“Si Kingsley I Kapab Fer Li, Mwan Osi Mon Kapab!”

EN DIMOUN i tous Kingsley lo son zepol, sa i sinyal li pour konmans son lektir Labib. I premye fwa ki i partisip dan Lekol Minister Teokratik kongregasyon. I pronons sak mo byen, san ki i mank okenn silab. Me esper en pti kou! Akoz i pa pe get dan son Labib?

Kingsley i reste Sri Lanka e i pa vwar kler. I osi pa tro tann byen e i bezwen en wiltyer akoz i pa kapab marse. Ki mannyer i’n aprann lo Zeova e kalifye pour Lekol Minister Teokratik? Mon ava eksplik zot.

Ler mon ti fek zwenn Kingsley, i ti vreman anvi konn laverite sorti dan Labib e sa ti enpresyonn mwan en kantite. I ti’n deza etidye Labib avek plizyer Temwen e ler ou get son liv Konnesans Ki Anmenn ver Lavi Eternel dan langaz Bray ou remarke ki i ti’n ganny byen servi.a Ler mon ti ofer li pour rekonmans son letid, i ti aksepte, me nou ti annan de problenm.

Premye problenm, se ki Kingsley ti viv avek plizyer lezot dimoun dan en lakaz pour bann vye dimoun e bann ki annan dezabilite. Vi ki i ti annan en ta tapaz e Kingsley pa ti tro tro tann byen, mon ti bezwen koz pli for. Anfet, tou dimoun ki ti reste la ti kapab tann nou letid sak semenn.

Dezyenm problenm, se ki Kingsley ti zis kapab lir e konpran en ptigin lenformasyon pandan sak letid. Pour ki Kingsley i profit pli byen nou letid i ti fer en bon preparasyon. Byen davans i ti lir sa ki nou ti pe al etidye plizyer fwa, rod bann verse dan son Labib dan langaz Bray e prepar bann larepons dan son lespri. Sa metod ti mars byen. Pandan nou letid, i ti asiz ater lo karpet lipye krwaze e byen eksite i ti tap ater anmezir ki i ti eksplik byen for sa ki i ti’n aprann. I pa ti mank lontan pour nou konmans etidye de fwa par semenn e sak letid ti dire pour de-z-erdtan.

Kingsley ti vreman anvi asiste bann renyon kot Lasal Rwayonm, me i pa ti fasil. I ti bezwen led pour antre e sorti dan son wiltyer, dan loto e dan Lasal Rwayonm. Me bokou dimoun dan kongregasyon ti ed li sakenn son tour e zot ti vwar sa konman en privilez. Pandan bann renyon, Kingsley ti gard en spiker o bor son zorey, i ti ekout byen e i ti menm partisipe.

Apre ki i ti’n etidye pour en pe letan, Kingsley ti deside pour antre dan Lekol Minister Teokratik. De semenn avan son premye lektir Labib, mon ti demann li si i’n repas lo son lektir. I ti reponn mwan avek konfyans, “Wi Frer, mon’n repas lo la apepre 30 fwa.” Mon ti felisit li pour son zefor e demann li si mon kapab ekoute. I ti ouver son Labib, met son ledwa lo son verse Bray e i ti konmans lir. Me selman mon ti realize ki son ledwa pa ti pe bouze lo paz parey labitid. I ti’n aprann son lektir Labib antye par ker!

Mon larm ti zis koule anmezir ki mon ti get li dan sok. Mon ti demann Kingsley ki mannyer i ti’n kapab rapel sitan byen sa lektir apre ki i ti’n repas lo la zis 30 fwa. I ti reponn: “Non, mon’n repas lo la apepre 30 fwa par zour.” Pour plis ki en mwan, Kingsley ti’n asiz lo son karpet e lir e relir son lektir Labib ziska ki i ti’n aprann li par ker.

Zour pour son size kot Lasal Rwayonm ti’n arive. Ler Kingsley ti fini son lektir, kongregasyon antye ti aplodi vreman for e bokou dimoun ti plere ler zot ti vwar determinasyon sa nouvo zelev. En proklanmater ki ti’n aret fer size dan lekol akoz i ti telman per ti demande pour li reantre dan lekol. Akoz? Sa ser ti reponn, “Si Kingsley i kapab fer li, mwan osi mon kapab!”

Le 6 Septanm 2008, apre ki Kingsley ti’n etidye Labib pour trwa-z-an, i ti senboliz son dedikasyon avek Zeova par batenm. Kingsley ti en Temwen fidel ziska son lanmor le 13 Me 2014. I ti asire ki dan Paradi lo later i pou kontinyen servi fidelman avek tou son lafors e i pou an bonn sante. (Iza. 35:5, 6)​—Rakonte par Paul McManus.