Eski ou annan menm pwennvi avek Zeova lo lazistis?

1, 2. (a) Ki lenzistis Nabot ek son bann garson ti sibir? (b) Ki sa de kalite ki nou pou koz lo la dan sa lartik?

DE MOVE zonm i akiz en lot zonm konmkwa i’n komet en gro krim. Sa ki zot pe dir pa vre. Me sa zonm i ganny trouve koupab e i pe al ganny egzekite. Zis mazinen ki mannyer bann dimoun ki kontan lazistis ti santi anmezir ki zot ti vwar sa zonm inosan ek son bann garson ganny saboule ek ros ziska zot mor! Sa pa zis en zistwar. Sa i en keksoz ki’n vreman arive avek en serviter Zeova ki apel Nabot, ki ti viv menm lepok ki Lerwa Aab ti pe diriz Izrael.​—1 Lerwa 21:11-13; 2 Lerwa 9:26.

² Dan sa lartik, nou pou diskit lo sa ki ti arive avek Nabot. Nou pou osi koz lo sa fot grav ki en ansyen fidel ti fer dan enn parmi bann premye kongregasyon Kretyen. Sa de legzanp pou montre nou ki mannyer limilite e pare pour pardonnen i neseser si nou anvi annan menm pwennvi avek Zeova lo lazistis.

3, 4. Ki kalite zonm Nabot ti ete e akoz i pa ti vann son plantasyon rezen avek Lerwa Aab?

³ Nabot ti toultan fidel avek Zeova menm si laplipar Izraelit ti pe swiv move legzanp Lerwa Aab ek move Larenn Zezabel. Zot ti ador fo Bondye Baal e pa ti respekte Zeova ek son bann lalwa. Me pour Nabot, son relasyon avek Zeova ti annan plis valer ki son lavi.

⁴ Lir 1 Lerwa 21:1-3. Ler Aab ti demann Nabot pour vann li son plantasyon rezen ouswa fer lesanz pour donn Nabot en pli bon plantasyon rezen, Nabot ti refize. Akoz? Avek respe i ti eksplike: “Bondye pa pou kontan si mon donn ou patrimwann mon bann zanset.” Nabot ti refiz sa ki Lerwa Aab ti ofer li akoz sa ti kont lalwa Zeova pour bann Izraelit vann net leritaz zot fanmir. (Levitik 25:23; Nonm 36:7) Pa i kler ki Nabot ti obei Zeova.

 5. Ki Zezabel ti fer pour ganny plantasyon rezen Nabot?

⁵ Ler Nabot ti refize vann son plantasyon rezen, Lerwa Aab ek son madanm ti fer bann keksoz terib. Pour kapab ganny sa plantasyon rezen, Larenn Zezabel ti demann de zonm pour akiz Nabot pour en krim ki i pa ti’n fer. Sa ti fer ki Nabot ek son bann garson ti ganny touye. Ki Zeova ti fer konsernan move konsekans sa lenzistis?

6, 7. Ki mannyer Zeova ti demontre ki i kontan lazistis e akoz sa ti’n bezwen rekonfortan pour fanmir ek zanmi Nabot?

⁶ Deswit Zeova ti anvoy Eliya pour konfront Aab. Eliya ti dir Aab ki i ti en kriminel e en voler. Ki Zeova ti deside fer? Aab, son madanm ek son bann zanfan ti pou ganny touye zis parey zot ti fer avek Nabot ek son bann garson.​—1 Lerwa 21:17-25.

⁷ Bann fanmir Nabot ek son bann zanmi ti an dey akoz sa bann move keksoz ki Aab ti’n fer. Me Zeova ti vwar sa lenzistis e i ti azir deswit. Sa ti’n bezwen rekonfortan pour fanmir Nabot ek son bann zanmi. Par kont, zot limilite e konfyans dan Zeova ti tre probab ganny teste par sa ki ti arive apre.

 8. Ki mannyer Aab ti reazir ler i ti tann mesaz Zeova e ki ti rezilta?

⁸ Ler Aab ti tann sa ki Zeova ti deside fer avek li, “i ti desir son lenz, apre met en lenz goni lo li, i pa ti manze, i ti kontinyen dormi dan sa lenz goni e i ti marse konmsi i ti dan depresyon.” Aab ti abes son lekor. Ki rezilta sa ti anmennen? Zeova ti dir Eliya: “Akoz i’n abes son lekor devan mwan, mon pa pou anmenn destriksyon pandan son letan. Mon pou anmenn maler lo son lakour dan letan son garson.” (1 Lerwa 21:27-29, NWT; 2 Lerwa 10:10, 11, 17) Zeova, “sa enn ki egzamin leker” sa enn ki vwar sa ki nou vreman ete ti demontre pitye pour Aab.​—Proverb 17:3, NWT.

 9. Akoz limilite ti’n bezwen vin en proteksyon pour bann fanmir Nabot ek son bann zanmi?

⁹ Ler bann zanmi ek fanmir Nabot ti tande ki fanmir Aab pa ti pou ganny pini ziska apre lanmor Aab, sa ti’n kapab teste zot lafwa dan Bondye. Me limilite ti pou’n kapab ed zot protez zot lafwa. Akoz? Parski si zot ti annan limilite, zot ti pou kontinyen ador Zeova e annan konfyans ki i enposib pour Zeova vin enzis. (Lir Deterononm 32:3, 4.) A lavenir, fanmir Nabot pou eksperyans sa benediksyon ler zot pou vwar bann ki zot kontan resisite. I pou annan lazistis parfe pour Nabot ek son bann garson. (Zob 14:14, 15; Zan 5:28, 29) En dimoun ki annan limilite i konnen ki, “Bondye pou ziz tou keksoz ki nou’n fer, tou sa ki dan kasyet, byen ou mal.” (Eklezyast 12:14) Zeova i egzamin bann keksoz ki nou pa konnen. Alor limilite i en proteksyon pour nou lafwa dan Zeova.

10, 11. (a) Ki bann sityasyon ki kapab teste nou pwennvi lo lazistis? (b) Dan ki fason limilite pou protez nou?

¹⁰ Ki mannyer ou pou reazir si bann ansyen i fer en desizyon ki ou pa konpran oubyen ki ou pa dakor avek? Par egzanp, ki ou pou fer si ou oubyen en dimoun ki ou kontan i perdi en privilez dan servis Zeova? Ki ou pou fer si ou konzwen, ou zanfan oubyen enn ou zanmi pros i ganny ekskli dan kongregasyon e ou pa dakor avek sa desizyon ki bann ansyen in pran? Ki ou pou fer si ou krwar ki bann ansyen pa ti merit pran pitye pour en dimoun ki’n fer pese? Sa bann sityasyon i kapab teste nou lafwa dan Zeova ek nou krwayans dan lafason ki i’n organiz kongregasyon ozordi. Ki mannyer limilite pou protez ou si ou ganny teste avek enn sa bann sityasyon? Annou vwar de fason.

¹¹ Premyerman, si nou annan limilite nou pou dakor ki nou pa konn tou keksoz. Menm si nou krwar nou konn tou keksoz ki i annan pour fer avek en sityasyon, zis Zeova ki konnen kwa ki dan leker en dimoun. (1 Samyel 16:7) Ler nou mazin sa, avek limilite nou pou rekonnet ki nou annan bann limit e ki nou bezwen aziste nou fason panse. Dezyenmman, si nou vwar oubyen sibir en lenzistis, limilite pou ed nou pour vin obeisan e esper avek pasyans ziska ki Zeova i aranz sa sityasyon. Labib i dir: “I annan boner pour sa ki annan respe pour Bondye.” Labib i osi dir: “Napa boner pour bann malfeter; son lavi pou pas vit.” (Eklezyast 8:12, 13) Si nou kontinyen annan limilite, sa pou anmenn byenfe pa zis pour nou, me osi pour tou lezot dimoun ki enplike.​—Lir 1 Pyer 5:5.

12. Ki resi nou pou egzaminen e akoz?

¹² Bann premye Kretyen Antyos, Siri ti eksperyans en sityasyon ki ti teste zot limilite e ki ti pou montre si zot ti vreman pare pour pardonnen. Annou egzamin sa resi pour vwar ki latitid nou annan konsernan pardon. Sa pou kapab ed nou konpran akoz Zeova i kapab servi bann dimoun enparfe san ki i abes son bann standar.

13, 14. Ki responsabilite Zapot Pyer ti annan e ki mannyer i ti montre ki i ti kouraze?

¹³ Zapot Pyer ti en ansyen ki laplipar bann Kretyen dan premye syek ti konn li tre byen. I ti zanmi Zezi e i ti ganny donnen bann responsabilite vreman enportan. (Matye 16:19) Par egzanp, dan bann lannen 36, Pyer ti ganny demande pour pres avek Korney e tou bann ki ti pe reste kot li. Akoz sa ti en keksoz spesyal? Parski Korney pa ti en Zwif, i ti sorti dan en lot nasyon e i pa ti’n ganny sirkonsi. Ler Korney ek bann ki ti reste avek li ti ganny lespri sen, Pyer ti rekonnet ki zot ti kapab ganny batize konman bann Kretyen. I ti dir: “Eski en dimoun i kapab anpes bann ki’n ganny batize avek lespri sen parey nou, ganny batize avek delo?”​—Akt 10:47.

¹⁴ Dan lannen 49, bann zapot ek ansyen Zerizalenm ti zwenn pour deside si bann dimoun ki pa Zwif ti bezwen ganny sirkonsi. Dan sa renyon, avek kouraz Pyer ti rapel bann frer ki i ti’n vwar bann non Zwif ki pa ti sirkonsi ganny lespri sen. Leksperyans Pyer ki ti ed konsey direkter fer sa desizyon. (Akt 15:6-11, 13, 14, 28, 29) Tou le de, bann Zwif ek bann non Zwif ti bezwen vreman rekonesan ki Pyer ti annan kouraz pour dir sa. Pa sa bann Kretyen ti’n bezwen annan konfyans dan sa zonm fidel e matir!​—Ebre 13:7.

15. Ki fot Pyer ti fer ler i ti Antyos, Siri? (Vwar portre o konmansman sa lartik.)

¹⁵ Deswit apre sa renyon Zerizalenm, Pyer ti vizit Antyos, Siri. Ler i ti laba i ti pas letan avek son bann frer non Zwif. Nou kapab mazinen ki mannyer zot ti kontan pour aprann avek konnesans ek leksperyans Pyer. Par kont, zot ti bezwen sirprann e sagren ler Pyer ti aret manz avek zot en sel kou. Pyer ti enfliyans lezot Kretyen Zwif, enkli Barnabas pour fer parey. Akoz sa ansyen matir ti fer en fot sitan grav ki ti’n kapab diviz kongregasyon? Pli enportan ankor, ki nou kapab aprann avek fot Pyer ki kapab ed nou si nou ganny blese par parol en ansyen?

16. Ki mannyer Pyer ti ganny reprimande e ki kestyon sa i fer demande?

¹⁶ Lir Galat 2:11-14. Pyer ti ganny lafreyer zonm. (Proverb 29:25) Pyer ti konnen ki mannyer Zeova ti santi konsernan bann non Zwif. Kantmenm sa, i ti per ki bann Kretyen Zwif sorti Zerizalenm ti pou vwar li konman enferyer akoz i ti pe asosye avek Kretyen non Zwif. Zapot Pol ti dir Pyer ki i ti en ipokrit. Akoz? Parski Pol ti la dan renyon Zerizalenm lannen 49, ler Pyer ti koz an faver bann non Zwif. (Akt 15:12; Galat 2:13) Ki mannyer bann Kretyen non Zwif ki Pyer ti’n ofanse ti pou reazir? Eski zot ti pou les sa fer zot tonbe? Eski Pyer ti pou perdi son privilez akoz fot ki i ti’n fer?

17. Ki byenfe Pyer ti gannyen avek pardon Zeova?

¹⁷ Pyer ti annan limilite e i ti aksepte koreksyon Pol. Labib pa dir si Pyer ti perdi okenn son bann responsabilite. Par kont, pli tar i ti ganny enspire pour ekri de let ki form parti Labib. Dan son dezyenm let, i ti menm refer avek Pol konman “nou frer Pol ki nou kontan.” (2 Pyer 3:15) Fot ki Pyer ti’n fer ti’n bezwen dekouraz bann Kretyen non Zwif. Kantmenm sa, Zezi ki sef Kongregasyon ti kontinyen servi li. (Efezyen 1:22) Bann frer ek ser dan kongregasyon ti annan sa loportinite pour imit Zezi ek son Papa par pardonn Pyer. Gran mersi personn pa’n les fot en zonm enparfe fer zot tonbe.

18. Kan nou devret annan menm pwennvi avek Zeova lo lazistis?

¹⁸ Dan kongregasyon sa letan, i ti napa ansyen ki ti parfe e ozordi osi i parey. Labib i dir: “Nou tou nou souvan fer fot.” (Zak 3:2) I fasil pour admet sa, me ki nou pou fer si en frer i komet en fot kont nou? Eski nou pou annan menm pwennvi avek Zeova lo lazistis? Par egzanp, ki mannyer ou pou reazir si en ansyen i fer resorti en pwennvi ki paret enzis dan son komanter? Si en ansyen in dir en parol san reflesir ki’n ofans e bles ou, eski ou pou les sa fer ou tonbe? Dan plas deswit mazinen ki sa frer pa devret en ansyen, eski avek pasyans ou pou esper Zezi ki sef kongregasyon azir? Dan plas konsantre lo sa fot, eski ou pou rapel tou sa lannen ki i’n reste fidel? Si en frer ki’n fer pese kont ou i kontinyen servi konman ansyen oubyen ganny plis responsabilite, eski ou pou kontan pour li? Si ou pare pour pardonnen, ou pe montre ki ou annan menm pwennvi avek Zeova lo lazistis.​—Lir Matye 6:14, 15.

19. Ki nou devret determinen pour fer?

¹⁹ Vi ki nou kontan lazistis, nou enpasyan pour sa zour kan Zeova pou retir tou lenzistis ki Satan ek son move lemonn in fer. (Izai 65:17) Me pour lemoman, ler nou sibir lenzistis, avek limilite annou rekonnet ki nou pa konn tou detay. Alor sa pou ed nou pour pardonn bann ki fer pese kont nou. Si nou fer sa, nou pou annan menm pwennvi avek Zeova lo lazistis.