I ti annan “en kantite deba”

1-3. (a) Kwa ki pros pour diviz sa kongregasyon Kretyen dan premye syek? (b) Ki mannyer nou kapab benefisye ler nou etidye sa resi dan liv Akt?

POL ek Barnabas i dan lazwa. Zot fek ariv Antyos, Siri e zot sorti lo zot premye vwayaz misyonner. Zot dan lazwa akoz Zeova in “ouver laport pour ki bann dimoun lezot nasyon i aksepte lafwa.” (Akt 14:26, 27) An plis ki sa, sa bon nouvel pe ganny prese partou Antyos e “en kantite dimoun” lezot nasyon pe vin dan sa kongregasyon laba.​—Akt 11:20-26.

² Sa nouvel konsernan sa lakantite frer ek ser ki pe ogmante pa tarde pour ariv Zide. Me pa tou dimoun ki dan lazwa akoz sa nouvel, parski sa i lev en deba konsernan sirkonsizyon e zot bezwen fer en desizyon konsernan sa problenm. Ki mannyer bann disip ki Zwif ek bann disip ki pa Zwif i devret tret kanmarad e ki mannyer bann disip ki pa Zwif i devret konsider Lalwa Moiz? Sa problenm i fer annan bann deba ki vreman serye e ki pros pour diviz sa kongregasyon Kretyen dan diferan group. Ki mannyer sa problenm pou ganny rezourd?

³ Anmezir ki nou vwar sa resi dan liv Akt, nou pou aprann en kantite leson enportan. Sa pou ed nou fer bann desizyon ki saz si i ariv okenn problenm ki kapab fer divizyon.

 4. Ki move fason panse serten disip ti annan e ki kestyon nou kapab demande?

⁴ Disip Lik ti ekri: “Serten zonm sorti Zide ti desann Antyos e zot ti konmans ansenny bann frer: ‘Si zot pa ganny sirkonsi dapre Lalwa Moiz, zot pa pou kapab ganny sove.’” (Akt 15:1) Labib pa dir si sa bann “zonm sorti Zide” ti bann Farizyen avan ki zot ti konverti pour vin bann Kretyen. Me kantmenm sa, i paret ki zot ti’n ganny enfliyanse par fason panse bann Farizyen ki ti konsantre lo tou pti detay ki ti annan dan Lalwa. I kapab ki zot ti osi dir ki zot ti pe koz pour bann zapot ek bann ansyen Zerizalenm me sa pa ti vre. (Akt 15:23, 24) I fer apepre 13 an depi ki Bondye ti’n dir zapot Pyer ki bann dimoun lezot nasyon pa bezwen sirkonsi pour vin dan kongregasyon Kretyen, me kantmenm sa, bann disip ki Zwif ti ankor pe dir ki zot bezwen sirkonsi. Akoz zot ti pe kontinyen dir sa?a​—Akt 10:24-29, 44-48.

5, 6. (a) Akoz serten Kretyen Zwif ti kontinyen krwar ki sirkonsizyon i neseser? (b) Eski lalyans sirkonsizyon ti form parti sa lalyans ki Zeova ti fer avek Abraam? Eksplike. (Vwar not.)

⁵ I ti kapab annan plizyer rezon. En rezon, i akoz Zeova ki ti demande pour sirkonsi bann garson ek zonm e sa ti montre ki zot annan en bon lanmitye avek li. Avan ki Zeova ti fer lalyans Lalwa, i ti demann Abraam ek lezot zonm dan son lakour pour ganny sirkonsi. Pli tar, sirkonsizyon ti form parti lalyans Lalwa.b (Lev. 12:2, 3) Dan Lalwa Moiz, menm bann etranze ti bezwen ganny sirkonsi avan ki zot ti kapab fer serten keksoz, par egzanp manz repa Lapak. (Egz. 12:43, 44, 48, 49) San dout, bann Zwif ti krwar ki bann zonm ki pa ti’n sirkonsi ti enpir e degoutan.​—Iza. 52:1.

⁶ Alor, bann disip ki Zwif ti bezwen annan lafwa ek limilite pour aksepte sa nouvo lansennyman. I ti annan en nouvo lalyans ki ti ranplas sa lalyans Lalwa. Alor, en dimoun pa ti otomatikman form parti pep Bondye zis akoz i ti’n ne konman en Zwif. Bann Kretyen Zwif ki ti pe reste dan bann kominote Zwif parey bann disip dan Zide ti bezwen annan kouraz pour zot fer konnen ki zot in aksepte Kris e pour aksepte bann dimoun lezot nasyon ki pa ti’n sirkonsi konman bann disip.​—Zer. 31:31-33; Lik 22:20.

 7. Ki laverite bann “zonm sorti Zide” pa ti’n konpran?

⁷ Byensir, bann standar Bondye pa’n sanze. Nou vwar sa akoz dan sa nouvo lalyans i annan bann menm prensip ki ti annan dan Lalwa Moiz. (Mat. 22:36-40) Par egzanp, pli tar Pol ti ekri sa konsernan sirkonsizyon: “Se sa ki dan leker ki fer en dimoun vin en vre Zwif e vre sirkonsizyon i sirkonsizyon leker par lespri sen e non pa par bann lalwa an ekri.” (Rom. 2:29; Det. 10:16) Sa bann “zonm sorti Zide” pa ti’n konpran sa bann laverite, zot ti ensiste ki Bondye pa’n zanmen aboli sa lalwa lo sirkonsizyon. Eski zot ti pou sanz zot fason panse?

 8. Akoz zot ti anmenn sa problenm konsernan sirkonsizyon Zerizalenm kot konsey direkter?

⁸ Apre, Lik ti dir: “Apre en kantite deba ek diskisyon ant Pol ek Barnabas ek sa bann dimoun [bann “zonm sorti Zide”], laranzman ti ganny fer pour ki Pol, Barnabas ek detrwa lezot frer i mont Zerizalenm kot bann zapot ek ansyen pour diskit sa zafer.”c (Akt 15:2) Sa “deba ek diskisyon” ti montre ki sa de group dimoun ti krwar ki sa ki zot ti pe dir ti vre e kongregasyon Antyos pa ti kapab rezourd sa problenm. Pour gard lape ek linite dan kongregasyon, zot ti deside pour anmenn sa problenm “Zerizalenm kot bann zapot ek ansyen” ki ti konsey direkter. Ki nou kapab aprann avek bann ansyen Antyos?

9, 10. Ki mannyer bann frer Antyos, Pol ek Barnabas in kit en bon legzanp pour nou ozordi?

⁹ En leson enportan ki nou aprann, i ki nou bezwen annan konfyans dan lorganizasyon Bondye. Reflesir lo sa: Bann frer Antyos ti konnen ki lo konsey direkter i ti annan zis bann Zwif. Me pourtan, zot ti annan konfyans ki sa group zonm ti pou servi Lekritir pour rezourd sa problenm lo sirkonsizyon. Akoz? Sa kongregasyon ti annan konfyans ki Zeova ti pou servi son lespri sen ek Zezi ki Sef kongregasyon Kretyen pour rezourd sa problenm. (Mat. 28:18, 20; Efe. 1:22, 23) Ozordi, ler i annan bann gro problenm, annou swiv bon legzanp bann disip Antyos par annan konfyans dan lorganizasyon Bondye e dan bann Kretyen swazir ki lo Konsey Direkter.

¹⁰ Nou osi aprann ki i enportan pour annan limilite ek pasyans. Menm si Pol ek Barnabas ti’n ganny apwente par lespri sen pour al kot bann lezot nasyon, zot pa ti santi ki zot ti annan sa drwa pour rezourd sa problenm konsernan sirkonsizyon dan sa sirkonstans. (Akt 13:2, 3) An plis ki sa, pli tar Pol ti ekri: “Se Senyer ki ti dir mwan retourn laba [Zerizalenm],” sa i montre ki Bondye ki ti pe gid li. (Gal. 2:2) Ozordi, bann ansyen i fer zefor pour annan sa menm limilite ek pasyans si i ariv okenn problenm ki kapab fer divizyon. Dan plas esey defann zot prop pwennvi, zot rod led Zeova par servi Labib e swiv bann lenstriksyon ek gidans sorti kot lesklav fidel.​—Fili. 2:2, 3.

11, 12. Akoz i enportan pour esper Zeova?

¹¹ Parfwa, nou bezwen esper Zeova pour ed nou pli byen konpran en keksoz. Pa oubliye ki bann frer dan letan Pol ti bezwen esper ziska apepre lannen 49, setadir apepre 13 an apre ki Korney ti’n ganny apwente par lespri sen lannen 36, avan ki Zeova i rezourd sa problenm konsernan si bann dimoun lezot nasyon i devret ganny sirkonsi. Akoz i ti pran tou sa letan? Petet Bondye ti anvi donn bann Zwif ki ti senser ase letan pour zot sanz zot fason panse. Apre tou, sa lalyans sirkonsizyon ti’n ganny fer avek zot zanset Abraam 1,900 an pase e la sa lalyans ti pe ganny aboli, sa ti serye!​—Zan 16:12.

¹² I en privilez pour nou ganny ansennyen e formen par nou Papa ki dan lesyel ki annan pasyans ek labonte! Ler i fer sa i toultan pour nou prop byenfe. (Iza. 48:17, 18; 64:8) Alor, annou pa zanmen ensiste ki nou nide i pli bon oubyen pa aksepte bann sanzman ki lorganizasyon Zeova i fer oubyen pa aksepte bann sanzman dan lafason ki nou konpran serten verse. (Ekle. 7:8) Si ou vwar ki ou annan sa tandans pour ensiste ki ou nide i pli bon, akoz ou pa priye e medit lo sa bann prensip ki annan dan liv Akt sapit 15?d

13. Ki mannyer nou kapab annan pasyans parey Zeova dan predikasyon?

¹³ Parfwa nou pou bezwen annan pasyans ler nou fer letid avek bann dimoun ki vwar li difisil pour zot aret krwar bann fo lansennyman oubyen pour aret fer bann keksoz ki Labib i dir i mal. Dan sa bann sityasyon, i kapab ki nou pou bezwen les en serten kantite letan ki rezonnab pase pour lespri sen Bondye travay dan leker sa etidyan. (1 Kor. 3:6, 7) Osi, nou bezwen priy lo sa sityasyon. Nou asire ki dan sa letan apropriye, Bondye pou ed nou konnen ki nou devret fer.​—1 Zan 5:14.

14, 15. Ki mannyer kongregasyon Antyos ti onor Pol, Barnabas ek lezot frer e ki mannyer zot ti ankouraz bann frer ek ser?

¹⁴ Apre, Lik ti dir: “Apre ki kongregasyon ti’n akonpanny zot lanmwatye semen, sa bann zonm ti kontiny zot vwayaz e travers Fenisi ek Samari. Laba zot ti rakont an detay lafason ki dimoun lezot nasyon ti pe konverti e sa ti fer tou bann frer kontan en kantite.” (Akt 15:3) Ler kongregasyon ti akonpanny Pol, Barnabas ek lezot frer lanmwatye semen, sa bann frer ek ser ti pe montre ki zot kontan zot e onor zot. Sa ti osi montre ki sa kongregasyon ti anvi ki Bondye i beni zot. Ankor enn fwa, pa sa bann frer Antyos in kit en bon legzanp pour nou! Eski ou onor ou bann frer ek ser dan kongregasyon, “sirtou sa bann [ansyen] ki travay dir pour ansenny e koz lo parol Bondye”?​—1 Tim. 5:17.

¹⁵ Ler zot ti pe vwayaze, zot ti rakont bann Kretyen Fenisi ek Samari “an detay” bann leksperyans ki zot ti’n gannyen ler zot ti pres avek bann dimoun lezot nasyon e sa ti ankouraz sa bann frer ek ser. Petet parmi bann dimoun ki ti pe ekoute ti annan bann disip ki Zwif ki ti’n sove dan lezot landrwa apre ki Etyenn ti’n ganny touye akoz son krwayans. Pareyman ozordi, ler bann frer ek ser i tann bann nouvel lo lafason ki Zeova pe beni sa travay predikasyon, sa i ankouraz zot, sirtou bann ki pe pas dan bann problenm. Eski ou ganny bann byenfe ler ou tann sa bann nouvel dan renyon, lasanble e ler ou lir bann leksperyans ek biografi dan nou bann piblikasyon ki swa i enprimen oubyen lo jw.org?

16. Kwa ki montre ki sirkonsizyon ti’n vin en gro problenm?

¹⁶ Apre ki zot ti’n vwayaz apepre 550 kilomet dan sid sorti Antyos, zot ti ariv Zerizalenm. Lik ti ekri: “Ler zot ti ariv Zerizalenm, kongregasyon ensi ki bann zapot ek ansyen ti byen resevwar zot e zot ti rakont sa kantite keksoz ki Bondye ti’n fer atraver zot.” (Akt 15:4) Par kont, “serten disip Zezi ki avan ti swiv lansennyman bann Farizyen ti leve kot zot ti pe asize e dir: ‘Fodre sirkonsi sa bann dimoun e donn zot lord pour obei Lalwa Moiz.’” (Akt 15:5) I kler ki sa problenm konsernan si bann Kretyen ki pa ti Zwif ti devret ganny sirkonsi ti’n vin en gro problenm e i ti bezwen ganny rezourd.

17. Lekel ki ti form parti konsey direkter Zerizalenm e akoz i ti osi enkli bann “ansyen”?

¹⁷ Proverb 13:10 i dir: “Lasazes i pour bann ki demann konsey.” Parey sa verse i dir, “bann zapot ek ansyen ti zwenn ansanm pour egzamin [sa problenm konsernan sirkonsizyon.]” (Akt 15:6) “Bann zapot ek ansyen” ti reprezant tou kongregasyon Kretyen, zis parey Konsey Direkter i fer ozordi. Akoz bann “ansyen” ti pe travay ansanm avek bann zapot? Pa oubliye ki zapot Zak ti’n ganny touye e zapot Pyer ti’n ganny met dan prizon pour en pe letan. Eski sa bann menm keksoz ti kapab arive avek lezot zapot osi? Alor bann zapot ti travay ansanm avek sa bann ansyen ki ti’n ganny apwente par lespri sen, parski zot ti anvi fer sir ki i ti annan ase frer pour pran swen avek sa bann kongregasyon.

18, 19. Ki Pyer ti dir e ki sa bann dimoun ki ti pe ekout li ti devret konpran?

¹⁸ Lik ti osi dir: “Apre en gran diskisyon, Pyer ti leve e dir . . . : ‘Mon bann frer, zot konn tre byen ki byen boner, Bondye ti swazir mwan parmi zot pour ki dimoun lezot nasyon i tann sa bon nouvel e krwar. Bondye ki konn leker ti montre ki i ti dakor par donn zot lespri sen, parey i ti fer avek nou osi. I pa ti fer okenn diferans ant nou ek zot, me i ti pirifye zot leker akoz zot lafwa.’” (Akt 15:7-9) Dapre en referans, sa mo Grek ki’n ganny tradwir “gran diskisyon” dan verse 7 i osi vedir “fer resers; kestyonnen.” Aparaman, bann frer ti annan diferan lopinyon e zot pa ti ezite pour koze.

¹⁹ Pyer ti fer zot tou rapel ki li i ti la ler Korney ek bann dimoun ki ti reste kot li, setadir bann premye dimoun lezot nasyon ki pa ti’n sirkonsi, ti ganny apwente par lespri sen lannen 36. Alor, si Zeova ti’n aret fer diferans ant bann Zwif ek bann ki pa ti Zwif, akoz bann imen pou fer sa? An plis ki sa, en dimoun i bezwen annan lafwa dan Kris pour son leker ganny pirifye me pa akoz i swiv Lalwa Moiz.​—Gal. 2:16.

20. Ki mannyer bann dimoun ki ti pe ensiste ki sirkonsizyon ti neseser ti pe “teste Bondye”?

²⁰ Dapre sa ki parol Bondye ti’n dir e sa ki lespri sen ti’n fer, Pyer ti dir: “Aprezan akoz ki zot teste Bondye par enpoz sa fardo lo likou bann disip, en keksoz ki ni nou zanset, ni nou, nou pa’n kapab anmennen? Me nou nou annan lafwa ki nou pou ganny sove atraver labonte ekstraordiner Senyer Zezi dan menm fason ki sa bann dimoun lezot nasyon.” (Akt 15:10, 11) Anfet, bann ki ti pe ensiste ki sirkonsizyon ti neseser, ti pe “teste Bondye,” oubyen ‘teste pasyans Bondye,’ parey en lot tradiksyon Labib i dir. Zot ti pe esey fors bann dimoun lezot nasyon pour swiv en lalwa ki menm bann Zwif pa ti kapab obei konpletman e sa ti fer zot ganny kondannen pour ganny touye. (Gal. 3:10) O kontrer, bann Zwif ki ti pe ekout Pyer ti’n devret remersye Bondye pour demontre son labonte ekstraordiner atraver Zezi.

21. Ki Barnabas ek Pol ti koz lo la dan sa diskisyon?

²¹ I kler ki sa ki Pyer ti dir ti fer sa bann dimoun ki ti pe ekout li reflesir, parski “zot tou zot ti reste trankil.” Apre sa, Barnabas ek Pol ti rakont “sa kantite mirak ek keksoz merveye ki Bondye ti’n fer atraver zot parmi dimoun lezot nasyon.” (Akt 15:12) Finalman, bann zapot ek bann ansyen ti kapab egzamin tou bann levidans e fer en desizyon ki ti dapre lavolonte Bondye lo sa problenm konsernan sirkonsizyon.

22-24. (a) Ki mannyer Konsey Direkter ozordi i swiv legzanp konsey direkter dan premye syek? (b) Ki mannyer tou ansyen i kapab respekte lafason ki keksoz i ganny organize dan kongregasyon?

²² Ozordi osi, ler bann frer ki lo Konsey Direkter i zwenn ansanm, zot servi Labib pour rod gidans Bondye e zot fer lapriyer senser pour ganny lespri sen. (Ps. 119:105; Mat. 7:7-11) Pour zot kapab fer bann desizyon ki dapre lavolonte Bondye, sak frer lo Konsey Direkter i ganny en progranm davans pour zot reflesir lo la e priy lo la. (Prov. 15:28) Ler zot fer zot bann renyon, sa bann frer swazir pa ezite pour dir zot pwennvi me zot fer li avek respe. Zot servi Labib en kantite ler zot pe koze.

²³ Bann ansyen dan kongregasyon i devret swiv sa legzanp. Si apre ki bann ansyen in koz lo en sityasyon ki grav e zot pa’n kapab rezourd sa problenm, sa konsey ansyen i kapab rod led avek zot Biro Brans oubyen avek son bann reprezantan, parey sirveyan rezyonal. Si i neseser, Biro Brans i kapab ekri en let pour Konsey Direkter.

²⁴ Wi, Zeova i beni bann dimoun ki respekte lafason ki keksoz i ganny organize dan kongregasyon e ki demontre limilite, fidelite ek pasyans. Parey nou pou vwar dan sa lot sapit, si nou fer sa, Zeova pou rekonpans nou e i pou donn nou vre lape, nou pou progrese spirityelman e i pou annan linite dan kongregasyon.