Nouvo lemonn Bondye pe esper ou!

BONDYE ti met Adan ek Ev dan zarden Edenn. Kantmenm zot ti dezobei li e mor, Bondye in donn zot bann zanfan, enkli nou ozordi, en sans pour viv pour touzour dan Paradi. Labib i promet: “Bann dimoun drwat pou posed later, e zot pou reste lo la pour touzour.”​—Psonm 37:29.

Labib i koz lo en “nouvo lesyel” ek en “nouvo later.” (Izai 65:17; 2 Pyer 3:13) Sa “lesyel” ki egziste ozordi i bann gouvernman imen. Me Zezi Kri ek bann ki diriz ansanm avek li dan lesyel pou form sa “nouvo lesyel.” Zot pou form en gouvernman drwat ki pou anmenn lape. Pa i pou gou ler gouvernman Bondye pou diriz later antye!

Be ki sa “nouvo later”?— Sa nouvo later pou bann bon dimoun ki kontan Zeova. Parfwa ler Labib i koz lo “later,” i pe koz lo bann dimoun ki viv lo later, pa lo plannet later li menm. (Zenez 11:1; Psonm 66:4; 96:1) Alors bann dimoun ki pou form parti sa nouvo later pou viv lanmenm lo sa later.

Sa lemonn avek tou son bann move dimoun pou nepli la. Pa bliye dan letan Noe, Deliz ti balye sa lemonn avek tou son move dimoun. E parey nou’n aprann, sa move lemonn ozordi pou ganny detrir zour Armagedon. Aprezan annou vwar ki mannyer lavi pou ete dan nouvo lemonn Bondye apre Armagedon.

Eski ou anvi viv pour touzour dan nouvo lemonn Bondye, kot lape pou egziste?— Napa okenn dokter ki kapab fer nou viv pour touzour. Napa okenn pilil ki kapab anpes nou mor. Sel fason pour nou viv pour touzour i par apros avek Bondye. E sa Gran Ansennyan i dir nou ki mannyer nou kapab fer sa.

Dan Zan sapit 17, verse 3 (NW), sa Gran Ansennyan i dir: “Savedir, pour ganny lavi eternel zot bezwen aprann konn ou konman sel vre Bondye ek sa enn ki ou’n anvoye, Zezi Kri.”

Alors ki Zezi ti dir nou bezwen fer pour viv pour touzour?— Premyerman, nou bezwen aprann konn nou Papa Zeova dan lesyel, e osi son Garson, ki’n donn son lavi pour nou. Savedir nou bezwen etidye Labib. Sa liv, Ekout sa Gran Ansennyan, i ed nou fer sa.

Be ki mannyer ler nou aprann konn Zeova i ed nou pour viv pour touzour?— Zis parey nou bezwen manze toulezour, nou bezwen aprann konn Zeova toulezour. Labib i dir: “Zonm pa viv zis lo dipen tousel me lo tou parol ki sorti dan labous Bondye.”​—Matye 4:4.

Nou bezwen osi aprann konn Zezi Kri akoz Bondye in anvoy son Garson pour efas nou pese. Labib i dir: “Zis limenm ki kapab sov zot.” I osi dir: “Tou dimoun ki krwar dan son Garson i ganny lavi eternel.” (Akt 4:12; Zan 3:36) Be eski nou vreman krwar dan Zezi? Eski nou vreman krwar nou pa kapab viv pour touzour san li?— Si nou krwar sa, nou pou kontinyen ekout sa Gran Ansennyan toulezour, e nou pou fer sa ki i dir nou.

En bon fason pour nou ekout sa Gran Ansennyan i par lir sa liv e relir li plizyer fwa. Get bann portre e reflesir lo la. Gete si ou kapab reponn bann kestyon ki al avek portre. Lir sa liv osi avek manmi ek dadi. Si zot pa avek ou, lir li ansanm avek lezot gran dimoun oubyen lezot zanfan. Pa i pou gou si ou kapab ed lezot aprann avek sa Gran Ansennyan ki zot bezwen fer pour viv pour touzour dan nouvo lemonn Bondye?—

Labib i dir nou: “Lemonn pou disparet.” Me apre Labib i eksplike ki mannyer nou kapab viv pour touzour dan nouvo lemonn Bondye. I dir: ‘Sa ki fer sa ki Bondye i anvi i reste eternelman.’ (1 Zan 2:17) Alors, ki mannyer nou kapab viv pour touzour dan nouvo lemonn Bondye?— Par aprann konn Zeova ek son Garson ki i byen kontan, Zezi. Me nou osi bezwen fer oubyen pratik sa ki nou aprann. Fotespere ou letid dan sa liv i ed ou fer sa.