Reziste bann taktik Satan e annan konfyans dan Zeova ek Zezi

1. Ki taktik Satan i servi pour esey fer nou pa reste fidel avek Bondye?

DEPI sa moman ki nou deside pour servi Zeova, Satan ek son bann demon i vin nou lennmi e zot kontinyen fer tou sa ki zot kapab pour fer nou aret servi Zeova. Me Satan i konnen ki tan ki nou annan sipor Zeova, i pa pou kapab ranport laviktwar lo nou. Alor i esey fer nou aret kontan Zeova pour nou perdi sa sipor. En fason ki i fer sa, i par fer nou annan dout konsernan si Zeova ek son Garson pe vreman ed nou.—2 Kor. 11:14; Zak 1:6.

2. Akoz i enportan ki nou annan konfyans dan Zeova ek Zezi Kri?

² Bann solda ki pe lager i bezwen annan konfyans dan zot bann sef. Si zot perdi konfyans dan zot bann sef, i kapab ki zot pa obeir e zot fer sa ki zot oule. Sa i kapab fer zot perdi zot lavi. Dan menm fason, nou bann solda dan en lager spirityel e nou pe lager avek “bann demon.” (Efe. 6:12) Satan i konnen ki si nou perdi konfyans dan Zeova ek Zezi, i tre probab ki nou pou aret obeir zot e rezet zot sipor. Alor i fer tou sa ki i kapab pour fer nou perdi konfyans dan zot. Dan sa lartik, nou pou vwar ki mannyer i ti servi sa taktik dan lepase e ki mannyer i ankor pe servi li ozordi. Apre nou pou vwar ki mannyer nou kapab reziste son bann riz. Dan sa lartik ki swiv, nou pou vwar de lezot taktik ki Satan i servi kont nou dan sa lager spirityel.a

SATAN TI DIR BANN MANSONZ LO ZEOVA EK ZEZI

3. Ki Satan ti dir Ev ki ti fer li perdi konfyans dan Zeova?

³ Pa bokou letan apre ki Zeova ti’n kree Adan ek Ev, Satan ti anvi fer zot dezobei Zeova. Satan ti anbet Ev e fer li krwar ki son Kreater pa ti anvi sa ki bon pour li. Satan ti demann li: “Eski i vre Bondye in dir ki zot pa devret manz fri dan tou pye dibwa sa zarden?” (Zen. 3:1-5) Satan ti konvenk Ev ki sa ki Zeova ti pe demann zot pour fer pa ti rezonnab e ki i pa ti pe donn zot tou sa ki zot ti bezwen. Malerezman, Ev e pli tar Adan, ti fer sa ki Satan ki lennmi Zeova, ti oule zot fer. Zot ti trai Zeova, sa Enn ki ti’n donn zot tou keksoz.—Zen. 3:6.

4. Ki bann mansonz Satan ti anvi Zob i krwar lo Zeova?

⁴ Depi dan letan Adan ek Ev, Satan in kontinyen dir bann mansonz lo Zeova. Par egzanp, Satan ti servi trwa swadizan zanmi Zob pour fer Zob annan dout konsernan si Zeova i kontan li e apresye son fidelite. (Zob 22:1-3) Satan ti krwar ki bann soufrans ki Zob ti pas ladan ti pou fer li rezet Zeova. Menm si Zob ti anba en kantite presyon, i ti reste fidel avek son zanmi, Zeova.—Zob 27:1, 5.

5. Ki mannyer Satan ti esey anpes dimoun swiv Zezi? (Matye 11:19)

⁵ Plizyer santenn lannen pli tar ler Zezi ti vin lo later, Satan ti esey anpes dimoun swiv Zezi. En fason ki i ti fer sa, i par servi bann sef relizye ek lezot dimoun ki ti ay Zezi pour dir bann mansonz lo Zezi. Finalman, zot ti akiz li konmkwa i en kriminel e zot ti touy li.—Lir Matye 11:19; 27:27-31; Mark 14:55, 56; Zan 8:41-45.

6-7. Ki bann fason Satan ti atak bann disip Zezi dan premye syek?

⁶ Apre ki Zezi ti’n mor, Satan ti esey dekouraz bann disip Zezi e anpes zot anons sa bon nouvel konsernan Zezi. Dyab ti esey fer zot annan dout konsernan si Zezi ti vreman resisite. Satan ti servi serten dimoun pour koz manti e dir ki bann disip Zezi ti’n vol son lekor. (Mat. 28:11-15) Dan bann zour ki swiv, Satan ti servi bann sef relizye ek bann dirizan politik pour persekit bann disip Zezi. I ti krwar ki sa ti pou fer zot per. I ti anvi fer zot krwar ki sa travay ki zot Met ti’n konfye zot ti tro difisil pour zot fer.—Akt 7:57–8:1; 12:1-3; 28:22.

⁷ Menm si serten bann Kretyen ti per e aret sa travay, laplipar zot ti reste ferm e refize reste trankil konsernan Zezi. Zot ti realize ki Satan ek bann demon ki ti zot vre lennmi. (Akt 4:18-20; 1 Pyer 5:8) Eski i ankor parey ozordi? Ki bann taktik Satan i servi pour esey dekouraz e anpes nou servi Zeova?

SATAN I KONTINYEN DIR BANN MANSONZ LO ZEOVA EK ZEZI

8. Ki mannyer Satan i servi fo larelizyon pour dir bann mansonz konsernan Zeova ek Zezi?

⁸ Ozordi, enn bann taktik prensipal ki Satan i servi i pour kasyet laverite konsernan Zeova ek Zezi. Dyab i “papa mansonz” e i servi bann fo larelizyon pour dir mansonz lo Zeova ek Zezi. (Zan 8:44) Par egzanp, i’n avegle bann dimoun pour zot pa konnen lekel Zeova e lekel son Garson. (2 Kor. 4:3, 4) Souvandfwa, bann larelizyon ki swadizan Kretyen i dir ki Papa ek son Garson i egal avek kanmarad. Sa i fer ki dimoun i tant pour inyor Papa parski zot pa konn son non e zot ador Garson. Ni Zeova, ni Zezi pa kontan sa kalite ladorasyon. (Mat. 4:10; Zan 4:23) Ler dimoun i ganny avegle dan sa fason i kapab difisil pour rezonn avek zot oubyen zot menm kapab opoz nou travay predikasyon.

9. Ki mannyer Satan in servi fo larelizyon pour anpes dimoun konn Zeova? (Zeremi 23:26, 27)

⁹ Enn bann premye keksoz ki nou fer ler nou konmans en relasyon i pour aprann non sa dimoun. Satan i anvi anpes bann dimoun annan en lanmitye pros avek Zeova par anpes zot pour menm konn Son non. Depi lontan i pe fer sa par servi fo larelizyon pour fer bann dimoun oubliy non Bondye. (Lir Zeremi 23:26, 27.) Dan Labib, non Bondye i ganny konpare avek en latour for ki donn proteksyon. Sa lennmi in fer sir ki non Bondye in ganny tire dan bokou tradiksyon Labib. (Prov. 18:10) Satan in menm servi fo larelizyon pour ansennyen ki Bondye ki fer dimoun soufer. Sa i kapab fer li difisil pour dimoun senser vwar Zeova konman en Zanmi ki zot kapab vin pros avek. (Zak 4:8) Me Satan i osi anvi afebli lafwa pep Zeova.

10. Kwa ki kapab fer en Kretyen ankoler avek Zeova?

¹⁰ Ler nou pe pas dan problenm, Satan i anvi nou krwar ki Zeova pa enterese avek nou. Si nou kontinyen soufer pour en kantite letan, Satan i anvi ki nou ankoler avek Zeova parski i pe les nou soufer. (Prov. 19:3) Bann ki konmans santi koumsa, i kapab menm mazinen: ‘Akoz mon pe kontinyen swiv bann lalwa ek prensip Zeova? I pa vo lapenn!’ Me si nou mazin koumsa, nou kapab fer bann keksoz ki fer Satan plezir olye fer Zeova plezir.

11. Ki mannyer Satan i fer bann dimoun annan dout konsernan bann standar Zeova? (Vwar portre.)

¹¹ Satan i servi bann keksoz parey rezo sosyal pour fer nou annan dout konsernan bann standar Zeova. Lo rezo sosyal, en kantite dimoun i dir ki bann standar moral ki dan Labib pa aplik pour nou letan e ki nou pa bezwen Bondye dir nou kwa ki byen e kwa ki mal. I kler ki “sef sa lemonn” in reisi fer en kantite dimoun krwar ki sa ki byen i mal e sa ki mal i byen.—Zan 14:30; Iza. 5:20; 1 Tim. 4:1, 2.

12. Akoz nou pa devret ekout bann propagann Satan?

¹² Si nou ekout bann propagann Satan, sa i kapab fer nou elwannyen avek Zeova. En zenn ser ki apel Shannonb i dir: “I ti pran en pe letan pour mwan realize ki bann standar moral ki mon ti pe ganny ansennyen kot lekol e avek bann dimoun ki mon ti pe frekante, ti pe sanz mon fason panse. Mon ti pe konmans kontan bann keksoz ki Zeova pa kontan. Pli mon ti pas letan lo rezo sosyal, pli mon ti anvi vin parey sa bann dimoun. Ptitapti, mon ti konmans elwannyen avek Zeova, mon fanmir ek mon bann frer ek ser dan kongregasyon.” Avek letan, Shannon ti retourn kot son Papa ki dan lesyel e i ti sorti dan latrap Dyab. Kwa ki ti ed li?

13. Ki ou aprann avek leksperyans Shannon?

¹³ Shannon ti realize ki i ti bezwen fer en kantite zefor pour li reste zanmi avek Zeova ek Zezi. I dir: “Mon ti priye e mon ti azir an armoni avek mon bann lapriyer par fer resers dan nou bann piblikasyon. Sa video Young People Ask—How Can I Make Real Friends? ti ed mwan en kantite.c Dan sa video, en zenn ser ki ti pe pas dan bann problenm en pe parey avek sa ki pour mwan. I ti demontre limilite e rod led avek son paran. Mon ti fer parey. Mon paran, bann ansyen ek bann ser matir dan kongregasyon ti ed mwan pour rezet move frekantasyon. Avek letan, mon ti realize ki pour mwan kapab vreman servi Zeova, mon ti bezwen fer plis ki zis al renyon e obeir mon paran. Mon ti bezwen devlop en lanmitye pros avek Zeova e konpran akoz mon krwar sa ki i dir mwan dan Labib.”

OU BEZWEN KONVENKI KI ZEOVA EK ZEZI I OU ZANMI

14. Ki mannyer nou kapab anpes Satan afebli nou lafwa? (Vwar portre.)

¹⁴ Pour reste zanmi avek Zeova, ou bezwen swazir byen bann dimoun ki ou frekante. (Zak 4:4) Nou devret fer atansyon ki nou pa krwar tou sa ki nou tande oubyen lir. Par egzanp, si nou krwar bann lenformasyon ki pa konpletman vre oubyen bann mansonz, nou kapab tonm lo bann move konklizyon. Si nou etidye Labib ek nou bann piblikasyon e nou regilyerman pas letan avek bann Kretyen matir, nou pa pou ganny enfliyanse fasilman. Pli nou konn laverite ki dan Labib, pli nou pou reisi anpes Satan afebli nou lafwa.—Prov. 13:20; Akt 17:11.

15. Ki mannyer nou kapab devlop plis konfyans ki Zeova ek Zezi i kontan nou e ki zot anvi nou ere?

¹⁵ Ler nou etidye Labib, nou pou annan plis konfyans ki Zeova ek Zezi i kontan nou e ki zot anvi nou ere. (Prov. 22:19) Anmezir ki nou medit lo bann resi ki montre lafason ki Zeova ek Zezi in pran swen avek bann imen, pli nou pou vwar zot konman bann zanmi ki nou kapab depan lo la. Dan Labib, i annan en kantite resi ki asir nou ki Zeova ek Zezi i kontan nou. Par egzanp, Zeova i dir ki i kontan son pep plis ki en manman i kontan son zanfan ki ankor pe tete. (Iza. 49:15) I dir ki bann dimoun ki kontan son non i presye pour li parey en “propriyete ki annan valer.” (Mal. 3:16, 17, not.) Labib i osi montre nou ki kantite Zezi i kontan nou par dir nou sa ki Zezi ti santi konsernan son sakrifis.—Zan 15:12, 13.

16. Ki mannyer ler nou reflesir lo nou prop leksperyans oubyen nou ekout leksperyans lezot, sa i kapab ed nou? (Psonm 118:5, 6)

¹⁶ Ler nou reflesir lo lafason ki Zeova ek Zezi i ed nou ozordi, sa i kapab fer nou asire ki zot kontan nou. Ler nou mazin bann moman ki Zeova ti avek nou, sa i kapab donn nou lafors ki nou bezwen. Nou kapab osi demann nou bann frer ek ser pour rakont nou ki mannyer Zeova in ed zot. (Prov. 22:17) Ler nou fer sa, nou pou annan plis konfyans ki nenport problenm nou fer fas avek, Zeova ek Zezi pou ed nou.—Lir Psonm 118:5, 6.

17. Dapre Zan 10:29, ki Zezi i promet bann ki reste pros avek li ek son Papa?

¹⁷ Nou tou nou anvi reste pros avek Zeova ek Zezi Kri. Me ziska ki Satan ek son bann demon i ganny detrir pour touzour, nou pou bezwen kontinyen lalit pour anpes Satan afebli nou konfyans dan Zeova ek Zezi. (Rev. 20:1-3, 10) Pour reziste taktik nou lennmi, nou bezwen gard en lanmitye pros avek Zeova e kontinyen annan konfyans ki li ek son Garson, zot kontan nou e apresye nou. Koumsa, parey Zezi ti dir, personn pa pou kapab ‘aras ou dan lanmen son Papa.’—Lir Zan 10:29; Zak 4:7.

18. Ki nou pou vwar dan sa lartik ki swiv?

¹⁸ Dan sa lartik ki swiv, nou pou vwar de lezot taktik ki Satan i servi kont nou dan sa lager spirityel. Premyerman, Satan i esey kree divizyon dan kongregasyon e dezyenmman, i enfliyans dimoun pour persekit nou. Ki mannyer nou kapab lalit avek sa bann taktik? Nou pou vwar sa dan sa lartik ki swiv.