Prepar Diskour pour Kongregasyon

PROGRANM dan Lekol Minister Teokratik i ganny prepare pour benefisye kongregasyon an antye. Lenformasyon presye i osi ganny prezante dan lezot renyon kongregasyon osi byen dan bann diferan lasanble. Si ou ganny dezinyen pour partisip dan enn sa bann progranm, ou’n ganny en responsabilite enportan. Zapot Pol ti ankouraz sirveyan Kretyen Timote pour fer touzour byen atansyon avek son lansennyman. (1 Tim. 4:16) Sa bann ki asiste bann rasanbleman Kretyen in met dekote letan presye—e serten in fer bokou zefor—pour kapab la prezan pour resevwar lenstriksyon lo bann keksoz ki annan pour fer avek zot relasyon avek Bondye. I vreman en tre gran privilez pour prezant bann tel lenstriksyon! Konman ki ou kapab desarz byen sa privilez?

Sa laspe dan lekol i baze lo lektir Labib ki ganny progranmen pour sak semenn. Lanfaz i devret ganny mete lo konman ki sa lenformasyon i afekte nou ozordi. Parey i ganny raporte dan Neemya 8:8, Ezra ek son bann konpanyon ti lir Parol Bondye piblikman, eksplik li, ‘fer konnen ki i vedir,’ e transmet konpreansyon. Ou annan loportinite pour fer menm parey. Me sa i tou depan lo lafason ki ou prepar pwen Biblik enteresan.

Konman ou devret prepar en tel partisipasyon? Si i posib, lir sa porsyon Labib ki’n ganny dezinyen byen davans, omwen en semenn oubyen plis. Apre mazin ou kongregasyon ek son bann bezwen. Priy konsernan sa. Ki konsey, ki legzanp, ki prensip dan sa porsyon Parol Bondye ki satisfer sa bann bezwen?

Resers i esansyel. Eski Watchtower Library lo CD-ROM oubyen Index des publications de la Société Watch Tower i disponib dan en langaz ki ou konpran? Si wi, servi zot byen. Par fer resers lo sa ki’n ganny pibliye lo sa bann verse ki ou’n swazir pour konsantre lo la, ou kapab trouv bann lenformasyon siplemanter ki anmenn leklersisman, ki eksplik lakonplisman bann profesi, fer analiz lo sa ki serten verse i revele lo Zeova, oubyen egzaminasyon bann prensip. Pa esey kouver tro bokou pwen. Konsantre lo zis detrwa verse. I pli meyer pour kouver detrwa verse e fer li byen.

Ou partisipasyon i kapab osi enkli envit lodyans pour fer komanter lo konman ki zot in benefisye avek lektir Labib lasemenn. Ki zot in trouve ki pou benefisye zot dan letid personnel e an fanmiy, dan zot minister oubyen dan zot fason viv? Ki bann kalite Zeova ki ganny manifeste atraver son fason azir avek dimoun ek bann nasyon? Ki lodyans in aprann ki ranforsi zot lafwa e batir zot lapresyasyon pour Zeova? Pa pas tro bokou letan lo bann detay konplike. Met lanfaz lo valer pratik sa bann pwen ki ou’n swazir.

Sa i baze lo lenformasyon ki’n ganny pibliye tel parey en lartik dan Latour Veyer oubyen Réveillez-vous! oubyen posibleman en porsyon en liv. Dan laplipar ka i annan pli bokou lenformasyon ki ou kapab kouver dan letan dezinyen. Ki mannyer ou devret tret sa ekspoze? Konman en ansennyan, pa senpleman konman en dimoun ki pe kouver lenformasyon. En sirveyan i devret “kapab byen ansennyen.”—1 Tim. 3:2.

Konmans ou preparasyon par etidye sa lenformasyon ki’n ganny dezinyen. Get bann verse. Medite. Esey fer sa byen boner avan dat ou ekspoze. Kit antet ki bann frer ek ser in ganny ankouraze pour lir davans sa lartik oubyen porsyon ki sa ekspoze i baze lo la. Ou lobzektif se, pa pour senpleman reviz sa lenformasyon oubyen pour fer en rezimen, me pour montre konman pour aplik li. Servi bann porsyon apropriye dan sa lenformasyon dan en fason ki kongregasyon pou vreman benefisye.

Zis parey ki sak zanfan i annan son prop personnalite, sak kongregasyon i annan son prop karakteristik. En paran ki ansenny dan en fason efektiv i pa senpleman resit bann lalwa moral avek son zanfan. I fer sa zanfan reflesir. I pran an konsiderasyon personnalite sa zanfan ek problenm ki sa zanfan pe fer fas avek. Demenm, bann ansennyan dan en kongregasyon i esey fer bokou zefor pour konpran e adres bann bezwen sa lodyans ki i pe koz avek. Sepandan, en ansennyan ki annan disernman pou evite servi bann legzanp ki kapab anbaras en dimoun dan lodyans. I pou mansyonn bann byenfe ki nou pe deza eksperyanse akoz nou pe viv dapre fason Zeova e pou fer resorti konsey Biblik ki pou ed kongregasyon reisi fer fas avek bann problenm ki zot rankontre.

En bon lansennyman i tous leker lodyans. Pour kapab fer sa, i bezwen pa zis mansyonn bann fe, me osi batir lapresyasyon pour ki sa bann keksoz i reprezante. I demann en lentere senser pour sa bann ki pe ganny enstri. Bann berze spirityel i devret konn troupo. Si avek lanmour zot gard antet bann problenm ki plizyer pe fer fas avek, zot pou kapab koz dan en fason ankourazan, montre konpreansyon, konpasyon, ek senpati.

Parey bann ansennyan efikas i konnen, en diskour i devret annan en lobzektif ki kler e defini. Lenformasyon i devret ganny prezante dan en serten fason ki bann pwen kle i evidan e ki lodyans pa oubliy zot. Sa lodyans i devret rapel bann lide pratik ki pou afekte zot lavi.

Ler ou pe donn en diskour ki baze lo en lartik dan Nou Minister Rwayonm, sa defi i kapab en pti pe diferan. Souvan ou pou vwar ki ou ganny demande pour transmet avek lodyans tou sa ki’n ganny fourni, me pa pour swazir sa ki pli apropriye. Ed lodyans pour rezonn lo bann verse ki konstitye baz pour nenport konsey ki ganny donnen. (Tit 1:9) Vi ki letan i limite, alor laplipar-di-tan napa letan pour lenformasyon adisyonnel.

Lo lot kote, ou kapab ganny envite pour fer en prezantasyon ki pa baze lo okenn lartik dan Nou Minister Rwayonm. Referans i kapab ganny fer avek en lartik Latour Veyer, oubyen sa prezantasyon i kapab baze selman lo detrwa not an bref. Konman en ansennyan, i depan lo ou pour konsider bann bezwen kongregasyon an relasyon avek sa lenformasyon ki’n ganny dezinyen. Ou kapab vwar li itil pour servi en ilistrasyon ki bref e presi oubyen rakont en leksperyans ki adapte. Mazinen ki ou ekspoze i pa senpleman pour koz lo sa topik, me pour prezant li dan en tel fason ki ed kongregasyon akonpli sa travay ki’n ganny mansyonnen dan Parol Bondye e trouv lazwa pour fer li.—Akt 20:20, 21.

Anmezir ki ou prepar ou partisipasyon, reflesir lo sirkonstans sa bann ki dan ou kongregasyon. Felisit zot pour sa ki zot pe deza fer. Konman ki zot kapab ogmant zot lefikasite ek zot lazwa dan predikasyon ler zot aplik bann sizesyon ki’n ganny donnen dan sa lenformasyon dezinyen?

Eski ou partisipasyon i enkli en demonstrasyon oubyen en entervyou? Si wi, i devret ganny organize byen davans. I kapab paret pli fasil pour senpleman demann en dimoun pour fer laranzman pour sa, me i pa toultan prodwir bann meyer rezilta. Otan ki i posib, repet sa demonstrasyon oubyen entervyou avan sa zour renyon. Fer sir ki sa porsyon dan ou ekspoze i ganny fer dan en fason ki vreman entansifye lenstriksyon ki pe ganny donnen.

Bann frer ki devlop bann bon kalite spirityel e ki vin bann orater piblik ek bann ansennyan efikas i kapab avek letan ganny demande pour partisip dan progranm en lasanble. Sa i vreman bann lokazyon spesyal pour ledikasyon teokratik. En tel devwar i kapab vin dan laform en maniskri, en plan, lenstriksyon pour en dram Biblik avek en laplikasyon modern, oubyen senpleman en paragraf lenstriksyon. Si ou privilezye pour partisip lo en tel progranm, etidye avek bokou latansyon lenformasyon ki ou’n gannyen. Travay lo la ziska ki ou byen sezi son valer.

Sa bann ki ganny dezinyen en diskour maniskri i devret lir sa lenformasyon mo pour mo. Zot pa ranplas bann mo oubyen re-aranz sa lenformasyon. Zot etidye li pour konpran klerman bann pwen prensipal e konman zot ganny devlope. Zot egzers lir li aotvwa ziska ki zot kapab prezant sa diskour avek lanfaz apropriye, lantouzyasm, douser ki adapte, santiman, senserite, ek konviksyon, osi byen volim ek nivo lavwa ki apropriye pour en gran lodyans.

Bann frer ki ganny dezinyen en diskour apartir en plan i responsab pour devlop zot lenformasyon dan en mannyer ki swiv byen pros sa plan. Olye lir apartir sa plan pandan sa diskour oubyen prepar son prop maniskri, sa orater i devret prezant sa lenformasyon dan en fason enprovize, koz sa ki dan son leker. I enportan pour respekte lafason ki letan in ganny distribye lo sa plan pour prezant klerman sak pwen prensipal. Sa orater i devret servi byen bann panse ek verse ki’n ganny ekrir anba sa bann pwen prensipal. I pa devret anmenn bann pwen adisyonnel ki li i prefere e ki obliz li retir sa ki’n ganny fourni dan sa plan. Byensir, se Parol Bondye ki baz pour lenstriksyon. Responsabilite bann ansyen se pour “anons Laparol.” (2 Tim. 4:1, 2) Alor sa orater i devret port latansyon spesyal lo bann verse dan sa plan—rezonn apartir sa bann verse e fer laplikasyon.

Eski ou servi dan en kongregasyon kot i annan bokou loportinite pour koze? Konman ki ou kapab donn otan latansyon avek sak sa bann partisipasyon? Evite prepar ou partisipasyon lo dernyen minit.

I demann sifizaman refleksyon byen davans afen ki kongregasyon i vreman benefisye atraver bann diskour. An konsekans, devlop labitid pour lir sa lenformasyon osito ki ou resevwar okenn partisipasyon. Sa pou permet ou pour reflesir lo la anmezir ki ou fer lezot aktivite. Pandan bann zour oubyen semenn avan ki ou donn ou diskour, ou kapab antann bann komanter ki ed ou vwar konman pour pli byen aplik sa lenformasyon. Bann sitiasyon i kapab arive ki revele ki sa lenformasyon i byen apropriye pour sa letan. I pran letan pour lir e reflesir lo partisipasyon toudswit apre ki ou’n ganny zot, me ou pa’n gaspiy ou letan. Akoz ler i ariv moman pour ou asize e devlop sa plan ou pou rekolte bann benefis atraver refleksyon ki ou’n fer lo la byen davans. Prepar ou bann prezantasyon dan sa fason pou redwir bokou presyon e pou ed ou prezant sa lenformasyon dan en mannyer ki pratik e ki tous leker sa bann ki dan kongregasyon.

Pli ou demontre ki ou apresye sa don ki’n ganny konfye avek ou an konneksyon avek progranm ledikasyon Zeova pour son pep, pli ou pou onor li e ou pou vin en benediksyon pour sa bann ki kontan li.—Iza. 54:13; Rom. 12:6-8.