

⁵ Sak Izraelit dan letan Izai ti bann “temwen” pour Zeova e sa nasyon antye ti bann “serviter” Bondye. (Iza. 43:10) En fason ki bann paran Izrael ti rann temwannyaz se kan zot ti ansenny zot zanfan lo ki mannyer Bondye ti azir anver zot zanset. Par egzanp, kan sa pep ti ganny demande pour obzerv Lapak sak lannen, zot ti ganny dir: “Ler zot garson i demann zot, ‘Ki sa selebrasyon i vedir pour zot?’ zot devret dir, ‘I en sakrifis Lapak pour Zeova, ki ti pas par lao lakaz bann Izraelit Lezip ler i ti anvoy fleo lo bann Ezipsyen me i ti eparny nou bann lakaz.’” (Egz. 12:26, 27) I kapab ki sa bann paran ti osi eksplik zot zanfan ki ler Moiz ti al devan lerwa Lezip pour demann permisyon pour bann Izraelit ador Zeova dan dezer, Faraon ti reponn: “Lekel li Zeova, ki mon devret ekout li pour les Izrael ale?” (Egz. 5:2) Byensir, zot ti osi kapab rakonte ki apre ki sa dis fleo ti’n devaste sa pei e apre ki bann Izraelit ti sove kont larme Ezipsyen kot Lanmer Rouz, tou dimoun ti ganny larepons kestyon Faraon. Zeova ti Tou pwisan e i ankor Tou Pwisan. Nasyon Izrael ti osi vin temwen ki Zeova i sa vre Bondye e sa Enn ki akonpli son bann promes.

⁶ San dout, bann Izraelit ki ti apresye zot privilez pour port non Zeova ti rakont sa bann levennman merveye pa zis avek zot zanfan me osi avek bann etranze ki ti vin lesklav kot zot lakour. I ti osi enportan ki bann Izraelit ti elve zot zanfan pour obzerv standar Zeova ki sen. Zeova ti dir: “Zot devret sen, akoz mwan, Zeova zot Bondye, mon sen.” (Lev. 19:2; Det. 6:6, 7) Pa sa i en bon legzanp pour bann paran Kretyen ozordi, ki osi bezwen elve zot zanfan dapre bann standar Zeova ki sen, ki pou ed zot pour anmenn loner lo non glorye Bondye!​—Lir Proverb 1:8a; Efezyen 6:4.

 7. (a) Kan bann Izraelit ti fidel anver Zeova, ki lefe sa ti annan lo bann nasyon dan zalantour? (b) Ki responsabilite tou bann ki port non Bondye i annan?

⁷ Alor, kan bann Izraelit ti fidel, zot ti donn en bon temwannyaz lo non Bondye. Zot ti’n ganny dir: “Tou dimoun lo later pou bezwen vwar ki ou’n ganny apele avek non Zeova e zot pou per ou.” (Det. 28:10) Me malerezman, listwar bann Izraelit i montre ki laplipar ditan zot ti enfidel. Plizyer fwa zot ti rekonmans ador zidol ki zonm ti fer. Deplis, zot ti vin kriyel, sakrifye zot zanfan e abiz lo bann pov parey bann bondye Kananeen ki zot ti adore. Pa sa i en bon leson pour nou touzour fer zefor pour sen parey sa Enn Pli Sen ki nou port son non!

“GETE! MON PE FER EN NOUVO KEKSOZ”

 8. Ki misyon Izai ti gannyen avek Zeova e ki mannyer Izai ti reazir?

⁸ Zeova ti’n predir ki i pou delivre nasyon Izraelit ki ti dan legzil dan en fason merveye e ki zot ti pou vwar tousala. (Iza. 43:19) Me sa premye sis sapit dan liv Izai i baze plis lo bann lavertisman konsernan maler ki Zerizalenm ek bann lavil dan zalantour ti pou sirman sibir. Zeova sa Enn ki konn sa ki dan leker ti dir Izai kontinyen anons sa lavertisman, menm si pa tou dimoun ki ti pou ekoute. Izai ti soke e i ti anvi konnen ki kantite letan nasyon Bondye pa ti pou repantir. Bondye ti reponn: “Ziska ki bann lavil i ganny detrir e ki i napa okenn zabitan e ki napa personn dan bann lakaz e ki sa pei i ganny detrir e devaste.”​—Lir Izai 6:8-11.b

 9. (a) Kan ki profesi Izai konsernan Zerizalenm ti ganny realize? (b) Ki sityasyon ki egziste ozordi ki fer ki nou bezwen reste eveye?

⁹ Izai ti ganny sa misyon pandan dernyen lannen renny Lerwa Ouziya oubyen apepre 778 A.N.L. I ti kontinyen konman profet pour plis ki 46 an ziska apre 732 A.N.L., pandan renny Lerwa Izkiya. Sa ti 125 an avan ki Zerizalenm ti ganny detri lannen 607 A.N.L. Alor, pep Bondye ti ganny averti sifizaman davans lo sa ki ti pou arive avek zot nasyon dan lavenir. Ozordi, Zeova i osi averti son pep davans lo sa ki pou arive dan lavenir. Pour 135 an, depi son premye nimero, Latour Veyer ti demann son bann lekter pour reste eveye e ki byento move renny Satan pou terminen e ganny ranplase par Renny Mil An Zezi Kri.​—Rev. 20:1-3, 6.

10, 11. Ki levidans bann Izraelit ti annan konsernan lakonplisman profesi Izai an Babilonn?

¹⁰ Bokou Zwif obeisan ki ti rann zot lekor avek bann Babilonnyen ti sirviv destriksyon Zerizalenm e ti ganny anmennen an egzil Babilonn. (Zer. 27:11, 12) Laba, 70 an pli tar, pep Bondye ti vwar lakonplisman en profesi ekstraordiner: “La sa ki Zeova i dir, sa Enn ki pou reaste ou, sa Enn Sen Izrael: ‘Akoz zot mon pou anvoy enn Babilonn ki pou kas tou bann bar ki avek baro.’”​—Iza. 43:14.

¹¹ Anliny avek sa profesi, en zour swar o konmansman Oktob 539 A.N.L., ti annan en levennman sokan ki ti annan en lefe lo lemonn antye. Kan Lerwa Babilonn ek son bann prens ti pe bwar diven dan bann resipyan ki zot ti’n pran dan tanp Zerizalenm, ki ti bann keksoz sen e ti pe loue zot bann bondye ki ti’n ganny fer par lanmen zonm, larme Med ek Pers ti konkerir Babilonn. An 538 oubyen 537 A.N.L., Siris ki ti’n konkerir Babilonn ti donn lord bann Zwif pour retournen e rekonstri tanp Zerizalenm. Tousala ti’n ganny predir par Izai, enkli sa promes Zeova pour protez bann ki ti repantir e donn zot sa ki zot ti bezwen ler zot ti retourn Zerizalenm. Bondye ti apel zot “sa pep ki mon’n formen pour mwan, pour ki zot koz lo mon louanz.” (Iza. 43:21; 44:26-28) Apre ki bann egzile ti retournen e rekonstri tanp Zeova Zerizalenm, zot ti annan levidans ki Zeova, sa sel vre Bondye, i touzour akonpli son parol.

12, 13. (a) Apard bann Izraelit, lekel ki ti donn lanmen reetablir ladorasyon Zeova? (b) Kwa ki ganny ekspekte avek ‘lezot mouton’ anmezir zot siport “Izrael Bondye” e ki lespwar zot annan?

¹² Plizyer milye dimoun ki pa ti Izraelit ti form parti sa nouvo nasyon e pli tar i ti annan bokou lezot dimoun ankor ki ti konverti. (Ezra 2:58, 64, 65; Ester 8:17) Ozordi, “en gran lafoul” ‘lezot mouton’ Zezi, pe fidelman donn zot sipor bann Kretyen swazir ki form parti “Izrael Bondye.” (Rev. 7:9, 10; Zan 10:16; Gal. 6:16, NW) Sa gran lafoul i osi port sa non ki Bondye in donnen, setadir Temwen Zeova.

¹³ Pandan sa Renny Mil an Zezi Kris, sa gran lafoul pou annan sa gran lazwa pour eksplik bann ki ganny resisite ki mannyer i ti ete konman en Temwen Zeova dan sa bann dernyen zour dan sa lemonn. Me sa pou posib si zis nou viv an armoni avek sa non ki nou’n gannyen la konmela e fer zefor pour reste sen. Malgre tou zefor ki nou fer, nou devret demann pardon tou le zour akoz nou pa toultan arive gard nou sentete e nou rekonnet ki menm si nou bann peser, Bondye i donn nou sa gran loner pour port son non.​—Lir 1 Zan 1:8, 9.

KI NON BONDYE I VEDIR

14. Dapre sa ki nou konpran, ki non Zeova i vedir?

¹⁴ Pour ogmant nou lapresyasyon pour sa loner ki nou annan pour port non Bondye, i byen ki nou medit lo sinifikasyon son non. Non Bondye ki souvan ganny tradwir “Zeova,” i sorti dan sa verb Ebre ki kapab dekrir aksyon e ki kapab ganny tradwir konman “arive.” Alor, dapre sa ki nou konpran, non Zeova i vedir “i fer arive.” Sa definisyon i al byen avek rol Zeova konman Kreater sa liniver fizik, bann lanz e konman sa Enn ki akonpli son plan. Anmezir ki bann levennman i arive, i kontinyen fer son lavolonte e fer ki son plan i ganny realize malgre nenport ki ki opoz li e menm Satan pa pou kapab anpes li akonpli son lavolonte.

15. Ki nou kapab aprann konsernan non Zeova dapre sa ki i ti dir Moiz? (Vwar sa bwat “En non ki annan en gran sinifikasyon.”)

¹⁵ Kan Zeova ti donn Moiz sa misyon pour tir son pep Lezip, i ti revel en laspe son personnalite par servi en verb pour dekrir son non, safwasi i ti servi sa pronon mon. Labib i dir: “Bondye ti dir avek Moiz: ‘Mon pou vin sa ki mon swazir pour vini.’ I ti azoute: ‘La sa ki ou pou dir bann Izraelit, ‘Sa ki mon swazir pour vini in anvoy mwan kot zot.’’” (Egz. 3:14) Alor dan nenport sirkonstans, Zeova pou vin sa ki neseser vini pour akonplir son plan. Pour bann ki ti’n deza dan lesklavaz Izrael, i ti sa Enn ki delivre, sa Enn ki protez, sa Enn ki gid e sa Enn ki donnen pour satisfer tou zot bezwen spirityel e materyel.

MONTRE NOU LAPRESYASYON

16, 17. (a) Ki mannyer nou kapab demontre nou lapresyasyon pour sa privilez pour port non Bondye? (b) Ki nou pou diskite dan lot lartik?

¹⁶ Ozordi, Zeova i kontinyen viv dapre sinifikasyon son non par satisfer tou nou bezwen spirityel e materyel. Me pourtan, sinifikasyon non Bondye i pa limite dan zis sa ki i swazir pour li menm vini. Me i osi fer son bann Temwen vin sa ki i neseser vini pour akonpli son plan. Lefet ki nou konn sa, sa pou motiv nou pour kontinyen viv an armoni avek son non. Kåre ki annan 84 an e ki reste Norway i en Temwen devoue pour plis ki 70 an. I dir: “Mon vwar li en gran loner pour servi Zeova, sa Lerwa eternel e pour form parti sa pep ki port son non sen. I touzour en gran privilez pour eksplik laverite dan Labib avek bann dimoun e vwar lazwa lo zot figir kan zot konpran lansennyman Labib. Par egzanp, mon ganny gran satisfaksyon kan mon ansenny zot kwa ki enplike dan sakrifis Kris e ki atraver sa zot kapab ganny lavi eternel dan sa nouvo lemonn kot pou annan lape ek ladrwatir.”

¹⁷ I vre ki dan serten teritwar i pe vin deplizanpli difisil pour zwenn bann dimoun ki anvi aprann lo Bondye. Me kantmenm sa, eski parey Kåre, pa ou eksperyans gran lazwa kan en dimoun i ekout ou e ou kapab ansenny li lo non Zeova? Me ki mannyer nou kapab Temwen Zeova e an menm tan temwen pour Zezi? Nou pou diskit lo sa kestyon dan lot lartik.

[Not anba lo paz]

[Bwat lo paz 26]

En non ki annan en gran sinifikasyon

Ki i vedir

“I fer arive”

Akoz i apropriye

▪ Zeova ti kree tou keksoz

▪ I kontinyen fer ki son plan ek son lavolonte i ganny akonpli

Sa ki i revele

▪ I pou vin nenport kwa ki i bezwen vini pour fer son bann promes vin vre

▪ I fer son kreasyon fer sa ki i bezwen pour akonpli son lavolonte

▪ Napa nanryen ki i pa kapab fer oubyen fer arive pour akonpli son plan

[Portre lo paz 24]

Ansenny nou zanfan lo Zeova i anmenn loner lo son non (Vwar paragraf 5, 6)