Eski i en pese pour fimen?

Sa ki Labib i dir

Labib pa koz lo fimena ouswa lo lezot fason ki taba i ganny servi. Par kont, dan Labib, i annan bann prensip ki montre ki Bondye pa aksepte bann labitid ki enpir e ki pa bon pour lasante. Alor dapre Labib, fimen i en pese.

Respe pour lavi. “Bondye . . . ki donn tou dimoun lavi, i fer zot tou respire.” (Akt 17:24, 25) Vi ki lavi i en kado sorti kot Bondye, nou pa devret fer nanryen ki pou akoursi nou lavi, tel parey fimen. Fimen i enn bann lakoz lanmor prensipal dan lemonn ki ti kapab ganny evite.
Lanmour pour nou prosen. “Ou devret kontan ou prosen parey ou kontan ou prop lekor.” (Matye 22:39) Bann dimoun ki fim o bor lezot, pa pe demontre lanmour. Bann ki pa fimen me ki souvandfwa dan en landrwa kot zot respir lafimen sigaret, i annan plis risk pour ganny serten maladi ki bann fimer i souvan gannyen.
Nou bezwen reste sen. “Ofer zot lekor konman en sakrifis vivan, sen e akseptab pour Bondye.” (Romen 12:1) “Annou pirifye nou avek tou sa ki sali lekor ek lespri e vin deplizanpli sen akoz nou annan en gran respe pour Bondye.” (2 Korentyen 7:1) Fimen pa en keksoz natirel. Deplis, i pa fer nou vin sen, ki vedir prop e pir, parski bann ki servi taba i volonterman pran bann keksoz ki vreman danzere pour lasante.

Eski Labib i koz lo servi kanabis oubyen lezot drog pour plezir?

Labib pa mansyonn kanabis (ki osi koni konman mariwana) ouswa lezot drog par zot non. Me dan Labib i annan bann prensip ki montre ki nou pa devret servi sa bann sibstans ki adiktiv pour plezir. Apard ki sa ki nou’n deza koz lo la, i annan lezot prensip ki aplikab:

Nou bezwen kontrol nou bann fakilte mantal. “Ou devret kontan Zeova ou Bondye . . . avek tou ou lespri.” (Matye 22:37, 38) “Kontinyen rezonn byen dan tou keksoz.” (1 Pyer 1:13) En dimoun ki servi drog pa kapab konpletman annan kontrol lo son lespri e en kantite dimoun i menm vin adikt avek drog. Zot lespri i konsantre zis lo ganny sa drog e servi li, olye lo bann panse ankourazan.—Filipyen 4:8.
Obei bann lalwa gouvernman. “Obei bann gouvernman ek lotorite.” (Tit 3:1) Dan plizyer pei, i annan serten kalite drog ki lalwa i defann servi. Si nou anvi fer plezir Bondye, nou devret obei bann lotorite ki gouvernen.—Romen 13:1.

Ki lefe taba i annan lo ou lasante?

Lorganizasyon Mondyal pour Lasante i estimen ki tou le-z-an apepre sis milyon dimoun i mor akoz bann maladi ki relye avek servi taba. Sa i enkli plis ki 600,000 dimoun ki pa fimen me ki ganny afekte akoz zot respir lafimen sigaret. Annou vwar ki lefe taba i annan lo lasante bann ki servi li e lo bann otour zot ki pa fimen.

Kanser. Dan lafimen taba i annan plis ki 50 kemikal ki donn kanser. Encyclopædia Britannica i dir ki i paret ki lafimen taba “i lakoz pour 90 poursan bann ka kanser poumon.” Lafimen taba i kapab donn kanser dan lezot lorgann enkli labous, lezofaz, fosgorz, lagorz, larenks, lefwa, pankreas ek blad.

Bann maladi respiratwar. Lafimen taba i ogmant risk pour ganny bann maladi respiratwar tel parey lemoni ek lagrip. Bann zanfan ki regilyerman respir lafimen sigaret i pli vilnerab pour ganny asma, latou ki kronik, poumon ki pa byen devlope e ki pa fonksyonn byen.

Maladi leker. I annan plis risk pour bann fimer ganny en latak laservel oubyen devlop en maladi leker. Carbon monoxide ki dan lafimen taba i fasilman pase sorti dan poumon pour al dan disan e la i ranplas loksizenn. Avek mwens loksizenn dan disan, leker i bezwen travay plis pour anmenn loksizenn dan lekor.

Lefe lo lansentman. Bann madanm ki fimen ler zot ansent i ogmant risk pour zot pti baba ne avan son ler, ne avek en lapeze ba ouswa avek lezot defo tel parey bekdelyev (cleft lip) Sa bann pti baba i osi kapab devlop bann problenm respiratwar ouswa zot sibit.

a Dan sa lartik, fimen pe refer avek ler en dimoun i volonterman ris lafimen taba ki sorti dan sigaret, sigar, pip ouswa water pipe. Par kont, bann prensip ki nou pou koz lo la i osi aplik avek sik taba, ris lapoud taba par nennen, servi sigaret elektronik ki annan nikotin ladan ek lezot prodwi parey.