Prepar Ekspoze Zelev pour Lekol

SAK fwa ki ou ganny demande pour fer en ekspoze dan lekol, la i en loportinite pour progrese. Konsyansyezman fer tou ou zefor, e ou menm e lezot dimoun pou ptit-a-pti vwar ou progre. (1 Tim. 4:15) Lekol pou ed ou devlop ou bann abilite pli plennman.

Ler ou mazin pour koz devan kongregasyon eski ou santi ou nerve? Sa i normal, menm si i fer enpe letan ki ou dan lekol. Sepandan, serten keksoz i kapab ed ou pour redwir ou nivo lenkyetid. Kot ou lakour, fer li en labitid pour lir souvan aotvwa. Dan bann renyon kongregasyon, fer komanter souvan, e si ou en proklanmater, partisip regilyerman dan predikasyon. Sa pou donn ou leksperyans pour koz devan lezot. Deplis, prepar ou ekspoze byen davans, e egzers sa ekspoze aotvwa. Mazinen ki ou pou koz devan en lodyans ki zantiy. Avan fer okenn ekspoze, priy Zeova. I tre kontan pour donn son lespri sen avek son bann serviter ki demann li.—Lik 11:13; Fili. 4:6, 7.

Fodre ou rezonnab dan sa ki ou ekspekte avek ou lekor. I pran letan pour ganny leksperyans konman en orater e pour vin en ansennyan efikas. (Mik. 6:8) Si ou nouvo dan lekol, pa ekspekte pour prezant en ekspoze parfe toudswit. Plito, travay lo zis en pwen alafwa. Etidye sa seksyon dan sa liv ki diskit lo sa pwen. Si i posib, fer sa legzersis ki ganny sizere. Sa pou donn ou leksperyans konsernan bann keksoz ki asosye avek sa pwen avan ki ou prezant ou ekspoze dan kongregasyon. Progre pou vini.

Preparasyon pour lektir piblik i enplik plis ki senpleman kapab dir bann mo ki dan sa seksyon ki ou’n gannyen pour lir. Esey ganny en konpreansyon kler lo sinifikasyon sa lenformasyon. Osito ki ou ganny demande pour fer en lektir, lir li avek sa lobzektif antet. Esey byen konpran sak fraz ek lide ki ganny devlope dan sak paragraf afen ki ou pou kapab transmet sa bann panse korekteman e avek santiman apropriye. Kot i posib, get bann mo ki ou pa familye avek dan en diksyonner pour kapab pronons zot byen oubyen demann en dimoun ki konn byen sa langaz. Fer ki ou arive konn sa lenformasyon byen. Bann paran i devret ed zot zanfan pour fer sa.

Eski ou’n ganny dezinyen pour lir en porsyon Labib oubyen petet bann paragraf dan en lartik Latour Veyer? Si sa lenformasyon i disponib lo kaset dan ou langaz, i kapab vreman itil pour ekout lektir e port latansyon lo bann keksoz parey prononsyasyon, fason lir fraz, kote lanfaz i ganny mete, ek ton lavwa. Apre esey enkli sa bann kalite dan ou prop lektir.

Ler ou konmans travay lo ou ekspoze, fer sir pour etidye byen sa leson ki diskit sa pwen ki ou’n gannyen pour travay lo la. Si i posib, repas lo sa pwen apre ki ou’n fini lir plizyer fwa aotvwa sa porsyon ki ou’n gannyen pour lir. Esey fer bokou zefor pour aplik sa konsey dan sa leson otan ki posib.

Sa formasyon pou byen servi ou dan ou minister. Sak fwa ki ou al dan predikasyon, ou kapab ganny bokou loportinite pour lir avek lezot. Vi ki Parol Bondye i annan pwisans pour sanz lavi dimoun, i enportan ki ou lir li byen. (Ebr. 4:12) Pa ekspekte ki avek enn oubyen de lektir devan kongregasyon ou pou fer byen dan tou laspe ki enplike dan en lektir ki efikas. Avek en ansyen ki ti’n deza annan bokou lannen leksperyans, zapot Pol ti ekrir: “Pas ou letan dan lektir parol Bondye an piblik.”—1 Tim. 4:13.

Ler ou resevwar en ekspoze dan lekol ki enplik travay avek en senn, konman ki ou devret fer?

I annan trwa keksoz prensipal ki merit konsiderasyon: (1) topik ki ou’n gannyen, (2) ou senn ek sa dimoun ki ou pou koz avek, ek (3) pwen ki ou’n gannyen pour travay lo la.

Ou bezwen rasanble lenformasyon dapre topik ki ou’n gannyen. Me avan ki ou al pli lwen ladan, reflesir seryezman lo ou senn osi byen sa dimoun ki ou pou koz avek, akoz sa de fakter pou afekte kalite lenformasyon ki ou pou diskite e osi lafason ki ou pou prezant li. Ki senn ki ou pou servi? Eski ou pe al demontre konman pour prezant bon nouvel avek en dimoun ki ou konnen? Oubyen eski ou pou montre ki kapab arive ler nou rankontre en dimoun pour premye fwa? Eski sa dimoun i pli aze ki ou oubyen i pli zenn? Konsernan sa topik ki ou deside diskite, ki latitid sa dimoun i kapab annan lo sa topik? Ki kantite ou krwar i deza konnen lo sa topik? Ki lobzektif ki ou ekspekte akonpli atraver sa diskisyon? Larepons pour sa bann kestyon pou fourni bann gidans enportan pour ou travay avek.

Kote ki ou pou trouv lenformasyon lo topik ki ou’n gannyen? Lo paz 33 ziska 38 sa liv, i annan en diskisyon lo “Konman fer Resers.” Lir li, e apre servi sa bann zouti resers ki dan ou dispozisyon. Dan laplipar ka ou pou vitman trouv bokou plis lenformasyon ki ou kapab vreman servi. Lir otan lenformasyon pour konn posibilite ki disponib pour ou tret sa ekspoze. Sepandan, anmezir ki ou fer sa, gard antet sa senn ki ou pe al servi pour ou prezantasyon osi byen sa dimoun ki ou pou koz avek. Not bann pwen ki apropriye pour servi.

Avan ki ou organiz ou prezantasyon e fer seleksyon bann detay final, pran letan pour lir leksplikasyon lo sa pwen ki ou’n gannyen. Laplikasyon sa pwen i enn bann rezon prensipal pour ou partisipasyon.

Par prezant lenformasyon dan letan ki’n ganny dezinyen, ou pou annan satisfaksyon pour prezant ou konklizyon, vi ki en sinyal pou endik ler ki letan dezinyen i fini. Parkont, i pa toultan neseser vey byen letan dan predikasyon. Alor, anmezir ki ou prepare, pran an konsiderasyon lakantite letan ki disponib, me kit lanfaz lo en lansennyman efikas.

Detrwa Konsey konsernan Senn. Egzamin bann sizesyon lo paz 82, e swazir enn ki ti a kapab ganny servi dan ou minister e ki pou permet ou servi bann lenformasyon ki’n ganny dezinyen dan en fason realis. Si ou dan lekol pour enpe letan, vwar sa konman en loportinite pour progrese e devlop ankor plis ou bann abilite dan ou minister.

Si sirveyan Lekol Minister Teokratik i donn ou en senn, aksepte sa defi. Laplipar senn i enplik rann temwannyaz. Si ou pa’n zanmen rann temwannyaz dan bann sirkonstans ki ganny dekrir, koz avek lezot proklanmater ki’n deza fer li pour ou ganny bann lide. Si i posib, esey diskit topik ki ou’n gannyen dan en senn ki konparab avek sa enn ki ou pou servi dan lekol. Sa pou ed ou akonpli en lobzektif enportan dan ou formasyon.

Si ou en frer, ou kapab ganny dezinyen pour prezant en diskour bref avek kongregasyon. Dan preparasyon sa bann diskour, bann pwen debaz ki bezwen ganny konsidere i parey avek sa bann ki’n deza ganny mansyonnen pli boner pour en ekspoze ki ganny prezante parey en demonstrasyon. Bann diferans prensipal se lodyans ek fason prezante.

Laplipar-di-tan i vo lapenn pour prepar ou lenformasyon afen ki tou dimoun dan lodyans i santi li konsernen. Laplipar dimoun ki prezan i deza konn bann laverite debaz lo Labib. I kapab ki zot byen familye avek sa topik ki ou’n gannyen pour koz lo la. Pran an konsiderasyon sa ki zot deza konnen lo ou topik. Esey fer bokou zefor pour ki zot benefisye dan en serten fason par ou prezantasyon. Demann ou lekor: ‘Konman ki mon kapab servi sa topik pour ogmant mon lapresyasyon e osi lapresyasyon mon lodyans lo personnalite Zeova? Ki i annan dan sa lenformasyon ki pou ed nou rekonnet lavolonte Bondye? Konman sa lenformasyon i kapab ed nou fer bann bon desizyon dan sa monn ki pe ganny dominen par bann dezir laser?’ (Efe. 2:3) Nou bezwen fer resers pour donn bann larepons satisfezan pour sa bann kestyon. Ler ou pe servi Labib, esey fer bokou zefor pour pa zis lir bann verse. Rezonn lo bann verse ki ou servi, e montre konman ki sa i fourni baz pour tir konklizyon. (Akt 17:2, 3) Pa esey kouver tro bokou. Prezant ou lenformasyon dan en tel fason ki pou fer li fasil pour mazinen.

Preparasyon i devret osi enkli port latansyon avek lafason ki ou pou prezant sa diskour. Pa redwir son lenportans. Egzers prezant ou diskour aotvwa. Zefor ki ou mete pour etidye e aplik bann konsey lo diferan pwen pou kontribye bokou dan ou progre. Ki swa ou en nouvo orater oubyen enn ki eksperyanse, prepar byen afen ki ou kapab koz avek konviksyon ek santiman ki apropriye avek ou lenformasyon. Sak fwa ki ou prezant en ekspoze dan lekol, gard antet ki ou lobzektif se pour servi ou don koze ki Zeova Bondye in donnen pour onor Li.—Pson. 150:6.