Zeova ti donn son bann lalwa

DE MWAN apre ki zot ti’n kit Lezip, bann Izraelit ti ariv lo Montanny Sinai, ki osi apel Oreb. Sa ti menm landrwa kot Zeova ti koz avek Moiz atraver sa brousay brile. Bann Izraelit ti’n vin la e zot ti pe reste en pe letan.

Anmenmtan ki bann dimoun ti pe espere anba, Moiz ti grenp montanny. Anler lo montanny, Zeova ti dir avek Moiz ki i anvi ki bann Izraelit i obeir Li e ki zot vin Son pep spesyal. Kan Moiz ti desann, i ti dir bann Izraelit ki Zeova ti’n dir. E bann dimoun ti dir ki zot pou obeir Zeova, akoz zot anvi vin son pep.

Apre sa Zeova ti fer en keksoz drol. I ti fer lafimen sorti dan bout montanny, e fer gro loraz. I ti osi koz avek bann dimoun: ‘Mwan Zeova zot Bondye ki’n retir zot Lezip.’ Apre i ti donn sa konmann: ‘Zot pa devret ador okenn lezot bondye eksepte mwan.’

Bondye ti donn bann Izraelit ankor nef komannman, oubyen lalwa. Bann dimoun ti vreman per. Zot ti dir avek Moiz: ‘Ou koz avek nou, akoz nou per ki si Bondye i koz avek nou, nou kapab mor.’

Plitar Zeova ti dir Moiz: ‘Mont kot mwan lo montanny. Mon pou donn ou de ros plat lo ki mon’n ekrir bann lalwa ki mon oule ki bann dimoun i obeir.’ Alor Moiz ti retourn ankor lo montanny. I ti reste lo montanny pour 40 zour ek 40 lannwit.

Bondye ti annan en kantite, en kantite lalwa pour son pep. Moiz ti ekrir sa bann lalwa. Bondye ti osi donn Moiz sa de ros plat. Lo sa de ros, Bondye limenm ti’n ekrir sa 10 lalwa ki i ti’n donn tou dimoun pli boner. Zot ganny apele konman Dis Komannman.

Sa Dis Komannman i bann lalwa enportan. Sa kantite lezot lalwa ki Bondye ti’n donn bann Izraelit ti osi enportan. Enn sa bann lalwa ti: ‘Ou devret kontan Zeova ou Bondye avek tou ou leker, tou ou lespri, tou ou nanm ek tou ou lafors.’ E en lot ti: ‘Ou devret kontan ou prosen parey ou menm.’ Garson Bondye, Zezi Kri, ti dir ki sa i sa de pli gran lalwa ki Zeova ti’n donn son pep Izrael. Plitar nou pou aprann en kantite keksoz konsernan Garson Bondye ek son bann lansennyman.