Eski ou pe fer tou pour vin matir parey Kris?

1, 2. Ki progre sak Kretyen i devret fer? Donn en legzanp.

KAN en manman i al aste fri bazar, i pa swazir bann ki pli gro oubyen pli bon marse, o kontrer, i rod bann ki mir. I anvi bann fri ki annan bon gou, bon loder e ki bon pour lasante. Se pour sa ki i swazir bann fri mir.

² Parey sa bann fri, Bondye i anvi ki bann Kretyen i vin mir oubyen matir. En Kretyen osi i annan sa lobzektif pour vin en serviter Bondye ki matir. Nou pa pe koz lo matirite fizik, me matirite spirityel. Menm apre ki en dimoun in progrese ziska ki i’n dedye son lavi e batize, i kontinyen progrese spirityelman. Zapot Pol ti ekri bann Kretyen Efez lo sa nesesite pour fer progre spirityel. I ti ankouraz zot pour ini dan lafwa e kontinyen aprann konsernan Zezi pour ki zot a vin “bann adilt e . . . konn en developman konplet parey Kris.”​—Efe. 4:13.

 3. Ki similarite i annan ant kongregasyon Efez ek bann kongregasyon ozordi?

³ I ti deza fer detrwa lannen ki kongregasyon Efez ti egziste ler Pol ti ekri son let. Bokou disip laba ti deza bann Kretyen matir ki ti annan leksperyans dan laverite. Me i ti annan serten ki ti ankor bezwen progrese pour vin matir. I menm parey parmi bann Temwen Zeova ozordi. Bokou frer ek ser in servi Bondye pour bokou lannen e zot in progrese pour vin matir spirityelman. Me i annan serten ki pa ankor vin matir. Par egzanp, i annan plizyer milye ki batize sak lannen, sa i vedir ki zot ankor bezwen fer zefor pour vin matir. Me ou, eski ou’n vin matir?​—Kol. 2:6, 7.

4, 5. Dan ki fason bann Kretyen matir i diferan avek kanmarad, me dan ki sans zot parey? (Vwar portre lo paz 3.)

⁴ Ler ou pe swazir fri ki mir bazar, ou remarke ki pa tou ki parey. Me, i annan serten karakteristik ki zot tou zot annan ki montre ki zot mir. Pareyman, bann Kretyen matir i annan diferan nasyonalite, lorizin, lasante, laz ek leksperyans. Zot menm annan diferan personnalite ek kiltir. Kantmenm sa, tou bann ki progrese spirityelman i devlop bann kalite ki montre ki zot matir. Dan ki sans?

⁵ En Kretyen matir i imit Zezi e swiv son “legzanp.” (1 Pyer 2:21) Zezi ti dir ki i vreman enportan pour en dimoun kontan Zeova avek tou son leker, nanm ek lespri e kontan son prosen parey i kontan li menm. (Mat. 22:37-39) En Kretyen matir i fer tou pour viv an armoni avek sa konsey. I montre par son fason viv ki bann keksoz pli enportan pour li se son relasyon avek Zeova e i demontre lanmour pour lezot par met zot lentere avan.

6, 7. (a) Ki bann kalite ki montre ki en Kretyen i matir? (b) Ki nou pou egzaminen?

⁶ Me nou konnen ki lanmour i zis en laspe fri lespri ki en Kretyen matir i demontre. (Gal. 5:22, 23) I osi enportan pour li demontre lezot laspe tel parey ladouser, kontrol lo son prop lekor ek pasyans. Sa bann kalite i kapab ed li fer fas avek bann sityasyon difisil san agase e osi ed li andir bann dezapwentman san perdi lespwar. Dan son letid personnel i kontinyen rod bann prensip Labib ki kapab ed li konn fer diferans ant sa ki byen ek sa ki mal. Alor, ler i fer bann desizyon i montre ki i matir spirityelman. Par egzanp, i ekout son konsyans ki’n ganny antrennen par Labib. I montre ki i annan limilite lefet ki i rekonnet ki bann standar ek fason fer Zeova i toultan pli bon ki sa ki pour li.a I anons sa bon nouvel avek devouman e ede pour ki i annan linite dan kongregasyon.

⁷ Nenport ki kantite letan nou pe servi Zeova, sakenn de nou i kapab demande, ‘Eski i annan serten domenn dan mon lavi kot mon devret fer bann azisteman pour imit Zezi pli byen e kontinyen progrese spirityelman?’

 8. Ki nou kapab dir lo konnesans ek konprenezon Zezi lo Labib?

⁸ Zezi ti konn Parol Bondye tre byen. Menm ler i ti annan zis 12 an, i ti kapab diskit lo Labib avek bann ansenyan dan tanp. “Tou dimoun ki ti tann li, ti etonnen par son lentelizans ek son repons.” (Lik 2:46, 47) Pli tar, pandan son minister, Zezi ti servi bann verse Labib apropriye ler i ti pe koz avek son bann lennmi e personn pa ti kapab reponn li.​—Mat. 22:41-46.

 9. (a) Ki mannyer en Kretyen i devret etidye Labib si i anvi vin matir spirityelman? (b) Akoz nou etidye Labib?

⁹ Anliny avek sa legzanp ki Zezi in kite, en Kretyen ki anvi progrese spirityelman pa pou kontant li zis avek en konnesans anler anler lo Labib. I pou regilyerman fer bann resers profon dan Labib akoz i konnen ki “nouritir solid i pour bann adilt.” (Ebr. 5:14) I kler alor ki en Kretyen matir i anvi ganny “konnesans [“egzakt,” NW] Garson Bondye.” (Efe. 4:13) Eski ou annan en progranm pour lir Labib tou le zour? Eski ou regilyerman fer letid personnel e fer zefor pour met letan de kote sak semenn pour fer Ladorasyon Fanmir? Anmezir ki ou egzamin Parol Bondye, rod bann prensip Labib ki pou ed ou pli byen konpran fason panse ek santiman Zeova. Apre sa, esey aplik bann prensip Labib e pran zot an konsiderasyon ler ou fer bann desizyon, sa pou fer ou vin pli pros avek Zeova.

10. Ki mannyer en Kretyen matir i santi konsernan bann konsey ek prensip Bondye?

¹⁰ En Kretyen matir i konpran ki i pa zis konnesans ki konte. Ki kantite i kontan sa ki i konnen lo fason fer Bondye ek son bann prensip? I demontre sa lanmour par met an premye bann keksoz ki annakor avek lavolonte Zeova dan plas sa ki pour li. Deplis, sa Kretyen in bezwen fer zefor pour “debaras” li avek latitid ek kondwit ki i ti annan avan. Anmezir ki en Kretyen i fer sa sanzman, i devlop sa nouvo personnalite Kretyen, ki’n ganny ‘kree dan resanblans Bondye ki zis e sen dapre laverite.’ (Lir Efezyen 4:22-24.) Labib in ganny ekrir anba gidans lespri sen. Alor, ler en Kretyen i aprann konn plis lo bann standar Labib e kontan zot, i pe les son leker ek lespri ganny gide par lespri sen. Sa i ed li progrese spirityelman.

11. Ki Zezi ti eksperyanse ler i ti lo later?

¹¹ Zezi ti en zonm parfe. Me ler i ti lo later, i ti antoure par bann imen enparfe. I ti ganny elve par bann paran enparfe e son bann frer ek ser osi ti enparfe. Menm son bann disip ki i ti pros avek ti demontre en latitid orgeye e egois. Par egzanp, sa zour swar avan Zezi ti ganny touye, son bann disip “ti konmans diskite antre zot lekel parmi zot ki ti pou ganny konsidere pli enportan.” (Lik 22:24) Me Zezi ti annan konfyans ki malgre ki son bann disip ti enparfe, zot ti pou progrese spirityelman e form en kongregasyon ki ini. Sa menm zour swar, Zezi ti priye ki son bann zapot i ini par demann son Papa: “Ki zot tou zot kapab vin en sel, parey ou Papa, ou ini avek mwan e mwan mon ini avek ou, pour ki zot osi zot kapab ini avek nou, . . .  pour ki zot a vin en sel, parey ou avek mwan nou en sel.”​—Zan 17:21, NW, 22.

12, 13. (a) Ki mannyer Efezyen 4:15, 16 i montre ki nou bezwen promot linite dan kongregasyon? (b) Ki mannyer en frer ti fer fas avek en febles e aprann pour promot linite?

¹² En serviter Zeova ki matir i promot linite dan kongregasyon. (Lir Efezyen 4:1-6, 15, 16.) Konman Kretyen nou annan sa lobzektif pour “byen rasanble ansanm,” setadir travay ansanm dan linite. Dapre Labib, pour arive fer sa, nou bezwen annan limilite. En frer oubyen ser matir i annan limilite e i fer zefor pour ki i annan linite, menm ler i fer fas avek lenperfeksyon lezot. Ki mannyer ou reazir kan ou fer fas avek lenperfeksyon en frer oubyen en ser dan kongregasyon? Oubyen si en dimoun in ofans ou dan kongregasyon? Eski ou annan sa tandans oubyen menm labitid pour les sa kree en baryer ant ou ek sa enn ki’n ofans ou? Oubyen eski ou esey kas sa baryer pour gard en bon relasyon avek sa dimoun? Dan plas kree en baryer, en Kretyen matir pour plito fer tou pour gard linite.

¹³ Annou pran legzanp en frer ki apel Uwe. Dan lepase, i ti tant pour les lenperfeksyon lezot Kretyen agas li. Me apre i ti deside pour servi Labib ek liv Insight on the Scriptures pour etidye lavi David. Akoz David? Uwe i eksplike: “David ti vwar ki serten serviter Zeova pa ti pe swiv son bann lalwa. Par egzanp, Lerwa Sail ti esey touy li, serten dimoun ti anvi saboul li avek ros e menm son madanm ti sikann li. (1 Sam. 19:9-11; 30:1-6; 2 Sam. 6:14-22) Me David pa ti zanmen les kondwit lezot fer li perdi son lanmour pour Zeova. David ti osi annan konpasyon dan son leker, en kalite ki mon ti bezwen devlope. Sa ki mon ti aprann dan mon letid ti sanz mon fason vwar lenperfeksyon mon bann frer ek ser. Mon nepli mazin zot bann fot. O kontrer, mon fer tou pour kontribye anver linite dan kongregasyon.” Eski ou osi ou annan sa lobzektif pour promot linite dan kongregasyon?

14. Ki kalite dimoun Zezi ti swazir pour vin zanmi avek?

¹⁴ Zezi ti amikal avek tou dimoun an zeneral. Tou dimoun ti santi zot alez avek li, ki swa msye, madanm, zenn, vye e menm bann zanfan. Me Zezi ti swazir lekel ki pou vin son zanmi pros. I ti dir avek son bann zapot fidel: “Zot mon bann zanmi, si zot obei mon konmannman.” (Zan 15:14) Zezi ti swazir son bann zanmi parmi bann ki ti fidelman swiv li e servi Zeova avek tou zot leker. Eski parey Zezi ou swazir ou bann zanmi parmi bann ki servi Zeova avek tou zot leker? Akoz i enportan pour fer sa?

15. Ler bann zenn i asosye avek bann Kretyen matir, ki mannyer sa i kapab ed zot?

¹⁵ En kantite fri i vin mir ler zot ganny soley. Pareyman, lanmour nou bann frer ek ser ki parey lasaler, i kapab ed ou progrese e vin matir. Petet ou en zenn ki pe deside ki ou pou fer avek ou lavi. I ti pou saz si ou ti asosye avek bann frer ek ser ki annan plis leksperyans dan servis Zeova e pe ede promot linite dan kongregasyon. Diran bann lannen, i kapab ki zot in pas atraver botan ek movetan e menm fer fas avek serten difikilte dan servis Bondye. Bann zanmi koumsa i kapab ed ou fer sa pli bon swa dan lavi. Ler ou asosye avek bann frer ek ser ki ankouraz ou e kontan ou, zot kapab ed ou pour fer bann desizyon saz e progrese pour vin matir.​—Lir Ebre 5:14.

16. Ki mannyer bann Kretyen matir dan kongregasyon ti ed en zenn ser?

¹⁶ Pran par egzanp Helga, pandan son dernyen lannen lekol bann zelev dan son laklas ti pe koz lo sa ki zot anvi fer apre. En kantite parmi zot ti pou kontan al liniversite pour fer en bon karyer. Helga ti koz lo la avek son bann zanmi dan kongregasyon. I dir: “Bokou parmi zot ti pli vye ki mwan e zot ti ed mwan en kantite. Zot ti ankouraz mwan pour pran servis a plen tan. Apre sa mon ti kapab fer senk an dan servis pionye. Ozordi, plizyer lannen pli tar mon kontan ki dan mon zenn tan mon ti konsantre dan servis Zeova. Napa en sou rezon pour mwan regrete.”

17, 18. Ki mannyer nou kapab pli byen servi Zeova?

¹⁷ Ler nou imit Zezi, sa pou ed nou vin bann Kretyen matir. Nou pou vin pli pros avek Zeova e nou pou annan en pli gran dezir pour servi li otan ki nou kapab. Ler en serviter Bondye in vin matir se la ki i kapab donn Zeova son meyer. Zezi ti ankouraz son bann disip: “Zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.”​—Mat. 5:16.

¹⁸ Parey nou’n vwar, en Kretyen matir i kapab annan en bon lefe dan kongregasyon. En Kretyen i osi montre ki i matir par lafason ki i servi son konsyans. Ki mannyer nou konsyans i kapab ed nou fer bann desizyon ki saz? Ki mannyer nou kapab respe konsyans lezot? Nou pou reponn sa bann kestyon dan sa lot lartik.